.jpg)
កិច្ចប្រជុំតាមប្រព័ន្ធ Skype រវាងលោក ជិន ម៉ាលីន និងលោក Pradeep Wagle កាលពីថ្ងៃ ២៩ មីនា។ រូបថត ក្រសួងយុត្តិធម៌
ភ្នំពេញៈ ក្រុមការងារក្រសួងយុត្ដិធម៌ និងការិយាល័យឧត្តមស្នងការទទួលបន្ទុកសិទ្ធិមនុស្សប្រចាំកម្ពុជា (OHCHR) បានឯកភាពគ្នារៀបចំក្រុមការងារបច្ចេកទេសចម្រុះដើម្បីធ្វើកំណែទម្រង់វិស័យច្បាប់ និងប្រព័ន្ធយុត្ដិធម៌នៅកម្ពុជា សម្រាប់អនុវត្ដកម្មវិធីកំណែទម្រង់ក្នុងឆ្នាំនេះ និងពិភាក្សាគ្នាលើកិច្ចសហប្រតិបត្តិការគ្នានៅក្នុងបរិបទកូវីដ ១៩ នេះ។
លោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្ដិធម៌ ថ្លែងប្រាប់ភ្នំពេញប៉ុស្ដិ៍ពីម្សិលមិញថា លោកបានដឹកនាំក្រុមការងារជួបប្រជុំតាមប្រព័ន្ធអនឡាញ (Skype) ជាមួយលោក Pradeep Wagle ប្រធានការិយាល័យឧត្តមស្នងការទទួលបន្ទុកសិទ្ធិមនុស្សប្រចាំកម្ពុជាកាលពីថ្ងៃទី ២៩ ខែមីនា ដោយបានពិភាក្សាលើរបៀបវារៈចំនួន ២ គឺ ១ ពិនិត្យ និងកែសម្រួលឡើងវិញនូវកិច្ចសហប្រតិបត្តិការក្នុងវិស័យកំណែទម្រង់ច្បាប់ និងយុត្តិធម៌ ដើម្បីឱ្យស្របតាម និងអាចអនុវត្តបានក្នុងបរិបទកូវីដ១៩។
ចំណែកទី២ គឺពិភាក្សាត្រៀមរៀបចំកិច្ចប្រជុំក្រុមការងារបច្ចេកទេសចម្រុះកំណែទម្រង់ច្បាប់ និងប្រព័ន្ធយុត្តិធម៌ (TWG) ជាមួយដៃគូអភិវឌ្ឍន៍ និងសង្គមស៊ីវិលដែលគ្រោងធ្វើនៅក្នុងខែមេសាខាងមុខនេះ តាមប្រព័ន្ធអនឡាញ។
លោកបានបញ្ជាក់ថា៖ «យើងពិនិត្យឡើងវិញទៅលើសកម្មភាពដែលយើងធ្វើជាមួយគ្នាដោយកែសម្រួលកិច្ចសហប្រតិបត្ដិការខ្លះ ដើម្បីធ្វើម៉េចឱ្យយើងអាចអនុវត្ដបានស្របទៅតាមបរិបទនៃកូវីដ ១៩»។
លោក ជិន ម៉ាលីន បានបន្តថា៖ «យើងបានឯកភាពគ្នានឹងរៀបចំក្រុមការងារបច្ចេកទេសចម្រុះកំណែទម្រង់ច្បាប់ និងប្រព័ន្ធយុត្ដិធម៌ដែលមានខ្ញុំ និងលោក Pradeep Wagle ជាសហប្រធានដឹកនាំ និងមានការចូលរួមពីដៃគូអភិវឌ្ឍន៍ និងសង្គមស៊ីវីលទាំងមូល ដើម្បីពិភាក្សាគ្នាពីការចូលរួមរបស់ដៃគូ និងភាគីពាក់ព័ន្ធក្នុងការអនុវត្ដកម្មវិធីកំណែទម្រង់ច្បាប់ និងប្រព័ន្ធយុត្តិធម៌ឆ្នាំ ២០២១។ យើងគ្រោងនឹងរៀបចំកិច្ចប្រជុំនេះនៅពាក់កណ្ដាលខែមេសាខាងមុខ»។
លោក Pradeep Wagle ថ្លែងប្រាប់ ភ្នំពេញ ប៉ុស្ដិ៍ កាលពីម្សិលមិញថា ជំនួបរវាងការិយាល័យឧត្តមស្នងការទទួលបន្ទុកសិទ្ធិមនុស្សប្រចាំកម្ពុជា និងក្រសួងយុត្ដិធម៌នេះគឺក្នុងឋានៈជាសហប្រធាននៃក្រុមការងារបច្ចេកទេសចម្រុះ ធ្វើកំណែទម្រង់ច្បាប់ និងប្រព័ន្ធយុត្ដិធម៌នៅកម្ពុជា។ ក្រុមការងារនេះមានសមាសភាពរដ្ឋាភិបាលកម្ពុជា ដៃគូអភិវឌ្ឍន៍ និងអង្គការសង្គមស៊ីវិលជួបគ្នាដើម្បីផ្លាស់ប្តូរព័ត៌មានពាក់ព័ន្ធនឹងកំណែទម្រង់ច្បាប់ និងប្រព័ន្ធយុត្ដិធម៌។
លោកថ្លែងថា៖ «កិច្ចប្រជុំនេះក៏គ្របដណ្តប់លើផ្នែកផ្សេងៗដែល OHCHR និងក្រសួងយុត្តិធម៌អាចធ្វើការជាមួយគ្នាជាពិសេសការបណ្តុះបណ្តាលលើផ្នែកសិទ្ធិមនុស្សក្នុងតុលាការ និងពង្រឹងការគ្រប់គ្រងទិន្នន័យតាមករណីបទឧក្រិដ្ឋដែលមានស្រាប់នៅតាមតុលាការដែល OHCHR បានសហការគាំទ្រតាំងពីឆ្នាំ ២០១៥ រហូតមក»។
លោក អំ សំអាត នាយករងអង្គការលីកាដូបានថ្លែងកាលពីម្សិលមិញថា ការធ្វើកំណែទម្រង់ច្បាប់ និងប្រព័ន្ធយុត្ដិធម៌នៅកម្ពុជាជាទិសដៅ និងជាយន្តការរបស់រាជរដ្ឋាភិបាលបានសន្យាជាយូរមកហើយ។
ក៏ប៉ុន្ដែការធ្វើកំណែទម្រង់នោះហាក់បីដូចជានៅមានភាពយឺតយ៉ាវនៅឡើយ ដែលមិនទាន់បានឆ្លើយតបទៅនឹងស្ថានភាពជាក់ស្ដែងនៅកម្ពុជា។
លោកបានថ្លែងថា៖ «ដូច្នេះហើយទើបមានការរិះគន់ច្រើនទាក់ទងទៅនឹងបញ្ហាប្រព័ន្ធយុត្ដិធម៌នៅកម្ពុជា។ យើងឃើញហើយថា OHCHR ជាពិសេសអ្នករាយការណ៍ពិសេសផ្នែកសិទ្ធិមនុស្សរបស់ OHCHR ប្រចាំកម្ពុជាបានផ្ដល់អនុសាសន៍ជាបន្តបន្ទាប់ ទាក់ទងនឹងការកំណែទម្រង់ប្រព័ន្ធច្បាប់ និងប្រព័ន្ធយុត្តិធម៌នៅកម្ពុជានេះដើម្បីជាជំនឿចិត្ដដល់ពលរដ្ឋ»។
យ៉ាងណាក្ដីលោក សំអាត បានគាំទ្រចំពោះជំនួបពិភាក្សារវាងក្រុមការងារក្រសួងយុត្ដិធម៌ និង OHCHR ប្រចាំកម្ពុជាលើការកំណែទម្រង់ប្រព័ន្ធច្បាប់ និងប្រព័ន្ធយុត្ដិធម៌ប្រចាំកម្ពុជារវាងភាគីទាំង ២។
លោកថ្លែងថា ថ្វីបើដំណើរការនេះមានភាពយឺតយ៉ាវ ប៉ុន្ដែក្រោយពេលរដ្ឋមន្ដ្រីក្រសួងយុត្ដិធម៌ថ្មីបានឡើងកាន់តំណែងកាលពីឆ្នាំមុន ការកំណែទម្រង់ថ្មីៗមួយចំនួនបានកើតឡើងដូចជា យុទ្ធនាការដោះស្រាយការកកស្ទះសំណុំរឿងតាមសាលាដំបូងរាជធានី-ខេត្ដ និងការកសាងគោលនយោបាយការដោះស្រាយវិវាទក្រៅប្រព័ន្ធតុលាការជាដើម។
លោកបានថ្លែងថា៖ «បន្ទាប់ពីរដ្ឋមន្ដ្រីថ្មីឡើងកាន់តំណែងយើងសង្កេតឃើញមន្ដ្រីយុត្ដិធម៌មានការពន្លឿននីតិវិធីនៅតាមសាលាដំបូង និងមានការបង្កើតគណៈកម្មការជាច្រើនក្នុងការកំណែទម្រង់។ ដូច្នេះយើងឃើញថា សកម្មភាពទាំងនេះទើបតែជាការចាប់ផ្ដើមគឺនៅមិនទាន់មានជារូបរាងច្បាស់លាស់ទេ»៕
