ភ្នំពេញៈ ក្រសួងព័ត៌មាន បានប្រកាសទទួលយកការចូលរួមនិងការផ្តល់មតិយោបល់ពីមជ្ឈដ្ឋានជាតិ និងអន្តរជាតិ ទាំងប្រជាពលរដ្ឋ និងអង្គការសង្គមស៊ីវិល ដើម្បីពិចារណាដាក់បញ្ចូលទៅក្នុងសេចក្តីព្រាងតាក់តែងច្បាប់ស្តីពីសិទ្ធិទទួលបានព័ត៌មាន ដែលនឹងដំណើរការរយៈពេល ៣ ឆ្នាំនេះ។
ទីប្រឹក្សាក្រសួងព័ត៌មាន និងជាអគ្គនាយករងទីភ្នាក់ងារសារព័ត៌មានកម្ពុជា (AKP) លោក អ៊ុក គឹមសេង ដែលត្រូវបានចាត់ឲ្យទទួលបន្ទុកការងារនេះ បានប្រាប់ ភ្នំពេញ ប៉ុស្តិ៍ កាលពីម្សិលមិញនេះថា ដើម្បីដំណើរការកិច្ចការងារនេះប្រកបដោយតម្លាភាព ក្រសួងព័ត៌មាន ក្នុងពេលឆាប់ៗនេះ នឹងរៀបចំជាគេហទំព័រមួយដែលផ្សព្វផ្សាយពីដំណើរការតាក់តែង រួមនឹងសេចក្តីព្រាងច្បាប់ដែលធ្វើរួច ដើម្បីទទួលយកមតិគាំទ្រនិងរិះគន់ពីសាធារណជន មុនពេលសម្រេចចេញជាសេចក្តីព្រាងច្បាប់។
លោកបន្តថា៖ «ជួនកាលការយល់ឃើញរបស់ប្រជាពលរដ្ឋ មានកន្លែងខ្លះក៏អ្នកច្បាប់យើងគិតមិនដល់ដែរ យើងអាចចាំស្តាប់មើលតើពួកគាត់យល់យ៉ាងម៉េច? យើងអាចពិចារណាដែរ! និយាយរួមក្រសួងស្វាគមន៍គ្រប់ជ្រុងនៃមតិ ដើម្បីឲ្យច្បាប់ហ្នឹង ទទួលយកបានទាំងអស់គ្នា... យើងក៏ទទួលយកមតិតាមសិក្ខាសាលា និងតាមអនឡាញដែរ»។
លោក អ៊ុក គឹមសេង បន្តឲ្យដឹងដែរថា កិច្ចការងារនេះបានចាប់ផ្តើមតាំងពីដើម ឆ្នាំ២០១៤ មកម៉្លេះ ហើយគ្រោងនឹងបញ្ចប់ក្នុងរយៈពេល ៣ឆ្នាំ តាមការគ្រោងទុក។ លោកបន្តថា៖ «ក្រោមការគាំទ្រពីយូណេស្កូ គឺយើងនឹងបន្តពិនិត្យលើសេចក្តីព្រាងច្បាប់ ដែលមានស្រាប់របស់ក្រសួងទំនាក់ទំនងព្រឹទ្ធសភា រដ្ឋសភា និងអធិការកិច្ច កាលពី ឆ្នាំ២០០៧»។
កាលពី ឆ្នាំ២០០៧ ក្រសួងទំនាក់ទំនងព្រឹទ្ធសភា រដ្ឋសភា និងអធិការកិច្ច បានបញ្ចប់សេចក្តីព្រាងឯកសារគោលនយោបាយ ស្តីពីសិទ្ធិទទួលបានព័ត៌មាន ហើយគណបក្សនយោបាយទាំង ៥ ដែលមានអាសនៈនៅក្នុងសភា ក៏បានបង្ហាញឆន្ទៈនយោបាយនិងការប្តេជ្ញាចិត្តក្នុងការជំរុញនិងអនុម័តច្បាប់ស្តីពីសិទ្ធិទទួលបានព័ត៌មាន ឲ្យមានតាំងពីអាណត្តិ ទី៤ ប៉ុន្តែ សេចក្តីស្នើច្បាប់ដែលស្នើឡើងដោយលោក សុន ឆ័យ សមាជិកសភាគណបក្សជំទាស់ ត្រូវបដិសេធមិនលើកយកមកពិភាក្សា និងអនុម័តចំនួន ២លើក។
នាយកវិទ្យាស្ថានតស៊ូមតិ និងគោលនយោបាយ (API) លោក ណែប ស៊ីនថៃ បានស្វាគមន៍ការបើកទូលាយនេះ តែលោកបានលើកឡើងពីកង្វល់នៃសេចក្តីព្រាងច្បាប់នេះដោយសារថា ក្រុមការងារបច្ចេកទេសតាក់តែងច្បាប់ទាំងនោះមិនមានការចូលរួមពីសង្គមស៊ីវិលឬមន្រ្តីជំនាញឡើយ។
លោកបានបន្តថា៖ «ដើម្បីរក្សាតម្លាភាពតាក់តែងច្បាប់ប្រកបដោយប្រសិទ្ធភាព ក្រោមកិច្ចសម្របសម្រួលពីដៃគូពាក់ព័ន្ធ API គ្រោងនឹងបញ្ចប់នូវកាលវិភាគផ្នែកច្បាប់ ផ្តោតលើគ្រប់វិស័យ ដែលជាមូលដ្ឋានគ្រឹះ សម្រាប់ការតាក់តែងច្បាប់នេះ...យើងនឹងបញ្ចប់កាលវិភាគនេះ នៅពាក់កណ្តាល ខែធ្នូ ព្រោះយើងបានធ្វើវាយូរមកហើយ តាំងតែពី ឆ្នាំ២០១០»។
នាយកប្រតិបត្តិនៃមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ (CCIM) លោក ប៉ា ងួនទៀង យល់ឃើញថា ក្នុងដំណើការនេះអង្គការសង្គមស៊ីវិលជាច្រើន បានផ្តួចផ្តើមគំនិតលើការបង្កើតច្បាប់នេះជាង ១០ ឆ្នាំមកហើយ ដោយសារច្បាប់នេះមានសារៈសំខាន់ ដើម្បីចាប់បង្ខំរដ្ឋាភិបាល បើកចំហពីព័ត៌មានទាក់ទងនឹងតួនាទីការងារចំណូលចំណាយថវិកាជាតិ និងបំណុលជាតិជាដើម។
លោកបន្តថា៖ «នៅចុងឆ្នាំនេះ សង្គមស៊ីវិលនឹងធ្វើយុទ្ធនាការអប់រំប្រជាពលរដ្ឋ ឲ្យយល់ពីសិទ្ធិទទួលបានព័ត៌មាន ហើយព័ត៌មានសាធារណៈនេះជាអ្វី? មានសារៈសំខាន់អ្វីខ្លះដល់ប្រជាពលរដ្ឋ?»។
កាលពីដើម ឆ្នាំ២០១៤ ក្រសួងព័ត៌មាន បានចុះអនុស្សរណៈយោគយល់គ្នាជាមួយអង្គការ UNESCO ដើម្បីដឹកនាំបង្កើតច្បាប់ស្តីពីសិទ្ធិទទួលបានព័ត៌មាននេះក្នុងរយៈពេល ៣ឆ្នាំ ក្រោមជំនួយពីរដ្ឋាភិបាលស៊ុយអែត ១ លានដុល្លារសម្រាប់ការងារនេះផងដែរ៕
