.jpg)
ទិដ្ឋភាពក្នុងសាលប្រឡងយកបណ្ណបើកបររបស់សិស្ស នៅមន្ទីរសាធារណការរាជធានី ពីថ្ងៃទី ៨ ឧសភា។ រូប ក្រសួងសាធារណការ
ភ្នំពេញៈ ក្រសួងសាធារណការ និងដឹកជញ្ជូនប្រកាសឱ្យផ្អាកដំណើរការចំពោះការបណ្តុះបណ្តាលនៅសាលាបង្រៀនបើកបរយានយន្ត និងការប្រឡងយកបណ្ណបើកបរយានយន្ត ជាបណ្តោះអាសន្នរយៈពេល ១៥ ថ្ងៃចាប់ពីថ្ងៃទី ១ ខែធ្នូ ដល់ថ្ងៃទី ១៥ ខែធ្នូ ឆ្នាំ ២០២០ ដើម្បីរួមចំណែកទប់ស្កាត់ការរីករាលដាលនៃជំងឺកូវីដ១៩ក្នុងសហគមន៍។ នេះបើតាមសេចក្តីជូនដំណឹងរបស់ក្រសួងសាធារណការកាលពីថ្ងៃទី ២ ខែធ្នូ។
លោក ហ៊ាង សុទ្ធាយុត្តិ ប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ និងជាអ្នកនាំពាក្យនៃក្រសួងសាធារណការ និងដឹកជញ្ជូនបានប្រាប់ភ្នំពេញប៉ុស្តិ៍កាលពីម្សិលមិញថា ក្នុងដំណាក់កាលនៃការបិទបណ្តោះអាសន្ននេះ បើទោះបីមិនមានការបញ្ជាក់នៅក្នុងសេចក្តីជូនដំណឹងពីវិធានការ ឬការដាក់ទោសទណ្ឌយ៉ាងណាក្តី ប៉ុន្តែបើពិនិត្យឃើញសាលាបង្រៀនបើកបរណាមួយ នៅតែបន្តបើកឱ្យដំណើរការទៀតនោះ ក្រសួង និងស្ថាប័នរបស់រដ្ឋមានសិទ្ធិក្នុងការចាត់វិធានការតាមផ្លូវច្បាប់។
លោកបន្តថា ចំពោះការចាត់វិធានការនេះមិនសំដៅដល់ការចាប់ចង ឬ ផ្តន្ទាទោសនោះទេគឺគ្រាន់តែធ្វើការណែនាំឱ្យមានការបិទ។ ប៉ុន្តែទោះយ៉ាងណាបើនៅតែមិនមានការបិទទេ ក្រសួង ស្ថាប័នរដ្ឋ ដែលមានសមត្ថកិច្ចនឹងធ្វើការកសាងសំណុំរឿងតាមច្បាប់បញ្ជូនទៅតុលាការ ដើម្បីចាត់វិធានការទៅតាមច្បាប់។
លោក ហ៊ាង សុទ្ធាយុត្តិ ក៏មិនបានបញ្ជាក់ពីចំនួនសាលាបង្រៀនបើកបរនៅទូទាំងប្រទេសមានប៉ុន្មាននោះទេ ដោយលោកថា មិនមានព័ត៌មានពីតួលេខសាលាបង្រៀននេះនៅក្នុងដៃ។ ប៉ុន្តែសម្រាប់មណ្ឌលប្រឡងយកបណ្ណបើកបរគឺមានចំនួន ២៦ មណ្ឌលក្នុងរាជធានី-ខេត្តនៅទូទាំងប្រទេស។
លោកស្រី កៀន សោភ័ណ ម្ចាស់សាលាបង្រៀនបើកបររថយន្តដៃធំ II បានឱ្យដឹងថា បន្ទាប់ពីទទួលបានសេចក្តីជូនដំណឹងរបស់ក្រសួង សាលាបង្រៀនបើកបររបស់លោកស្រីបានបិទជាបណ្តោះអាសន្ន ដើម្បីបង្ការ និងចូលរួមជាមួយរាជរដ្ឋាភិបាលក្នុងការទប់ស្កាត់នៃការចម្លងនូវជំងឺកូវីដ១៩ ក្នុងសហគមន៍។ លោកស្រីបានប្រាប់ឱ្យលោកគ្រូបង្រៀន និងសិស្សទាំងអស់ ផ្អាកបង្រៀន និងរៀនមួយរយៈនេះ។ ប៉ុន្តែក្នុងអំឡុងពេលនៃជំងឺកូវីដ១៩នេះសាលាក៏មិនសូវទទួលបានសិស្សមកចុះឈ្មោះចូលរៀនដែរ ដោយសារបញ្ហាចម្បងគឺមានការភ័យខ្លាចពីការឆ្លងនូវជំងឺកូវីដ១៩។
បើតាមលោកស្រីចាប់តាំងពីមានការផ្ទុះឡើងនូវវិបត្តិជំងឺកូវីដ១៩នៅក្នុងប្រទេស សាលាបង្រៀនបើកបររបស់លោកស្រីស្ទើរតែគ្រប់សាខាធ្លាក់ចុះចំនួនសិស្សមកចុះឈ្មោះចូលរៀនប្រមាណពី ៧០ ទៅ ៨០ ភាគរយ។ ប៉ុន្តែលោកស្រីក៏មិនបានបញ្ជាក់ពីចំនួនសិស្សច្បាស់លាស់នោះដែរ។
លោកស្រី សោភ័ណ និយាយថា៖ «ទាំងសិស្សចុះឈ្មោះរួចហើយក៏មិនសូវមករៀន និងសិស្សថ្មីក៏មិនសូវមាន ហើយនៅក្នុងអំឡុងពេលនេះ និងក្រោយជំងឺកូវីដ១៩ សាលាបានដាក់ចេញនូវវិធានការអនាម័យ និងគម្លាតសង្គម ដើម្បីការពារកុំឱ្យមានការឆ្លងនូវជំងឺកូវីដ១៩ ស្របតាមការអំពាវនាវរបស់ប្រមុខនៃរាជរដ្ឋាភិបាលកម្ពុជា»។
ចំណែកលោកស្រី ណង លក្ខិណា ម្ចាស់សាលាបង្រៀនបើកបររថយន្តមិត្តភាពបានឱ្យដឹងដែរថា លោកស្រីបានទទួលសេចក្តីជូនដំណឹងនេះពីក្រសួងសាធារណការ និងដឹកជញ្ជូនដែលប្រាប់ដើម្បីឱ្យចូលរួមអនុវត្ត និងបង្ការការចម្លងជំងឺកូវីដ១៩ ដែលកំពុងកើតឡើងនៅក្នុងសហគមន៍នាពេលនេះ។
លោកស្រីថ្លែងថា៖ «សាលាបានបិទបណ្តោះអាសន្នគ្រប់សាខាទាំងអស់ ហើយក៏បានសូមអភ័យទោសដល់លោកគ្រូ បង្រៀន និងសិស្សផងដែរ ព្រោះកាលៈទេសៈនេះគឺជាពេលវេលាលំបាកទាំងអស់គ្នា»។
លោកនាយករដ្ឋមន្ត្រី ហ៊ុន សែន កាលពីថ្ងៃទី ៣០ ខែវិច្ឆិកាប្រាប់ឱ្យក្រសួង ស្ថាប័ន និងរាជធានី-ខេត្ត ដែលពាក់ព័ន្ធត្រូវបិទបណ្តោះអាសន្ននូវសាលារៀន និងពិធីជួបជុំដែលមានគ្នាច្រើន ដើម្បីទប់ស្កាត់កុំឱ្យមានការចម្លងជំងឺកូវីដ១៩៕
