ក្រចេះ ក្រសួងឧស្សាហកម្មនិងសិប្បកម្មនៅថ្ងៃទី ១ ខែវិច្ឆិកានេះ បានបើកវគ្គបណ្តុះបណ្តាលស្តីពីបទដ្ឋានបច្ចេកទេសក្នុងការផលិតស្រាសអង្ករ និង ពន្យល់ពីផលប៉ះពាល់ដល់សុវត្ថិភាពនិងសុខភាព បន្ទាប់ពីមានករណីពុលស្រាសបង្កឲ្យមានមនុស្សស្លាប់និងឈឺជាបន្តបន្ទាប់នៅក្នុងខេត្ដក្រចេះ ។
លោក ខាន់ ចំណាន អភិបាលរងខេត្តក្រចេះដែលបានចូលរួមបើកវគ្គបណ្ដុះបណ្ដាលនេះបានថ្លែងប្រាប់ភ្នំពេញបុស្ដិ៍ថា វគ្គបណ្ដុះបណ្ដាលនេះទទួលបានការចូលរួមពីផ្នែកបច្ចេកទេសស្ដង់ដារចំពោះការផលិតស្រាសធ្វើពីអង្ករ និងមន្ដ្រីជំនាញមកពីក្រសួងឧស្សាហកម្មនិងសិប្បកម្ម បង្ហាញដល់អ្នកប្រកបរបរផលិតស្រាស មុននឹងអនុញ្ញាតឲ្យពួកគាត់បើកលក់។
លោកបានបន្ដថា៖ «វគ្គបណ្ដុះបណ្ដាលនេះ យើងបានពន្យល់ពួកគាត់ទៅលើ បទដ្ឋានបច្ចេកទេស ក្នុងការផលិតស្រាសអង្ករ និងផលប៉ះពាល់របស់វា ចំពោះសុវត្ថិភាព និងសុខភាពអ្នកបរិភោគ។ អ្នកដែលប្រកបរបរផលិតស្រាសអង្ករ នៅតាមបណ្តាស្រុកទាំង៥ និងក្រុង ១ ក្នុងខេត្តក្រចេះបានមកចូលក្នុងវគ្គបណ្ដុះបណ្ដាលនេះដើម្បីទទួលបានចំណេះដឹងថ្មីៗអំពីការផលិតស្រាសធ្វើពីអង្ករ»។
លោក ចំណាន បានបង្ហាញថា វគ្គបណ្តុះបណ្តាលនេះ ក៏ជាផ្នែកមួយដ៏សំខាន់ក្នុងការជំរុញឲ្យផលិតផលក្នុងស្រុក អនុវត្តតាមស្តង់ដារកម្ពុជា និងស្តង់ដារអន្តរជាតិ ធានានូវគុណភាព និងសុវត្ថិភាព ដើម្បីរួមចំណែកក្នុងការការពារសុខុមាលភាព និងសុខភាពសាធារណៈ និងសង្គមជាតិទាំងមូល។
លោក អ៊ិន សំបូរ អគ្គនាយករងនៃអគ្គនាយកដ្ឋានស្តង់ដារកម្ពុជា បានធ្វើបទបង្ហាញពីសារៈសំខាន់នៃការផលិតស្រាសដល់អ្នកចូលរួមផងដែរ។
លោក បានផ្តាំផ្ញើថា៖ «អ្នកផលិតទាំងអស់ត្រូវផលិតប្រកបដោយមានអនាម័យនិងមានគុណភាព សុវត្ថិភាព។ មិនត្រូវផលិតស្រាសដោយការលាយសារធាតុមេតាណុលនោះទេ ព្រោះជាហេតុនាំឲ្យមានផលប៉ះពាល់ដល់សុខភាពអ្នកបរិភោគស្រាសនោះ»។
គួរបញ្ជាក់ថា ករណីពុលស្រាសមួយបានកើតឡើងនៅឃុំបឹងចារ ស្រុកសំបូរ ខេត្ដក្រចេះ និងឃុំកោះខ្ញែ បណ្ដាលឲ្យពលរដ្ឋ៥នាក់ស្លាប់ និង៧៨នាក់ទៀត ធ្លាក់ខ្លួនឈឺជាបន្ដបន្ទាប់។
លោក នី ឆុង ប្រធានមន្ទីរ ឧស្សាហកម្ម និងសិប្បកម្មខេត្ដក្រចេះ បានបញ្ជាក់ថា បន្ទាប់ពីទទួលបានការបណ្ដុះបណ្ដាលហើយ អាជ្ញាធរបានបញ្ជាក់ទៅពលរដ្ឋទាំងអស់ មុននឹងបើកលក់ស្រាត្រូវមកសុំសិទ្ធិនៅមន្ទីរពាក់ព័ន្ធជាមុនសិនដើម្បីបញ្ជាក់ពីបទដ្ឋានបច្ចេកទេសនៃការផលិតស្រាសរបស់ពួកគាត់។
លោកបន្ដ៖ «ទាល់តែយើងពិនិត្យមើលផលលិតផលស្រាសរបស់ពួកគាត់ត្រឹមត្រូវតាមបទដ្ឋានបច្ចេកទេសដែលមន្ដ្រីជំនាញបានកំណត់ ទើបយើងអនញ្ញាតផ្ដល់សិទ្ធិឲ្យពួកគាត់បើកលក់បន្ដទៀតបាន»។
គួរបញ្ជាក់ថា ករណីពុលស្រាសដែលមានមនុស្សស្លាប់និងធ្លាក់ខ្លួនឈឺរាប់សិបនាក់បែបនេះមិនមែនជាលើកទីមួយទេសម្រាប់ខេត្តក្រចេះ ប៉ុន្តែកាលពីដើមខែឧសភា ឆ្នាំ ២០១៨ មានករណីពុលស្រាស និងទឹក ដែលមានសារធាតុគីមីពុលបានសម្លាប់ពលរដ្ឋក្នុងឃុំកន្តួត ស្រុកចិត្របុរី ១៤ នាក់ និងរាប់សិបនាក់ធ្លាក់ខ្លួនឈឺជាទម្ងន់។
ចំណែកករណីពុលស្រាសមួយទៀតបានកើតឡើងនៅឃុំបឹងចារ ស្រុកសំបូរ ខេត្ដក្រចេះ និងឃុំកោះខ្ញែរ បណ្ដាលឲ្យប្រជាពលរដ្ឋ ៥ នាក់ស្លាប់ និង ៧៨ នាក់ ទៀត ធ្លាក់ខ្លួនឈឺជាបន្ដបន្ទាប់៕