The Phnom Penh Post Search

Search form

ក្រសួង​ រ៉ែ​ គ្រោង​បង្ហាញ​​ពី​ផលប៉ះពាល់​នៃ​ការ​បូម​ខ្សាច់

សកម្មភាព​កប៉ាល់​បូម​ខ្សាច់​នៅ​​តាម​ស្ទឹង​ក្នុង​ខេត្ត​កោះកុង​កាលពី​ពេល​កន្លង​មក​។
សកម្មភាព​កប៉ាល់​បូម​ខ្សាច់​នៅ​​តាម​ស្ទឹង​ក្នុង​ខេត្ត​កោះកុង​កាលពី​ពេល​កន្លង​មក​។ រូបថត អង្គការ​មាតា​ធម្មជាតិ

ក្រសួង​ រ៉ែ​ គ្រោង​បង្ហាញ​​ពី​ផលប៉ះពាល់​នៃ​ការ​បូម​ខ្សាច់

កោះកុងៈ ក្រសួង​រ៉ែ​ និង​ថាមពល​កំពុង​គ្រោង​ចេញ​​នូវ​លទ្ធផល​​នៃ​ការ​​វាយតម្លៃ​ផលប៉ះពាល់​បរិស្ថាន​​​នៃ​ការ​បូមខ្សាច់​ដែល​មាន​លក្ខណៈ​ចម្រូង​ចម្រាស​ក្នុង​​ខេត្ត​កោះកុង​ដោយ​ក្រុមហ៊ុន​ពីរ​ «​​នា​ពេល​ឆាប់ៗ​​»។ នេះ​បើ​​តាម​អ្នក​នាំ​ពាក្យ​របស់​ក្រសួង​លោក ម៉េង ស័ក្តធារ៉ា ដែល​បាន​ថ្លែង​កាលពី​ថ្ងៃ​ចន្ទ។

សកម្មជន​មកពី​អង្គការ​មាតា​ធម្មជាតិ​បាន​អះអាង​ថា​ក្រុមហ៊ុន​ទាំង​ពីរ​នេះ​គឺ​ក្រុមហ៊ុន International Rainbow Company Ltd និង​​ក្រុមហ៊ុន Direct Access Ltd. បាន​ទៅ​ធ្វើ​ប្រតិបត្តិការ​ដោយ​មិន​​បាន​ធ្វើការ​សិក្សា​​ពី​ផលប៉ះពាល់​ទៅលើ​បរិស្ថាន​ និង​សហគមន៍​នេសាទ​។

តំណាង​រាស្រ្ត​គណបក្ស​ប្រឆាំង​លោក ស៊ុន ឆ័យ កាលពី​ដើម​ខែ​នេះ​បាន​ស្នើ​​ឲ្យ​​​​ក្រសួង​បង្ហាញ​នូវ​​​ការ​វាយតម្លៃ​ផលប៉ះពាល់​បរិស្ថាន​​ព្រម​ទាំង​ចំណូល​​​របស់​រដ្ឋាភិបាល​ពី​ប្រតិបត្តិការ​បូម​​ខ្សាច់​ក្នុង​ខេត្ត​កោះកុង​។

សួន ប៊ុនសៀ ប្រធាន​ការិយាល័យ​ផ្តល់​អាជ្ញាប័ណ្ណ​របស់​​ក្រសួង​កាលពី​ម្សិលមិញ​បាន​បង្ហាញ​​ភ្នំពេញ​ប៉ុស្តិ៍​នូវ​លទ្ធផល​ការ​វាយតម្លៃ​ផល​ប៉ះពាល់​បរិស្ថាន​សម្រាប់​​ក្រុមហ៊ុន International Rainbow ពី​ឆ្នាំ​ ២០០៩ ព្រម​ទាំង​​លទ្ធផល​ការ​វាយតម្លៃ​ថ្មី​ខ្លី​មួយ​ប្រចាំ​ឆ្នាំ​សម្រាប់​​ក្រុមហ៊ុន Direct Access Ltd. កាលពី​ឆ្នាំ ២០១៤​។

ការ​ស្រាវជ្រាវ​របស់​​ក្រសួង​រកឃើញ​ថា ​ផលប៉ះពាល់​នៃ​ការ​បូមខ្សាច់​គឺ​មាន​ទំហំ​តិច​តួច​ណាស់​​។ នេះ​បើ​តាម​ឯកសារ​។ ចំណូល​​របស់​រដ្ឋាភិបាល​ពី​ប្រតិបត្តិការ​នេះ​មិន​ត្រូវ​បាន​បង្ហាញ​ទេ​​។

លោក ប៊ុនសៀ បាន​ថ្លែង​បន្ត​ថា​៖ «​​កប៉ាល់​មិន​អាច​ឆ្លង​​​ព្រែក​កោះកុង​បាន​ពីព្រោះ​មាន​ខ្សាច់​​ច្រើន​ពេក​។ ​វា​បង្ក​ឲ្យ​មាន​​​ទឹក​ជំនន់​»។ «​ច្រាំង​ទន្លេ​ក៏​បាក់​ផង​ដែរ​​ដោយសារ​ចរន្ត​ទឹក​ខ្លាំង​»​។

ភ្នំពេញ​ប៉ុស្តិ៍​ក៏​បាន​ឃើញ​ផង​​ដែរ​នូវ​ការ​សិក្សា​​ឆ្នាំ​ ២០១៣ ដែល​​ធ្វើ​ឡើង​ដោយ​ផ្ទាល់​ដោយ​ក្រុមហ៊ុន International Rainbow។ ផ្នែក​នៃ​របាយការណ៍​នេះ​បាន​ទទួល​ស្គាល់​ថា​ប្រតិបត្តិការ​​បូម​ខ្សាច់​ទ្រង់ទ្រាយ​ធំ​អាច​​ប៉ះពាល់​ជា​អវិជ្ជមាន​ទៅលើ​សហគមន៍​នេសាទ​ដែល​ជា​សហគមន៍​មួយ​ដែល​មាន​ប្រជាជន​​រស់​នៅ​ច្រើន​។ ទោះ​យ៉ាង​ណា​ក្តី​របាយការណ៍​​នេះ​បាន​សន្និដ្ឋាន​​​ថា​ការ​បូម​ខ្សាច់​គឺ​ផ្តល់​នូវ​ផលវិជ្ជមាន​សម្រាប់​ខេត្ត​។

ក្រុមហ៊ុន International Rainbow Company Ltd និង​​ក្រុមហ៊ុន Direct Access Ltd.​មិនអាច​ទាក់ទង​សុំ​អធិប្បាយ​បាន​ទេ​ពី​ម្សិលមិញ។

លោក Alex Gonzalez-Davidson ដែល​ជា​ស្ថាបនិក​នៃ​អង្គការ​មាតា​ធម្មជាតិ​ដែល​ត្រូវ​បាន​និរទេស​បាន​សរសេរ​នៅ​ក្នុង​អ៊ីមែល​មួយ​កាលពី​ម្សិលមិញ​ថា​ការ​វាយតម្លៃ​ផលប៉ះពាល់​បរិស្ថាន​ក្នុង​ប្រទេស​កម្ពុជា​តែងតែ​សូក​លុយ​ដើម្បី​​ឲ្យ​មាន​ការ​វាយ​ត្រា​លើ​ឯកសារ​នោះ​»។

លោក Alex Gonzalez-Davidson ​ក៏​បាន​​លើក​ឡើង​ផង​ដែរ​នូវ​មតិ​យោបល់​​​របស់​អ្នក​ជំនាញ​ខាង​ទំនប់​វារីអគ្គិសនី​​​ និង​​អ្នក​ជំនាញ​ខាង​ជីវ​ចម្រុះ​ដែល​ត្រូវ​បាន​សម្ភាស​ដោយ​អង្គការ​របស់​លោក​បាន​ឲ្យ​ដឹង​ថា​ការ​យល់​ឃើញ​ថា​ព្រែក​ទាំង​នោះ​មាន​ខ្សាច់​​ធម្មជាតិ​ច្រើន​ពេក​ «​គឺជា​ការ​យល់​ខុស​» ​ហើយ​ការ​យល់​ខុស​មួយ​​ទៀត​របស់​​ក្រសួង​គឺ​ការ​អះអាង​របស់​ក្រសួង​​​ដែល​ថា​ការ​បូម​ខ្សាច់​​បង្ក​នូវ​​​ផលប៉ះពាល់​តិចតួច​ទៅលើ​ចំនួន​ត្រី​ និង​ក្តាម​​នៅ​ក្នុង​ព្រែក​។

សហគមន៍​ដែល​រស់នៅ​តាម​​ព្រែក​​ក្នុង​ខេត្ត​កោះកុង​បាន​អះអាង​ថា​ក្រុមហ៊ុន​មិន​បាន​ធ្វើការ​សម្ភាស​ពួកគេ​គ្រប់គ្រាន់​អំពី​ផលប៉ះពាល់​​បរិស្ថាន​ទេ​។ នេះ​បើ​តាម​​សមាជិក​​អង្គការ​​មាតា​ធម្មជាតិ​លោក ធន់ រដ្ឋា​។ ការ​អះអាង​នេះ​ផ្ទុយ​នឹង​​ការ​លើក​ឡើង​​​​នៅក្នុង​ការ​វាយតម្លៃ​ផលប៉ះពាល់​បរិស្ថាន និង​ការ​អះអាង​របស់​លោក ប៊ុនសៀ ដែល​ថា​សហគមន៍​​​ទាំង​នេះ​ត្រូវ​បាន​សម្ភាស​ និង​ពិគ្រោះ​យោបល់​ជាមួយ​។

លោក​នាយក​រដ្ឋមន្រ្តី ហ៊ុន សែន បាន​​ចេញ​បម្រាម​ហាមប្រាម​ការ​បូម​ខ្សាច់​​កាលពី​ឆ្នាំ​ ២០១១​ បន្ទាប់ពី​មាន​​កំហឹង​ពី​សាធារណជន​លើ​ផលប៉ះពាល់​បរិស្ថាន​ និង​សង្គម​ប៉ុន្តែ​ចាប់​តាំង​ពី​​ពេល​នោះ​មក​ក្រុមហ៊ុន​បូម​ខ្សាច់​មួយ​ចំនួន​​បាន​បន្ត​​​ប្រតិបត្តិការ​​ក្រោម​អាជ្ញាប័ណ្ណ​ជាក់លាក់​ដែល​ផ្តល់​ឲ្យ​​ដោយ​​ក្រសួង​រ៉ែ​ និង​ថាមពល​។

លោក ស៊ុន ឆ័យ​ មិន​អាច​ទាក់ទង​សុំ​អត្ថាធិប្បាយ​បាន​ទេ​កាលពី​ម្សិលមិញ៕ PS

រាយការណ៍​បន្ថែម​ដោយ Igor Kossov និង ប៉ិច សុធារី

អត្ថបទគួរចាប់អារម្មណ៍

  • សណ្ឋាគារ​ប្រណីត​នៅ​កោះរ៉ុង បើក​ជា​ផ្លូវការ

    ភ្នំពេញៈ សណ្ឋាគារ​ដ៏ប្រណីត Royal Sands នៅលើ​កោះរ៉ុង​របស់​លោក គិត ម៉េង បាន​បើក​ដំណើរការ​ជា​ផ្លូវការ​កាលពី​ថ្ងៃ​ម្សិលមិញ ដែល​គេ​រំពឹង​ថា​នឹង​ទាក់ទាញ​ភ្ញៀវទេសចរ​កាន់តែ​ច្រើន​។

  • ដំរី​ដែល​ចូល​ចម្ការ​អ្នក​ភូមិ​បាន​គេច​ទៅ​ភ្នំ​ដងរែក

    ឧត្តរមានជ័យៈ ក្រុម​មន្ត្រី​បាន​និយាយ​ថា​សត្វ​ដំរី​ញី​មួយ​ក្បាល​ដែល​បាន​ចូល​លុកលុយ​ក្នុង​ចម្ការ​អ្នកភូមិ​រំដួល​ចាស់ ឃុំ​អម្ពិល ស្រុក​បន្ទាយ​អម្ពិល ខេត្ត​ឧត្តរមានជ័យ​កាលពី​ព្រឹក​ថ្ងៃ​អាទិត្យ​នោះ​បាន​គេច​ខ្លួន​ចូល​ទៅ​ក្នុង​តំបន់​ជួរ​ភ្នំ​ដងរែក​វិញ​ហើយ ខណៈ​ដែល​ក្រុម​មន្ត្រី​ជំនាញ​បរិស្ថាន និង​អាជ្ញាធរ​កំពុង​បន្ត​ឃ្លាំ​មើល​ពី​ដំណើរ​របស់​វា​។

  • ព្រះមហាក្សត្រ​អំពាវនាវ​ឲ្យ​ធានា​ការពារ​យុត្តិធម៌​ និង គោរព​សិទ្ធិ​មនុស្ស

    ភ្នំពេញៈ ក្រោយពី​ឈ្នះ​អាសនៈ​ទាំង​ ៥៨ ដោយ​មិន​មាន​អតីត​បក្ស​សង្គ្រោះ​ជាតិ​ដែល​ជា​គូប្រកួត​ដ៏ស័ក្តិសម​នឹង​គ្នា​សម្រាប់​ការបោះឆ្នោត​ព្រឹទ្ធសភា​ពី​ខែ​កុម្ភៈ គណបក្ស​កាន់​អំណាច​ដែល​ទទួល​ជ័យជម្នះ​បាន​បន្ត​គ្រប់គ្រង​ស្ថាប័ន​នីតិប្បញ្ញត្តិ​ជាថ្មី​ដោយ​បើក​សម័យប្រជុំ​លើក​ដំបូង នីតិកាល​ទី​ ៤ ​នៃ​ព្រឹទ្ធសភា​ពី​ម្សិលមិញ​ក្រោម​ព្រះរាជាធិបតីភាព​ព្រះមហាក្សត្រ​ព្រះបាទ​សម្តេច​ព្រះនរោត្តម សីហមុនី ដែល​ព្រះអង្គ​អំពាវនាវ​ឲ្យ​មាន​ការធានា​ការពារ​យុត្តិធម៌ និង​គោរព​សិទ្ធិ​មនុស្ស និង​រួម​សាមគ្គី​គ្នា​ជា​ធ្លុង​មួយ​។

  • នាយក​រដ្ឋមន្ត្រី​បញ្ជា​ឲ្យ​ដកហូត​កោះ​ ៣០ ​មក​វិញ និង​ឲ្យ​ពិនិត្យ​អ្នក​នៅ​ពី​ក្រោយ​ការទន្ទ្រាន​យក​ដី

    ព្រះសីហនុៈ លោក​នាយករដ្ឋមន្ត្រី ហ៊ុន សែន បាន​បញ្ជា​ឲ្យ​ដកហូត​កោះ​ដែល​មិន​បាន​អភិវឌ្ឍ​ប្រមាណ​ ៣០ ​មក​វិញ​ ខណៈ​អត្តសញ្ញាណ​របស់​ម្ចាស់​ក្បាល​ដី​ចំនួន​ ៥៨៤ ​ដែល​មាន​ទាំង​មន្ត្រី​មាន​អំណាច​កំពុង​ត្រូវបាន​ពិនិត្យ​រឿង​នៅ​ពី​ក្រោយ​ខ្នង​ការកាប់​ទន្ទ្រាន​យក​ដី​ដ៏ក្តៅគគុក​នៅ​កោះរ៉ុង ហើយ​មន្ត្រី​ជាន់ខ្ពស់​ខ្លះ​នឹង​មិន​ត្រូវ​ឲ្យ​ចូលរួម​បង្កើត​រដ្ឋាភិបាល​ថ្មី​នៅ​​អាណត្តិ​ក្រោយ​ឡើយ​។