The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​ដែនដី​ចង់​ឲ្យ​យុវជន​ចូល​រួម​កាត់​បន្ថយ​ជម្លោះ​ដីធ្លី

ក្រសួង​ដែនដី​ចង់​ឲ្យ​យុវជន​ចូល​រួម​កាត់​បន្ថយ​ជម្លោះ​ដីធ្លី

យុវជន​រងគ្រោះ​ដោយ​សារ​ជម្លោះ​ដីធ្លី​មក​ពី ខេត្ត​ព្រះវិហារ ត្រូវ​សន្តិសុខ​ចាប់​វាយ​នៅ​ពេល​តវ៉ា​កាល​ពី​សប្តាហ៍​មុន។
យុវជន​រងគ្រោះ​ដោយ​សារ​ជម្លោះ​ដីធ្លី​មក​ពី ខេត្ត​ព្រះវិហារ ត្រូវ​សន្តិសុខ​ចាប់​វាយ​នៅ​ពេល​តវ៉ា​កាល​ពី​សប្តាហ៍​មុន។ ម៉ៃ វីរៈ

ក្រសួង​ដែនដី​ចង់​ឲ្យ​យុវជន​ចូល​រួម​កាត់​បន្ថយ​ជម្លោះ​ដីធ្លី

ភ្នំពេញៈ ក្រសួង​ដែនដី​នគរូប​នីយកម្ម និង​សំណង់ នឹង​សហការ​ជាមួយ​ក្រសួង​អប់រំ បង្កើត​កម្មវិធី​សិក្សា​ផ្តល់​ជូន​យុវជន​ដើម្បី​បង្កើន​ការ​យល់​ដឹង និង​ការ​ចូល​រួម​ចំណែក​កាត់​បន្ថយ​បញ្ហា​ពាក់​ព័ន្ធ​នឹង​ទំនាស់​ដីធ្លី និង​លំនៅឋាន​នៅ​កម្ពុជា។

គម្រោង​នេះ​ត្រូវ​បាន​ប្រកាស​ឲ្យ​ដឹង​កាល​ពី​ម្សិល​មិញ នៅ​ក្នុង​វេទិកា​ស្តី​ពី «ការ​លើក​កម្ពស់​និង​បង្កើន​ការ​ចូល​រួម​របស់​យុវជន​ក្នុង​ការ​កាត់​បន្ថយ​បញ្ហា​ដីធ្លី និង​លំនៅឋាន» ដែល​រៀបចំ​ឡើង​ដោយ​អង្គការ​សង្គម​ស៊ីវិល​ជាង ១០ ដោយ​មាន​យុវជន​ជាង ២៥០ នាក់​ចូល​រួម។

រដ្ឋ​លេខាធិការ​ក្រសួង​រៀបចំ​ដែនដី នគរូប​នីយកម្ម និង​សំណង់ លោក សរ សុវណ្ណ បាន​ថ្លែង​ទទួល​ស្គាល់​ថា បញ្ហា​ទំនាស់​ដីធ្លី លំនៅឋាន​និង​ផល​ប៉ះ​ពាល់​នៃ​បញ្ហា​ទាំង​នេះ គឺជា​បញ្ហា​ក្តៅ​គគុក​មួយ​សម្រាប់​ប្រទេស​កម្ពុជា នា​ពេល​បច្ចុប្បន្ន ដែល​ទាមទារ​ឲ្យ​មាន​ការ​ចូល​រួម​ពី​យុវជន ដែល​ជា​ទំពាំង​ស្នង​ឫស្សី ជា​ធនធាន​មនុស្ស​ក្នុង​ការ​អភិវឌ្ឍ​ប្រទេស​ជាតិ។

លោក​បាន​គូស​បញ្ជាក់​ថា ក្នុង​កិច្ច​ការងារ​នេះ ក្រសួង​អប់រំ នឹង​រួម​ចំណែក​ផ្តល់​កម្មវិធី​សិក្សា​ដល់​យុវជន​ដើម្បី​បង្កើត​គំនិត និង​បច្ចេក​ទេស ដោះ​ស្រាយ​ការងារ​នេះ។ លោក​បន្ថែម​ថា៖ «ឥឡូវ​ក្រសួង​អប់រំ​មាន Scholarship និង Exchange program ដើម្បី​ឲ្យ​យុវជន​មាន​ឱកាស​ទៅ​សិក្សា​ក្រៅ​ប្រទេស​ពាក់​ព័ន្ធ​នឹង​ជំនាញ​ផ្សេងៗ...ដើម្បី​កំណត់​ទិស​ដៅ​សម្រាប់​ពង្រឹង​សមត្ថភាព​យុវជន...ផែនការ​ជាក់​លាក់​គឺ​យើង​អត់​ទាន់​មាន​ទេ តែ​យើង​បើក​ចំហ​ចំពោះ​ការ​ផ្តល់​មតិ​យោបល់​ថា ក្រៅ​ពី​នោះ យុវជន​គួរ​ចេះ​ដឹង​អី​បន្ថែម​ទៀត»។

អ្នក​នាំ​ពាក្យ​ក្រសួង​អប់រំ លោក រស់ សាលីន បាន​ឲ្យ​ដឹង​ថា ក្រសួង​អប់រំ​មាន​គោល​បំណង​ផ្សារ​ភ្ជាប់ និង​ពង្រឹង​សមត្ថភាព​របស់​យុវជន​ក្នុង​កិច្ច​ការងារ​សង្គម តាម​រយៈ​កម្មវិធី​សិក្សា​នានា ក្នុង​ស្ថាប័ន​រដ្ឋ និង​វេទិកា​សាធារណៈ ស្រប​តាម​គោល​ការណ៍​អភិវឌ្ឍន៍ ឆ្នាំ​២០១៤ ដល់ ២០១៨ ហើយ​ក្នុង​នោះ ក្រសួង​យល់​ឃើញ​ថា បញ្ហា​ដីធ្លី​គឺជា​រឿង​សំខាន់​ក្នុង​ស្ថានការណ៍​បច្ចុប្បន្ន។ «យើង​មិន​ទាន់​មាន​យន្តការ​ផ្លូវ​ការ​មែន តែ​ផែនការ​យុទ្ធសាស្ត្រអ​ភិវឌ្ឍន៍​យុវជន គឺ​យើង​មាន​ហើយ ជំហាន​បន្ទាប់​គឺ​យើង​នឹង​ពិនិត្យ​យន្តការ​ផ្លូវ​ការ ឯកសារ​ពាក់​ព័ន្ធ​នានា​ដើម្បី​ឆ្លើយ​តប​ទៅ​នឹង​តម្រូវ​ការ​របស់​យុវជន»។

នាយក​ប្រតិបត្តិ​វេទិកា​នៃ​អង្គការ​មិន​មែន​រដ្ឋាភិបាល​ស្តីពី​កម្ពុជា លោក តឹក វណ្ណារ៉ា ដែល​ដឹក​នាំ​វេទិកា​យុវជន​នេះ បាន​ឲ្យ​ដឹង​ថា វេទិកា​នេះ​បាន​ផ្តល់​ឱកាស​ឲ្យ​មាន​ការ​ចូល​រួម​ជជែក​ពិភាក្សា​ក្នុង​ន័យ​ស្ថាបនា​លើ​បញ្ហា និង​កង្វល់​ជុំវិញ​ទំនាស់​ដីធ្លី និង​លំនៅឋាន។

លោក​បាន​បន្ថែម​ថា៖ «សង្គម​ស៊ីវិល មាន​ជំនឿ​ថា ការ​អនុវត្ត​ច្បាប់ ការ​ត្រួត​ពិនិត្យ​លើ​ការ​អនុវត្ត​របស់​ក្រុម​ហ៊ុន​សម្បទាន​ដី​សេដ្ឋកិច្ច សម្បទាន​រ៉ែ និង​គម្រោង​អភិវឌ្ឍន៍​ខ្នាត​ធំៗ​ការ​ពង្រីក​និង​ពន្លឿន​ការ​ចុះ​បញ្ជី​ដី​សហគមន៍​ជន​ជាតិ​ភាគ​តិច​សហគមន៍​ព្រៃឈើ សហគមន៍​តំបន់​ការពារ សហគមន៍​អេកូ​ទេសចរណ៍​និង​សហគមន៍​នេសាទ​គឺជា​ដំណោះ​ស្រាយ​ដ៏​មាន​ប្រសិទ្ធភាព​លើ​បញ្ហា​វិវាទ​ដី​ធ្លី​នៅ​កម្ពុជា»។

យុវជន ឌីម សុផល និស្សិត​ឆ្នាំ ទី១ នៃ​សាកល​វិទ្យាល័យ​ភូមិន្ទ​នីតិសាស្ត្រ និង​វិទ្យាសាស្ត្រ​សេដ្ឋកិច្ច បាន​ឲ្យ​ដឹង​ថា វេទិកា​ពិភាក្សា​នេះ បាន​បង្ហាញ​ពី​ចំណុច​ល្អ និង​ចំណុច​អាក្រក់ រួម​នឹង​បញ្ហា​ការ​យល់​ដឹង​ទាប​ដែល​នាំ​ឲ្យ​កើត​មាន​ជម្លោះ​ដីធ្លី និង​លំនៅឋាន។

សុផល និយាយ​ថា៖ «ខ្ញុំ​ចង់​ឲ្យ​រដ្ឋាភិបាល​ជួយ​ផ្សព្វ​ផ្សាយ អប់រំ និង​ផ្តល់​ជំនាញ​បច្ចេក​ទេស ក៏​ដូច​ជា​ការ​ស្រាវជ្រាវ​ដល់​យុវជន និង​ប្រជា​ពលរដ្ឋ តាម​ជនបទ​ដើម្បី​ឲ្យ​ពួក​យើង​អាច​បន្ត​ចែក​រំលែក និង​ដោះ​ស្រាយ​បញ្ហា​តាម​សហគមន៍»។

យុវតី អាន ស្រីតូច សិស្ស​ថ្នាក់ ទី៩ នៃ​អនុ​វិទ្យាល័យ​កសាង មក​ពី ខេត្ត​ក្រចេះ បាន​ឲ្យ​ដឹង​ថា ភាគ​ច្រើន ករណី​ទំនាស់​ដីធ្លី​ដែល​កើត​មាន​នៅ​ក្នុង ខេត្ត​ក្រចេះ គឺ​មាន​ការ​ទាក់​ទង​នឹង​ក្រុម​ហ៊ុន​សម្បទាន​ដី​សេដ្ឋកិច្ច ហើយ​ភាគ​ច្រើន​ការ​តវ៉ា​របស់​ប្រជា​ពលរដ្ឋ​គឺ​បរាជ័យ មិន​មាន​ដំណោះ​ស្រាយ ដែល​នាំ​ឲ្យ​ជិត ៨០ ភាគរយ​នៃ​ពលរដ្ឋ​រង​គ្រោះ​ទាំង​នោះ ឡើង​មក​ស្វែង​រក​កិច្ច​អន្តរាគមន៍​នៅ​រាជធានី​ភ្នំពេញ​ដើម្បី​ស្វែង​រក​ដំណោះ​ស្រាយ។

ស្រី​តូច បន្ថែម​ថា៖ «បើ​ខ្ញុំ​ចេះ ខ្ញុំ​នឹង​ចែក​រំលែក ព្រោះ​ខ្លះ​អត់​យល់ មិន​ដឹង​រក​ដំណោះ​ស្រាយ​តាម​ណា មាន​ពលរដ្ឋ​ខ្លះ​ទៅ​រស់​នៅ​លើ​ដី​របស់​គេ ចាប់​យក​ដី​ទំនេរ​មក​សង់​ផ្ទះ ទាំង​នេះ​មក​ពី​ពួក​គាត់​មិន​យល់»។

តាម​របាយ​ការណ៍ ក្នុង​រយៈ​ពេល ៣ ខែ​ដើម ឆ្នាំ​២០១៤ អង្គការ អាដហុក បាន​ធ្វើ​ការ​ស៊ើប​អង្កេត​ករណី​វិវាទ​ដីធ្លី ៣៧ ករណី​ដែល​ប៉ះពាល់​ដល់​ពលរដ្ឋ ២៦១៧ គ្រួសារ​ស្មើ​នឹង​ប្រមាណ ៦៤៧០ នាក់​និង​ទំហំ​ដី​សរុប​ជាង ៥៤០០ ហិកតា។ ប៉ុន្តែ​តួលេខ ដែល​កត់​ត្រា​ដោយ​គណៈកម្មការ​សុរិយោ​ដី​ក្នុង​ក្របខ័ណ្ឌ​ទូទាំង​ប្រទេស ក្នុង​រយៈ​ពេល ៦ ខែ​ដើម ឆ្នាំ​២០១៤ នេះ​ទទួល​បាន​បណ្តឹង​សរុប ៨៥ ករណី ដែល​ពាក់​ព័ន្ធ​នឹង​ប្រជា​ពលរដ្ឋ​ប្រមាណ ៧០ គ្រួសារ​ប៉ុណ្ណោះ៕

អត្ថបទគួរចាប់អារម្មណ៍