The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​បរិស្ថាន​​ឲ្យ​ប្រើប្រាស់​នូវ​គម្រោង​ជីវិត​ និង​ធម្មជាតិ

ក្រសួង​បរិស្ថាន​​ឲ្យ​ប្រើប្រាស់​នូវ​គម្រោង​ជីវិត​ និង​ធម្មជាតិ

កុមារា​ម្នាក់​នេះ​បាន​ដង​ទឹក​យក​ទុក​ប្រើប្រាស់​ដោយសារ​តែ​ភាព​រាំងស្ងួត​នៅ​ខេត្ត​កំពង់ធំ។
កុមារា​ម្នាក់​នេះ​បាន​ដង​ទឹក​យក​ទុក​ប្រើប្រាស់​ដោយសារ​តែ​ភាព​រាំងស្ងួត​នៅ​ខេត្ត​កំពង់ធំ។ ហេង ជីវ័ន

ក្រសួង​បរិស្ថាន​​ឲ្យ​ប្រើប្រាស់​នូវ​គម្រោង​ជីវិត​ និង​ធម្មជាតិ

ភ្នំពេញៈ ក្រសួង​បរិស្ថាន​បាន​សហការ​ជាមួយ​អង្គការ​ស្បៀង និង​កសិកម្ម​នៃ​សហប្រជាជាតិ (FAO-UN) ដាក់​ឲ្យ​ប្រើប្រាស់​នូវ​គម្រោង ជីវិត និង​ធម្មជាតិ (Life and Nature) សម្រាប់​ពង្រឹង​សមត្ថភាព​បន្សាំ និង​​ភាព​ធន់​នៃ​សហគមន៍​តាម​មូលដ្ឋាន​ក្នុង​ខេត្ត​ចំនួន ៤ បន្ទាប់ពី​រកឃើញ​ថា​លទ្ធផល​នៃ​គម្រោង​មួយ​ចំនួន​មិន​បាន​ដោះស្រាយ​ភាពក្រីក្រ​ និង​បញ្ហា​ប្រឈម​របស់​សហគមន៍​មូលដ្ឋាន​នៅ​ឡើយ។

គម្រោង ជីវិត និង​ធម្មជាតិ​ទទួល​បាន​ការ​ឧបត្ថម្ភ​មូលនិធិ​ដោយ Global Environment Facility មាន​រយៈពេល ៥ ឆ្នាំ​ក្រោម​ទឹកប្រាក់ ៥ ​លាន​ ២ ​សែន​ដុល្លារ​អាមេរិក​ដែល​មាន​បំណង​ធ្វើឲ្យ​ប្រសើរ​នូវ​ជីវភាព​របស់​ប្រជាកសិករ​នៅ​ជនបទ​ដោយ​ការ​ប្រើ​វិធីសាស្ត្រ​គ្រប់គ្រង​ទីជម្រាល​ខ្នាត​តូច​​ចំពោះ​​ការ​ប្រែប្រួល​អាកាសធាតុ​សម្រេច​បាន​នូវ​សន្តិសុខ​ស្បៀង​ក្នុង​ឃុំ​តំបន់​គោលដៅ​ក្នុង​ខេត្ត​សៀមរាប​ ខេត្ត​កំពង់​ធំ ខេត្ត​ព្រះវិហារ និង​ខេត្ត​រតនគិរី​ដែល​ទី​ជម្រាល​ខ្នាត​តូច​ក្នុង​ឃុំ​ទាំង ៤ គ្រប​ដណ្តប់​លើ​ផ្ទៃដី​ប្រមាណ ៦ ​​ម៉ឺន​ហិកតា និង​មាន​​ប្រជាជន​ប្រមាណ ១ ម៉ឺន​នាក់​។

លោក គីម ណុង នាយក​គម្រោង​ថ្នាក់​ជាតិ និង​ជា​អគ្គនាយក​រង​ក្រសួង​បរិស្ថាន​បាន​ថ្លែង​​ក្នុង​សិក្ខាសាលា​កាលពី​ម្សិលមិញ​ថា​គម្រោង ជីវិត និង​ធម្មជាតិ​ធ្វើ​ឡើង​ក្នុង​គោលបំណង​បង្កើន​សមត្ថភាព​បន្សុំា​របស់​​សហគមន៍​ជនបទ​ទៅ​នឹង​ការ​ប្រែប្រួល​អាកាសធាតុ និង​ចូលរួម​ចំណែក​កាត់បន្ថយ​ភាព​​​ងាយ​រងគ្រោះ​ពិសេស​ជនក្រីក្រ ស្ត្រី និង​ជួយ​បង្កើន​គុណភាព​ចិញ្ចឹម​ជីវិត​ដល់​កសិករ​​ក្នុង​តំបន់​ជម្រាល​ខ្នាត​តូច។

តាមរយៈ​បទពិសោធ​ការងារ​ក្នុង​ក្រសួង​បរិស្ថាន​ជាង ២០ ​ឆ្នាំ​មក​នេះ លោក គីម ណុង បាន​ឲ្យ​ដឹង​ថា​ភាគច្រើន​គម្រោង​ដែល​ដឹកនាំ​ប្រតិបត្តិ​ដោយ​ក្រុម​អ្នក​ជំនាញ​ការ​មិន​សូវ​​បាន​​បំពេញ​តម្រូវការ​ជា​អាទិភាព​របស់​ប្រជាសហគមន៍​មូលដ្ឋាន​ទេ​ពួកគេ​ច្រើន​តែ​ធ្វើ​តាម​ផែនការ​ដែល​បាន​គ្រោង​ទុក​ដែល​​ពេល​ខ្លះ​ផែនការ​ទាំងនេះ​មិន​បាន​ឆ្លើយតប​នូវ​ព្រឹត្តិការណ៍​វិវត្ត​ថ្មី​ដែល​កំពុង​កើត​មាន​ឡើង។

លោក​ថា៖ «ឧទាហរណ៍​មាន​គម្រោង​មួយ​ដែល​ខ្ញុំ​សុំ​មិន​បង្ហាញ​ឈ្មោះ​ដែល​មាន​ទឹកប្រាក់​រាប់​លាន​ដុល្លារ​ធ្វើ​នៅ​​បឹង​ទន្លេសាប​រយៈពេល ៥ ឆ្នាំ​ដែល​ទាក់ទិន​នឹង​និរន្តរភាព​ជីវភាព​​រស់នៅ​របស់​សហគមន៍​ជនបទ​ប៉ុន្តែ​ក្រោយពី​បញ្ចប់​គម្រោង​ប្រជាសហគមន៍​ក្រីក្រ​នៅតែ​ក្រីក្រ​ព្រោះ​គម្រោង​មិន​បាន​ដោះស្រាយ​នូវ​អ្វី​ដែល​សហគមន៍​មូលដ្ឋាន​សំណូមពរ និង​តម្រូវការ​ជាក់ស្តែង​របស់​ពួកគាត់»។

ប្រធាន​ទីប្រឹក្សា​បច្ចេកទេស​នៃ​អង្គការ​ស្បៀង និង​កសិកម្ម​នៃ​សហប្រជាជាតិ លោកស្រី​បណ្ឌិត Stacy Crevello បាន​ឲ្យ​ដឹង​ថា​កម្ពុជា​ងាយ​រងគ្រោះ​ខ្លាំង​ទៅ​នឹង​ឥទ្ធិពល​នៃ​ការ​ប្រែប្រួល​អាកាសធាតុ​ហើយ​បើ​កត្តា​ប្រឈម​នានា​នៅ​តែ​មាន​នោះ​សន្តិសុខ​ស្បៀង​នឹង​ប្រឈម​បញ្ហា​កាន់តែ​ធ្ងន់ធ្ងរ។

លោកស្រី​ថា៖ «ការ​ប្រែប្រួល​អាកាសធាតុ​នឹង​កាត់បន្ថយ​ផលិតផល​កសិកម្ម​បង្ក​ឥទ្ធិពល​អវិជ្ជមាន​ចំពោះ​មុខរបរ​ចិញ្ចឹម​ជីវិត​របស់​ក្រុម​ជន​ងាយ​រងគ្រោះ។ ភាគច្រើន​ស្ត្រី​នៅ​តាម​ជនបទ​អាស្រ័យ​លើ​ការ​ប្រមូល​អនុផល​ព្រៃឈើ​សម្រាប់​ម្ហូបអាហារ​នៅក្នុង​គ្រួសារ និង​​ប្រាក់​កម្រៃ​បន្ទាប់បន្សំ»។

លោកស្រី Stacy Crevello មាន​សុទិដ្ឋិនិយម​ចំពោះ​គម្រោង ជីវិត និង​ធម្មជាតិ​នឹង​នាំ​មក​នូវ​ភាព​ជោគជ័យ​ពិតប្រាកដ​បើ​ប្រៀបធៀប​នឹង​គម្រោង​បន្ស៊ាំ​នឹង​ការ​ប្រែប្រួល​អាកាសធាតុ​ផ្សេង​ទៀត​ដោយ​ហេតុ​ថា គម្រោង​នេះ​នឹង​ធ្វើការ​ជាមួយ​សហគមន៍​តាម​មូលដ្ឋាន​ដោយ​ផ្ទាល់​ឆ្លើយតប​នឹង​តម្រូវការ​ជាក់ស្តែង​ដោយ​មាន​ការ​ចូលរួម​ពី​ភាគី​ពាក់ព័ន្ធ។

នាយក​ប្រតិបត្តិ​វេទិកា​នៃ​អង្គការ​មិនមែន​រដ្ឋាភិបាល​ស្តី​ពី​កម្ពុជា​លោក តឹក វណ្ណារ៉ា យល់​ឃើញ​ថា​គម្រោង​ជីវិត និង​ធម្មជាតិ​ហាក់​បង្ហាញ​ពី​សញ្ញាណ​វិជ្ជមាន​ច្រើន​តាមរយៈ​ការ​ចុះ​អនុវត្ត​ផ្ទាល់​តាម​មូលដ្ឋាន​ជាមួយ​ប្រជាសហគមន៍​ដើម្បី​ឆ្លើយតប​បញ្ហា​ប្រឈម​ខុស​ពី​គម្រោង​មុន។

លោក​ថា៖ «យើង​ឃើញ​ថា​កម្រោង​ភាគច្រើន ​ច្រើន​តែ​នៅ​ថ្នាក់​ជាតិ​មិន​មាន​ការ​ចុះ​ពន្យល់​​ដោយ​ផ្ទាល់​ដល់​ពលរដ្ឋ​តាម​មូលដ្ឋាន​ឡើយ​ហើយ​កម្រិត​នៃ​ការ​យល់ដឹង​របស់​អ្នក​កាន់​គម្រោង​គឺ​នៅ​មាន​ទាប​ដែល​នាំឲ្យ​ការ​អនុវត្ត​នោះ​មិន​មាន​ប្រសិទ្ធភាព​គួបផ្សំ​នឹង​ការ​ប្រើប្រាស់​ថវិកា​មិន​ចំ​គោលដៅ​ទាំង​នេះ​គឺ​មិន​អាច​ឆ្លើយតប​ទៅ​នឹង​សមត្ថភាព​នៃ​ការ​បន្សាំ​ខ្លួន​របស់​សហគមន៍​ចំពោះ​​ការ​ប្រែប្រួល​អាកាសធាតុ​បាន​ឡើយ»។

បើ​តាម​ក្រសួង​បរិស្ថាន​ការ​ប្រែប្រួល​អាកាសធាតុ​បាន​បង្ក​នូវ​ការ​ខូចខាត​គិត​ជា​ទឹកប្រាក់​ប្រមាណ​ ៣៥០ លាន​ដុល្លារ​ស្មើ​នឹង ២,៣ ភាគរយ​​នៃ​ផល​ទុន​ជាតិ​សរុប​ពី​ឆ្នាំ​ ២០១៣ ខណៈ​ដែល​កម្ពុជា​បាន​ព្យាយាម​កៀរគរ​ថវិកា​ពី​ក្រៅ​ប្រទេស​ដើម្បី​ការងារ​ប្រែប្រួល​អាកាសធាតុ​​នេះ​ជា​មធ្យម​ប្រមាណ ៨០ លាន​ដុល្លារ​ក្នុង​ ១ ​ឆ្នាំ​៕

អត្ថបទគួរចាប់អារម្មណ៍

  • កោះកុងៈ កូនអណ្តើក​ហ្លួង​ចំនួន ៣០ ​ក្បាល​បាន​ញាស់​ចេញពី​សម្បុក​នៅលើ​ឆ្នេរ​ខ្សាច់​សិប្បនិម្មិត​ក្នុង​មជ្ឈមណ្ឌល​អភិរក្ស​សត្វ​ល្មូន​ខេត្តកោះកុង កាលពី​សប្តាហ៍​កន្លងទៅ ហើយ​នេះ​គឺជា​លើក​ទី​ ២ ​ហើយ ដែល​អណ្តើក​ហ្លួង​ចិញ្ចឹម​ក្នុង​មជ្ឈមណ្ឌល​នេះ​បាន​ពង​កូន​។ នេះ​បើតាម​អង្គការ​សមាគម​អភិរក្ស​សត្វព្រៃ​នៅ​កម្ពុជា (WCS)​។

  • ភ្នំពេញៈ ការបញ្ចូល​មីក្រូ​សារជាតិ​ក្នុង​អង្ករ គឺជា​ជំហាន​ចម្បង​មួយ​ក្នុងការ​ដោះស្រាយ​បញ្ហា​អាហារូបត្ថម្ភ​ក្នុង​ប្រទេស​កម្ពុជា ដែល​ប្រជាជន​ភាគច្រើន​ទទួលទាន​បាយ ក្នុង​បរិមាណ​ច្រើន​ជា​រៀងរាល់ថ្ងៃ​។ នេះ​បើតាម​មន្ត្រី​ក្រុមប្រឹក្សា​ស្តារ​អភិវឌ្ឍន៍​វិស័យ​កសិកម្ម និង​ជនបទ​។

  • ភ្នំពេញ: ក្នុង​ចំណោម​ភោជនីយដ្ឋាន​ពោរពេញ​ដោយ​សិល្បៈ​ចម្អិន​ម្ហូបអាហារ ការ​គិតគូរ​ពី​និរន្តរភាព​បរិស្ថាន​ភព​ផែន​ដី និង​បង្កប់​រឿង​រ៉ាវ​ប្រពៃណី​វប្បធម៌​ដ៏​អស្ចារ្យ​នៅ​អេស្ប៉ាញ ប៉េរូ​សហរដ្ឋអាមេរិក​ ថៃ ដាណឺម៉ាក​ នូវែលសេឡង់ ចិន ជប៉ុន អ៊ីតាលី និង​ម៉ិកស៊ិក អាហារ​នៅ​​ផ្ទះ​ប្រពៃណី​បុរាណ​មួយ​​​តាម​ដង​ទន្លេ​មេគង្គ

  • ភ្នំពេញៈ ទាំង​អ្នកនយោបាយ អ្នកវិភាគ និង​ស្ថាប័ន​គណៈកម្មាធិការ​ជាតិ​រៀបចំ​ការបោះឆ្នោត​បានចាត់ទុក​ដំណើរការ​ឃោសនា​រក​សំឡេងឆ្នោត ក្នុង​រយៈពេល ៣ ​ថ្ងៃ​របស់​គណបក្ស​នយោបាយ ដែល​បាន​ចុះបញ្ជី​បេក្ខជន​ចូលរួម​បោះឆ្នោត​ជ្រើសរើស​ក្រុមប្រឹក្សាឃុំ សង្កាត់​អាណត្តិ​ទី​ ៥ ដែល​នឹង​ប្រព្រឹត្តទៅ​នៅ​ថ្ងៃទី​ ៥ ខែមិថុនា ថា មាន​ភាពចាស់ទុំ​ផ្នែក​នយោបាយ និង​មិនមាន​អំពើហិង្សា​ណាមួយ​កើតឡើង​នោះ

  • ភ្នំពេញៈ សាលាឧទ្ធរណ៍​ភ្នំពេញ​នៅ​ថ្ងៃទី​ ២៣ ​ឧសភា បានប្រកាស​សាលដីកា​កំបាំង​មុខមន្ត្រី​សមាគម​ការពារ​សិទ្ធិមនុស្ស​អាដហុក​ ៤ ​រូប និង​អតីត​មន្ត្រី​ ១ ​រូប​ទៀត​សម្រេច​តម្កល់​សាលក្រម​របស់​សាលាដំបូង​រាជធានី​ភ្នំពេញ​ដដែល បន្ទាប់ពី​បាន​កាត់ក្តី​ឱ្យ​ពួកគេ​ជាប់ពន្ធនាគារ​ក្នុង​ម្នាក់​ ៥ ​ឆ្នាំ តែ​ឱ្យ​អនុវត្ត​ទោស ​១៤ ​ខែ​ពាក់ព័ន្ធ​បទចោទ​សូកប៉ាន់​សាក្សី និង​សមគំនិត​សូកប៉ាន់​សាក្សី​ដល់​ នាង ខុម ចាន់តារាទី ហៅ​ ស្រីមុំ​។

  • បន្ទាយមានជ័យៈ ក្នុង​មួយ​ថ្ងៃៗ​មាន​ប្រជាពលរដ្ឋ​នៅតាម​ព្រំដែន ជាពិសេស​ពលករ​ខ្មែរ​ពី ​៤០០ ទៅ​ ៥០០​ នាក់​បាន​ទៅ​ស្នើសុំ​ធ្វើ​បណ្ណ​ឆ្លងដែន ដើម្បី​បាន​ចូលទៅ​ធ្វើការ ឬ​លក់ដូរ​ស្របច្បាប់ នៅក្នុង​ប្រទេស​ថៃ បន្ទាប់ពី​ភាគី​ទាំង​ ២​ បាន​ឯកភាព​គ្នា​បើក​ច្រកព្រំដែន​ឡើងវិញ កាលពី​ថ្ងៃទី​ ១ ខែឧសភា ក្នុង​កម្រិត​ថ្នាក់​តំបន់​។