.jpg)
សត្វព្រៃនៅឧទ្យានសួនសត្វភ្នំតាម៉ៅដែលគេថតបាន។ រូបថត សហការី
ភ្នំពេញៈ ក្រសួងកសិកម្មរុក្ខាប្រមាញ់ និងនេសាទកាលពីថ្ងៃពុធបានចេញសេចក្តីប្រកាសមួយឆ្លើយតបទៅនឹងការរិះគន់ពីមហាជនតាមបណ្ដាញសង្គមមួយចំនួនដែលថា សត្វព្រៃនៅក្នុងសួនសត្វភ្នំតាម៉ៅក្នុងស្រុកបាទី ខេត្តតាកែវមានការស្គមស្គាំងដោយសារខ្វះចំណី និងខ្វះការយកចិត្តទុកដាក់ពីសំណាក់មន្ត្រីនៃឧទ្យានសួនសត្វនេះ។
យោងតាមសេចក្តីប្រកាសនោះក្រសួងនេះបានពន្យល់ថា ឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅគឺជាមជ្ឈមណ្ឌលស្ដារនីតិសម្បទាសត្វព្រៃគ្រប់ប្រភេទដោយមានមន្ត្រីបសុពេទ្យមើលថែទាំជាប្រចាំក្រោមកិច្ចសហការជាមួយអង្គការដៃគូចំនួន ៣ រួមមាន អង្គការ Wildlife Alliance, អង្គការ FFI និង អង្គការ Free the Bear។
ក្រសួងបានគូសបញ្ជាក់ថាដោយមានកិច្ចសហប្រតិបត្តិការល្អជាមួយដៃគូកាលពីឆ្នាំ ២០១៨ កន្លងទៅ ឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅបានសង្គ្រោះសត្វព្រៃថ្មីចំនួន ១ ៨៩៣ ក្បាល ព្យាបាលសត្វព្រៃចំនួន ២៥៧ ក្បាល និងកំពុងថែរក្សាសត្វព្រៃចំនួន ១ ៥៨៦ ក្បាល (បក្សីចំនួន ៥៤ ប្រភេទ ថនិកសត្វចំនួន ៤១ ប្រភេទ និងល្មូនចំនួន ១២ ប្រភេទ) ព្រមទាំងបានស្ដារលទ្ធភាពជីវសាស្ត្រសត្វព្រៃ និងដោះលែងសត្វព្រៃគ្រប់ប្រភេទចូលព្រៃធម្មជាតិវិញបានចំនួន ១៤៨៤ ក្បាល។
ដោយឡែកក្នុងរយៈពេល ៩ ខែឆ្នាំនេះ ឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅបានសង្គ្រោះសត្វព្រៃថ្មីចំនួន ៧៦៧ ក្បាល ព្យាបាលសត្វព្រៃបានចំនួន ២០៧ ក្បាល និងកំពុងថែរក្សាសត្វព្រៃចំនួន ១ ៦២៥ ក្បាល (បក្សីចំនួន ៥៣ ប្រភេទ ថនិកសត្វចំនួន ៤១ ប្រភេទ និងល្មូនចំនួន ១៣ ប្រភេទ) ព្រមទាំងបានស្ដារលទ្ធភាពជីវសាស្ត្រសត្វព្រៃ និងដោះលែងសត្វព្រៃគ្រប់ប្រភេទចូលទៅក្នុងព្រៃធម្មជាតិវិញចំនួន ៦៧៤ ក្បាល។
ប៉ុន្តែកាលពីពេលថ្មីៗនេះមានករណីថតរូបសត្វព្រៃមួយចំនួនដែលស្គមស្គាំងក្នុងសភាពដូចគ្មានចំណីអាហារហើយយកមកបង្ហោះផ្សព្វផ្សាយតាមបណ្ដាញសង្គម Facebook ជាមួយនឹងការរិះគន់មន្ត្រី និងថ្នាក់ដឹកនាំនៅក្នុងឧទ្យានសួនសត្វនេះថា៖ «ខ្វះការយកចិត្តទុកដាក់ក្នុងការថែទាំ និងផ្ដល់ចំណីអាហារដល់សត្វបណ្ដោយឲ្យសត្វមានជំងឺស្គមរីងរៃ»។
ក្នុងនោះគណនីហ្វេសប៊ុកឈ្មោះ ស្លាប៉ាកាអព្យាក្រឹតបានសរសេរថា៖ «អ្នកគ្រប់គ្រងសួនសត្វភ្នំតាម៉ៅយកលុយទៅចិញ្ចឹមស្អី បានទុកឲ្យសត្វព្រៃនៅសួនសត្វមួយនេះក្លាយជារបៀបនេះ...»។
ជុំវិញករណីនេះក្រសួងបានបញ្ជាក់ថា៖ «ការពិតសត្វព្រៃទាំងនោះមិនមែនស្គមស្គាំងដោយសារខ្វះចំណីដូចការរិះគន់នោះឡើយ។ ពួកវាជាសត្វដែលទើបតែសង្គ្រោះបានពីការប្រមាញ់ផ្សេងៗ ជាពិសេសសត្វជាប់អន្ទាក់របស់ព្រានព្រៃជាដើម ហើយទើបត្រូវបានយកមកចិញ្ចឹមថែទាំនៅក្នុងសួននេះដើម្បីព្យាបាល និងស្ដារនីតិសម្បទាមុនពេលត្រូវដោះលែងទៅក្នុងព្រៃធម្មជាតិវិញ»។
បើតាមសេចក្ដីប្រកាសនេះ ដើម្បីចូលរួមថែរក្សា និងការពារសត្វព្រៃដ៏មានតម្លៃរបស់កម្ពុជាឲ្យបានគង់វង្សក្រសួងកសិកម្មនឹងបន្តយកចិត្តទុកដាក់លើការពង្រឹងការអនុវត្តច្បាប់ ការផ្សព្វផ្សាយច្បាប់លិខិតបទដ្ឋានគតិយុត្ត និងថែរក្សាក៏ដូចជាព្យាបាលសត្វព្រៃគ្រប់ប្រភេទសម្រាប់ជាកេរមរតកដល់អ្នកជំនាន់ក្រោយៗទៀត។
លោក ញឹក រតនៈពេជ្រ ប្រធានឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅបានប្រាប់ភ្នំពេញប៉ុស្តិ៍កាលពីម្សិលមិញថា ជាទូទៅភ្ញៀវទេសចរភាគច្រើនតែងតែយល់ថា សត្វនៅក្នុងសួនសត្វគប្បីមានមាឌធំ ហើយធាត់ជាងសត្វដែលរស់នៅក្នុងព្រៃ ព្រោះនៅទីនេះមានចំណីអាហារច្រើន។
ការប្រទះឃើញសត្វព្រៃក្នុងទ្រុងស្គមស្គាំងបានធ្វើឲ្យពួកគេមិនសប្បាយចិត្តនិងបញ្ចេញមតិរិះគន់មកលើមន្ត្រី និងថ្នាក់ដឹកនាំនៃឧទ្យានសួនសត្វដោយមិនបានសួរនាំដើម្បីស្វែងយល់ពីការពិតថាតើមកពីមូលហេតុអ្វីនោះទេ។
លោក រតនៈ ពេជ្រ បានថ្លែងថា៖ «ការពិតសត្វព្រៃដែលមានសភាពស្គមស្គាំងក្នុងទ្រុងដាច់ដោយឡែកពីគេនោះ វាជាសត្វដែលមានជំងឺដែលត្រូវយកមកព្យាបាល។ សត្វព្រៃនៅទីនេះប្រៀបដូចជាគ្រួសាររបស់យើងខ្ញុំដូច្នេះយើងមិនបណ្ដោយឲ្យពួកគេស្គមស្គាំង ឬឈឺងាប់ដោយសារតែខ្វះចំណីអាហារ ឬខ្វះការមើលថែ និងព្យាបាលនោះទេ»។
លោកបានបន្តថា ចាប់តាំងពីឆ្នាំ ១៩៩៥ មកឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅបានសង្គ្រោះ និងដោះលែងសត្វព្រៃគ្រប់ប្រភេទប្រមាណជាង ២ ម៉ឺនក្បាលចូលទៅក្នុងព្រៃធម្មជាតិ និងជាង ៥ ០០០ ក្បាលទៀតចូលទៅក្នុងព្រៃនៃឧទ្យានសួនសត្វភ្នំម៉ៅ ខណៈសត្វព្រៃគ្រប់ប្រភេទចំនួន ១ ៦០០ ក្បាលទៀត កំពុងស្ថិតក្នុងការថែទាំនៅក្នុងទ្រុងដែលទ្រុងនីមួយៗដែលមានទំហំផ្ទៃដីជាង ១ ហិកតា។
សត្វព្រៃទាំងនោះភាគច្រើនមានរបួសដែលសមត្ថកិច្ចពាក់ព័ន្ធបង្ក្រាបបានពីបទល្មើសនានានៅទូទាំងប្រទេសហើយបានបញ្ជូនមកសួនសត្វដើម្បីព្យាបាល និងស្ដារនីតិសម្បទាមុនពេលដោះលែងទៅក្នុងព្រៃធម្មជាតិវិញ៕
