.jpg)
លោក អុិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ ក្នុងជំនួបពិភាក្សាការងារជាមួយ លោក Edward DanielrajSelvanayagam នាយកប្រចាំប្រទេសនៃអង្គការទស្សនៈពិភពលោក (World Vision) កាលពីព្រឹកមិញ។ រូបថត ក្រសួងការងារ
ក្រសួងការងារ និងបណ្តុះបណ្តាលវិជ្ជាជីវៈ ជាមួយអង្គការទស្សនៈពិភពលោកនឹងរួមគ្នារៀបចំយុទ្ធសាស្រ្តដើម្បីស្តារមកវិញនូវផលប៉ះពាល់ផ្សេងៗពាក់ព័ន្ធនឹងយុវជន កម្មករ កុមារ និងកម្លាំងពលកម្មនៅកម្ពុជាជាបណ្តើរៗដោយសារភាគីទាំង២មិនដឹងថា តើពេលណាជំងឺកូវីដ ១៩ នឹងបាត់ទៅវិញនោះឡើយ។ នេះបើតាមមន្ត្រីក្រសួងការងារបញ្ជាក់នាថ្ងៃនេះ។
រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ លោក អុិត សំហេង បានជួបពិភាក្សាការងារជាមួយនាយកប្រចាំប្រទេសនៃអង្គការទស្សនៈពិភពលោក (World Vision) នាព្រឹកមិញនេះ នៅទីស្តីការក្រសួងការងារដើម្បីពិភាក្សាការងារ។ លោកថ្លែងក្នុងជំនួបនោះថា អង្គការទស្សនៈពិភពលោកបានចូលរួមយ៉ាងសកម្មក្នុងការអនុវត្តគោលនយោបាយរបស់រាជរដ្ឋាភិបាលកម្ពុជាក្នុងការលើកកម្ពស់គោលនយោបាយរបស់រាជរដ្ឋាភិបាលកម្ពុជាយ៉ាងសកម្ម ក្រោយថ្ងៃរំដោះ ៧ មករា ឆ្នាំ ១៩៧៩។
លោករដ្ឋមន្ត្រីមានប្រសាសន៍ថា អង្គការទស្សនៈពិភពលោក បានចូលមកដល់កម្ពុជាអស់រយៈពេលយូរហើយ ដោយអង្គការមួយនេះបានធ្វើសកម្មភាពមនុស្សធម៌តរៀងមក។ អង្គការមានគោលដៅធំៗ ក្នុងកម្មវិធីបណ្តុះបណ្តាលបច្ចេកទេស និងវិជ្ជាជីវៈ គម្រោងលុបបំបាត់ពលកម្មកុមារ ផ្តល់អាហារូបត្ថម្ភ ពាក់ព័ន្ធសុខភាព ការអប់រំ បង្កើតឱកាសការងារ និងការដោះស្រាយលើកុមារតូចៗជាដើម។
លោក ងុយ រិទ្ធ អនុរដ្ឋលេខាធិការនៃក្រសួងការងារ និងបណ្តុះបណ្តាលវិជ្ជាជីវៈ បានប្រាប់អ្នកសារព័ត៌មាន ពីព្រឹកមិញនេះថា ដោយសារបច្ចុប្បន្នអង្គការទស្សនៈពិភពលោកបានចូលរួមចំណែកក្នុងការគាំទ្ររាជរដ្ឋាភិបាលក្នុងការដោះស្រាយផលប៉ះពាល់ទៅលើបញ្ហាកូវីដផងដែរនោះ ភាគីទាំង ២ នៅក្នុងជំនួបនេះក៏បានពិភាក្សាគ្នាក្នុងការរៀបចំនូវយុទ្ធសាស្រ្ត ដើម្បីស្តារឡើងវិញនូវផលប៉ះពាល់នានាដូចជា យុវជន កម្មករ និងកុមារជាដើម។
លោកមានប្រសាសន៍ថា៖ «បន្ទាប់ពីនេះទៅ យើងនឹងរៀបចំយុទ្ធសាស្រ្ត ដើម្បីស្តារឡើងវិញនូវផលប៉ះពាល់ផ្សេងៗពាក់ព័ន្ធនឹងយុវជនរបស់យើង កម្មកររបស់យើង និងកុមាររបស់យើង ដើម្បីឱ្យឱកាសទាំងអស់នេះ យើងអាចស្តារឡើងវិញជាបណ្តើរៗ ដោយសារកូវីដបានធ្វើឱ្យយើងទាំងអស់គ្នារងទុក្ខលំបាក ហើយយើងក៏មិនដឹងថាតើពេលណានឹងចប់នោះទេ»។
លោកបន្តទៀតថា ទោះបីជាយ៉ាងណាក៏ដោយ ក្រសួងនឹងរួមគ្នាធ្វើកិច្ចការងារនេះ ហើយអង្គការទស្សនៈពិភពលោកក៏ពេញចិត្តជាខ្លាំងនូវវិធានការរបស់រាជរដ្ឋាភិបាល និងក្រសួងការងារ និងបណ្តុះបណ្តាលវិជ្ជាជីវៈ ហើយអង្គការនេះចង់បន្តការងារជាមួយក្រសួងឱ្យកាន់តែល្អប្រសើរថែមទៀត។
លោក Edward DanielrajSelvanayagam នាយកប្រចាំប្រទេសនៃអង្គការទស្សនៈពិភពលោក (World Vision) ដែលទើបទទួលតំណែងថ្មី បានលើកឡើងក្នុងពេលជួបជាមួយរដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ ដោយអរគុណដល់លោកនាយករដ្ឋមន្ត្រីនៃប្រទេសកម្ពុជា ដែលបានអនុញ្ញាតឲ្យអង្គការទស្សនៈពិភពលោកចូលមកអនុវត្តកម្មវិធីមនុស្សធ៌មផ្សេងៗនៅកម្ពុជា។
អង្គការពេញចិត្តជាខ្លាំងនូវអ្វីដែលជាវិធានការរបស់រដ្ឋាភិបាលកម្ពុជា ក៏ដូចជាចំណាត់ការរបស់ក្រសួងការងារ និងបណ្តុះបណ្តាលវិជ្ជាជីវៈ ហើយអង្គការក៏មានបំណងចង់បន្តការងារនេះឱ្យល្អប្រសើរថែមទៀត។
ជាមួយគ្នានេះដែរ ភាគីទាំង ២ បានប្តេជ្ញាបន្តកិច្ចសហប្រតិបត្តិការ ដើម្បីពង្រឹងភាពជាដៃគូជាមួយគ្នាឲ្យកាន់តែល្អប្រសើរថែមទៀត៕
