The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​បង្ហាញ​ឈ្មោះ​ក្រុមហ៊ុន​នាំ​ពលករ​ទៅ​ធ្វើ​ការ​នៅ​បរទេស

ក្រសួង​បង្ហាញ​ឈ្មោះ​ក្រុមហ៊ុន​នាំ​ពលករ​ទៅ​ធ្វើ​ការ​នៅ​បរទេស

ក្រសួង​បង្ហាញ​ឈ្មោះ​ក្រុមហ៊ុន​នាំ​ពលករ​ទៅ​ធ្វើ​ការ​នៅ​បរទេស

20140310_04
ពលករចំណាកស្រុករង់ចាំបំពេញបែបបទដើម្បីឆ្លងដែនទៅធ្វើការនៅប្រទេសជិតខាង ហុង មិនា

ភ្នំពេញៈ ក្រសួង ការងារ និង​បណ្តុះ​បណ្តាល​វិជ្ជាជីវៈ​បាន​បញ្ចេញ​នូវ​បញ្ជី​ឈ្មោះ​របស់​ទីភ្នាក់ងារ​ជ្រើសរើស​ពលករ​ទៅ​ធ្វើ​ការ​នៅ​ក្រៅ​ប្រទេស​សម្រាប់​ពលរដ្ឋ​ទាំងអស់​ដែល​មាន​បំណង​ទៅ​ធ្វើ​ការ​នៅ​ក្រៅ​ប្រទេស​អាច​ទាក់​ទង​បាន ប៉ុន្តែ​ក្នុង​ចំណោម​ភ្នាក់ងារ​ទាំង​នោះ​មាន​ក្រុមហ៊ុន​មួយ​ចំនួន​ធ្លាប់​មាន​រឿង​អាស្រូវ និង​ខ្លះ​បាន​បិទ​ទ្វារ​ផង​ដែរ ដែល​ជា​ហេតុ​នាំ​ឲ្យ​អង្គការ​សង្គម​ស៊ីវិល​មាន​ការ​ព្រួយ​បារម្ភ​ពី​សុវត្ថិភាព​របស់​ពលករ​ខ្មែរ និង​ទទូច​ឲ្យ​ក្រសួង​ធ្វើ​ការ​ពិចារណា​ឡើង​វិញ​ចំពោះ​ចំណុច​នេះ។

យោង​តាម​សេចក្តី​ជូន​ដំណឹង​ស្តី​ពី​ការ​រក​ការងារ​ធ្វើ​នៅ​ក្រៅ​ប្រទេស​នៃ​ក្រសួង ការងារ និង​បណ្តុះ​បណ្តាល​វិជ្ជាជីវៈ​ដែល​ចុះ​ហត្ថលេខា​ដោយ​លោក​រដ្ឋ​មន្រ្តី អ៊ិត សំហេង ចុះ​ថ្ងៃ ទី២៤ ខែ កុម្ភៈ បាន​ឲ្យ​ដឹង​ថា ដើម្បី​ចៀស​វាង​ការ​យល់​ច្រឡំ​ក្រសួង ការងារ និង​បណ្តុះ​បណ្តាល​វិជ្ជាជីវៈបាន​ជូន​ដំណឹង​ដល់​ប្រជា​ពលរដ្ឋ​ទាំង​ពីរ​ភេទ​ដែល​មាន​បំណង​ចង់​ទៅ​ធ្វើ​ការ​នៅ​ក្រៅ​ប្រទេស អាច​ទៅ​ទំនាក់​ទំនង​ជាមួយ​ទីភ្នាក់ងារ​ជ្រើស​រើស​ឯកជន​ស្រប​ច្បាប់​ដែល មាន​អជ្ញាប័ណ្ណ​ពី​ក្រសួង ការងារ។

លោក អ៊ិត សំហេង បាន​ឲ្យ​ដឹង​តាម​រយៈ​លិខិត​ទៀត​ថា បច្ចុប្បន្ន​នេះ​ក្រសួង​បាន​និង​កំពុង​បញ្ជូន​ពលករ​ទៅ​ធ្វើ​ការ​នៅ​ប្រទេស ថៃ ម៉ាឡេស៊ី សិង្ហបុរី ជប៉ុន និង​សាធារណរដ្ឋ កូរ៉េ។ កន្លង​មក​ក្រសួង​បាន​ពិនិត្យ​ឃើញ​ថា មាន​ជន​ខិល​ខូច​មួយ​ចំនួន​បាន​ប្រើ​ល្បិច​បោក​ប្រាស់​ប្រជា​ពលរដ្ឋ​នាំ​ទៅ​ធ្វើ​ការ​នៅ​ក្រៅ​ប្រទេស​ដោយ​ខុស​ច្បាប់ ហើយ​ទទួល​រង​នូវ​ការ​រំលោភ​បំពាន​ផ្សេងៗ និង​រហូត​មាន​គ្រោះថ្នាក់​ដល់​ជីវិត។

ទីភ្នាក់ងារ​ជ្រើស​រើស​ឯកជន​ដែល​ក្រសួង​អះអាង​ថា​បាន​ទទួល​អជ្ញាប័ណ្ណ​ត្រឹម​ត្រូវ​មាន​ចំនួន ៤៩ ក្នុង​នោះ​មាន​ដូចជា Cambodian Labour Supply PTY Ltd, Philimore Cambodian Co.,Ltd, Mey Yorn Service, Top Manpower, VC Manpower, K-L-M Manpower និង​មាន​ក្រុមហ៊ុន​ជាច្រើន​ទៀត។

នៅ​ក្នុង​នោះ​ក្រសួង ការងារ ក៏​បាន​បញ្ជាក់​ផង​ដែរ​ថា ចំពោះ​ការ​ដាក់​ពាក្យ​សុំ​ទៅ​ធ្វើ​ការ​នៅ​សាធារណ​រដ្ឋ កូរ៉េ គឺ​ពុំ​មាន​ទីភ្នាក់ងារ​ជ្រើសរើស​ឯកជន​ណា​មួយ​ធ្វើ​ការងារ​នេះ​ទេ មាន​តែ​ក្រសួង ការងារ មួយ​គត់​ដែល​ធ្វើ​ការងារ​នេះ​ជាមួយ​ក្រសួង ការងារ នៃ​សាធារណរដ្ឋ កូរ៉េ។

លោក អំ សំអាត ប្រធាន​ផ្នែក​បច្ចេកទេស​របស់​អង្គការ លីកាដូ បាន​បង្ហាញ​ពី​ការ​ព្រួយ​បារម្ភ​ទៅ​នឹង​ការ​បញ្ជូន​ពលករ​ទៅ​ធ្វើ​ការ​នៅ​ក្រៅ​ប្រទេស​ជា​ពិសេស​ដោយ​សារ​ឃើញ​មាន​ក្រុមហ៊ុន​មួយ​ចំនួន​ដែល​ធ្លាប់​មាន​បញ្ហា​ជាប់​ទាក់ទង​នឹង​ពាក្យ​បណ្តឹង និង​ក្រុមហ៊ុន​ខ្លះ​ទៀត​កំពុង​ត្រូវ​បាន​អាជ្ញាធរ​ស្វះ​ស្វែង​រក​ការ​ចាប់​ខ្លួន ក៏​មាន​ឈ្មោះ​ដែល​ក្រសួង ការងារ បាន​ប្រកាស​នេះ។

លោក​ថា៖ «ការ​ដាក់​នេះ​ធ្វើ​ឲ្យ​មាន​ការ​សង្ស័យ​ដដែល ហើយ​ជា​ពិសេស​យើង​មិន​ទាន់​បាន​ឃើញ​ពី​ចំណាត់​ការ​ដើម្បី​ធ្វើ​យ៉ាង​ណា​ឲ្យ​ក្រុមហ៊ុន​ទាំង​នេះ មាន​ការ​ទទួល​ខុស​ត្រូវ​ចំពោះ​មុខ​ច្បាប់​នៅ​ឡើយ តែ​ក្រសួង​នៅ​តែ​បន្ត​ផ្តល់​អជ្ញាប័ណ្ណ​ឲ្យ​ក្រុមហ៊ុន​ទាំង​អស់​នេះ​ដើម្បី​បញ្ជូន​ពលករ​ទៅ​ធ្វើការ​នៅ​ក្រៅ​ប្រទេស»។

លោក​ថ្លែង​ថា៖ «ខ្ញុំ​គិត​ថា វា​ជា​ការ​លឿន​ពេក​ដែល​ក្រសួង​ប្រញាប់​ប្រកាស​ពី​ក្រុមហ៊ុន​ទាំង​នេះ​ដែល​មាន​សិទ្ធិ​បញ្ជូន​ពលករ​ទៅ​ក្រៅ​ប្រទេស។ យើង​ក៏​សុំ​ទទូច​ឲ្យ​ក្រសួង​ធ្វើ​ការ​ពិនិត្យ​ពិចារណា​ឡើង​វិញ​ដើម្បី​ជា​សុវត្ថិភាព​ទៅ​ដល់​បង​ប្អូន​ពលករ​របស់​យើង»។

លោក ហេង សួរ អ្នក​នាំ​ពាក្យ​ក្រសួង ការងារ មិន​អាច​សុំ​ការ​អត្ថាធិប្បាយ​បាន​ទេ៕

អត្ថបទគួរចាប់អារម្មណ៍