.jpg)
តូបលក់សម្លៀកបំពាក់មួយកន្លែងក្នុងផ្សារបឹងកេងកង។ ហ៊ាន រង្សី
ភ្នំពេញៈ ក្រសួងធនធានទឹក និងឧតុនិយមនៅថ្ងៃម្សិលមិញបានអំពាវនាវដល់ប្រជាពលរដ្ឋ ព្រមទាំងកងទ័ពដែលកំពុងរស់នៅ និងឈរជើងក្នុងតំបន់ជួរភ្នំដងរ៉ែក និងខ្ពង់រាបភាគឦសាននៃប្រទេសកម្ពុជា ត្រូវបង្កើនការយកចិត្តទុកដាក់ថែទាំសុខភាពឱ្យបានល្អ ព្រោះនៅដើមខែមករាឆ្នាំ ២០២១ ខាងមុខនេះ អាកាសធាតុត្រជាក់នឹងធ្លាក់ចុះដល់កម្រិត ១៤ អង្សាសេ។
អ្នកនាំពាក្យក្រសួងធនធានទឹក និងឧតុនិយមលោក ចាន់ យុត្ថា បានប្រាប់ ភ្នំពេញ ប៉ុស្តិ៍ នៅថ្ងៃទី ២៩ ខែ ធ្នូ ឆ្នាំ ២០២០ ថា ក្រៅពីឥទ្ធិពលសម្ពាធខ្ពស់ពីប្រទេសចិន និងខ្យល់មូសុងឦសាន ប្រព័ន្ធសម្ពាធទាបសកម្មដែលកំពុងធ្វើដំណើរកាត់តាមតំបន់ជ្រោយម៉ាឡាកានៃព្រំដែនថៃ និងម៉ាឡេស៊ីនឹងបង្កើនឥទ្ធិពលមកលើប្រទេសកម្ពុជាផងដែរ។ ក្នុងស្ថានភាពនេះនឹងធ្វើឱ្យអាកាសធាតុក្នុងប្រទេសកម្ពុជា ចុះត្រជាក់ជាថ្មីម្ដងទៀតចាប់ពីយប់ថ្ងៃទី ៣០ ខែ ធ្នូ ឆ្នាំ ២០២០ ដល់ថ្ងៃទី ៥ ខែ មករា ឆ្នាំ ២០២១។
លោកថ្លែងថា៖ «នៅយប់ថ្ងៃឆ្លងឆ្នាំថ្មី អាកាសធាតុត្រជាក់នឹងធ្លាក់មកនៅក្នុងកម្រិត ១៤ អង្សាសេ ឬទាបជាងនេះ សម្រាប់តំបន់ជួរភ្នំដងរែក និងខ្ពង់រាបឦសាន។ ចំណែកនៅតំបន់វាលទំនាបកណ្ដាល អាកាសធាតុត្រជាក់នឹងអាចធ្លាក់មកក្នុងកម្រិត ១៦ អង្សាសេ»។
បើតាមលោក យុត្ថា បន្ទាប់ពីយប់ថ្ងៃឆ្លងឆ្នាំ អាកាសធាតុត្រជាក់នឹងបន្តអូសបន្លាយរហូតដល់យប់ថ្ងៃទី ៣ ខែមករា ឆ្នាំ ២០២១។ ប្រជាពលរដ្ឋដែលរស់នៅក្នុងតំបន់មាត់សមុទ្រ ជាពិសេសអ្នកនិយមចូលចិត្តធ្វើដំណើរកម្សាន្តតាមប្រជុំកោះនានានៃតំបន់ឆ្នេរសមុទ្រកម្ពុជា រួមទាំងប្រជានេសាទសមុទ្រ ត្រូវបង្កើនការប្រុងប្រយ័ត្នចំពោះល្បឿនខ្យល់ និងរលកសមុទ្រ ព្រោះក្នុងអំឡុងពេលនេះល្បឿនខ្យល់បក់ ១០ ម៉ែត្រក្នុង ១ វិនាទីដែលជំរុញឱ្យរលកសមុទ្រមានកម្ពស់ចន្លោះពី ១,៥ ម៉ែត្រ ទៅ ២ ម៉ែត្រ។ នៅថ្ងៃទី ៤ និងទី ៥ ខែមករា ឆ្នាំ ២០២១ នឹងមានភ្លៀងធ្លាក់តិចតួចនៅក្នុងតំបន់មួយចំនួននៃបណ្ដាខេត្តជាប់ព្រំដែនវៀតណាម។
លោក សន ស៊ា មេបញ្ជាការកងពលតូចលេខ ៤ ដែលកំពុងឈរជើងនៅចំណុចចង្ក្រានយក្ស និងចាន់ក្រហមនៃតំបន់ជួរមុខទិសប្រាសាទតាមាន់ ខេត្តឧត្តរមានជ័យបានឱ្យដឹងថា កងកម្លាំងប្រដាប់អាវុធមិនបារម្ភពីអាកាសធាតុត្រជាក់នោះទេ ព្រោះទទួលបានអាវរងា និង សម្ភារប្រើប្រាស់មួយចំនួនដែលអាចទប់ទល់នឹងអាកាសធាតុត្រជាក់បាន។
លោក ខាន់ សាម៉ែន មេបញ្ជាការសឹករងស្រុកជាំក្សាន្ត ខេត្តព្រះវិហារបានថ្លែងថា កាលពីថ្ងៃទី ២៦-២៧ ខែ ធ្នូ ឆ្នាំ ២០២០ កន្លងទៅនេះ នៅស្រុកជាំក្សាន្ត សីតុណ្ហភាពអប្បបរមាបានធ្លាក់ចុះមកដល់ ១៦ អង្សាសេ ប៉ុន្តែនៅថ្ងៃទី ២៩ សីតុណ្ហភាពអប្បបរមាបានឡើងមកដល់ ១៩ អង្សាសេវិញ។
លោកថ្លែងថា៖ «អាកាសធាតុត្រជាក់កាលពីប៉ុន្មានថ្ងៃមុននេះបានធ្វើឱ្យបងប្អូនកងទ័ពយើងមួយចំនួនមានជំងឺគ្រុនផ្ដាសាយតិចតួចដែរ ជាពិសេសកម្លាំងល្បាត នៅពេលយប់ ដើម្បីការពារសន្តិសុខតាមជួរបន្ទាត់ព្រំដែន»៕
វីដេអូ៖
