The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​ ​ពិភាក្សា​លើ​សេចក្តី​ព្រាង​ច្បាប់​កំណត់​ប្រាក់​ឈ្នួល

ក្រសួង​ ​ពិភាក្សា​លើ​សេចក្តី​ព្រាង​ច្បាប់​កំណត់​ប្រាក់​ឈ្នួល

ក្រសួង​ ​ពិភាក្សា​លើ​សេចក្តី​ព្រាង​ច្បាប់​កំណត់​ប្រាក់​ឈ្នួល

ភ្នំពេញៈ ក្រសួង​ការងារ​កាលពី​ម្សិលមិញ​បាន​បើក​កិច្ចប្រជុំ​ធ្វើការ​ពិភាក្សា​ទៅ​លើ​សេចក្តី​ព្រាង​ច្បាប់​ស្តីពី​ការ​កំណត់​ប្រាក់​ឈ្នួល​អប្បបរមា​របស់​កម្មករ និយោជិត ដែល​នៅ​ក្នុង​ឱកាស​នេះ​លោក អ៊ិត សំហេង រដ្ឋមន្រ្តី​ក្រសួង​ការងារ​បាន​អះអាង​ថា​ច្បាប់​នេះ​នឹង​បញ្ចៀស​នូវ​ការ​ញុះញង់​ឲ្យ​មាន​ការ​ធ្វើ​បាតុកម្ម ប៉ុន្តែ​សហជីព​បារម្ភ​ថា​ច្បាប់​នេះ​អាច​នឹង​ដាក់​សម្ពាធ​ទៅ​លើ​តំណាង​កម្មករ។

លោក អ៊ិត សំហេង ថ្លែង​ថា​ច្បាប់​ថ្មី​នេះ​កំណត់​ឲ្យ​មាន​ការ​ប្រជុំ​ទៀងទាត់​ស្តីពី​ប្រាក់​ឈ្នួល​ជា​ជាង​ការ​តវ៉ា​កើតឡើង​ហើយ​ច្បាប់​ថ្មី​នេះ​ទៀត​សោត​ក៏​នឹង​មិន​ប៉ះពាល់​ដល់​ការ​បញ្ជា​ទិញ​ពី​ខាង​ក្រៅ​ឡើយ។

លោក​ថា៖ «ច្បាប់​ថ្មី​នេះ​មាន​ការ​ពិភាក្សា​ពី​គ្រប់​ភាគី​ទាំង​រដ្ឋាភិបាល​តំណាង​កម្មករ និង​និយោជក​ដើម្បី​ធានា​ដល់​ការ​លើក​កម្ពស់​ជីវភាព​កម្មករ និង​ធានា​បាន​នូវ​ការ​បញ្ជា​ទិញ»។

យោង​តាម​សេចក្តី​ព្រាង​ច្បាប់​ស្តីពី​ប្រាក់​ឈ្នួល​នេះ​មាន​គោលបំណង​កំណត់​ប្រាក់​ឈ្នួល​អប្បបរមា​សម្រាប់​ជន​ទាំងឡាយ​ដែល​ស្ថិត​នៅ​ក្រោម​បទប្បញត្តិ​នៃ​ច្បាប់​ស្តីពី​ការងារ បង្កើត​នីតិវិធី​កំណត់​ប្រាក់​ឈ្នួល​អប្បបរមា​តាម​បែប​វិទ្យាសាស្រ្ត កំណត់​លក្ខណ​វិនិច្ឆ័យ​បែប​សង្គម និង​សេដ្ឋកិច្ច និង​បង្កើត​ក្រុម​ប្រឹក្សា​ជាតិ​ប្រាក់​ឈ្នួល​អប្បបរមា​ដើម្បី​ជា​យន្តការ​ត្រី​ភាគី​សម្រាប់​ការ​សិក្សា​ស្រាវជ្រាវ និង​ផ្តល់​អនុសាសន៍ អំពី​ប្រាក់​ឈ្នួល​អប្បបរមា និង​អត្ថប្រយោជន៍​ផ្សេងៗ​របស់​ជន​ទាំង​ឡាយ​ដែល​ស្ថិត​នៅ​ក្រោម​បទប្បញត្តិ​នៃ​ច្បាប់​ស្តីពី​ការងារ។

នៅ​ក្នុង​មាត្រា ២៦ នៃ​សេចក្តី​ព្រាង​ច្បាប់​នេះ​ត្រូវ​ព្រមាន​ជា​លាយលក្ខណ៍​អក្សរ​ចំពោះ​បុគ្គល​ដែល​ញុះញង់​ ឬ​បំផុស​ឲ្យ​មាន​សកម្មភាព​ផ្សេងៗ​នឹង​ប្រកាស​ស្តីពី​ការ​កំណត់​ប្រាក់​ឈ្នួល​អប្បបរមា។ ក្នុង​ករណី​មិន​គោរព​តាម​ការ​ព្រមាន​ខាង​លើ​ត្រូវ​ពិន័យ​អន្តរការណ៍​ជា​ប្រាក់​មិន​លើស​ពី ១០ លាន​រៀល។

បើ​តាម​លោក អ៊ិត សំហេង គិត​ចាប់​ពី​ឆ្នាំ ១៩៩៧ ដល់​ឆ្នាំ ២០១៧ រាជរដ្ឋាភិបាល​បាន​ដំឡើង​ប្រាក់​ឈ្នួល​អប្បបរមា និង​អត្ថប្រយោជន៍​ផ្សេងៗ​របស់​កម្មករ​និយោជិត​ផ្នែក​វាយនភណ្ឌ​កាត់ដេរ និង​ផលិត​ស្បែក​ជើង​បាន​ចំនួន ១៣ លើក​ដោយ​កើន​ពី ៣០ ដុល្លារ​ក្នុង​ឆ្នាំ ១៩៩៧ ដល់ ១៥៣ ដុល្លារ ក្នុង​ឆ្នាំ ២០១៧។

លោក អាត់ ធន ប្រធាន​សហភាព​ការងារ​កម្ពុជា​បាន​ឲ្យ​ដឹង​ថា​ខាង​សហជីព​គាំទ្រ​ចំពោះ​ច្បាប់​ថ្មី​នេះ​តែ​តម្រូវ​ឲ្យ​មាន​ការ​ពិភាក្សា​ឲ្យ​បាន​ល្អិតល្អន់។ «ច្បាប់​នេះ​មាន​ទាំង​ចំណុច​ល្អ និង​មិន​ល្អ​សម្រាប់​ប្រសិទ្ធភាព​ផ្សេងៗ​ដែល​ធ្លាប់​មាន និង​បាន​ដាក់​ទណ្ឌកម្ម​ទៅ​លើ​អ្នក​តំណាង​ដែល​ធ្វើ​ឲ្យ​តំណាង​កម្មករ​អាច​នឹង​បាត់​សំឡេង»៕

អត្ថបទគួរចាប់អារម្មណ៍