.jpg)
លោក ម៉ម ប៊ុនហេង (ស្ដាំ) និងមន្ត្រីសាលាក្រុង ពេលចុះពិនិត្យមណ្ឌលចត្តាឡីស័កថ្មី។ រូប សាលាក្រុង
ភ្នំពេញៈ ក្រសួងសុខាភិបាល និងរដ្ឋបាលរាជធានីភ្នំពេញកំពុងសហការពន្លឿនការសាងសង់មណ្ឌលចត្តាឡីស័កថ្មីលើផ្ទៃដីជិត ១ ហិកតា ឱ្យបានរួចរាល់នៅដំណាច់ខែធ្នូឆ្នាំនេះ សម្រាប់ទុកដាក់អ្នកត្រូវធ្វើចត្ដាឡីស័ក ដែលជាកត្ដាសំខាន់បំផុតក្នុងការទប់ស្កាត់ជំងឺកូវីដ ១៩។ នេះបើតាមលោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល។
លោកស្រីបានថ្លែងប្រាប់ ភ្នំពេញ ប៉ុស្ដិ៍ ពីថ្ងៃ ១០ វិច្ឆិកា ថា ក្រសួងសុខាភិបាលតាមរយៈការសហការជាមួយសាលារាជធានីភ្នំពេញកំពុងពន្លឿនការសាងសង់មណ្ឌលចត្ដាឡីស័កចំនួន ៤ អគារនៅលើផ្ទៃដីជិត ១ ហិកតា ស្ថិតក្នុងភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។ ការសាងសង់នេះបានចាប់ផ្ដើមកាលពីខែកញ្ញា ឆ្នាំនេះ ហើយត្រូវពន្លឿនដំណើរការសាងសង់ឱ្យបានរួចរាល់ជាស្ថាពរ និងដាក់ឱ្យប្រើប្រាស់នៅចុងខែធ្នូ ឆ្នាំនេះ។
លោកស្រីបានបញ្ជាក់ថា៖ «ក្រុមការងារនឹងប្រឹងប្រែងធ្វើយ៉ាងណាឱ្យការសាងសង់មណ្ឌលចត្ដាឡីស័កនេះបានរួចរាល់ទៅតាមផែនការនៅចុងខែធ្នូ ឆ្នាំ ២០២០ នេះ ដើម្បីប្រើប្រាស់។ ព្រោះតម្រូវការនៃការធ្វើចត្ដាឡីស័កនេះ គឺជាតម្រូវការដែលសំខាន់មែនទែន សម្រាប់ការទប់ស្កាត់ការចម្លងជំងឺកូវីដ១៩ បន្តទៅទៀត»។
លោក ម៉ម ប៊ុន ហេង រដ្ឋមន្ដ្រីក្រសួងសុខាភិបាល និងអភិបាលរាជធានីភ្នំពេញលោក ឃួង ស្រេង រួមនឹងមន្ត្រីពាក់ព័ន្ធកាលពីថ្ងៃទី ៥ ខែវិច្ឆិកា ឆ្នាំនេះ បានចុះពិនិត្យវឌ្ឍនភាពនៃការសាងសង់មណ្ឌលចត្ដាឡីស័កថ្មីនេះ ដើម្បីពន្លឿនឱ្យបានឆាប់រួចរាល់តាមការគ្រោងទុក។
លោកស្រី យក់ សម្បត្ដិ រដ្ឋលេខាធិការក្រសួងសុខាភិបាលបានប្រាប់អ្នកសារព័ត៌មានក្នុងពេលអមដំណើរលោក ម៉ម ប៊ុនហេង នាពេលនោះថា មណ្ឌលចត្ដាឡីស័កថ្មីនេះមានអគារចំនួន ៤ ដែលអាចដាក់មនុស្សបាន ៤៦០ នាក់ ហើយក្រសួងមានផែនការពង្រីកអគារចំនួន ២ ទៀត ដើម្បីដាក់មនុស្សឱ្យបាន ៨០០ នាក់។ គម្រោងនេះត្រូវប្រើប្រាស់ថវិកាប្រមាណ ៧៩ ម៉ឺនដុល្លារ ដែលជាថវិការបស់រាជរដ្ឋាភិបាលកម្ពុជា។
លោកស្រីបានឱ្យដឹងថា កន្លងមករាជរដ្ឋាភិបាលយកបានសាលារៀនមួយចំនួននៅរាជធានីភ្នំពេញធ្វើជាកន្លែងធ្វើចត្ដាឡីស័កសម្រាប់ពលរដ្ឋខ្មែរដែលធ្វើដំណើរមកពីក្រៅប្រទេសចូលមកកម្ពុជា វិញ។ ប៉ុន្ដែបច្ចុប្បន្ននេះសាលារៀនមួយចំនួនកំពុងបើកដំណើរការឱ្យសិស្សចូលសិក្សាឡើងវិញ។
លោកស្រីបញ្ជាក់ថា៖ «ពេលមណ្ឌលចត្ដាឡីស័កទីតាំងថ្មីនេះធ្វើរួចរាល់ ពលរដ្ឋខ្មែរមកពីក្រៅប្រទេសគឺត្រូវធ្វើចត្ដាឡីស័កនៅទីតាំងថ្មីនេះ លើកលែងតែជនបរទេស ដែលត្រូវសម្រាកនៅតាមសណ្ឋាគារ។ ការអនុវត្ដនេះដើម្បីមានភាពងាយស្រួលក្នុងការគ្រប់គ្រង ព្រោះមណ្ឌលចត្ដាឡីស័កនេះមានគ្រូពេទ្យ និងបំពាក់សម្ភាររួចជាស្រេចត្រៀមជាប់ជានិច្ច» ។
ក្រោយព្រឹត្ដិការណ៍ថ្ងៃទី ៣ ខែវិច្ឆិកា លោកនាយករដ្ឋមន្ដ្រី ហ៊ុន សែន បានអំពាវនាវ និងដាក់បទបញ្ជាជាបន្តបន្ទាប់ដល់អ្នកប៉ះពាល់ដោយផ្ទាល់ ឬដោយប្រយោលក្នុងព្រឹត្ដិការណ៍នេះដោយលោកជំរុញឱ្យគោរពតាមការណែនាំរបស់ក្រសួងសុខាភិបាល និងធ្វើចត្ដាឡីស័កឱ្យបានត្រឹមត្រូវ។
លោកនាយករដ្ឋមន្ដ្រីបញ្ជាក់ថា៖ «ដើម្បីបញ្ចៀសករណីដូចដែលខ្ញុំលើកឡើងខាងលើ ខ្ញុំសុំចេញបទបញ្ជាឱ្យក្រសួងសុខាភិបាល អាជ្ញាធររាជធានីភ្នំពេញ និងខេត្តកណ្តាល ពិនិត្យតាមដានគ្រប់មនុស្សដែលបាន និងកំពុងធ្វើចត្តាឡីស័ក។ ប្រសិនពួកគាត់អនុវត្តមិនបានត្រឹមត្រូវក្នុងការធ្វើចត្តាឡីស័កតាមផ្ទះទេ សូមអញ្ជើញពួកគាត់ទៅធ្វើចត្តាឡីស័កតាមទីកន្លែងដែលរៀបចំដោយក្រសួងសុខាភិបាល ដោយមានការយាមកាមពីកម្លាំងនគរបាល ឬកងរាជអាវុធហត្ថឱ្យបានហ្មត់ចត់» ៕
