.jpg)
លោក ព្រុំ សុខា ពេលជួបជាមួយពលរដ្ឋនៅខេត្តក្រចេះ ដើម្បីស្ទាបស្ទង់មតិជ្រើសរើសមេភូមិកាលពីថ្មីៗនេះ។ រូបថត Fresh News
ក្រចេះ: ក្រសួងមុខងារសាធារណៈ និងក្រុមការងារខេត្តក្រចេះកំពុងសហការរៀបចំការជ្រើសរើសអ្នកដឹកនាំភូមិថ្មីចំនួន ៣៧ ភូមិ ស្ថិតក្នុងឃុំ-សង្កាត់ចំនួន ១៧ នៃស្រុក-ក្រុងចំនួន ៥ ដែលក្រសួងមហាផ្ទៃសម្រេចឱ្យបង្កើតតាមតម្រូវការចាំបាច់កាលពីដើមខែមីនា ខណៈការជ្រើសរើសអាចត្រូវបញ្ចប់នៅចុងសប្តាហ៍ក្រោយ។
កាលពីថ្ងៃទី ៣ មេសា លោក ព្រុំ សុខា រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងារខេត្តក្រចេះអមដំណើរដោយអ្នកតំណាងរាស្ត្រមណ្ឌលខេត្តក្រចេះ និងថ្នាក់ដឹកនាំព្រមទាំងសមាជិកក្រុមការងារស្រុកព្រែកប្រសព្វបានចុះជួបតំណាងពលរដ្ឋប្រមាណ ៥០ នាក់ នៅភូមិអូរជ្រៃជាភូមិទើបបង្កើតថ្មី ដែលបំបែកចេញពីភូមិព្រែកប្រសព្វលើនៃឃុំព្រែកប្រសព្វ ស្រុកព្រែកប្រសព្វ ស្ថិតក្នុងបរិវេណវត្តព្រះធម្មគង្គា ហៅវត្តភ្នំរអិល។
តាមទំព័រហ្វេសប៊ុករបស់ក្រសួងមុខងារសាធារណៈពីថ្ងៃទី ៣ ខែមីនា បានឱ្យដឹងថា ជំនួបនេះគឺដើម្បីស្ទាបស្ទង់មតិរបស់ពលរដ្ឋដើម្បីជ្រើសរើស អ្នកមានលក្ខណសម្បត្តិដែលអាចធ្វើជាបេក្ខជនសម្រាប់ការបោះឆ្នោតរបស់ក្រុមប្រឹក្សាឃុំក្នុងការជ្រើសរើសប្រធានភូមិថ្មី។
ទំព័រហ្វេសប៊ុកដដែលបានឱ្យដឹងថា «បន្ទាប់ពីការថ្លែងមតិសំណេះសំណាលរបស់ឯកឧត្តមរដ្ឋមន្ត្រី ព្រុំ សុខា ដែលបានផ្តល់សារៈសំខាន់ទៅលើការចូលរួមរបស់ប្រជាពលរដ្ឋក្នុងការជ្រើសរើសអ្នកដឹកនាំភូមិរួចមក ការបោះឆ្នោតដើម្បីស្ទាបស្ទង់មតិលើមុខសញ្ញា ៦ នាក់ក៏បានដំណើរការទៅដោយរលូនរហូតដល់ពេលបញ្ចប់ពិធី»។
ក្រសួងមុខងារសាធារណៈបានបញ្ជាក់ថា ការរៀបចំស្ទាបស្ទង់មតិបែបនេះគឺជាគំរូសម្រាប់ភូមិបង្កើតថ្មីដទៃទៀតក្នុងស្រុកព្រែកប្រសព្វទាំងមូលរួមទាំងការជ្រើសរើសមេភូមិថ្មីទាំង ៣៧ ភូមិទូទាំងខេត្ត។
លោក វ៉ា ថន អភិបាលខេត្តក្រចេះបានប្រាប់ភ្នំពេញប៉ុស្តិ៍ពីម្សិលមិញថា ដំណើរការជ្រើសរើសមេភូមិនេះគឺនៅបន្តធ្វើនៅឡើយ ខណៈឃុំមួយចំនួនបានជ្រើសរើសអ្នកតំណាងរួចរាល់ដោយក្នុង ១ ភូមិមានអ្នកឈរឈ្មោះយ៉ាងតិចចំនួន ៦ នាក់។
បើតាមផែនការការជ្រើសរើសនេះអាចនឹងបញ្ចប់នៅចុងសប្តាហ៍ក្រោយដោយតួនាទីនៃការជ្រើសរើសគឺជាកាតព្វកិច្ចរបស់ក្រុមប្រឹក្សាឃុំសង្កាត់ជាអ្នកបោះឆ្នោតជ្រើសតាំង។
លោកបញ្ជាក់ថា៖ «ជាគោលការណ៍ពេលណាយើងជ្រើសរើសមុខសញ្ញាអ្នកដែលមានលក្ខណសម្បត្តិនៅតាមភូមិនីមួយៗ គឺប្រគល់សិទ្ធិនោះឱ្យក្រុមប្រឹក្សាឃុំ ហើយនិងអភិបាលស្រុកជាបន្តការងារ ព្រោះនេះគ្រាន់តែជារបៀបនៃការចាប់ផ្តើមជ្រើសមេភូមិល្អបម្រើប្រជាជនស្មោះត្រង់ និងដឹងសុខទុក្ខប្រជាជន»។
បើតាមលោក វ៉ា ថន ចំពោះមុខសញ្ញាអ្នកដែលមានលក្ខណសម្បត្តិជ្រើសរើសសម្រាប់តំណែងជាមេភូមិថ្មីទាំងនេះ គឺសុទ្ធតែមានអាយុចាប់ពី ៣០ ឆ្នាំ និងមិនមានអាយុលើសពី ៥០ ឆ្នាំនោះទេហើយពួកគេក៏សុទ្ធជាមនុស្សមានសមត្ថភាពដែលនាំឱ្យពលរដ្ឋ ស្រឡាញ់ និងគាំទ្រ។
លោក យក់ ប៊ុនណា អ្នកនាំពាក្យក្រសួងមុខងារសាធារណៈបានប្រាប់ភ្នំពេញប៉ុស្តិ៍ពីម្សិលមិញដែរថា នៅពេលដំណើរនៃការជ្រើសរើសអ្នកមានលក្ខណសម្បត្តិទាំង ៣៧ ភូមិរួចរាល់ ក្រុមប្រឹក្សាឃុំ សង្កាត់នឹងពិភាក្សាគ្នាដើម្បីជ្រើសតាំងបេក្ខភាពអនុប្រធានភូមិ និងសមាជិកភូមិចំនួន ៣ រូបតាមរយៈការបោះឆ្នោត។
លោកបញ្ជាក់ថា៖ «នីតិវិធីបន្ត នៅពេលយើងជ្រើសរើសបានមេភូមិហើយ នោះមេភូមិនឹងស្នើបេក្ខភាព អនុប្រធានភូមិ និងសមាជិកភូមិដើម្បីឱ្យក្រុមប្រឹក្សាឃុំ សង្កាត់ បោះឆ្នោតបន្ត។ តាមរយៈនីតិវិធីជ្រើសតាំងសម្រាប់ភូមិថ្មីនេះគឺចុងក្រោយ យើងនឹងបានមេភូមិ អនុប្រធានភូមិ និងសមាជិកភូមិ»។
តាមលោក យក់ ប៊ុនណា មកទល់បច្ចុប្បន្ន ការងារជ្រើសតាំងមេភូមិថ្មីនេះ កំពុងដំណើរការនៅតាមតំបន់ដែលត្រូវបានបង្កើតភូមិថ្មី ហើយមានកន្លែងខ្លះបានរៀបចំការស្ទាបស្ទង់មតិពីពលរដ្ឋរួចហើយ ហើយឈានទៅដល់ដំណាក់កាលនៃការរៀបចំបញ្ជីសម្រាប់ជូនទៅក្រុមប្រឹក្សាបោះឆ្នោត។ ចំណែកកន្លែងខ្លះទៀតក៏កំពុងបន្តរៀបចំទទួលមតិយោបល់ពីពលរដ្ឋដើម្បីរើសបេក្ខភាពមេភូមិថ្មីដែលពួកគាត់ពេញចិត្ត។
បើតាមក្រសួងមុខងារសាធារណៈមកទល់បច្ចុប្បន្នខេត្តក្រចេះមានស្រុក-ក្រុងចំនួន ៦ ឃុំ-សង្កាត់ ចំនួន ៤៧ និងភូមិចំនួន ២៥៨។ ក្នុងចំណោមភូមិទាំងអស់នេះមានឧបសម្ព័ន្ធជារចនាសម្ព័ន្ធគ្រប់គ្រងរដ្ឋបាលបណ្ដោះអាសន្ន ឬហៅថា ភូមិឧបសម្ព័ន្ធចំនួន ១២។ ក្នុងភូមិសាស្ត្រភូមិឧបសម្ព័ន្ធទាំងអស់នោះមានពលរដ្ឋរស់នៅ ២២ ៦២០ គ្រួសារក្នុងនោះចំនួនមនុស្ស ៨៧ ០៧៦ នាក់ ហើយអ្នកដែលមានអាយុចាប់ពី ១៨ ឆ្នាំឡើងមានចំនួន ៤៦ ៨៣៥ នាក់ និងបានចុះឈ្មោះបោះឆ្នោតចំនួន ៣២៦៣៨ នាក់។
លោក ប៉ិច ពិសី នាយកប្រតិបត្តិអង្គការតម្លាភាពកម្ពុជាបានសាទរចំពោះដំណើរការនៃការរៀបចំភូមិថ្មីដើម្បីឆ្លើយតបទៅនឹងតម្រូវការជាក់ស្តែងនៃកំណើនពលរដ្ឋក្នុងតំបន់។ ការរៀបចំរចនាសម្ព័ន្ដដឹកនាំភូមិជាក់លាក់គឺត្រូវការថ្នាក់ដឹកនាំដែលមានសមត្ថភាពហើយការផ្តល់ឱកាសដល់យុវជនក៏ជារឿងមួយដែលចាំបាច់ផងដែរ។
លោកថា៖ «ការផ្តល់សេវាប្រកបដោយប្រសិទ្ធភាពគឺជាគោលដៅសំខាន់របស់ក្រសួងមហាផ្ទៃ និងក្រសួងមុខងារសាធារណៈដែលដឹកនាំក្នុងការធ្វើកំណែទម្រង់សេវាសាធារណៈ។
មកទល់ពេលនេះ ខ្ញុំគិតថា ទោះភូមិ ឃុំថ្មី ឬភូមិឃុំចាស់ក៏ដោយក៏ត្រូវជ្រើសរើសថ្នាក់ដឹកនាំដែលមានសមត្ថភាពហើយក្មេងៗដែលមានចំនួនច្រើនលើសលប់ជាពិសេសស្ត្រីហ្នឹង គួរតែមានឱកាសក្នុងការចូលរួមដឹកនាំមូលដ្ឋានរបស់ពួកគាត់»៕
