.jpg)
បេក្ខជនប្រឡងចូលមន្ត្រីរាជការ នៅក្នុងបន្ទប់ប្រឡងកាលពីពេលកន្លងមក។ រូបថត ក្រសួងការងារ
ភ្នំពេញៈ ក្រសួង និងស្ថាប័នចំនួន ៦ ប្រកាសប្រឡងជ្រើសរើសមន្ត្រីក្របខ័ណ្ឌថ្មី ចំនួន ២២២ នាក់សម្រាប់ឆ្នាំ ២០២១ ដែលកាលបរិច្ឆេទទទួលពាក្យនឹងត្រូវធ្វើឡើងចាប់ពីថ្ងៃទី ២៥ មករា រហូតដល់ថ្ងៃទី ៥ ខែមីនា ហើយការជ្រើសរើសនេះមិនអនុញ្ញាតឱ្យបេក្ខជនដែលបានសុំសិទ្ធិប្រឡងកាលពីឆ្នាំ ២០២០ រួចហើយដាក់ពាក្យសុំសិទ្ធិប្រឡងជាថ្មីទៀតទេ។
សេចក្តីជូនដំណឹងរបស់ក្រសួងមុខងារសាធារណៈបានឱ្យដឹងថា ក្រសួងទាំង ៦ ដែលនឹងសម្រេចឱ្យបន្តមានការទទួលពាក្យសុំសិទ្ធិប្រឡងជ្រើសរើសមន្ត្រីរាជការស៊ីវិលនេះ គឺមានក្រសួងមុខងារសាធារណៈខ្លួនឯង ដែលត្រូវជ្រើសរើសមន្ត្រីថ្មីចំនួន ៨ កន្លែង កម្រិតក្របខ័ណ្ឌប្រភេទ ក ដោយត្រូវមានសញ្ញាបត្រចាប់ពីកម្រិតថ្នាក់បរិញ្ញាបត្រឡើងទៅ ឬសញ្ញាបត្រសមមូល។
ចំពោះក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចត្រូវការជ្រើសរើសមន្ត្រីថ្មី ចំនួន ៥ កន្លែងក្នុងក្របខ័ណ្ឌ ក និងក្រសួងកសិកម្ម រុក្ខាប្រមាញ់ និងនេសាទ ត្រូវការជ្រើសរើសមន្ត្រីស៊ីវិលចំនួន ១៣៣ កន្លែង ក្នុងក្របខ័ណ្ឌប្រភេទ ក និងប្រភេទ ខ ឱ្យមកបម្រើការងារនៅមន្ទីរស្ថាប័ននេះទូទាំងប្រទេស។
ក្រសួងមុខងារសាធារណៈបានបន្តទៀតថា ចំពោះក្រសួងពាណិជ្ជកម្មក៏ត្រូវការជ្រើសរើសមន្ត្រីស៊ីវិលថ្មីចំនួន ៣៦ កន្លែងសម្រាប់បេក្ខជនប្រឡងក្រមខ័ណ្ឌប្រភេទ ក និងប្រភេទ ខ ឱ្យចូលបម្រើការងារនៅក្រសួង និងសម្រាប់មន្ទីរចំនួន ១៤ រាជធានីខេត្តផងដែរ ខណៈក្រសួងធនធានទឹក និងឧតុនិយមត្រូវការជ្រើសរើសមន្ត្រីថ្មីចំនួន ២៨ កន្លែងក្នុងប្រភេទក្របខ័ណ្ឌ ក ឱ្យចូលបម្រើការងារនៅតាមមន្ទីរ ស្ថាប័នមួយចំនួន។
ក្រសួងមុខងារសាធារណៈបញ្ជាក់ថា៖ «រដ្ឋលេខាធិការដ្ឋានអាកាសចរស៊ីវិល ជ្រើសរើសមន្ត្រីស៊ីវិលថ្មីចំនួន ១២ កន្លែង សម្រាប់បេក្ខជនប្រឡងក្របខ័ណ្ឌប្រភេទ ក ត្រូវមានសញ្ញាបត្រចាប់ពីកម្រិតបរិញ្ញាបត្រឡើងទៅ ឬសញ្ញាបត្រសមមូលលើមុខជំនាញអក្សរសាស្ត្រអង់គ្លេស ព័ត៌មានវិទ្យា សេដ្ឋកិច្ច ធនាគារ និងហិរញ្ញវត្ថុ»។
លោក អែវ ប៊ុនថុល ប្រធានគណៈកម្មការរៀបចំការប្រឡង និងជារដ្ឋលេខាធិការក្រសួងមុខងារសាធារណៈបានលើកឡើងក្នុងសេចក្តីជូនដំណឹងយ៉ាងដូច្នេះថា ការប្រឡងជ្រើសរើសមន្ត្រីក្របខ័ណ្ឌថ្មីនេះ គឺផ្តល់សិទ្ធិដល់បេក្ខជនទាំង ២ ភេទ ដែលមានលក្ខណៈគ្រប់គ្រាន់តាមការកំណត់របស់ក្រសួង។ ចំពោះបេក្ខជនជាមន្ត្រីរាជការក៏មានសិទ្ធិក្នុងការចូលរួមប្រឡងជ្រើសរើសនេះដែរដោយទទួលបានការលើកលែងលក្ខខណ្ឌអាយុ ដោយគ្រាន់តែមានការយល់ព្រមពីប្រធាន ស្ថាប័នសាមីដើម្បីអនុញ្ញាតឱ្យបេក្ខជនជាមន្ត្រីអាចចូលរួមប្រឡងប្រជែងបាន។
ប៉ុន្តែលោក អែវ ប៊ុនថុល បានបញ្ជាក់ថា បេក្ខជនអាចដាក់ពាក្យសុំសិទ្ធិប្រឡងបានតែមួយក្រសួង ឬស្ថាប័នប៉ុណ្ណោះ ហើយចំពោះបេក្ខជនដែលបានដាក់ពាក្យសុំសិទ្ធិប្រឡង កាលពីឆ្នាំ ២០២០ រួចហើយ មិនតម្រូវឱ្យដាក់ពាក្យសុំសិទ្ធិប្រឡងឡើងវិញទេ។
លោកសង្អត់ធ្ងន់ថា៖ «បេក្ខជន ត្រូវប្រាកដថា មិនប្រាសចាកសិទ្ធិខាងផ្លូវរដ្ឋប្បវេណី សិទ្ធិពលរដ្ឋ និងសិទ្ធិខាងនយោបាយ។ ចំពោះបេក្ខនារី ជនពិការ និងអ្នករស់នៅតំបន់ដាច់ស្រយោលត្រូវបានផ្តល់អាទិភាព និងលើកទឹកចិត្ត»។ ជាមួយគ្នានេះ ក្នុងករណីដែលរកឃើញថាមានការក្លែងបន្លំសញ្ញាបត្រ ឬលិខិតស្នាមផ្សេងៗ បេក្ខជននឹងត្រូវលុបឈ្មោះចេញជាស្វ័យប្រវត្តិ ទោះបីជាបេក្ខជនប្រឡងជាប់ក្នុងក្របខ័ណ្ឌក្រសួង ស្ថាប័នណាក៏ដោយ។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជា បានលើកឡើងពីម្សិលមិញថា រដ្ឋាភិបាលគួរតែឱ្យអាទិភាពទៅតំបន់ដែលមានតម្រូវការមន្ត្រីច្រើន ដើម្បីឱ្យបេក្ខជនប្រឡង ដែលរស់នៅក្នុងតំបន់នោះទទួលបានឱកាសទាំងនេះ។
លោកបន្តថា៖ «ខេត្តណាដែលខ្វះ គួរតែផ្តល់ឱកាសឱ្យខេត្តនោះជ្រើសរើសមន្ត្រីនៅក្នុងតំបន់ ដើម្បីបំពេញតាមតម្រូវការ។ ការជ្រើសរើសជាទូទៅដូចនេះ ហើយក្រោយមកមានការបញ្ចូលមន្ត្រីដែលជាប់ថ្មីនោះទៅធ្វើការកន្លែងឆ្ងាយពីគ្រួសាររបស់គាត់គឺពិបាកណាស់»។
ចំពោះការហាមប្រាមបេក្ខជនចាស់ មិនអាចឱ្យចូលរួមការប្រឡងជាថ្មី លោក សន ជ័យ យល់ថា នេះក៏មិនមែនជាមធ្យោបាយល្អនោះដែរ ហើយក្រសួង គួរតែបើកសេរីភាពឱ្យមានការប្រឡងទាំងអស់គ្នា ព្រោះថាបេក្ខជនដែលប្រឡងធ្លាក់កន្លងមកពួកគាត់អាចនឹងមានបទពិសោធ និងសមត្ថភាពខ្លាំងជាងមុនក្នុងការទទួលបានលទ្ធផលល្អក្នុងការប្រឡងជាថ្មី៕
