.jpg)
លោក សម រង្ស៊ី ប្រធានស្តីទីអតីតគណបក្សសង្គ្រោះជាតិ។ រូបថត សហការី
ភ្នំពេញៈ ក្រសួងស្ថាប័ននានាចេញសារថ្កោលទោសលោក សម រង្ស៊ី មេដឹកនាំអតីតបក្សប្រឆាំងជាបន្តបន្ទាប់ពាក់ព័ន្ធនឹងការចោទប្រកាន់ ឬប្រមាថចំពោះអង្គព្រះមហាក្សត្រ ថាជាអាយ៉ងលោកនាយករដ្ឋមន្ត្រី ហ៊ុន សែន ខណៈដែលប្រធានស្ដីទីអតីតគណបក្សសង្គ្រោះជាតិរូបនេះត្រូវបានតុលាការចោទប្រកាន់លើបទចោទនេះសាជាថ្មី។
ការចេញញត្តិថ្កោលទោសនេះធ្វើឡើងបន្ទាប់ពីលោក សម រង្ស៊ី បានថ្លែងតាមរយៈបទសម្ភាសជាមួយវិទ្យុអាស៊ីសេរីកាលពីថ្ងៃទី ១២ ខែកញ្ញាដែលមានខ្លឹមសារថា ព្រះមហាក្សត្រជាចំណាប់ខ្មាំងរបស់លោកនាយករដ្ឋមន្ត្រី ហ៊ុន សែន ហេតុដូច្នេះព្រះអង្គខ្លាចលោក ហ៊ុន សែន មិនហ៊ានជួយប្រជារាស្ត្រដែលរងគ្រោះដោយអំពើអយុត្តិធម៌។ ព្រះអង្គចង់រក្សារាជបល្ល័ង្ក។
លោក សម រង្ស៊ី បន្តថា៖ «យើងមិនអាចរំពឹងព្រះមហាក្សត្រដែលជាអាយ៉ងរបស់លោក ហ៊ុន សែន ដូចសព្វថ្ងៃបានទេ»។
ភ្លាមៗបន្ទាប់ពីលោកថ្លែងដូច្នេះលោក អង្គ វង្ស វឌ្ឍានា រដ្ឋមន្ត្រីក្រសួងយុត្តិធម៌បានចេញលិខិតមួយកាលពីថ្ងៃសុក្រទៅសាលាដំបូងរាជធានីភ្នំពេញស្នើឲ្យព្រះរាជអាជ្ញាចាត់វិធានការផ្លូវច្បាប់ជាបន្ទាន់ និងដោយតឹងរ៉ឹងបំផុតចំពោះអំពើប្រមាថអង្គព្រះមហាក្សត្រខាងលើដោយអនុវត្តស្របតាមនីតិវិធីជាធរមាន។
លោក អង្គ វង្ស វឌ្ឍានា បានថ្លែងថា៖ «ពាក្យសម្ដីរបស់ សម រង្ស៊ី ដែលផ្សព្វផ្សាយជាសាធារណៈនេះបានធ្វើឲ្យប៉ះពាល់យ៉ាងធ្ងន់ធ្ងរដល់ព្រះកិត្តិនាមព្រះមហាក្សត្រនៃព្រះរាជាណាចក្រកម្ពុជាជាទីគោរពសក្ការៈដ៏ខ្ពង់ខ្ពស់ដែលប្រជារាស្ត្រខ្មែរទូទាំងព្រះរាជាណាចក្រកម្ពុជាគោរពស្រឡាញ់ស្មើជីវិត»។
ក្រៅពីក្រសួងយុត្តិធម៌ ក្រុមមេធាវីរបស់រាជរដ្ឋាភិបាលនៅថ្ងៃសុក្រដដែល បានដាក់ពាក្យបណ្ដឹងមួយទៅតុលាការក្រុងភ្នំពេញដោយស្នើឲ្យ «ពិនិត្យសម្រេចចោទប្រកាន់ និងផ្ដន្ទាទោសឲ្យបានធ្ងន់ធ្ងរបំផុតលើឈ្មោះ សម រង្ស៊ី តាមបញ្ញត្តិនៃក្រមព្រហ្មទណ្ឌ»។
លោក កែវ សុធា តំណាងអយ្យការអមសាលាដំបូងរាជធានីភ្នំពេញ បានសម្រេចនៅថ្ងៃដដែលដោយធ្វើការចោទប្រកាន់លោក សម រង្ស៊ី ពីបទ «ប្រមាថចំពោះអង្គព្រះមហាក្សត្រ» ប្រព្រឹត្តកាលពីថ្ងៃទី ១២ កញ្ញា ដូចមានចែងក្នុងបញ្ញត្តិមាត្រា ៤៣៧ ស្ទួននៃក្រមព្រហ្មទណ្ឌ។ លោក កែវ សុធា ក៏សម្រេចឲ្យដាក់លោក សម រង្ស៊ី ស្ថិតក្រោមការឃុំខ្លួនបណ្ដោះអាសន្ន (បញ្ជាឲ្យចាប់ខ្លួន) ដើម្បីបង្ការ ឬបញ្ចប់បទល្មើសកុំឲ្យកើតឡើងជាថ្មី។
ក្រៅពីនីតិវិធីផ្លូវច្បាប់ ព្រះបរមរាជវាំង ក្រសួង ស្ថាប័នរដ្ឋ អគ្គស្នងការដ្ឋាននគរបាលជាតិស្នងការដ្ឋានតាមរាជធានីខេត្តកងរាជអាវុធហត្ថក៏ដូចជាសាធារណជនជាច្រើនបានចេញការប្រកាសថ្កោលទោស លោក សម រង្ស៊ី ជាបន្តបន្ទាប់ដោយខ្លះបានលើកឡើងថា ការប្រមាថចំពោះអង្គព្រះមហាក្សត្រ គឺជាអំពើក្បត់ជាតិជាដើម។
សេចក្ដីថ្លែងការណ៍របស់កងរាជអាវុធហត្ថលើផ្ទៃប្រទេសចុះផ្សាយថ្ងៃទី ១៤ ខែកញ្ញាសរសេរថា៖ «កងរាជអាវុធហត្ថគាំទ្រចំពោះចំណាត់ការរបស់តុលាការ និងបានត្រៀមខ្លួនក្នុងការអនុវត្តដីការបស់តុលាការ និងអនុវត្តរាល់បទបញ្ជារបស់ប្រមុខរាជរដ្ឋាភិបាល ដើម្បីរក្សាបាននូវសន្តិសុខ សណ្ដាប់ធ្នាប់សង្គម»។
ដោយឡែកព្រឹទ្ធសភាបានចេញសេចក្ដីថ្លែងការណ៍ដោយចាត់ទុកការលើកឡើងរបស់លោក សម រង្ស៊ី ថាជាការបរិហារ ញុះញង់ បង្កឲ្យមានភាពវឹកវរ ចលាចល អសន្តិសុខសង្គមដែលជាការរំលោភបំពានលើមាត្រា ៧ នៃរដ្ឋធម្មនុញ្ញរបស់ព្រះរាជាណាចក្រកម្ពុជា។
ឆ្លើយតបទៅនឹងចំណាត់ការរបស់តុលាការ និងការថ្កោលទោសរបស់ក្រសួង ស្ថាប័នរដ្ឋ ជាបន្តបន្ទាប់បែបនេះលោក សម រង្ស៊ី បានថ្លែងថា ព្រះមហាក្សត្រមានខ្លាំង និងអន់ ហើយព្រះមហាក្សត្របច្ចុប្បន្នខុសពីព្រះមហាក្សត្រមុនៗ។
លោកបានកោតសរសើរដល់ស្នាព្រះហស្តរបស់សម្ដេចព្រះនរោត្តម សីហនុ លើរឿងជាច្រើនតាំងពីនយោបាយ និងសិទ្ធិមនុស្សដែលលោកថា អតីតព្រះមហាក្សត្រសម្តេចនរោត្តម សីហនុ បានជួយដោះស្រាយបញ្ហានយោបាយ និងបញ្ហាសង្គមបានច្រើនសម្រាប់ជាតិ និងប្រជាពលរដ្ឋ។
ចំពោះព្រះមហាក្សត្របច្ចុប្បន្នវិញលោក សម រង្ស៊ី ថ្លែងថា ព្រះអង្គមិនបានជួយដល់ប្រជារាស្ត្រដែលរងគ្រោះដោយអំពើអយុត្តិធម៌ដូចជាការរឹបអូសផ្ទះសំបែង និងដីធ្លី ការចាប់ពលរដ្ឋឃុំឃាំង និងទង្វើផ្សេងទៀត។
លោក សម រង្ស៊ី អះអាងថា ព្រះមហាក្សត្របានអំពាវនាវឲ្យពលរដ្ឋទៅបោះឆ្នោតកាលពីឆ្នាំ ២០១៨ ហើយបានយាងទៅបើកសម័យប្រជុំនីតិកាលទី ៦ នៃរដ្ឋសភាដែលការបោះឆ្នោតនោះមិនមានការចូលរួមរបស់គណបក្សសង្គ្រោះជាតិដែលបក្សប្រឆាំងមួយនេះមានពលរដ្ឋជិតពាក់កណ្ដាលនគរគាំទ្រ។ លោកថ្លែងថា៖ «ព្រះមហាក្សត្របែបនេះមិនមែនជាព្រះមហាក្សត្រគួរឲ្យស្រឡាញ់ និងគោរពទេ»។
លោក ឯម សុវណ្ណារ៉ា អ្នកវិភាគនយោបាយថ្លែងថា៖ «លោក សម រង្ស៊ី លើកឡើងបែបនេះត្រូវមានបណ្ដឹងមួយទៀត អ៊ីចឹងលោករឹតតែពិបាកទុកច្រកសម្រាប់ព្រះមហាក្សត្រសម្រាប់ការលើកលែងទោស។ ទី២ យើងមានច្បាប់មួយដែលតម្រូវឲ្យប្រមុខរដ្ឋជាអ្នកលើកលែងទោសក្នុងករណីណាមួយ។
ដូច្នេះនេះជាការបិទច្រកមួយសម្រាប់អ្នកនយោបាយ ហើយពិបាកក្នុងការរកវិធានការកណ្ដាលដើម្បីដោះស្រាយ។ នេះជាហេតុផលមួយដែលអ្នកនយោបាយឈានដល់ចំណុចមួយប្រឈមមុខគ្នាកាន់តែខ្លាំង ហើយពិបាករកច្រកក្នុងការដោះស្រាយ»។
សូមបញ្ជាក់ថាលោក សម រង្ស៊ី ធ្លាប់ត្រូវបានផ្តន្ទាទោសម្ដងហើយកាលពីដើមខែឧសភាលើបទប្រមាថអង្គព្រះមហាក្សត្រដែលលោកលើកឡើងកាលពីមុនការបោះឆ្នោតឆ្នាំ ២០១៨។ លោកហៅសារលិខិតរបស់ព្រះមហាក្សត្រអំពាវនាវឲ្យពលរដ្ឋទៅបោះឆ្នោតថាជាលិខិតក្លែងក្លាយ ឬធ្វើឡើងដោយការបង្ខំ៕
វីដេអូ៖
