.jpg)
ទិដ្ឋភាពភ្លើងឆេះព្រៃនៅមណ្ឌលគិរីកាលពីឆ្នាំមុន។ រូបថត កងរាជអាវុធហត្ថ
ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទបានចេញសេចក្ដីណែនាំមួយដោយរំឭកចំពោះអ្នកដែលបង្កឲ្យមានករណីភ្លើងឆេះព្រៃ ឬព្រៃលិចទឹកដោយរំឭកថា ពួកគេនឹងត្រូវប្រឈមការផ្ដន្ទាទោសជាប់ពន្ធនាគារពី ៣ ដល់ ១០ ឆ្នាំ បន្ទាប់ពីមានឧប្បត្តិហេតុបែបនេះកើតមានជារៀងរាល់ឆ្នាំបណ្ដាលឲ្យប៉ះពាល់ដល់ផលប្រយោជន៍ជាច្រើន។
យោងតាមសេចក្ដីណែនាំដែលចុះហត្ថលេខាដោយលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទស្ដីពី «វិធានការការពារ និងទប់ស្កាត់ភ្លើងឆេះព្រៃ» ចុះថ្ងៃទី ១៥ ខែមករាដែលភ្នំពេញប៉ុស្តិ៍ទទួលបានកាលពីម្សិលមិញបានកត់សម្គាល់ថា មានកត្តាចម្បងមួយចំនួនដែលនាំឲ្យមានភ្លើងឆេះព្រៃញឹកញាប់នៅរដូវប្រាំង។
ក្នុងនោះមានកើតតាមរយៈសកម្មភាពការដុតរានព្រៃដើម្បីចាប់សត្វព្រៃ ឬដើម្បីសម្រួលដល់ការកាប់ឆ្ការព្រៃសម្រាប់សង់លំនៅថ្មី និងភ្ជួររាស់ដីដាំដំណាំកសិកម្មផ្សេងៗព្រមទាំងការបន្សល់ទុកដើមភ្លើងនៅក្នុងព្រៃតាមរយៈការធ្វេសប្រហែសពីមនុស្ស។
លោករដ្ឋមន្ត្រីបានបញ្ជាក់ថា៖ «ភ្លើងឆេះព្រៃជារៀងរាល់ឆ្នាំបានបង្កឲ្យមានបញ្ហាដ៏ធ្ងន់ធ្ងរដល់ធនធានព្រៃឈើ និងសត្វព្រៃបរិស្ថាន សង្គម និងសេដ្ឋកិច្ចជាតិ ព្រោះនៅពេលមានភ្លើងឆេះព្រៃគឺមានការឆេះរាលដាលដល់ស្រូវ និងភូមិកររបស់ប្រជាពលរដ្ឋដែលពេលខ្លះបានបង្កវិនាសកម្មដល់ជីវិតមនុស្សថែមទៀត»។
សេចក្ដីណែនាំដដែលថា ដើម្បីទប់ស្កាត់បញ្ហាប្រឈមទាំងនេះក្រសួងកសិកម្ម បានដាក់ចេញនូវវិធានការ ៧ ចំណុចក្នុងនោះមានទាំងការការពារ និងគ្រប់គ្រងដីព្រៃ ឬដីព្រៃលិចទឹករបស់រដ្ឋពីការទន្ទ្រានកាន់កាប់ដោយខុសច្បាប់ពីបុគ្គលណាម្នាក់ក្រោយពីមានករណីភ្លើងឆេះព្រៃ ដើម្បីឲ្យគ្រប់មន្ទីរ និងអង្គភាពជំនាញក្រោមឱវាទក្រសួងកសិកម្មព្រមទាំងអាជ្ញាធរពាក់ព័ន្ធក៏ដូចសហគមន៍ រួមគ្នាអនុវត្តការងារឲ្យបានពេញលេញ។
បើតាមវិធានការចម្បងដែលក្រសួងបានដាក់ចេញក្នុងសេចក្ដីណែនាំនោះគឺ «ការទប់ស្កាត់ការប្រើប្រាស់ភ្លើងជាមធ្យោបាយដើម្បីយកឃ្មុំ ការដុតព្រៃ និងព្រៃលិចទឹកដើម្បីស្ទាក់ចាប់សត្វព្រៃ ឬដើម្បីពង្រីកផ្ទៃដីកសិកម្ម និងការដុតវាលស្មៅដើម្បីយកល្បាស់ធ្វើជាចំណីសត្វពាហនៈជាដើម...»។
ក៏ប៉ុន្តែក្នុងករណីចាំបាច់ត្រូវប្រើប្រាស់ភ្លើងដើម្បីជាមធ្យោបាយដុតរណ្ដៅជ័រច្បោះតាមប្រពៃណី ឬដុតកាកសំណល់ឈើព្រៃក្នុងគោលបំណងដាំដំណាំកសិកម្ម និងក្នុងសកម្មភាពស្របច្បាប់ផ្សេងទៀតត្រូវជូនដំណឹងដល់មន្ទីរកសិកម្មរាជធានី ខេត្តសាមី ដើម្បីណែនាំអនុវត្តវិធានការតាមបច្ចេកទេស ដែលអាចធានាសុវត្ថិភាពភ្លើងឆេះព្រៃ។
ជាមួយនេះដែរក្នុងករណីមានភ្លើងឆេះព្រៃកើតឡើង ត្រូវប្រញាប់ចាត់វិធានការពន្លត់ភ្លើងជាបន្ទាន់ ដើម្បីទប់ស្កាត់ការរាលដាលកាន់តែធំ ឬរាលដាលឆេះស្រូវ និងភូមិកររបស់ពលរដ្ឋ និងត្រូវចាត់វិធានការតាមផ្លូវច្បាប់ឲ្យបានតឹងរ៉ឹងបំផុតចំពោះជនណាដែលបានប្រព្រឹត្ត ឬបង្កឲ្យមានភ្លើងឆេះព្រៃ។
ក្នុងសេចក្ដីណែនាំនោះលោក សាខុន ក៏បានបញ្ជាក់ដែរថា៖ «ជនណាដែលបានប្រព្រឹត្ត ឬបង្កឲ្យមានភ្លើងឆេះព្រៃ ឬភ្លើងឆេះព្រៃលិចទឹកដោយចេតនាត្រូវផ្ដន្ទាទោសក្រោមបទល្មើសព្រៃឈើថ្នាក់ទី ១ ឬបទល្មើសជលផលថ្នាក់ទី ១ ដែលត្រូវជាប់ពន្ធនាគារពី ៣ ឆ្នាំទៅ ៥ ឆ្នាំ ឬពី ៥ ឆ្នាំទៅ ១០ ឆ្នាំ»។
ពាក់ព័ន្ធករណីដុតរានដីព្រៃនេះដែរលោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរីបានប្រាប់ភ្នំពេញប៉ុស្តិ៍ពីម្សិលមិញថា កាលពីយប់ថ្ងៃ ១៥ មករា ទីស្នាក់ការសហគមន៍តំបន់ការពារធម្មជាតិអបួនលើនៃដែនជម្រកសត្វព្រៃស្រែពកនៅក្នុងឃុំអបួន ស្រុកកោះញែក ត្រូវបានជនមិនស្គាល់មុខលួចដុតឆេះខូចខាតទាំងស្រុង។
លោកបានថ្លែងថា៖ «យើងចាត់ទុកការដុតបំផ្លាញទីស្នាក់ការរបស់ប្រជាសហគមន៍តំបន់ការពារធម្មជាតិអបួនលើដែលប្រព្រឹត្តដោយជនមិនស្គាល់មុខខាងលើនេះជាទង្វើខុសច្បាប់ និងអសីលធម៌បំផុត»។
បើតាមលោក សុភគ៌ ករណីនេះត្រូវបានគេសង្ស័យថាជាការសងសឹកពីក្រុមជនល្មើសកាប់បំផ្លាញព្រៃឈើ និងបរបាញ់ដាក់អន្ទាក់សត្វព្រៃខុសច្បាប់ព្រោះកន្លងមកប្រជាសហគមន៍តំបន់នេះបានចូលរួមយ៉ាងសកម្មជាមួយមន្ត្រីឧទ្យានុរក្សដែនជម្រកសត្វព្រៃស្រែពកក្នុងការការពារ និងអភិរក្សធនធានធម្មជាតិ។
លោកបន្តថា កាលពី ១ សប្ដាហ៍មុនក៏មានករណីលួចដុតទីស្នាក់ការបរិស្ថានអន្ទ្រងក្នុងដែនជម្រកសត្វព្រៃភ្នំព្រិចផងដែរ។ ប៉ុន្តែរឿងនេះខាងសហគមន៍រួមទាំងមន្ត្រីឧទ្យានុរក្សបាននាំគ្នាដាក់ពាក្យបណ្ដឹងទៅអាជ្ញាធរមូលដ្ឋានដើម្បីជួយស្រាវជ្រាវរកអត្តសញ្ញាណជនល្មើសដើម្បីចាត់វិធានការទៅតាមនីតិវិធីច្បាប់៕
