The Phnom Penh Post Search

Search form

Logo of Phnom Penh Post newspaper Phnom Penh Post - ក្រសួង​អប់រំ​បង្ហាញ​តារាង​ដំឡើង​ប្រាក់​ខែ​គ្រូ​ចំ​ពេល​ឃោសនា




ក្រសួង​អប់រំ​បង្ហាញ​តារាង​ដំឡើង​ប្រាក់​ខែ​គ្រូ​ចំ​ពេល​ឃោសនា

ក្រសួង​អប់រំ​បង្ហាញ​តារាង​ដំឡើង​ប្រាក់​ខែ​គ្រូ​ចំ​ពេល​ឃោសនា

ភ្នំពេញៈ នៅ​ពាក់​កណ្តាល​យុទ្ធការ​ឃោសនា​បោះឆ្នោត​ដែល​គណបក្ស​នយោបាយ​គូ​ប្រជែង​លើក​ពី​បញ្ហា​ប្រាក់​ខែ​ជា​បញ្ហា​សំខាន់​នោះ ក្រសួង​អប់រំ​យុវជន និង​កីឡា កាល​ពី​ថ្ងៃ​ចន្ទ​បាន​ដាក់​បង្ហាញ​តារាង​ប្រាក់​បៀវត្សរ៍​របស់​គ្រូ​បង្រៀន​ថ្មី​មួយ​ជា​សាធារណៈ​ខុស​ពី​ធម្មតា​និង​បាន​ប្រើ​ជា​ស្តង់ដារ​ក្នុង​ការ​ផ្តល់​បៀវត្សរ៍​ដល់​គ្រូ​បង្រៀន។

គ្រូប​ឋម​សិក្សា ទោះ​ជា​ប្រាក់​ខែ​តិច​ជាង​១០០​ដុល្លារ ក៏​នៅ​តែ​តស៊ូ​បង្រៀន​សិស្ស​ដែរ។
គ្រូប​ឋម​សិក្សា ទោះ​ជា​ប្រាក់​ខែ​តិច​ជាង​១០០​ដុល្លារ ក៏​នៅ​តែ​តស៊ូ​បង្រៀន​សិស្ស​ដែរ។ ហេង ជីវ័ន

តារាង​នេះ​មាន​តួលេខ​ពិបាក​យល់​បន្តិច​ប៉ុន្តែ ដែល​ច្បាស់​នោះ​គឺថា គ្រូ​បង្រៀន​នៅ​ទូទាំង​ប្រទេស​កម្ពុជា ត្រូវ​បាន​សន្យា​ថា នឹង​ត្រូវ​ដំឡើង​ប្រាក់​បៀវត្សរ៍​ជូន​ជា​រៀង​រាល់​ឆ្នាំ។

លោក ប៉ែន ផល្លា អនុ​ប្រធាន​នាយកដ្ឋាន​បុគ្គលិក​នៃ​ក្រសួង​អប់រំ យុវជន និង​កីឡា កាល​ពី​ម្សិលមិញ មិន​បញ្ជាក់​ថា តើ​អ្វី​ដែល​ជា​កត្តា​ជំរុញ​ឲ្យ​មាន​ការ​ដំឡើង​ប្រាក់​បៀវត្សរ៍​គ្រូ​នៅ ពេល​នេះ​ឬ​មូលហេតុ​អ្វី​បាន​ជា​តារាង​ប្រាក់​បៀវត្សរ៍​នេះ​ទើប​យក​មក​បង្ហាញ​ជា​សាធារណៈ នៅ​កៀក​ថ្ងៃ​បោះឆ្នោត​ជាតិ ដែល​នឹង​ប្រព្រឹត្ត​ទៅ​នៅ​ថ្ងៃ​ទី២៨ ខែ​កក្កដា បែប​នេះ​ទេ។

លោក​ថ្លែង​ថា៖ «ខ្ញុំ​មិន​ចង់​និយាយ​អំពី​តារាង​ប្រាក់​បៀវត្សរ៍​នេះ​ទេ ពី​ព្រោះ​ខ្ញុំ​មិន​មែន​ជា​អ្នក​នយោបាយ​។ ខ្ញុំ​មិន​ដឹង​ថា តើ​វា​នឹង​បង្ហាញ​នៅ​ឆ្នាំ​ក្រោយ​ទៀត​ឬ​អត់​នោះ​ទេ»។

លោក រ៉ុង ឈុន ប្រធាន​សមាគម​គ្រូ​បង្រៀន​កម្ពុជា​ឯករាជ្យ បាន​ថ្លែង​កាល​ពី​ម្សិលមិញ​ថា បើ​ទោះ​ជា​វា​ចម្លែក​ដែល​ឯកសារ​នេះ​ត្រូវ​បាន​បង្ហាញ​ជា​សាធារណៈ ហើយ​ព័ត៌មាន​ដែល​មាន​នៅ​ក្នុង​តារាង​នេះ​រួម​ទាំង​ព័ត៌មាន​នៃ​ការ​ដំឡើង​ប្រាក់​បៀវត្សរ៍​មិន​មែន​ជា​រឿង​សម្ងាត់​ទេ។

លោក​បន្ត​ថា​៖ «វា​ជា​លើក​ទី​១ ដែល​ក្រសួង​អប់រំ បាន​បិទ​តារាង​ប្រាក់​បៀវត្សរ៍​គ្រូ​បង្រៀន​ជា​សាធារណៈ​ប៉ុន្តែ វា​មិន​មែន​ជា​រឿង​ថ្មី​នោះ​ទេ»។

បើ​តាម​លោក រ៉ុង ឈុន ប្រាក់​បៀវត្សរ៍​គ្រូ​បង្រៀន​និង​មន្រ្តី​រដ្ឋាភិបាល​ត្រូវ​ដំឡើង​ជា​ប្រចាំ​ឆ្នាំ​ចំនួន ២០​ភាគរយ ពី​លើ​ប្រាក់​បៀវត្សរ៍​ឆ្នាំ​ចាស់។

លោក​បាន​បន្ត​ថា ៖ «ប្រាក់​ខែ​របស់​លោក​គ្រូ​បង្រៀន គឺ​នៅ​មាន​កម្រិត​ទាប។ ដូច្នេះ​ខ្ញុំ​មិន​គិត​ថា ការ​ប្រកាស​នេះ​ជា​ហេតុ​ផល​ចេញ​ពី​នយោបាយ​របស់​គណបក្ស​នោះ​ទេ»។

គណបក្ស​សង្គ្រោះ​ជាតិ​ដែល​ជា​គណបក្ស​ប្រឆាំង​ដ៏​ធំ​បាន​ដាក់​គោល​នយោបាយ​ដំឡើង​ប្រាក់​បៀវត្សរ៍​ដល់​មន្រ្តី​រាជការ​ទាំងអស់​នៅ​ក្នុង​ការ​ឃោសនា​បោះឆ្នោត​របស់​ខ្លួន។ គណបក្ស​នេះ​បាន​ធ្វើ​ការ​សន្យា​ផ្តល់​ប្រាក់​ខែ​យ៉ាង​តិច​១លាន​រៀល​ក្នុង​មួយ​ខែ​ដល់​មន្ត្រី​រាជការ​ទាប​បំផុត។ បើ​តាម​តារាង​ប្រាក់​បៀវត្សរ៍​ក្រសួង​អប់រំ​នោះ គ្រូ​បង្រៀន​កម្រិត​ទាប​កំពុង​ទទួល​ប្រាក់​ខែ​តិច​ជាង​១០០​ដុល្លារ ក្នុង​មួយ​ខែ​នៅ​ឡើយ។

គណបក្ស​សង្គ្រោះ​ជាតិ​បាន​សន្យា​ដែរ​ថា នឹង​ដំឡើង​ប្រាក់​ខែ​ជូន​កម្មករ​នៅ​ក្នុង​ឧស្សាហកម្ម​កាត់​ដេរ​ខណៈ​រដ្ឋាភិបាល​បាន​អន្តរាគមន៍​ដំឡើង​ប្រាក់​ឈ្នួល​អប្បបរមា រហូត​ដល់​៧៥​ដុល្លារ ក្នុង​មួយ​ខែ កាល​ពី​ខែ​មីនា។

លោក ម៉ក់ វ៉ាន់ រដ្ឋ​លេខាធិការ​ក្រសួង​អប់រំ មិន​អាច​ទាក់​ទង​សុំ​អត្ថាធិប្បាយ​បាន​ទេ កាល​ពី​ម្សិលមិញ៕ PS

អត្ថបទគួរចាប់អារម្មណ៍