.jpg)
ពិធីចុះហត្ថលេខារវាងក្រសួងសុខាភិបាល និងភាគីមូលនិធិ GX កាលពីថ្ងៃទី ៨ តុលា។ ហុង មិនា
ភ្នំពេញៈ រដ្ឋមន្ត្រីក្រសួងសុខាភិបាលកម្ពុជា និងប្រធានមូលនិធិ GX របស់ចិនកាលពីថ្ងៃអង្គារបានចុះអនុស្សរណៈយោគយល់គ្នា (MoU) ជាលើកទី ២ លើគម្រោងលុបបំបាត់ភាពពិការភ្នែកដោយជំងឺភ្នែកឡើងបាយដោយត្រូវពង្រីកទៅកាន់ខេត្តព្រៃវែង ហើយគ្រោងនឹងបន្តនៅទូទាំងប្រទេសទៀត។
សេចក្តីប្រកាសព័ត៌មានរបស់ក្រសួងសុខាភិបាលកាលពីថ្ងៃអង្គារបានបញ្ជាក់ថា MoU ទី ១ ត្រូវបានចុះហត្ថលេខាកាលពីឆ្នាំ ២០១៧ ដែលបាននិងកំពុងអនុវត្តនៅខេត្តកំពង់ចាមក្នុងការផ្តល់សេវាពិនិត្យព្យាបាល និងវះកាត់ភ្នែកឡើងបាយជូនពលរដ្ឋដែលរហូតមកទល់ពេលនេះមានពលរដ្ឋចំនួន ១០ ៥០៤ នាក់ បានទទួលការពិនិត្យ និងព្យាបាលភ្នែក និង ៤ ៩៦១ នាក់ បានទទួលការវះកាត់ភ្នែកឡើងបាយ។
សេចក្តីប្រកាសព័ត៌មានបានបញ្ជាក់ថា «ដើម្បីសម្រេចបាននូវគោលដៅនៃគម្រោងនេះ ភាគីមិត្តចិននឹងផ្តល់នូវគ្លីនិកចល័តវះកាត់ភ្នែកចំនួន ២ គ្រឿង រថយន្តសម្រាប់ដឹកអ្នកជំងឺ ១ គ្រឿង ព្រមទាំងបំពាក់សម្ភារបរិក្ខារពេទ្យសម្រាប់បម្រើឱ្យការពិនិត្យ ព្យាបាល និងវះកាត់ភ្នែកឡើងបាយដល់អ្នកជំងឺនៅក្នុងខេត្តព្រៃវែង»។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានថ្លែងក្នុងពិធីចុះ MoU ថា បញ្ហាធំមួយទៀតពាក់ព័ន្ធសុខភាពភ្នែកដែលនៅសេសសល់នៅកម្ពុជាគឺជំងឺភ្នែកឡើងបាយដែល ៧៤,៧ ភាគរយ បណ្តាលឱ្យពិការភ្នែក។ កម្ពុជាត្រូវការធនធានបន្ថែមទៀតរួមមានកម្លាំងពលកម្មឧបករណ៍ និងបច្ចេកវិទ្យាទំនើបដើម្បីប្រយុទ្ធប្រឆាំងនឹងជំងឺនេះ។ គម្រោងបច្ចុប្បន្នបានអនុវត្តយ៉ាងរលូន និងជោគជ័យហើយកម្ពុជាបានរៀនសូត្រច្រើនពីក្រុមគ្រូពេទ្យក្វាងស៊ី (Guangxi)។
លោក ម៉ម ប៊ុនហេង បានបញ្ជាក់ថា៖ «ខ្ញុំជឿជាក់ថាការចុះហត្ថលេខាលើអនុស្សរណៈនៃការយោគយល់គ្នាស្តីពីគម្រោងលុបបំបាត់ភាពពិការភ្នែកដោយជំងឺភ្នែកឡើងបាយនៅថ្ងៃនេះនឹងនាំឱ្យវិស័យសាធារណៈ វិស័យឯកជន និងបណ្ឌិត្យសភានៃប្រទេសទាំង ២ ចិន និងកម្ពុជាធ្វើការរួមគ្នាយ៉ាងជិតស្និទ្ធដើម្បីលុបបំបាត់ភាពពិការភ្នែកដោយជំងឺភ្នែកឡើងបាយនៅខេត្តព្រៃវែង និងនៅក្នុងប្រទេស កម្ពុជា ទាំងមូលក្នុងពេលដ៏ខ្លីខាងមុខ» ។
លោក Leung Chunying ប្រធានមូលនិធិ GX បានថ្លែងប្រាប់អ្នកកាសែតតាមរយៈអ្នកបកប្រែ បន្ទាប់ពិធីចុះ MoU ថាទន្ទឹមនឹងជួយដល់ពលរដ្ឋនៅខេត្តព្រៃវែងមូលនិធិ GX នេះក៏នឹងជួយដល់ពលរដ្ឋទូទៅផងដែរឱ្យតែពួកគាត់ត្រូវការពិនិត្យ និងព្យាបាលភ្នែក។
លោក Leung Chunying បានបន្តថា៖ «ការពិនិត្យព្យាបាលភ្នែកមិនមែនត្រឹមតែសម្រាប់ប្រជាជននៅខេត្តព្រៃវែងនោះទេ។ កាលណាពលរដ្ឋមកទទួលសេវាពិនិត្យ និងព្យាបាលភ្នែកកាន់តែច្រើនកាន់តែល្អដើម្បីជំរុញឱ្យគម្រោងទទួលបានជោគជ័យផងដែរ»។
មូលនិធិ GX គឺជាអង្គការមិនមែនរដ្ឋាភិបាលរបស់ចិនមានមូលដ្ឋាននៅទីក្រុងហុងកុងដែលមិនរកប្រាក់កម្រៃដែលត្រូវបានបង្កើតឡើងដើម្បីផ្តល់ជំនួយសុខាភិបាលអន្តរជាតិ និងជំនួយពាក់ព័ន្ធនានា។ មូលនិធិនេះគឺជាការឆ្លើយតបនឹងការអំពាវនាវឱ្យមានការភ្ជាប់ទំនាក់ទំនងរវាងពលរដ្ឋ និងពលរដ្ឋក្រោមគំនិតផ្តួចផ្តើមផ្លូវ និងខ្សែក្រវាត់សម្រាប់កិច្ចសហប្រតិបត្តិការអន្តរជាតិ។
សេចក្តីប្រកាសព័ត៌មានដដែលបានបន្ថែមថាការចុះហត្ថលេខាលើ MoU នៃគម្រោងនេះគឺយោងទៅតាមគំនិតផ្តួចផ្តើមខ្សែក្រវាត់ និងផ្លូវក្នុងការពង្រឹងទំនាក់ទំនងរវាងប្រទេសទាំង ២ ចិន និងកម្ពុជាឱ្យឈានដល់កម្រិតកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ។
លោក យ៉ង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពបានថ្លែងកាលពីថ្ងៃពុធម្សិលមិញថា វាគឺជារឿងសំខាន់ដែលពលរដ្ឋទទួលសេវាពិនិត្យព្យាបាលជំងឺភ្នែកឡើងបាយដោយឥតគិតថ្លៃ។ កិច្ចការនេះគួរមានគោលនយោបាយច្បាស់ក្នុងការពិនិត្យព្យាបាលជំងឺភ្នែកឡើងបាយដល់ពលរដ្ឋឱ្យបានទៀងទាត់។
លោកបានបញ្ជាក់ថា៖ «ជំនាញណាដែលយើងខ្វះ យើងរកគ្រូពេទ្យស្ម័គ្រចិត្តដែលគេមានជំនាញឱ្យគេមកជួយអ៊ីចឹងទៅ»។
លោក គិមអេង បានបន្តថា ទិន្នន័យច្បាស់លាស់គួរត្រូវមានផងដែរដើម្បីចង្អុលបង្ហាញពីការផ្លាស់ប្តូរគ្រូពេទ្យស្ម័គ្រចិត្ត៕
