The Phnom Penh Post Search

Search form

Logo of Phnom Penh Post newspaper Phnom Penh Post - ក្រសួង​ស្នើ​ព្រះ​មហាក្សត្រ​លើក​លែង-បន្ធូរ​បន្ថយ​ទោស​ទណ្ឌិត ៨២០ នាក់




ក្រសួង​ស្នើ​ព្រះ​មហាក្សត្រ​លើក​លែង-បន្ធូរ​បន្ថយ​ទោស​ទណ្ឌិត ៨២០ នាក់

រៀបចំ​ប្រារព្ធ​ព្រះ​រាជ​ពិធី​គ្រង​រាជ​សម្បត្តិ​ព្រះ​មហាក្សត្រ សម្តេច​ព្រះ​បរមនាថ នរោត្តម សីហមុនី​នៅ​ថ្ងៃ​ទី ២៩ តុលា។ ក្រសួង​យុត្តិធម៌ បាន​ស្នើ​សុំ​ព្រះ​អង្គ​ព្រះ​រាជ​ទាន​លើក​លែង​ទោស និង​បន្ធូរ​បន្ថយ​ទោស​ដល់​ទណ្ឌិត​ទូ​ទាំង​ប្រទេស។
រៀបចំ​ប្រារព្ធ​ព្រះ​រាជ​ពិធី​គ្រង​រាជ​សម្បត្តិ​ព្រះ​មហាក្សត្រ សម្តេច​ព្រះ​បរមនាថ នរោត្តម សីហមុនី​នៅ​ថ្ងៃ​ទី ២៩ តុលា។ ក្រសួង​យុត្តិធម៌ បាន​ស្នើ​សុំ​ព្រះ​អង្គ​ព្រះ​រាជ​ទាន​លើក​លែង​ទោស និង​បន្ធូរ​បន្ថយ​ទោស​ដល់​ទណ្ឌិត​ទូ​ទាំង​ប្រទេស។ ហេង ជីវ័ន

ក្រសួង​ស្នើ​ព្រះ​មហាក្សត្រ​លើក​លែង-បន្ធូរ​បន្ថយ​ទោស​ទណ្ឌិត ៨២០ នាក់

ភ្នំពេញៈ ក្រសួង​យុត្តិធម៌​បាន​ស្នើ​សុំ​ព្រះ​មហាក្សត្រ​ព្រះ​រាជទាន​លើក​លែង​ទោស​និង​បន្ទូរ​បន្ថយ​ទោស​ដល់​ទណ្ឌិត​ទូទាំង​ប្រទេស​សរុប​ចំនួន ៨២០ នាក់ នៅ​ក្នុង​ពិធី​បុណ្យ​អុំទូក អក​អំបុក សំពះ​ព្រះខែ ដែល​នៅ​ក្នុង​ប្រតិទិន​បាន​កំណត់​ប្រារព្ធ​ធ្វើ​រយៈ​ពេល ៣​ថ្ងៃ ចាប់​ពី​ថ្ងៃ ទី៥ ដល់​ថ្ងៃ ទី៧ វិច្ឆិកា ខាង​មុខ​នេះ។

លោក គុយ ប៊ុនសន អគ្គ​នាយក​នៃ​អគ្គ​នាយកដ្ឋាន​ពន្ធនាគារ​នៃ​ក្រសួង​មហាផ្ទៃ ថ្លែង​ថា លោក​ពុំ​បាន​ទទួល​ព័ត៌មាន​ទាក់ទិន​ទៅ​នឹង​ការ​លើក​លែង​ទោស​និង​បន្ធូរ​បន្ថយ​ទោស​នៅ​ក្នុង​ពិធី​គម្រប់​ខួប ១០ ឆ្នាំ​នៃ​ការ​គ្រង​រាជ្យ​របស់​ព្រះ​មហាក្សត្រ​ព្រះ​បាទ​នរោត្តម​សីហមុនី នោះ​ទេ។

លោក​បាន​ថ្លែង​ថា៖ «មាន​ការ​ស្នើ​សុំ​លើក​លែង​ទោស​និង​បន្ធូរ​បន្ថយ​ទោស​ដល់​ទណ្ឌិត​ក្នុង​ពិធី​បុណ្យ​អុំ​ទូក»។

លោក សុច សុផាន់ណារ៉ា ប្រធាន​នាយកដ្ឋាន​ព្រហ្មទណ្ឌ​នៃ​ក្រសួង​យុត្តិធម៌​បាន​ថ្លែង​ថា នៅ​ក្នុង​រដូវ​លើក​លែង​ទោស​បន្ទូរ​បន្ថយ​ទោស​ដល់​ទណ្ឌិត​នៅ​ក្នុង​ពិធី​បុណ្យ​អុំ​ទូក ហើយ​ទណ្ឌិត​ដែល​បាន​ស្នើ​មក​នោះ​មាន​ខាង​ពន្ធនាគារ​មាន ២០ ខេត្ត​និង​មណ្ឌល​អប់រំ​កែប្រែ​ទាំង ៤ ហើយ​ទណ្ឌិត​ដែល​បាន​ស្នើ​សុំ​លើក​លែង​ទោស​និង​បន្ធូរ​បន្ថយ​ទោស​មាន​ចំនួន ៨២០ នាក់។

លោក​ថា៖ «៨២០ នាក់​គ្រាន់​តែ​ដាក់​មក​ស្នើ​សុំ​ដាក់​ជូន​គណៈ​កម្មាធិការ ក្នុង​ការ​ពិនិត្យ​និង​សម្រេច​ដោយ​ឈរ​លើ​គោល​ការ​ច្បាប់»។

លោក​បន្ត​ថា ការ​លើក​លែង​ទោស​នោះ​គឺ​ផ្តោត​ទៅ​លើ​ទណ្ឌិត​ណា​ដែល​មាន​ការ​កែប្រែ​ខ្លួន​នៅ​ក្នុង​ពន្ធនាគារ ហើយ​ជា​គោល​ការណ៍ ការ​លើក​លែង​ទោស​និង​បន្ធូរ​បន្ថយ​ទោស​គឺ​មួយ​ឆ្នាំ​មាន ៣ ដង គឺ​ចូល​ឆ្នាំ វិសាក​បូជា​និង​ពិធី​អុំទូក។

លោក​ថ្លែង​ថា៖ «ការ​លើក​លែង​ទោស​នោះ​មិន​បាន​បញ្ជាក់​បទ​ល្មើស​ធ្ងន់ធ្ងរ​ឬ​យ៉ាង​ណា​នោះ​ទេ គឺ​ពិនិត្យ​ទៅ​លើ​ទណ្ឌិត​នោះ​អនុវត្តន៍​ទៅ​តាម​គោល​ការណ៍​ច្បាប់ ២ ភាគ ៣ ក្នុង​ការ​លើក​លែង​ទោស​និង ១ ភាគ ៣ ក្នុង​ការ​បន្ធូរ​បន្ថយ​ទោស»។

លោក អំ សំអាត មន្ត្រី​ស៊ើប​អង្កេត​ជាន់​ខ្ពស់​អង្គការ​ការពារ​សិទ្ធិ​មនុស្ស​លីកាដូ បាន​ថ្លែង​ឲ្យ​ដឹង​ថា ទាក់​ទិន​ទៅ​នឹង​ការ​លើក​លែង​ទោស​និង​បន្ធូរ​បន្ថយ​ទោស​ដល់​ទណ្ឌិត​នោះ​គឺ​នៅ​តែ​ទទួល​បាន​ការ​ត្អូញ​ត្អែរ​ជាច្រើន​ពី​ទណ្ឌិត​ដែល​ពួក​គាត់​ថា មាន​លក្ខខណ្ឌ​គ្រប់​គ្រាន់​ក្នុង​ការ​បន្ធូរ​បន្ថយ​ទោស និង​លើក​លែង​ទោស​ប៉ុន្តែ​ពុំ​មាន​ឈ្មោះ​គឺ​មាន​ឈ្មោះ​តែ​អ្នក​មាន​លុយ។

លោក​ថ្លែង​ថា៖ «ដើម្បី​កាត់​បន្ថយ​ការ​រិះគន់​នេះ​បាន​លុះ​ត្រា​តែ​មាន​ការ​ប្តូរ​ប្រព័ន្ធ​ខ្លះ​គឺ ក្រសួង​មិន​ត្រូវ​ទទួល​តែ​របាយ​ការណ៍​ពី​ប្រធាន​ពន្ធនាគារ​បញ្ជូន​ឲ្យ​នោះ​ទេ គឺ​ត្រូវ​មាន​គណៈ​កម្មាធិការ​ចុះ​ត្រួត​ពិនិត្យ​ផ្ទាល់​នៅ​ក្នុង​ពន្ធនាគារ​បើ​នៅ​តែ​ពឹង​របាយ​ការណ៍​របស់​ប្រធាន​ពន្ធនាគារ​គឺ​នៅ​តែ​មាន​ការ​រិះ​គន់​ដដែល»។

សូម​រំឭក​ផង​ដែរ​ថា កាល​ពិធី​បុណ្យ​ចូល​ឆ្នាំ​កន្លង​មក​ក្រសួង​យុត្តិធម៌​ក៏​បាន​ស្នើ​សុំ​ព្រះ​មហាក្សត្រ​ព្រះ​រាជទាន​លើក​លែង​ទោស​និង​បន្ទូរ​បន្ថយ​ទោស​ដល់​ទណ្ឌិត​ទូទាំង​ប្រទេស​សរុប​ចំនួន ៥៥៥ នាក់​និង​នៅ​ក្នុង​ពិធី​ថ្វាយ​ព្រះ​ភ្លើង​ដល់​ព្រះ​បរមរតន​កោដ្ឋ ព្រះ​មហា​វីរ​ក្សត្រ នរោត្តម សីហនុ រាជ​រដ្ឋាភិបាល ក៏​បាន​ស្នើ​សុំ​ទៅ​ព្រះ​មហាក្សត្រ​លើក​លែង​ទោស​ដល់​ទណ្ឌិត​ចំនួន ៤១២ នាក់​និង​បន្ធូរ​បន្ថយ​ទោស​ដល់​ទណ្ឌិត ៨៤ នាក់៕

អត្ថបទគួរចាប់អារម្មណ៍