The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​បញ្ជា​ឲ្យ​រោងចក្រ ឃីង ហ្វើស សម្អាត​បរិស្ថាន​បន្ទាប់​ពី​កម្មករ​សន្លប់

ក្រសួង​បញ្ជា​ឲ្យ​រោងចក្រ ឃីង ហ្វើស សម្អាត​បរិស្ថាន​បន្ទាប់​ពី​កម្មករ​សន្លប់

ក្រសួង​បញ្ជា​ឲ្យ​រោងចក្រ ឃីង ហ្វើស សម្អាត​បរិស្ថាន​បន្ទាប់​ពី​កម្មករ​សន្លប់

កណ្តាលៈ មន្ត្រី​ក្រសួង​ការងារ​បាន​បញ្ជា​ឲ្យ​រោងចក្រ ឃីង ហ្វើស អ៊ីនដាស់ទ្រៀល នៅ​ស្រុក អង្គស្នួល ខេត្ត កណ្ដាល សម្អាត​បរិស្ថាន​នៅ​ក្នុង​រោងចក្រ និង​នៅ​កន្លែង​ធ្វើការ​បន្ទាប់​ពី​កម្មករ​ជាង ១០០ នាក់​បាន​ដួល​សន្លប់​ក្នុង​រយៈ​ពេល​ពីរ​ថ្ងៃ។

លោក សេង សក្កដា អគ្គ​នាយក​នៃ​ក្រសួង ការងារ ដែល​បាន​ចុះ​ផ្ទាល់​ទៅ​រោងចក្រ​ដើម្បី​ទៅ​មើល​កម្មករ​នៅ​មន្ទីរពេទ្យ និង​រោងចក្រ បាន​ប្រាប់​អ្នក​យក​សារព័ត៌មាន​ថា មាន​មូល​ហេតុ​បី​ដែល​បណ្ដាល​ឲ្យ​កម្មករ​សន្លប់។ លោក​បាន​មាន​ប្រសាសន៍​ថា៖ «មូលហេតុ​ដែល​បណ្ដាល​ដួល​សន្លប់​នោះ​គឺ កង្វះ​ខាត​ខ្យល់​នៅ​ខាង​ក្នុង​រោងចក្រ អនាម័យ​កខ្វក់ និង​ការ​ធ្វើ​ការ​លើស​ម៉ោង»។

សេង សក្កដា បាន​និយាយ​ថា រោងចក្រ​បាន​ទុក​ទំនិញ​ជាច្រើន​នៅ​ក្នុង​រោងចក្រ​ដែល​បិទ​បាំង​ខ្យល់ និង​បង្អួច​មិន​ឲ្យ​ខ្យល់​ចូល​ទៅ​ក្នុង​កន្លែង​ការងារ​ដែល​គ្មាន​អនាម័យ​ល្អ។

សេង សក្កដា បាន​បន្ត​ថា៖ «កម្មករ​ធ្វើ​ការ​ថែម​ម៉ោង​ច្រើន​ដែល​បណ្ដាល​ឲ្យ​ពួកគេ​អស់​កម្លាំង​ទាល់​តែ​ដួល​សន្លប់​។ ជួន​កាល​ពួកគេ​ធ្វើ​ការ​ថែម​ម៉ោង​ចំនួន​ពីរ​ម៉ោង និង​ជួន​កាល​បួន​ម៉ោង។ រោងចក្រ​ត្រូវ​តែ​រៀបចំ​កន្លែង​ការងារ​ឲ្យ​បាន​ប្រសើរ​ជាង​មុន​ដោយ​គ្មាន​ការ​បំពុល ដោយ​ឲ្យ​មាន​ខ្យល់​ចូល​គ្រប់​គ្រាន់»។

សេង សក្កដា បាន​លើក​ឡើង​ថា មន្ត្រី​អធិការកិច្ច​នៃ​ក្រសួង ការងារ បាន​រក្សា​ការ​តាម​ដាន​លើ​រោងចក្រ​ថា តើ​រោងចក្រ​ធ្វើ​ការ​ផ្លាស់​ប្ដូរ​តាម​បញ្ជា​របស់​គាត់​ឬ ក៏​អត់។ មូលនិធិ​បេឡា​ជាតិ​សន្តិសុខ​សង្គម​នឹង​ត្រូវ​ចំណាយ​ក្នុង​ការ​រក្សា​សុខភាព និង​ព្យាបាល​កម្មករ​ទាំង​នោះ។ លោក​បាន​មាន​ប្រសាសន៍​បន្ថែម​ទៀត​ថា រោងចក្រ​ត្រូវ​តែ​សហការ​ជាមួយ​កម្មករ​ដើម្បី​បង្កើត​លក្ខខណ្ឌ​និង​អនាម័យ​ល្អ​សម្រាប់​ការងារ​របស់​ពួក​គេ។

លោក ឃួត ទូច ប្រធាន​សហជីព​កម្មករ​សេរី​ប្រចាំ​រោងចក្រ បាន​លើក​ឡើង​កាល​ពី​ម្សិលមិញ​ថា កម្មករ​ជិត ៦០ នាក់​បាន​ដួល​សន្លប់​នៅ​ព្រឹក​ថ្ងៃ​សុក្រ នៅ​ពេល​ដែល​ពួក​គេ​កំពុង​សំពះ​ព្រះសង្ឃ​នៅ​រោងចក្រ បន្ទាប់​ពី​មាន​កម្មករ ៨០ នាក់​បាន​សន្លប់​កាល​ពី​ថ្ងៃ​ព្រហស្បតិ៍។

លោក​បាន​លើក​ឡើង​ថា៖ «រោងចក្រ​បាន​និមន្ដ​ព្រះសង្ឃ​មក​ប្រសិទ្ធពរ​ជ័យ​ឲ្យ​កម្មករ​មាន​សំណាង​ល្អ ប៉ុន្តែ​រំពេច​នោះ​មាន​កម្មករ ៦ នាក់​បាត់​ស្មារតី​អត់​ដឹង​ខ្លួន ហើយ​បន្ទាប់​មក​កម្មករ​ច្រើន​ជាង ៥០ នាក់​តក់ស្លុត និង​ដួល​ចុះ»។

លោក ឃួត ទូច បាន​និយាយ​ថា រោងចក្រ​បាន​រៀបចំ​បរិស្ថាន​ប្រសើរ​ជាង​មុន និង​កម្មករ​នឹង​ត្រលប់​មក​ធ្វើ​ការ​វិញ​ថ្ងៃ​នេះ។ ខ្ញុំ​នឹង​មិន​អនុញ្ញាត​ឲ្យ​កម្មករ​ធ្វើ​ការ​ប្រសិន​បើ​រោងចក្រ​មិន​សម្អាត​កន្លែង​ធ្វើការ​របស់​ពួក​គេ»។

មន្ត្រី​រោងចក្រ ហ្វើស អ៊ីនដាស់ទ្រៀល មួយ​រូប​ដែល​បដិសេធ​មិន​បញ្ចេញ​ឈ្មោះ​បាន​និយាយ​ថា រោងចក្រ​បាន​ធ្វើ​តាម​ការ​បញ្ជា​របស់​មន្ត្រី​ក្រសួង។

មន្ត្រី​រោងចក្រ​រូប​នោះ​បាន​លើក​ឡើង​ថា៖ «ពួក​យើង​បាន​ធ្វើ​ដូច ដែល​លោក​មន្ត្រី​បាន​ប្រាប់​យើង»៕

អត្ថបទគួរចាប់អារម្មណ៍