ភ្នំពេញ: ក្រសួងបរិស្ថាន អង្គការ UNDP និងអង្គការស្បៀង និងកសិកម្មសហប្រជាជាតិ (FAO) ប្រចាំកម្ពុជា កំពុងពិភាក្សាសេចក្ដីព្រាងរបាយការណ៍ស្តីពីស្ថានភាពបរិស្ថានជាតិលើកទី៤ ដើម្បីប្រមូលធាតុផ្សំក្នុងការចងក្រងឯកសារ ទិន្នន័យគោលនិងព័ត៌មានវិទ្យាសាស្ត្រអំពីបរិស្ថាន និងធនធានធម្មជាតិសម្រាប់អ្នកសិក្សាស្រាវជ្រាវ និងប្រើប្រាស់ជាមូលដ្ឋានក្នុងការអប់រំចំណេះដឹងពីបញ្ហាបរិស្ថាននៅកម្ពុជា។
លោក នេត្រ ភក្ត្រា រដ្ឋលេខាធិការក្រសួងបរិស្ថានបានថ្លែងក្នុងកិច្ចពិភាក្សាលើសេចក្ដីព្រាងរបាយការណ៍នៅថ្ងៃ ៣១ សីហា ថា របាយការណ៍ស្ថានភាពបរិស្ថានជាតិលើកទី៤ នេះ គឺជាការចងក្រងប្រមូលផ្តុំឯកសារ ទិន្នន័យគោល និងព័ត៌មានវិទ្យាសាស្ត្រអំពីបរិស្ថាន និងធនធានធម្មជាតិ។
ការរៀបចំនេះដើម្បីឲ្យអ្នកសិក្សាស្រាវជ្រាវអ្នកគ្រប់គ្រង អ្នកធ្វើផែនការ សហគមន៍ ឧស្សាហករណ៍ វិនិយោគិន អង្គការជាតិ-អន្តរជាតិ ប្រើប្រាស់ជាមូលដ្ឋានសម្រាប់ការអប់រំចំណេះដឹងបរិស្ថាន ការធ្វើសេចក្តីសម្រេច ការគ្រប់គ្រង និងការធ្វើផែនការសកម្មភាព ដើម្បីសម្រេចបានការអភិវឌ្ឍប្រកបដោយចីរភាពស្របតាមកម្មវិធីនយោបាយជាតិ។
លោកបន្តថា បរិស្ថានគឺជាការងារពហុវិស័យ និងពហុជំនាញ ដែលក្នុងន័យនេះតម្រូវឲ្យមានការចូលរួមសហការច្រើនពីក្រសួង និងស្ថាប័នពាក់ព័ន្ធ ដើម្បីអាចទទួលបានធាតុចូលច្រើនតាមដែលអាចធ្វើទៅបាន និងការឯកភាពគ្នា។ លោកថា របាយការណ៍បានបញ្ចូលប្រធានបទបរិស្ថានចម្បងៗចំនួន៧ ក្នុងនោះមាន គុណភាពខ្យល់,ការប្រែប្រួលអាកាសធាតុ, ទឹក (ទឹកសាបនិងទឹកសមុទ្រ), គុណភាពដី, ជីវចម្រុះ(ព្រៃឈើ សត្វព្រៃ), សុវត្ថិភាពចំណីអាហារ និងសំណល់ (រឹង និងរាវ)។
លោកបញ្ជាក់ថា៖ «របាយការណ៍នេះគឺជារបាយការណ៍ស្ថានភាពបរិស្ថានជាតិលើកទី៤ គ្រោងនឹងបញ្ចប់នៅឆ្នាំ ២០២២។ ដោយឡែករបាយការណ៍នេះ ត្រូវបានរៀបចំនិងបោះពុម្ពផ្សាយ ៣ លើករួចមកហើយគឺ លើកទី១ នៅឆ្នាំ ១៩៩៤ លើកទី២ នៅឆ្នាំ ២០០៥ និងលើកទី៣ នៅឆ្នាំ ២០១៩ កន្លងទៅ»។
លោក ជួប ប៉ារីស៍ អគ្គនាយកចំណេះដឹង និងព័ត៌មានបរិស្ថាននៃក្រសួងបរិស្ថានបានថ្លែងនៅថ្ងៃ ៣១ សីហា ដែរថា របាយការណ៍នេះចាំបាច់ត្រូវមានសូចនាករ ទិន្នន័យ ស្ថិតិប្រកបដោយលក្ខណៈវិទ្យាសាស្ត្រជាអំណះអំណាងច្បាស់លាស់។ ធាតុចូលចាំបាច់សំខាន់ៗសម្រាប់របាយការណ៍នឹងក្លាយជាឯកសារមានតម្លៃអាចយកទៅប្រើប្រាស់ជាមូលដ្ឋានយោង ហើយថែមទាំងទុកជាភ័ស្តុតាងចម្បងដែលដើរតួនាទីបំពេញជាសារបញ្ជាក់រួមមួយដែលអាចទទួលយកបានអំពីស្ថានភាពបរិស្ថានបច្ចុប្បន្ននៅកម្ពុជា។
លោកបញ្ជាក់ថា៖ «របាយការណ៍នេះ យើងធ្វើជា ២ ភាសា គឺភាសាខ្មែរ និងអង់គ្លេស ហើយយើងសង្ឃឹមថា វាជារបាយការណ៍មួយដែលមានលក្ខណៈវិទ្យាសាស្ត្រ មានទិន្នន័យត្រឹមត្រូវអាចទទួលយកបាន ហើយត្រូវបានប្រើប្រាស់ដោយភាគីទាំងអស់ទាំងក្រសួង-ស្ថានប័ននានា អ្នកសិក្សាស្រាវជ្រាវ និងសាធារណជនទាំងអស់ អ្វីដែលសំខាន់ គឺយើងមិនចង់ឲ្យមានភាពចម្រូងចម្រាសផ្នែកព័ត៌មានទាក់ទងបរិស្ថាន»។
លោកបន្ថែមថា ក្រសួងបរិស្ថានបានកំណត់យកការធ្វើទំនើបកម្មស្ថាប័ន កិច្ចគាំពារបរិស្ថាន ការអភិរក្សជីវចម្រុះ និងការរស់នៅដោយចីរភាព ជាសសរស្តម្ភ និងជាមូលដ្ឋានគ្រឹះសម្រាប់ការរៀបចំគោលនយោបាយ ផែនការយុទ្ធសាស្ត្រ និងផែនការសកម្មភាពនានា។
លោក Nick BERESFORD តំណាងអង្គការ UNDP ប្រចាំកម្ពុជាបានថ្លែងដែរថា របាយការណ៍ស្ថានភាពបរិស្ថានជាតិលើកទី៤ នេះ ពិតជាមានតម្លៃសំខាន់ចំពោះនយោបាយ, តម្លៃសេដ្ឋកិច្ច, តម្លៃបរិស្ថាននិងការអភិវឌ្ឍ, តម្លៃសង្គមកិច្ច និងការកសាងសមត្ថភាពមន្ត្រីតាមរយៈដំណើរការរៀបចំរបាយការណ៍នេះ។
លោកបន្ថែមថា ការបណ្តុះបណ្តាលធនធានមនុស្ស និងការពង្រឹងសមត្ថភាពមន្ត្រីពាក់ព័ន្ធនឹងប្រព្រឹត្តទៅជាបន្តបន្ទាប់ ដើម្បីកសាងសមត្ថភាពអ្នកបន្តវេនសម្រាប់ការរៀបចំរបាយការណ៍ស្ថានភាពបរិស្ថានជាតិនេះតទៅមុខទៀត។
លោកបញ្ជាក់ថា៖ «របាយការណ៍នេះ ផ្តល់ការយល់ដឹងអំពីនិន្នាការ ស្ថានភាពបរិស្ថានឲ្យបានកាន់តែប្រសើរ ចងក្រងផលប៉ះពាល់បរិស្ថានសង្គម និងពីស្ថានភាពដែលប្រែប្រួល និងបង្ហាញពីប្រសិទ្ធភាពនៃការឆ្លើយតបចំពោះ សម្ពាធ និងផលប៉ះពាល់បរិស្ថានជាច្រើនទៀត»៕