The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​ការ​បរទេស​ប្រតិកម្ម​ការ​រិះគន់​របស់​លោក ស៊ូប៊ែរឌី

ក្រសួង​ការ​បរទេស​ប្រតិកម្ម​ការ​រិះគន់​របស់​លោក ស៊ូប៊ែរឌី

លោក កុយ គួង អ្នក​នាំ​ពាក្យ​ក្រសួង​ការ​បរទេស​ថ្លែង​ទៅ​កាន់​អ្នក​សារ​ព័ត៌មាន។
លោក កុយ គួង អ្នក​នាំ​ពាក្យ​ក្រសួង​ការ​បរទេស​ថ្លែង​ទៅ​កាន់​អ្នក​សារ​ព័ត៌មាន។ ហេង ជីវ័ន

ក្រសួង​ការ​បរទេស​ប្រតិកម្ម​ការ​រិះគន់​របស់​លោក ស៊ូប៊ែរឌី

ភ្នំពេញៈ មន្រ្តី​ជាន់​ខ្ពស់​ក្រសួង​ការ​បរទេស​កម្ពុជា កាល​ពី​ថ្ងៃ​ពុធ​ម្សិល​មិញ​នេះ បាន​ប្រតិកម្ម​នឹង​ការ​រិះ​គន់​របស់​លោក សូរិយា ស៊ូប៊ែរឌី អ្នក​រាយ​ការណ៍​ពិសេស​អង្គការ​សហ​ប្រជាជាតិ​ប្រចាំ​កម្ពុជា ដែល​ថា តុលាការ​កម្ពុជា​មិន​ឯករាជ្យ ហើយ​រដ្ឋាភិបាល​ដែល​ដឹក​នាំ​ដោយ​គណបក្ស​ប្រជាជន​កម្ពុជា កំពុង​ប្រើ​ប្រាស់​តុលាការ​ដើម្បី​ប្រយោជន៍​ខាង​នយោបាយ។

ក្នុង​សន្និសីទ​សារ​ព័ត៌មាន ក្រោយ​ជំនួប​រវាង​រដ្ឋ​មន្រ្តី​ក្រសួង​ការ​បរទេស លោក ហោ ណាំហុង ជាមួយ​នឹង​លោក Rady Mom អ្នក​តំណាង​រាស្ត្រ​ប្រចាំ​តំបន់ ទី១៨ នៃ​រដ្ឋ​ម៉ាស្សា​ឈូសេត អ្នក​នាំ​ពាក្យ​ក្រសួង​ការ​បរទេស​កម្ពុជា លោក កុយ គួង បាន​ថ្លែង​ថា លោក ស៊ូប៊ែរឌី តែង​តែ​ជំរុញ​កម្ពុជា​ឲ្យ​មាន​ការ​អនុវត្ត​តាម​នីតិរដ្ឋ និង​ស្ថាប័ន​តុលាការ​ឯករាជ្យ ប៉ុន្តែ​គ្រប់​ពេល​ដែល​តុលាការ​អនុវត្ត​ច្បាប់ លោក​តែង​តែ​ថ្កោល​ទោស​ថា ជា​ការ​រំលោភ​សិទ្ធិ​មនុស្ស​បំបិទ​សិទ្ធិ​សេរី​ភាព​បញ្ចេញ​មតិ​ទៅ​វិញ។

លោក​បន្ត​ថា៖ «ការ​អនុវត្ត​ច្បាប់​និង​សេរីភាព​បញ្ចេញ​មតិ​កន្លង​មក ការ​កាត់​ទោស​អ្នក​ប្រព្រឹត្ត​បទ​ល្មើស​គឺ​មិន​ពាក់​ព័ន្ធ​នឹង​បញ្ហា​សិទ្ធិ​មនុស្ស​ទេ គឺ​បញ្ហា​អ្នក​បាន​ប្រព្រឹត្ត​បទ​ល្មើស​ជាក់​ស្តែង​ផ្ទុយ​នឹង​ច្បាប់។ ខាង​សង្គម​ស៊ីវិល តែង​តែ​ជំរុញ​ឲ្យ​រដ្ឋាភិបាល​អនុវត្ត​ច្បាប់ ហើយ​គេ​បែរ​ជា​ថា ប៉ះ​ទង្គិច​នឹង​សេរីភាព​បញ្ចេញ​មតិ​ទៅ​វិញ​ត្រូវ​ចែក​គ្នា​ឲ្យ​ដាច់​រវាង​សេរីភាព​សម្តែង​មតិ និង​ការ​ប៉ះ​ពាល់​ច្បាប់។»

ជុំវិញ​ការ​លើក​ឡើង​របស់​លោក ស៊ូប៊ែរឌី ដែរ​នោះ លោក កុយ គួង បន្ថែម​ថា៖ «តុលាការ​គេ​ចាប់​តាម​នីតិវិធី​ច្បាប់ វា​ខុស​ប៉ុនណា​តើ​សុខៗ​គេ​ចេះ​តែ​ដើរ​ចាប់​មនុស្ស​តាម​ផ្ទះ​ឬ​យ៉ាង​ម៉េច?»។

ក្នុង​សេចក្តី​ថ្លែង​ការណ៍​កាល​ពី​ថ្ងៃ ទី១៨ ខែ​វិច្ឆិកា លោក ស៊ូប៊ែរឌី បាន​លើក​ឡើង​ទាក់​ទិន​នឹង​ការ​ចាប់​ខ្លួន​ជា​បន្ត​បន្ទាប់​នូវ​សកម្ម​ជន​ការពារ​ដីធ្លី និង​មន្រ្តី​គណបក្ស​ប្រឆាំង​ថា៖ «វា​ធ្វើ​ឲ្យ​ខ្ញុំ​ពិបាក​ចិត្ត​នៅ​ពេល​ឃើញ​ថា ប្រព័ន្ធ​តុលាការ​ត្រូវ​បាន​ប្រើ​ប្រាស់​ម្តង​ហើយ​ម្តង​ទៀត ជា​ឧបករណ៍​របស់​នីតិ​ប្រតិបត្តិ»។

លោក​ថា៖ «កង្វះ​ខាត​នៃ​ប្រព័ន្ធ​តុលាការ​ឯករាជ្យ គឺ​ជា​ឧបសគ្គ​នៅ​ចំ​កណ្តាល​មួយ​សម្រាប់​កម្ពុជា​ឆ្ពោះ​ទៅ​រក​សង្គម​រួម​មួយ ដែល​កម្ពុជា​ព្យាយាម​ចង់​បាន​នោះ។ ការ​អនុវត្ត​ថ្មី​នេះ​របស់​តុលាការ​បាន​បង្ហាញ​ជា​ថ្មី​ម្តង​ទៀត​នូវ​តម្រូវ​ការ​នៃ​ប្រព័ន្ធ​យុត្តិធម៌​ឯករាជ្យ​សម្រាប់​កម្ពុជា។»

លោក ស៊ូប៊ែរឌី ក៏​បាន​បង្ហាញ​ការ​សោក​ស្តាយ​ចំពោះ​វប្បធម៌​និទ្ទណ្ឌ​ភាព​នៅ​កម្ពុជា ដោយ​រំឭក​ជា​ថ្មី​ថា មិន​មាន​អាជ្ញាធរ​មាន​សមត្ថកិច្ច​ណា​មួយ​ត្រូវ​បាន​កោះ​ហៅ​មក​ទទួល​ខុស​ត្រូវ ជុំវិញ​ការ​ប៉ះ​ទង្គិច​គ្នា ដែល​នាំ​ឲ្យ​មាន​មនុស្ស​ជា​ច្រើន​ស្លាប់ និង​របួស កាល​ពី​ឆ្នាំ​មុន និង​កាល​ពី​ថ្ងៃ ទី១៥ ខែ​កក្កដា ឡើយ។

ជុំវិញ​ការ​ប៉ះ​ទង្គិច​កាល​ពី​ថ្ងៃ ទី១៥ ខែ​កក្កដា សមាជិក​គណបក្ស​សង្គ្រោះ​ជាតិ​ពីរ​នាក់ រួម​មាន លោក មាជ សុវណ្ណារ៉ា និង​លោក ទេព ណារិន ត្រូវ​បាន​តុលាការ​ឃុំ​ខ្លួន​ថ្មីៗ​នេះ ដោយ​ចោទ​ប្រកាន់​ពាក់​ព័ន្ធ​នឹង​ហិង្សា​លើ​សន្តិសុខ គិត​មក​ទល់​ពេល​នេះ សមាជិក និង​អ្នក​គាំទ្រ​គណបក្ស​សង្គ្រោះ​ជាតិ ចំនួន ១៧ នាក់ ត្រូវ​បាន​រង​ការ​ចោទ​ប្រកាន់​ក្នុង​ករណី​នេះ។

កាល​ពី​ថ្ងៃ ទី១០ និង ១១ ខែ​វិច្ឆិកា ស្រ្តី​ដី​ធ្លី ១០ នាក់​ត្រូវ​បាន​តុលាការ​កាត់​ទោស​ជាប់​ពន្ធនាគារ​ម្នាក់ៗ ១ ឆ្នាំ​និង​ពិន័យ​ជា​ប្រាក់​ម្នាក់ ២ លាន​រៀល បន្ទាប់​ពី​ពួក​គេ​បាន​តវ៉ា​បិទ​ផ្លូវ​ព្រះ​មុនីវង្ស រក​អន្តរាគមន៍​រំដោះ​ទឹក​ស្អុយ​ដែល​ជន់​លិច​ផ្ទះ​នៅ​បឹង​កក់។ ចំណែក​ព្រះ​សង្ឃ ១ អង្គ​ត្រូវ​បាន​កាត់​ទោស​ដូច​គ្នា ខណៈ​មើល​ការ​តវ៉ា​នៅ​មុខ​តុលាការ។

អ្នក​តំណាង​រាស្ត្រ​គណបក្ស​សង្គ្រោះ​ជាតិ លោក ស្រី មូរ សុខហួរ បាន​ឲ្យ​ដឹង​ថា លោក​ស្រី និង​តំណាង​រាស្ត្រ​ស្រ្តី ៥ នាក់​របស់​គណបក្ស​នេះ នៅ​ព្រឹក​ថ្ងៃ​ព្រហស្បតិ៍​នេះ​នឹង​ទៅ​ជួប​សួរ​សុខ​ទុក្ខ​ស្រ្តី​រង​គ្រោះ​ដី​ធ្លី ១០ នាក់​ដែល​កំពុង​ជាប់​ឃុំ​ខ្លួន​នៅ​មន្ទីរ​អប់រំ​កែប្រែ ទី២ (ម២)។

លោក​ស្រី​ថា៖ «លិខិត​ស្នើ​សុំ​ជួប​សួរ​សុខ​ទុក្ខ ដែល​ពួក​យើង​បាន​ដាក់​ទៅ​ប្រធាន​សាលា​ដំបូង កាល​ពី​ថ្ងៃ ទី១៧ ខែ​វិច្ឆិកា គឺ​ត្រូវ​បាន​ឆ្លើយ​តប​ជា​វិជ្ជមាន​ម្សិល​មិញ​នេះ ហើយ​យើង​នឹង​ជួប​អ្នក​ទាំង ១០ នាក់​នោះ នៅ​ម៉ោង ៩ ព្រឹក។ យើង​នឹង​ប្រាប់​ពួក​គេ​ថា យើង​គាំ​ទ្រ និង​តំណាង​ឲ្យ​ពួក​គេ ក្នុង​នាម​ជា​តំណាង​រាស្ត្រ​ចំពោះ​ការ​តវ៉ា​ដ៏​ត្រឹម​ត្រូវ​នេះ ដើម្បី​ការ​រស់​នៅ​ដោយ​ភាព​ថ្លៃ​ថ្នូរ។»

លោក​បាន​ឲ្យ​ដឹង​ដែរ ម្សិល​មិញ​នេះ លោក​ស្រី​ក៏​បាន​ផ្ញើ​លិខិត​ទៅ​កាន់​លោក ហេង សំរិន ប្រធាន​រដ្ឋសភា និង​គណៈ​ប្រឹក្សា​អង្គ​ចៅ​ក្រម​ដើម្បី​ជំរុញ​ឲ្យ​ប្រធាន​សាលា​ដំបូង​រាជធានី​ភ្នំពេញ លោក កែវ មុន្នី បំភ្លឺ​ជុំវិញ​ការ​សាក​សួរ លោក អ៊ុក ពេជ្រ​សំណាង ដែល​រង​ការ​ចោទ​ពី​បទ​ធ្វើ​កុបកម្ម​ដោយ​មិន​បាន​ជូន​ដំណឹង​ដល់​មេធាវី​របស់​កូន​ក្តី និង​ករណី​សមត្ថកិច្ច​ឡោម​ព័ន្ធ​ចាប់​ព្រះ​តេជគុណ កែវ សុម៉ាលី៕

អត្ថបទគួរចាប់អារម្មណ៍