The Phnom Penh Post Search

Search form

Logo of Phnom Penh Post newspaper Phnom Penh Post - ក្រសួង អប់រំ នឹង​ចុះ​ចាប់​អ្នក​លក់​សៀវភៅ​គោល​របស់​រដ្ឋ




ក្រសួង អប់រំ នឹង​ចុះ​ចាប់​អ្នក​លក់​សៀវភៅ​គោល​របស់​រដ្ឋ

ក្រសួង អប់រំ នឹង​ចុះ​ចាប់​អ្នក​លក់​សៀវភៅ​គោល​របស់​រដ្ឋ

140203_03
សៀវភៅគោលដែលមានលក់នៅតាមទីផ្សារ ហុង មិនា

ភ្នំពេញៈ ក្រសួង អប់រំ នឹង​ចាប់​ផ្តើម​អនុវត្ត​នូវ​ការ​ចុះ​ចាប់​យក​សៀវភៅ​សិក្សា​គោល​ដែល​មាន​សរសេរ​នៅ​លើ​ក្របមុខ​ថា «ហាម​លក់» និង «កម្មសិទ្ធិ​របស់​រដ្ឋ» នៅ​តាម​បណ្តា​ទីផ្សារ បណ្ណាគារនិ​ង​តូប​លក់​សៀវភៅ​នានា នៅ​ខែ​ក្រោយ បន្ទាប់​ពី​ក្រសួង​បាន​ចេញ​សេចក្តី​ជូន​ដំណឹង​កាល​ពី​ថ្ងៃ ទី៣១ ខែ មករា ពី​ការ​ទប់​ស្កាត់​ការ​លក់-ទិញ​សៀវភៅ​គោល​នេះ។

លោក លឹម សុត្ថារិទ្ធិ ប្រធាន​ការិយាល័យ​នៃ​ការ​ផ្គត់​ផ្គង់​សៀវភៅ​សិក្សា​គោល​នៃ​នាយកដ្ឋាន អភិវឌ្ឍន៍​កម្មវិធី​សិក្សា​នៃ​ក្រសួង អប់រំ យុវជន និង​កីឡា បាន​មាន​ប្រសាសន៍​កាល​ពី​ថ្ងៃ​អាទិត្យ​ថា ក្រសួង​មិន​ទាន់​ធ្វើ​ការ​អនុវត្ត​ភ្លាម​ទេ ដោយ​ធ្វើ​ការ​ផ្សព្វ​ផ្សាយ​នូវ​សេចក្តី​ជូន​ដំណឹង​របស់​ក្រសួង​សិន។

លោក​ថា៖ «យើង​មិន​ទាន់​ធ្វើ​ការ​អនុវត្ត​ភ្លាមៗ​នោះ​ទេ យើង​ទុក​ពេល​ឲ្យ​គាត់​មួយ​រយៈ​សិន ដោយ​យើង​ធ្វើ​ការ​ផ្សព្វ​ផ្សាយ​ជា​មុន​សិន ប៉ុន្តែ​ក្រោយ​ពី​ការ​ជូន​ដំណឹង​នេះ​ចេញ​ប្រហែល​ជា​មួយ​ខែ​ក្រោយ​យើង​នឹង​ចាប់​ផ្តើម​អនុវត្ត​ចាប់​យក​សៀវភៅ​តែ​ម្តង​សម្រាប់​អ្នក​មិន​គោរព​តាម​ការ​ជូន​ដំណឹង»។

ក្រសួង អប់រំ យុវជន និង​កីឡា បាន​ចេញ​សេចក្តី​ជូន​ដំណឹង​មួយ​កាល​ពី​ថ្ងៃ​សុក្រ​សប្តាហ៍​មុន​ដល់​អាជីវករ និង​សាធារណជន​ទាំង​អស់​ឲ្យ​បញ្ឈប់​ជា​បន្ទាន់​នូវ​ការ​លក់-ទិញ​សៀវភៅ​សិក្សា​គោល ដែល​មាន​សរសេរ​នៅ​លើ​ក្រប​ថា «ហាម​លក់» និង «កម្មសិទ្ធិ​របស់​រដ្ឋ» ដែល​មាន​ចុះ​ហត្ថលេខា​ដោយ​លោក ហង់ ជួន ណារ៉ុន រដ្ឋ​មន្រ្តី​ក្រសួង អប់រំ យុវជន និង​កីឡា។

លោក​បាន​និយាយ​ក្នុង​សេចក្តី​ជូន​ដំណឹង​ថា៖ «ក្រសួង អប់រំ យុវជន និង​កីឡា​សូម​បញ្ជាក់​ឡើង​វិញ​ថា ការ​លក់-ទិញ​សៀវភៅ​គោល​ដែល​មាន​សរសេរ​នៅ​លើ​ក្រប​ថា «ហាម​លក់» និង «កម្មសិទ្ធិ​របស់​រដ្ឋ» គឺជា​អំពើ​ខុស​ច្បាប់ បង្ក​ឲ្យ​មាន​ផល​អវិជ្ជមាន​ដល់​ការងារ​អប់រំ​យ៉ាង​ខ្លាំង»។

ក្នុង​សេចក្តី​ជូន​ដំណឹង​នោះ​បាន​ឲ្យ​ដឹង​ទៀត​ថា ចាប់​ពី​ថ្ងៃ​ជូន​ដំណឹង​នេះ​តទៅ ក្រសួង អប់រំ យុវជន និង​កីឡា​នឹង​រួម​សហការ​ជាមួយ​ស្ថាប័ន​មាន​សមត្ថកិច្ច​ចុះ​តាម​ទីផ្សារ បណ្ណាគារ និង​តូប​លក់​សៀវភៅ​នានា​ដើម្បី​រឹប​អូស​យក​សៀវភៅ​សិក្សា​គោល​ដែល​មាន​សរសេរ​ថា «ហាម​លក់» និង «កម្មសិទ្ធិ​របស់​រដ្ឋ» ដោយ​ពុំ​មាន​ទូទាត់​ប្រាក់​សំណង​អ្វី​ឡើយ ហើយ​ជន​ល្មើស​ទាំង​អស់​ត្រូវ​ប្រឈម​នឹង​ការ​ដាក់​ទោស​តាម​ច្បាប់​ជា​ធរមាន។

លោក លឹម សុត្ថារិទ្ធិ បាន​ឲ្យ​ដឹង​ថា ប្រសិន​បើ​អាជីវករ ឬ​អ្នក​ពាក់​ព័ន្ធ​ទាំង​នោះ​មិន​អនុវត្ត​ឬ​គោរព​ទៅ​តាម​សេចក្តី​ជូន​ដំណឹង​នេះ​ទេ ក្រសួង​នឹង​ដាក់​ទោស​ទណ្ឌ​ទៅ​តាម​ច្បាប់​កម្មសិទ្ធិ​បញ្ញា​ដោយ​ធ្វើ​ការ ផាក​ពិន័យ ប៉ុន្តែ​ក្រសួង​មិន​អាច​បិទ​អាជីវកម្ម​របស់​គេ​ទេ។

លោក​បញ្ជាក់​ទៀត​ថា សៀវភៅ​សិក្សា​គោល​ដែល​ក្រសួង​ហាម​លក់-ទិញ នៅ​តាម​ទីផ្សារ​មិន​ដឹង​ថា​តើ​បាន​មក​ពី​ប្រភព​ណា​នោះ​ទេ ដែល​ជា​ហេតុ​ធ្វើ​ឲ្យ​ក្រសួង​បាន​ខិត​ខំ​ធ្វើ​ការ​ទប់​ស្កាត់​នៅ​តាម​ទីផ្សារ។

លោក​ថា៖ «នៅ​ពេល​ដែល​យើង​ទប់​ស្កាត់​ការ​លក់​នៅ​លើ​ទីផ្សារ​បាន​ហើយ នោះ​ប្រភព​ក៏​លែង​បញ្ចេញ​សៀវភៅ​ដែរ។ ប្រភព​នោះ​អាច​មាន​មក​ពី​ច្រើន​កន្លែង តែ​យើង​មិន​ទាន់​អាច​សន្និដ្ឋាន​បាន​នៅ​ឡើយ»។

ជាមួយ​គ្នា​នេះ​ដែរ​លោក សន ជ័យ តំណាង​សម្ព័ន្ធ​គណនេយ្យភាព​សង្គម​អាស៊ី​បូព៌ា និង​ប៉ាស៊ីហ្វិក​ប្រចាំ​នៅ កម្ពុជា បាន​ផ្តល់​ជា​អនុសាសន៍​ដល់​ក្រសួង អប់រំ ថា ដើម្បី​ចូល​រួម​ចំណែក​ក្នុង​ការ​ជំរុញ​ឲ្យ​មាន​ការ​គ្រប់​គ្រង​សៀវភៅ​សិក្សា​គោល​និង​ចែក​ជូន​ដល់​សិស្ស​សម្រាប់​ការ​រៀន​សូត្រ​គឺ​ក្រសួង គួរ​តែ​ជំរុញ​ឲ្យ​មាន​ការ​ដឹក​ជញ្ជូន​សៀវភៅ​សិក្សា​គោល​ឲ្យ​បាន​ដល់​សាលារៀន​ដោយ​ផ្ទាល់ និង​មាន​ការ​ចូល​រួម​ដឹង​ឮ​ពី​អ្នក​ពាក់ព័ន្ធ និង​រាប់​ចំនួន​សៀវភៅ​ឲ្យ​បាន​ត្រឹម​ត្រូវ។

លោក​ថា៖ «គួរ​បង្កើន​ថវិកា​សម្រាប់​ការ​តាម​ដានការ​គ្រប់​គ្រង​សៀវភៅ​សិក្សា​គោល​នៅ​កម្រិត​សាលា​រៀន​ឲ្យ​បាន​យ៉ាង​តិច ២ ដង​ក្នុង​មួយ​ឆ្នាំ​សម្រាប់​សាលារៀន​នីមួយៗ»៕

អត្ថបទគួរចាប់អារម្មណ៍