The Phnom Penh Post Search

Search form

Logo of Phnom Penh Post newspaper Phnom Penh Post - ក្រសួង​លើក​ការ​ផ្តល់​ពាក្យ​ប្រឡង​ធ្វើ​ការ​នៅ​កូរ៉េ​ទៅ​តាម​ខេត្ត




ក្រសួង​លើក​ការ​ផ្តល់​ពាក្យ​ប្រឡង​ធ្វើ​ការ​នៅ​កូរ៉េ​ទៅ​តាម​ខេត្ត

ក្រសួង​លើក​ការ​ផ្តល់​ពាក្យ​ប្រឡង​ធ្វើ​ការ​នៅ​កូរ៉េ​ទៅ​តាម​ខេត្ត

130813_09a
ពលការិនីខ្មែរដែលប៉ុនប៉ងទៅធ្វើការនៅកូរ៉េ តែត្រូវក្រុមហ៊ុនបោកប្រាស់កន្លងមក ហេង ជីវ័ន

ភ្នំពេញៈ ក្រសួង​ការងារ​បាន​ប្រកាស​លុប​ចោល​ការ​ចែក​ពាក្យ​សម្រាប់​ប្រឡង​ភាសា​កូរ៉េ​ដែល​គ្រោង​នឹង​ធ្វើ​នៅ​វិទ្យាស្ថាន​ជាតិ​ពហុ​បច្ចេកទេស​កម្ពុជា (NPIC) ដោយ​សារ​តែ​កង្វះ​សំណុំ​ឯកសារ​សម្រាប់​ដាក់​ប្រឡង។

តាម​សេចក្ដី​ជូន​ដំណឹង​របស់​ក្រសួង​ការងារ​មាន​ចុះ​ហត្ថលេខា​លោក ហេង សួរ ជា​អគ្គ​នាយក និង​ជា​ប្រធាន​រដ្ឋបាល​និង​ហិរញ្ញវត្ថុ នៃ​គណៈកម្មាធិការ​បណ្ដុះ​បណ្ដាល​និង​បញ្ជូន​ពលករ​ទៅ​ធ្វើ​ការ​នៅ​បរទេស ដែល​ភ្នំពេញ ប៉ុស្តិ៍ ទទួល​បាន​ពី​ម្សិលមិញ​បាន​ឲ្យ​ដឹង​ថា គណៈកម្មាធិការ​នេះ​បាន​ធ្វើ​ការ​ផ្លាស់​ប្ដូរ​នូវ​ទម្រង់​នៃ​ការ​ចែក​ចាយ​និង​ទទួល​ពាក្យ​ទៅ​ធ្វើ​តេស្ត​ទៅ​តាម​បណ្ដា​ខេត្ត​មួយ​ចំនួន​វិញ​ចាប់​ពី ថ្ងៃ​ទី១៣ ដល់​ថ្ងៃ​ទី១៦ ខែ សីហា ឆ្នាំ ២០១៣។

សេចក្ដី​ជូន​ដំណឹង​បន្ត​ថា៖ «ដោយ​សារ​តែ​ឯកសារ​ពាក់​ព័ន្ធ​នឹង​ការ​ដាក់​ពាក្យ​និង​ទទួល​ពាក្យ​ប្រឡង​ភាសា​កូរ៉េ​លើក​ទី១០ និង​ដោយ​សារ​បេក្ខជន បម្រុង​មក​ប្រឡង​មាន​ចំនួន​ច្រើន​លើស​លប់​នៅ​តាម​បណ្តា​ខេត្ត​វិញ»។

ការ​ចែក​ចាយ ពាក្យ​មាន​នៅ​តាម​ខេត្ត​ដូចជា ខេត្ត ស្វាយរៀង ព្រៃវែង ក្រចេះ កំពង់ចាម កំពង់ធំ សៀមរាប បាត់ដំបង ពោធិ៍សាត់ កំពង់ឆ្នាំង កំពង់ស្ពឺ កំពត តាកែវ និង​ខេត្ត កណ្ដាល។

លោក សន សុខឃីម មន្ត្រី​បម្រើការ​នៅ​ក្រសួង​ការងារ​ដែល​ចុះ​ធ្វើ​ការងារ​នេះ​ផ្ទាល់​នៅ​ខេត្ត ព្រៃវែង បាន​ឲ្យ​ដឹង​ថា មាន​ទម្រង់​ពាក្យ​សុំ​ជាង ៣ ពាន់​ច្បាប់​បាន​ត្រៀម​បម្រុង​សម្រាប់​ចែក​ជូន​បេក្ខជន​ក្នុង​ខេត្ត ព្រៃវែង ដែល​អាច​ប្រហាក់​ប្រហែល​នឹង​ចំនួន​ពី​លើក​មុន​ដែរ។

លោក​បញ្ជាក់​ថា ៖ «យើង​មិន​ដឹង​ថា តើ​មាន​បេក្ខជន​ប៉ុន្មាន​នាក់​នឹង​មក​ទទួល​យក​ពាក្យ​ទាំង​នេះ​ទេ តែ​យើង​បាន​ត្រៀម​ជាង ៣ ពាន់​ច្បាប់​សម្រាប់​ពួកគេ​ហើយ​នឹង​យក​មក​ថែម​ទៀត បើ​សិន​មាន​បេក្ខជន​ច្រើន​ជាង​ចំនួន​នេះ​។ នៅ​ក្នុង​ខេត្ត ព្រៃវែង មាន​បេក្ខជន​ចន្លោះ​ពី ៣ ពាន់​ទៅ ៤ ពាន់​នាក់ បាន​ដាក់​ពាក្យ​ប្រឡង​ជា​រៀង​រាល់​ឆ្នាំ»។

លោក សុខឃីម អះអាង​ថា៖ «នៅ​ក្នុង​រាជធានី​ភ្នំពេញ ក្រសួង​បាន​សម្រេច​លុប​ចោល​ការ​ចែក​ចាយ​និង​ទទួល​ពាក្យ ព្រោះ​យើង​មិន​ចង់​ឲ្យ​បេក្ខជន​ទាំងអស់​មក​ពី​គ្រប់​ខេត្ត​ជួប​ជុំ​គ្នា ច្រើន​កុះករ​នៅ​ក្នុង​ទីក្រុង ដែល​អាច​បង្ក​ឲ្យ​មាន​ភាព​អនាធិបតេយ្យ​ដែល​យើង​មិន​នឹក​ស្មាន​ដល់​។ បើ​សិន​យើង​មិន​មាន​ពាក្យ​គ្រប់​គ្រាន់​ឲ្យ​ទេ ពួកគេ​នឹង​នៅ​រង់ចាំ​រហូត​ទទួល​បាន។ ដូច្នេះ​វា​មិន​ជា​ការ​ល្អ​ទេ​ទើប​យើង​សម្រេច​ចែក​ពាក្យ​នៅ​តាម​បណ្ដា​ខេត្ត​ដែល​ងាយ​ក្នុង​ការ​មក​ទទួល​ពាក្យ​ផង​ដែរ»។

លោក សុខឃីម លើក​ឡើង​ថា បេក្ខជន​មិន​ចាំ​បាច់​ចំណាយ​ពេល​និង​ថវិកា​បន្ថែម​ក្នុង​ការ​ធ្វើ​ដំណើរ ទៅ ភ្នំពេញ ដើម្បី​ទទួល​ពាក្យ​ប្រឡង​ឡើយ​តែ​គេ​អាច​ទទួល​បាន​លឿន​និង​ចំណាយ​ពេល​តិច​នៅ​តាម​មណ្ឌល​បណ្តុះ​បណ្តាល​វិជ្ជាជីវៈ​តាម​ខេត្ត​ដែល​ពួក​គេ​រស់​នៅ​ឬ​ជិត​ខេត្ត​របស់​ពួក​គេ។

លោក សុខឃីម បញ្ជាក់​ថា មាន​ពលករ​កម្ពុជា​ជិត ៣ ម៉ឺន​នាក់​កំពុង​បម្រើការ​នៅ​កូរ៉េ​ខាង​ត្បូង។

មន្ត្រី​នៅ​ក្រសួង​ការងារ​សុំ​មិន​បញ្ចេញ​ឈ្មោះ​ពី​ម្សិលមិញ​បាន​ប្រាប់​ថា ក្រសួង​មិន​មែន​ភ័យ​ខ្លាច​មាន​បញ្ហា​កើត​ឡើង​នៅ​ភ្នំពេញ​ទេ ប៉ុន្តែ​មាន​បំណង​ចង់​បង្ក​ភាព​ងាយ​ស្រួល​ដល់​បេក្ខជន​តែ​ប៉ុណ្ណោះ។

មន្ត្រី ដដែល​នេះ​ថា៖ «យើង​មិន​អាច​រៀបចំ​ឯកសារ​នៅ​មួយ​កន្លែង​ឲ្យ​ទាន់​ពេល​បាន​ទេ ដូច្នេះ​ទើប​ធ្វើការ​ចែក​ចាយ​នៅ​តាម​ខេត្ត​មួយ​ចំនួន​។ ដោយ​យើង​ចង់​ជួយ​ពួកគេ​ឲ្យ​មាន​ភាព​ងាយ​ស្រួល​និង​មិន​ចំណាយ​ពេល​ច្រើន»។

មន្ត្រី​ដដែល​នេះ​បន្ត​ថា នៅ​ឆ្នាំ​នេះ ក្រសួង​គ្រោង​នឹង​បញ្ជូន​ពលករ​ជាង ៦ ពាន់​នាក់​ឲ្យ​ទៅ​ធ្វើ​ការ​នៅ​ប្រទេស​កូរ៉េ​ខាង​ត្បូង។

មន្ត្រី មិន​ប្រាប់​ឈ្មោះ​រូប​នេះ​លើក​ឡើង​ដែរ​ថា ៖ «យើង​គ្រោង​នឹង​បញ្ជូន​ពលករ ៤ ពាន់​នាក់​ទៅ​ធ្វើ​ការ​នៅ​ផ្នែក​ឧស្សាហកម្ម ចំនួន ៧០០ នាក់ នៅ​ខាង​ផ្នែក​សំណង់ និង​ជាង ១ ពាន់​នាក់​នៅ​ខាង​ផ្នែក​កសិកម្ម»។ ប៉ុន្តែ​លោក​មិន​ដឹង​ប្រាកដ​ទេ​ថា នៅ​ឆ្នាំ​ក្រោយ​តើ​ក្រសួង​នឹង​ធ្វើ​ដូច​គ្នា​នេះ​ដែរ​ឬ​យ៉ាង​ណា​នោះ​ទេ៕ PN

អត្ថបទគួរចាប់អារម្មណ៍