.jpg)
ភ្នំពេញៈ ក្រសួងអប់រំ យុវជន និងកីឡា រួមជាមួយក្រុមហ៊ុន Smart Axiata ប្រកាសរួមគ្នាពីការចាប់ផ្ដើមផ្សព្វផ្សាយវីដេអូមេរៀនអនឡាញកម្មវិធី «Smart 1,000 Grade 12 Video Collection» សម្រាប់សិស្សថ្នាក់ទី ១២ ដែលទទួលបានការគាំទ្រមូលនិធិចំនួនទឹកប្រាក់ ១ លានដុល្លារ ដើម្បីប្រឆាំងនឹងជំងឺកូវីដ ១៩។
សេចក្តីប្រកាសព័ត៌មានរបស់ក្រុមហ៊ុន Smart Axiata ដែលបានចេញផ្សាយកាលពីថ្ងៃទី ១ កញ្ញា ឲ្យដឹងថា កម្មវិធី Smart 1,000 Grade 12Video Collection នឹងក្លាយជាធនធានដ៏សំខាន់សម្រាប់សិស្សថ្នាក់ទី ១២ នាឆ្នាំនេះ ក៏ដូចជាពេលអនាគត។ បន្ថែមពីនេះ បណ្ណាល័យឌីជីថលដែលមានផ្ទុកវីដេអូអនឡាញនេះក៏នឹងជួយដល់ការត្រៀមខ្លួនជាស្រេចរបស់ក្រសួងអប់រំ សម្រាប់ពេលអនាគតផងដែរ ស្របពេលមូលនិធិនេះបានផ្តល់គុណតម្លៃយ៉ាងច្រើនបន្ថែមទៀតដល់កិច្ចសហការរវាងក្រុមហ៊ុន Smart Axiata ក្រសួងអប់រំ យុវជន និងកីឡា និងវិទ្យាស្ថានបើកទូលាយ។
សេចក្តីប្រកាសបញ្ជាក់ថា៖ «រហូតមកទល់នឹងពេលនេះមានវីដេអូចំនួនជាង ៤០០ ហើយដែលបានផលិតឡើង។ ខណៈដែលមានវីដេអូជាច្រើនទៀតកំពុងស្ថិតក្នុងដំណើរការផលិត។ ក្នុងពេលនេះដែរ ក្រសួងអប់រំនឹងចាប់ផ្ដើមសម្ពោធឲ្យប្រើប្រាស់វីដេអូ ដែលបានរៀបចំយ៉ាងមានរបៀបរៀបរយ។ វីដេអូទាំងនោះនឹងត្រូវបានចាក់ផ្សាយនៅលើទំព័របណ្ដាញសង្គមរបស់ក្រសួង រួមមាននៅលើទំព័រ Facebook និងទំព័រ YouTube របស់ក្រសួងផ្ទាល់ក៏ដូចជានៅលើប៉ុស្តិ៍ទូរទស្សន៍កម្ពុជា ២ (ប៉ុស្តិ៍អប់រំ TVK 2) ផងដែរ»។
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ថ្លែងថា ខណៈដែលក្រសួងអប់រំ យុវជន និងកីឡាកំពុងតែពង្រីកកាលានុវត្តភាពនៃការសិក្សាពីចម្ងាយ ដូច្នេះមូលនិធិរបស់ក្រុមហ៊ុន Smart Axiata គឺជាជំនួយយ៉ាងធំធេងដល់កិច្ចខិតខំប្រឹងប្រែងរបស់ក្រសួង ដោយបានជួយទ្រទ្រង់ដល់ប្រព័ន្ធអប់រំរបស់កម្ពុជា តាមរយៈបច្ចេកវិទ្យាឌីជីថល។
លោកបញ្ជាក់ថា៖ «គំនិតផ្ដួចផ្ដើមនេះផ្ដោតលើសិស្សថ្នាក់ទី ១២ ពីព្រោះសិស្សដែលកំពុងរៀនឆ្នាំចុងក្រោយសម្រាប់មធ្យមសិក្សា ចាំបាច់ត្រូវត្រៀមលក្ខណៈសម្រាប់ការប្រឡងបញ្ចប់ ហើយបន្តចូលទៅរៀននៅសាកលវិទ្យាល័យ»។
លោកបន្តថា តាមរយៈមូលនិធិនេះក្រសួងអប់រំ យុវជន និងកីឡា និងវិទ្យាស្ថានបើកទូលាយ បានរៀបចំស្ទូឌីយោចំនួន ២ ដែលមានបំពាក់បរិក្ខារពេញលេញ សម្រាប់ផលិតវីដេអូអនឡាញសម្រាប់សិស្សថ្នាក់ទី ១២ ដើម្បីជួយ ពួកគេអាចបន្តការសិក្សាពីចម្ងាយ សម្រាប់ការប្រឡងសញ្ញាបត្រមធ្យមសិក្សាទុតិយភូមិនាឆ្នាំសិក្សា នេះស្របពេលមានការបិទទ្វារសាលារៀនទូទាំងប្រទេស ដោយសារការរាតត្បាតជំងឺកូវីដ ១៩។
លោក ថូម៉ាស ហ៊ុន នាយកប្រតិបត្តិក្រុមហ៊ុន Smart Axiata លើកឡើងថា ក្រុមហ៊ុនមានបំណងចង់ធានាថា ការបិទទ្វារសាលាមិនមែនជាឧបសគ្គឡើយសម្រាប់ការអប់រំនៅកម្ពុជា។ លោកថា ក្រុមហ៊ុន Smart តែងមានការប្ដេជ្ញាចិត្តក្នុងការជួយទ្រទ្រង់ដល់វិស័យអប់រំនៅប្រទេសកម្ពុជា។
លោកបន្ថែមថា៖ «យើងមានជំនឿចិត្តលើការធ្វើការជាដៃគូ និង កិច្ចសហប្រតិបត្តិការ ដូច្នេះហើយទើបមូលនិធិទឹកប្រាក់ ១ លានដុល្លាររបស់ក្រុមហ៊ុន Smart Axiata ត្រូវបានបង្កើតឡើងដើម្បីជួយគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា និងជួយដល់សហគមន៍ដែលទទួលរងផលប៉ះពាល់ពីវិបត្តិជំងឺរាតត្បាតសកលនេះ»។
លោក Javier Sola នាយកប្រតិបត្តិវិទ្យាស្ថានបើកទូលាយយល់ថា ការគាំទ្រផ្នែកហិរញ្ញវត្ថុដែលទទួលបានពីមូលនិធិសង្គ្រោះនេះ បានផ្ដល់លទ្ធភាពឲ្យវិទ្យាស្ថាន អាចកសាងស្ទូឌីយោថតដ៏ទំនើបចំនួន ២ យ៉ាងឆាប់រហ័សដែលសុទ្ធតែជាស្ទូឌីយោការពារសំឡេង និងបំពាក់ទៅដោយក្ដារខៀនវៃឆ្លាត ឧបករណ៍ថតសំឡេង និងម៉ាស៊ីនថតវីដេអូលំដាប់ខ្ពស់។
លោកបន្តថា៖ «នៅពេលនេះស្ទូឌីយោទាំង ២ នេះកំពុងដំណើរការ ប្រកបដោយភាពពេញលេញ។ ដូច្នេះយើងអាចផលិតវីដេអូបានចំនួនរហូតដល់ទៅ ៨០ វីដេអូបង្រៀនក្នុង ១ ថ្ងៃ។ ក្រុមការងារត្រួតពិនិត្យគុណភាពបានធ្វើការយ៉ាងហ្មត់ចត់ដើម្បីធានាថា រាល់វីដេអូ ដែលបានថត គោរពតាមបទដ្ឋានរបស់ក្រសួង និងមានគុណភាពខ្ពស់សម្រាប់ការចាក់ផ្សាយដែលជាធនធានដ៏សំខាន់សម្រាប់សិស្សានុសិស្ស»។
បើតាមសេចក្តីប្រកាស មូលនិធិនេះផ្ដោតលើគំនិតផ្ដួចផ្ដើមនានាដោយផ្អែកលើគោលដៅ ៤ រួមមាន បច្ចេកវិទ្យាព័ត៌មានវិទ្យាសម្រាប់ការអប់រំ ការគ្រប់គ្រងវិបត្តិ គម្លាតសង្គម និងអនាម័យផ្ទាល់ខ្លួន។ កម្មវិធីកិច្ចសហការជាដៃគូរវាងស្ថាប័នឯកជន និងរដ្ឋត្រូវបានលើកទឹកចិត្តឲ្យដាក់សំណើមកកាន់មូលនិធិនេះដើម្បីទទួលបានមូលនិធិដល់ទៅ ២០ ម៉ឺនដុល្លារអាមេរិកសម្រាប់កម្មវិធីនីមួយៗ៕
