The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​ជំរុញ​ឲ្យ​ពលករ​ត្រូវ​ក្រុមហ៊ុន​ឆបោក​ដាក់​បណ្តឹង

ក្រសួង​ជំរុញ​ឲ្យ​ពលករ​ត្រូវ​ក្រុមហ៊ុន​ឆបោក​ដាក់​បណ្តឹង

ក្រសួង​ជំរុញ​ឲ្យ​ពលករ​ត្រូវ​ក្រុមហ៊ុន​ឆបោក​ដាក់​បណ្តឹង

130916_08
ពលការិនីរងការឆបោករបស់ក្រុមហ៊ុននាំពលករទៅក្រៅប្រទេស ត្រូវសមត្ថកិច្ចសង្គ្រោះ ហេង ជីវ័ន

ភ្នំពេញៈ គណៈកម្មាធិការ​បណ្ដុះបណ្ដាល​និង​បញ្ជូន​ពលករ​ទៅ​បរទេស​នៃ​ក្រសួង​ការងារ​បាន​ជូន​ដំណឹង​ទៅ​ដល់​ជនរងគ្រោះ​ទាំងអស់​ដែល​ត្រូវ​បាន​បោកប្រាស់​ដោយ​ក្រុមហ៊ុន​រើស​ពលករ​ឈ្មោះ យូខេនវីន​គ្រុប​«You​Can​Win​Co​Ltd​» ឲ្យ​ប្រញាប់​មក​ដាក់​ពាក្យបណ្ដឹង​ប្រឆាំង​នឹង​ក្រុមហ៊ុន​នេះ។

លោក​ពេជ​សោភ័ន​រដ្ឋលេខាធិការ​ក្រសួង​ការងារ ជា​ប្រធាន​គណៈកម្មាធិការ​បណ្ដុះបណ្ដាល​និង​បញ្ជូន​ពលករ​ទៅ​បរទេស​ឲ្យ​ដឹង​តាម​សេចក្តី​ជូន​ដំណឹង​ចុះ​ថ្ងៃ​ទី​១៣​ខែ​កញ្ញា​ថា​ក្រសួង​អំពាវនាវ​ឲ្យ​ជនរងគ្រោះ​ដែល​ត្រូវ​បោកប្រាស់​នោះ​ដាក់​ពាក្យប្ដឹង​ទៅ​គ្រប់​មន្ទីរ​ការងារ និង​បណ្តុះបណ្តាល​វិជ្ជាជីវៈ​នៅ​ទូទាំង​ប្រទេស​ឬ​នៅ​គណៈកម្មាធិការ​ស្ថិត​នៅក្នុង​វិទ្យាស្ថាន​ជាតិ​ពហុបច្ចេកទេស​កម្ពុជា។

លោក​ថ្លែង​ថា ៖ «​សូម​បងប្អូន​ដែល​ជា​ជនរងគ្រោះ​ចាញ់​ការ​ឆបោក​ក្រុមហ៊ុន​នេះ​ប្រញាប់​ដាក់​ពាក្យបណ្តឹង​ទារ​សំណង​ជំងឺចិត្ត​និង​ប្តឹង​ជនជាប់ចោទ​»។

លោក​អួន​សារ៉ាត់​អាយុ​៣០​ឆ្នាំ​ជា​ប្រធាន​ក្រុមហ៊ុន​និង​លោក​គឹម​សុផាត​អាយុ​២៩​ឆ្នាំ​ប្រធាន​ផ្នែក​ទីផ្សារ​នៃ​ក្រុមហ៊ុន​ជ្រើសរើស​ពលករ​នេះ​ត្រូវ​បាន​ចាប់​ខ្លួន​និង​ចោទ​ពី​បទ​ឆបោក​ជា​ក្រុម​ការ​ចាត់​តាំង​និង​ធ្វើ​សកម្មភាព​បង្កើត​ឲ្យ​មាន​ការ​យល់ច្រឡំ​នឹង​ការ​បំពេញ​មុខងារ​សាធារណៈ។

ក្រុមមន្ត្រី​មកពី​ក្រសួង​ការងារ​បាន​ចាប់ផ្ដើម​ស៊ើបអង្កេត​រឿងរ៉ាវ​កើតឡើង​ពី​ខែ​មិថុនា​នៅ​ពេល​ក្រុមហ៊ុន You Can Win Co. Ltd. ចាប់ផ្ដើម​ផ្សព្វផ្សាយ​សេវា​ខ្លួន​តាម​ហ្វេសប៊ុក។

សមត្ថកិច្ច​បាន​ចាប់​ខ្លួន​ឈ្មោះ​សារ៉ាត់​និង​សុផាត​បន្ទាប់ពី​លោក​ហេង​សួរ​អគ្គនាយក​នៃ​អគ្គនាយកដ្ឋាន​រដ្ឋបាល​និង​ហិរញ្ញវត្ថុ​នៃ​ក្រសួង​ការងារ​បាន​ដាក់​ពាក្យប្ដឹង​ជន​ទាំង​ពីរ​នាក់​នេះ​ទៅ​តុលាការ​ក្រុង​ភ្នំពេញ។

ជនជាប់ចោទ​ទាំងនេះ​បាន​យក​លុយ​ពី​អតិថិជន​ខ្លួន​ចំនួន​១០០​ដុល្លារ​សម្រាប់​ពាក្យ​សុំ​បម្រើ​ការងារ​ដែល​ក្រុមហ៊ុន​បាន​ផ្សព្វផ្សាយ​នោះ​ជា​ថ្នូរ​នឹង​ការ​បាន​ទៅ​ធ្វើការ​នៅ​កូរ៉េ​ខាង​ត្បូង​ស្រប​ច្បាប់​ប៉ុន្តែ​ទម្រង់​ខុស​ច្បាប់​ដែល​ក្រុមហ៊ុន​បាន​លក់​នេះ​មិន​អនុញ្ញាត​ដោយ​ក្រសួង​ការងារ​ទេ​និង​មិន​បាន​ផ្ដល់​ការ​អនុញ្ញាត​ស្រប​ច្បាប់​ដល់​អតិថិជន​ឲ្យ​ធ្វើការ​នៅ​បរទេស​ឡើយ។

លោក ពេជ សោភ័ន​បាន​លើក​ឡើង​ថា​ជនរងគ្រោះ​ត្រូវ​ភ្ជាប់​មក​ជាមួយ​នូវ​ច្បាប់​ថតចម្លង​មួយ​ចំនួន​ដូចជា​វិក្កយបត្រ​បង់ប្រាក់​ដែល​មាន​ហត្ថលេខា​ក្រុមហ៊ុន​កិច្ចសន្យា​ដែល​បាន​ចុះ​ជាមួយ​ក្រុមហ៊ុន​អត្តសញ្ញាណប័ណ្ណ​សៀវភៅ​គ្រួសារ​ឬ​សៀវភៅ​ស្នាក់នៅ​និង​ឯកសារ​ពាក់ព័ន្ធ​នឹង​ក្រុមហ៊ុន​មួយ​ចំនួន​ទៀត​។

លោក​ពេជ​សោភ័ន​បញ្ជាក់​ថា​៖ «​មាន​តែ​គណៈកម្មាធិការ​បណ្ដុះបណ្ដាល​និង​បញ្ជូន​ពលករ​ទៅ​បរទេស​នៃ​ក្រសួង​ការងារ​នេះ​តែ​មួយ​គត់​ដែល​មាន​សិទ្ធិ​សហការ​ជាមួយ​អង្គភាព​អភិវឌ្ឍន៍​ធនធាន​មនុស្ស​នៃ​ក្រសួង​មុខរបរ​និង​ការងារ​នៃ​សាធារណ​រដ្ឋ​កូរ៉េ​ក្នុង​ការ​រៀបចំ​ការ​ធ្វើ​តេស្ត​សមត្ថភាព​ភាសា​កូរ៉េ​និង​បញ្ជូន​ពាក្យ​ស្វែងរក​ការងារ​ធ្វើ​ដោយ​ស្រប​ច្បាប់​នៅ​កូរ៉េ​»។​លោក​បន្ត​ថា​៖ «​ភ្នាក់ងារ​ជ្រើសរើស​ឯកជន​អង្គការ​សាលារៀន​វិទ្យាស្ថាន​និង​សហគមន៍​សាសនា​ដែល​បណ្ដុះបណ្ដាល​ភាសា​កូរ៉េ​ពុំ​មាន​សិទ្ធិ​ជ្រើសរើស​និង​បញ្ជូន​ពលករ​ទៅ​ធ្វើការ​នៅ​កូរ៉េ​ឡើយ​»។

ជនជាប់ចោទ​កំពុង​ស្ថិត​នៅក្នុង​មន្ទីរ​ឃុំឃាំង​និង​រង់ចាំ​ការ​ជំនុំជម្រះ​ក្ដី៕ PN

អត្ថបទគួរចាប់អារម្មណ៍