.jpg)
ភ្ញៀវទេសចរចូលទស្សនាប្រាសាទអង្គរវត្ត នាពេលកន្លងមក។ ហេង ជីវ័ន
ភ្នំពេញៈ ក្រសួងទេសចរណ៍អះអាងថា កម្ពុជាជាប្រទេស ១ ក្នុងចំណោមប្រទេសមានសុវត្ថិភាពបំផុតក្នុងការមកទស្សនា ទោះបីពេលមានជំងឺកូវីដ ១៩ ក្ដី ស្របពេលការិយាល័យសេដ្ឋកិច្ចសេណេហ្គាល់ទើបផ្ដល់ចំណាត់ថ្នាក់ថ្មីឱ្យកម្ពុជាជាប់លេខ ១ ក្នុងការទប់ស្កាត់កូវីដ ១៩។
សេចក្ដីប្រកាសព័ត៌មានរបស់ក្រសួងទេសចរណ៍ពីថ្ងៃ ១២ មករា បានឱ្យដឹងថា កាលពីថ្ងៃទី ២០ ធ្នូ ឆ្នាំមុន ការិយាល័យសេដ្ឋកិច្ចសេណេហ្គាល់បានចុះផ្សាយថា «កម្ពុជាបានជាប់ចំណាត់ថ្នាក់លេខ ១ លើពិភពលោកក្នុងការប្រយុទ្ធប្រឆាំង និងការទប់ស្កាត់ការរាតត្បាតនៃជំងឺកូវីដ ១៩» ដែលមានពិន្ទុ ១/១ (១ ជាពិន្ទុខ្ពស់បំផុតនៃការធ្វើចំណាត់ថ្នាក់) ក្នុងចំណោម ១៦៦ ប្រទេសជុំវិញពិភពលោក បន្ទាប់មកគឺប្រទេសស៊ូដង់ខាងត្បូង និងប្រទេសប្រ៊ុយណេដែលបានពិន្ទុ ០,៩៩។
ក្រសួងបញ្ជាក់ថា៖ «ដោយមានការគ្រប់គ្រងយ៉ាងល្អ និងម៉ឺងម៉ាត់របស់រាជរដ្ឋាភិបាលកម្ពុជាក្នុងការប្រយុទ្ធប្រឆាំងជំងឺកូវីដ ១៩ ប្រទេសកម្ពុជា បានក្លាយជាប្រទេស ១ ក្នុងចំណោមប្រទេសដែលមានសុវត្ថិភាពបំផុតក្នុងការមកទស្សនា ទោះបីក្នុងអំឡុងពេលនៃការឆ្លងរាលដាលជំងឺកូវីដ ១៩»។
សេចក្ដីប្រកាសនេះក៏បានរំឭកដែរថា កាលពីខែវិច្ឆិកា ឆ្នាំមុន ការិយាល័យសេដ្ឋកិច្ចសេណេហ្គាល់ក៏បានចុះផ្សាយពីចំណាត់ថ្នាក់ប្រទេសដែលគ្រប់គ្រងកូវីដ ១៩ បានល្អបំផុតនៅលើពិភពលោកម្ដងដែរ។ ប៉ុន្ដែកាលនោះកម្ពុជាជាប់លេខ ៣ បន្ទាប់ពី Saint Kitts និង Nevis ដែលជារដ្ឋតូចនៃតំបន់ការ៉ាអ៊ីប និងស៊ីស្សល។
ក្រសួងទេសចរណ៍បញ្ជាក់ថា «ចំណាត់ថ្នាក់នេះជាមោទនភាពជាតិមួយផ្សេងទៀតរបស់ប្រទេសកម្ពុជា និងជាឱកាសដ៏ល្អក្នុងការផ្សព្វផ្សាយ «កម្ពុជាព្រះរាជាណាចក្រអច្ឆរិយផ្តល់ភាពកក់ក្ដៅ» ជូនភ្ញៀវទេសចរជាតិ និងអន្តរជាតិនៅគ្រប់កាលៈទេសៈទាំងអស់»។
ជាមួយគ្នានេះ ក្រសួងទេសចរណ៍បានស្នើគ្រប់ភាគី ស្ថាប័នពាក់ព័ន្ធ ប្រតិបត្តិករទេសចរណ៍ដៃគូអភិវឌ្ឍន៍ សាធារណជន និងប្រព័ន្ធផ្សព្វផ្សាយជាតិអន្តរជាតិក្នុងការផ្សព្វផ្សាយដំណឹងដ៏រីករាយនេះដល់ដៃគូពាក់ព័ន្ធទេសចរជាតិ អន្តរជាតិ ជុំវិញពិភពលោកថា «កម្ពុជាជាប្រទេសមួយក្នុងចំណោមប្រទេសដែលមានសុវត្ថិភាពបំផុតក្នុងការមកទស្សនាក្នុងអំឡុងពេលរីករាលដាលនៃជំងឺកូវីដ ១៩»។
លោកស្រី ខៃ ចិន្តា ប្រធានសមាគមសណ្ឋាគារកម្ពុជាសាទរចំពោះការទទួលបានចំណាត់ថ្នាក់របស់កម្ពុជានេះដែលអាចទាក់ទាញភ្ញៀវទេសចរពីបរទេសមកកម្សាន្តនៅកម្ពុជា។
លោកស្រីថ្លែងថា៖ «ប្រទេសយើងទទួលបានចំណាត់ថ្នាក់ល្អហើយ ប៉ុន្ដែយើងក៏អាស្រ័យលើប្រទេសខាងក្រៅដែរ បើប្រទេសខាងក្រៅចូលរួមទប់ស្កាត់ជំងឺកូវីដបានល្អជាងមុននោះលំហូរភ្ញៀវទេសចរក៏កើនឡើងវិញដែរ»។
បើតាមលោកស្រី ចិន្តា កាលពីម្សិលមិញលោកស្រីបានដឹកនាំកិច្ចប្រជុំជាមួយសមាជិកសមាគមសណ្ឋាគារនៅកម្ពុជាជាង ១០០ នៅរាជធានីភ្នំពេញ ដើម្បីស្វែងរកដំណោះស្រាយនានាក្នុងការបង្កើតយន្តការទាក់ទាញភ្ញៀវទេសចរឱ្យមកកម្សាន្តនៅកម្ពុជា ខណៈឆ្នាំមុន វិស័យទេសចរណ៍ធ្លាក់ចុះខ្លាំង ជាពិសេសផ្នែកសណ្ឋាគារ។
លោកស្រីថ្លែងថា៖« វិស័យសណ្ឋាគាររស់បានគឺពឹងផ្អែកទាំងស្រុងលើភ្ញៀវទេសចរហើយក្នុងសម័យកាលកូវីដ ១៩ ជាង ១ ឆ្នាំនេះមានសណ្ឋាគារខ្លះប៉ះពាល់ធ្ងន់ធ្ងរឈានទៅបិទទាំងស្រុង និងខ្លះទៀតបានបង្រួមការងារសម្របតាមលទ្ធភាពជាក់ស្តែង»៕
វីដេអូ៖
