ភ្នំពេញៈ ក្រសួងមហាផ្ទៃនឹងចំណាយប្រាក់រហូតដល់ប្រមាណជា ៣០ លានដុល្លារក្រោមកិច្ចសហការជាមួយក្រុមហ៊ុនចិនដើម្បីបង្កើត «ស្ថានីយវិទ្យុ និងទូរទស្សន៍មហាផ្ទៃ» ក្នុងគោលបំណងបង្កើនការផ្សព្វផ្សាយព័ត៌មានដែលគ្រោងនឹងផ្សាយសាកល្បងនៅដើមឆ្នាំ ២០១៦ ស្របពេលគ្នានឹងផែនការផ្សាយទូរទស្សន៍របស់គណបក្សសង្គ្រោះជាតិ។
ថ្លែងបន្ទាប់ពីកម្មវិធីចុះហត្ថលេខាលើកិច្ចព្រមព្រៀងសហការបង្កើត ស្ថានីយវិទ្យុ និងទូរទស្សន៍មហាផ្ទៃនៅទីស្តីការក្រសួងកាលពីម្សិលមិញឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស ខេង បានបញ្ជាក់ថា៖ «ទីតាំង (ស្ថានីយវិទ្យុ និងទូរទស្សន៍) ប្រហែលជានៅជាយក្រុងហើយចំណាយប្រមាណ ៣០ លានដុល្លារ មិនខុសពីទូរទស្សន៍ផ្សេងៗទេគឺបង្កើតដើម្បីបម្រើផលប្រយោជន៍សង្គម»។
អគ្គនាយកនៃអគ្គនាយកដ្ឋានភ័ស្តុភារ និងហិរញ្ញវត្ថុនៃក្រសួងមហាផ្ទៃលោក ម៉ៅ ប៊ុនណារិន បានឲ្យដឹងថាកិច្ចព្រមព្រៀងបង្កើតស្ថានីយវិទ្យុ និងទូរទស្សន៍មហាផ្ទៃសហការជាមួយក្រុមហ៊ុន China Fujian Zhongya Culture Media Co.Ltd នៃសាធារណរដ្ឋប្រជាមានិតចិនដោយគ្រោងនឹងធ្វើការផ្សាយសាកល្បងនៅដើមឆ្នាំ ២០១៦ ហើយផ្សាយជាផ្លូវការនៅពាក់កណ្តាលឆ្នាំ ២០១៦ ។
លោកថា កន្លងមកក្រសួងមហាផ្ទៃបានផលិតកម្មវិធីទូរទស្សន៍មួយមានឈ្មោះថា «នាទីសន្តិសុខមាតុភូមិដោយផ្តោតសំខាន់ទៅលើមាតិកាផ្សាយអំពីសកម្មភាពថ្នាក់ដឹកនាំក្រសួងមហាផ្ទៃព្រឹត្តិការណ៍សន្តិសុខជាតិ និងស្នាដៃផ្សេងៗលើការងារការការពារសណ្តាប់ធ្នាប់សាធារណៈ និងសុវត្ថិភាពសង្គមដោយចាក់ផ្សាយតាមរយៈបណ្តាស្ថានីយទូរទស្សន៍ផ្សេងៗមួយចំនួនអស់កាលជាង ២០ ឆ្នាំមកហើយ។
លោក ម៉ៅ ប៊ុនណារិន ថា៖ «បច្ចុប្បន្នដោយសារតែស្ថានភាពរីកចម្រើន និងការប្រកួតប្រជែងលើទីផ្សារបណ្តាស្ថានីយទូរទស្សន៍ទាំងនោះបានចាប់ផ្តើមបង្កើនកម្មវិធីផ្សាយរបស់ខ្លួនដើម្បីប្រកួតប្រជែង និងរកប្រាក់ចំណូល។ កត្តានេះនាំឲ្យការចាក់ផ្សាយកម្មវិធីនាទីសន្តិសុខមាតុភូមិត្រូវបានអាក់ខានពន្យារពេលផ្សាយកាត់បន្ថយរយៈពេលផ្សាយ និងផ្សាយមិនទៀងទាត់មិនអាចឆ្លើយតបទៅនឹងពេលវេលា និងព្រឹត្តិការណ៍នៃព័ត៌មានឡើយ»។
អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ បានបង្ហាញភាពភ្ញាក់ផ្អើលចំពោះការបង្កើតស្ថានីយទូរទស្សន៍របស់ក្រសួងដែលមិនធ្លាប់មានពីមុនមក។
លោកថា៖ «ទូរទស្សន៍រដ្ឋយើងមានហើយហេតុអ្វីចាំបាច់ត្រូវមានតាមក្រសួងទៀតយើងមិនយល់ត្រង់ចំណុចនេះយើងមិនទាន់បានដឹងច្បាស់ពីកម្មវិធី ឬគម្រោងផែនការស្នើសុំពីអង្កាល់យើងទើបបានព័ត៌មាននេះទេយើងភ្ញាក់ផ្អើលមែនទែន»។
កន្លងទៅគណបក្សសង្គ្រោះជាតិក៏បានប្រកាសពីគម្រោងបង្កើតទូរទស្សន៍ផ្ទាល់ខ្លួនដែរដោយមានឈ្មោះថាទូរទស្សន៍ព្រះអាទិត្យក្រោមគម្រោងចំណាយប្រមាណពី ៣ ទៅ ៤ លានដុល្លារ និងដាក់ដំណើរការនៅដើមឆ្នាំ ២០១៦។ បើតាមលោក យ៉ែម បុញ្ញឫទ្ធិ មូលនិធិបង្កើតទូរទស្សន៍ព្រះអាទិត្យប្រមូលបានប្រាក់ប្រមាណ ៤០ ម៉ឺនដុល្លារ គិតត្រឹមថ្ងៃម្សិលមិញ។
បើតាមប្រសាសន៍ លោក ប៊ុនណារិន ទូរទស្សន៍មហាផ្ទៃកាណាល់ប៉ុស្តិ៍លេខ ៦១ និងវិទ្យុ FM លេខ ៩០.២៥ MHz នឹងផ្សព្វផ្សាយទៅលើការងារសំខាន់ៗរួមមានការអប់រំចំណេះដឹងច្បាប់សកម្មភាពថ្នាក់ដឹកនាំព្រឹត្តិការណ៍នយោបាយ សន្តិសុខ និងសេដ្ឋកិច្ចក្នុងតំបន់ពិសេសការងារគ្រប់គ្រងរដ្ឋបាលដែនដីសណ្តាប់ធ្នាប់សាធារណៈស្ថិរភាពនយោបាយ និងសុវត្ថិភាពសង្គម។ ក្រៅពីនេះលោកថាផែនការបង្កើតស្ថានីយវិទ្យុ និងទូរទស្សន៍មហាផ្ទៃក៏មានការរៀបចំផែនការយុទ្ធសាស្ត្រទីផ្សាររួមមាន ការផ្សព្វផ្សាយពាណិជ្ជកម្ម និងការលក់ ការផ្តល់សេវាកម្ម និងតម្លៃទីផ្សារ និងអតិថិជនព្រមទាំងទំនាក់ទំនងសាធារណៈជាដើម៕
