ភ្នំពេញៈ ក្រសួងធនធានទឹក និងឧតុនិយម អំពាវនាវឲ្យពលរដ្ឋមានការប្រុងប្រយ័ត្នជាថ្មី ស្របពេលដែលកម្ពុជាបន្តស្ថិតក្នុងតំបន់នៃជ្រលងសម្ពាធទាបជួបនឹងសម្ពាធខ្ពស់ពីប្រទេសថៃដែលនឹងមានភ្លៀងកក់ខែ និងមានខ្យល់កន្ត្រាក់លាយឡំនឹងផ្គររន្ទះ ខណៈការខូចខាតពីគ្រោះធម្មជាតិ នៅត្រីមាសទី១ ក្នុងឆ្នាំនេះ មានការកើនឡើង។
សេចក្តីជូនដំណឹងរបស់ក្រសួងធនធានទឹកដែលចេញកាលពីម្សិលមិញបានឲ្យដឹងថា ចាប់ពីថ្ងៃទី ៣ ដល់ថ្ងៃទី ៥ ខែ មេសា ឆ្នាំ ២០១៩ កម្ពុជាបាននិងកំពុងស្ថិតក្នុងតំបន់នៃជ្រលងសម្ពាធទាបដែលលាតសន្ធឹងមកពីប្រទេស ថៃជួបនឹងសម្ពាធខ្ពស់។
សេចក្តីជូនដំណឹងដដែលបញ្ជាក់ថា៖ «ចាប់ពីថ្ងៃទី ៣ ដល់ថ្ងៃទី ៥ មេសា ឆ្នាំ ២០១៩ នឹងបន្តមានភ្លៀងកក់ខែធ្លាក់ក្នុងកម្រិតពីខ្សោយទៅមធ្យម តែពុំបានសាយភាយល្អនោះទេ។ឯសីតុណ្ហភាពជាទូទៅមានពី ៣៣ ដល់ ៣៤ អង្សាសេ តែចាប់ពីថ្ងៃទី ៦ ខែ មេសា សីតុណ្ហភាពនឹងបន្តកើនឡើងវិញ»។
លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានប្រាប់ភ្នំពេញប៉ុស្តិ៍ម្សិលមិញថា ក្នុងករណីកម្ពុជាកំពុងជួបអាកាសធាតុក្តៅ និងការខ្វះខាតទឹកដូច្នេះ បើបន្តមានភ្លៀងកក់ខែនោះ នឹងធ្វើឲ្យពលរដ្ឋសប្បាយរីករាយ ព្រោះបញ្ហាខ្វះទឹកនេះ បានធ្វើឲ្យជួបការលំបាកប៉ុន្មានខែមកហើយ។
លោកថា៖ «បើក្រសួងជំនាញ ប្រកាសថា មានភ្លៀងអ៊ីចឹង គឺធ្វើឲ្យពលរដ្ឋលោកអរម្យ៉ាងដែរ ស្របពេលយើងខ្វះខាត និងអាកាសធាតុក្តៅខ្លាំងបែបនេះ ទោះបីជាពេលភ្លៀង មានបញ្ហាអ្វីខ្លះក៏ដោយ ក៏កម្តៅបរិយាកាសនឹងមានថយចុះបន្តិចធ្លាប់ឡើងដល់ ៣៩ ទៅ ៤០ អង្សាអី អ៊ីចឹងប៉ុន្តែពេលនេះសីតុណ្ហភាពនឹងមានការថយចុះ»។
បើតាមលោក កែវ វី នៅក្នុងត្រីមាសទី១ នេះបញ្ហាខ្យល់ព្យុះ កើតឡើងក្នុងខេត្តចំនួន ១៦ មានការខូចខាតផ្ទះរលំដោយខូចធ្ងន់ធ្ងរ ៩២ ខ្នង និងមានផ្ទះរបើកដំបូលឬខូចមធ្យមចំនួន ៥៣៧ ខ្នង។ចំណែកសាលារៀន និងទីចាត់ការខូចខាតចំនួន ១៣ អគារ ខូចខាតតូបលក់ដូរតាមឆ្នេរសមុទ្រ ៩៥ តូប និងរោងស្តុកកសិផលចំនួន ៣ កន្លែង ហើយបណ្តាលឲ្យមនុស្សចំនួន ៧ នាក់រងរបួស។ រីឯអ្នករងគ្រោះដោយសាររន្ទះបាញ់គឺបណ្តាលឲ្យស្លាប់មនុស្ស ៤ នាក់ និង ២ នាក់របួស ខណៈសត្វគោងាប់ចំនួន ៣ ក្បាល។
លោក កែវ វី បន្តថា ក្នុងពេលរាំងស្ងួតនេះ អាជ្ញាធរបានជួយសង្គ្រោះស្រូវប្រមាណ ៣ ម៉ឺនហិកតាក្នុងខេត្តចំនួន ១១ ដែលផលប៉ះពាល់មានចំនួនតែជាង ១ ពាន់ហិកតាប៉ុណ្ណោះ ព្រោះពលរដ្ឋនៅតែពឹងអាស្រ័យលើទឹកភ្លៀងក្នុងវិស័យកសិកម្មនេះ។ ចំណែកការខ្វះទឹកប្រើប្រាស់វិញ លោកថាគឺបានកើតឡើងក្នុងខេត្ត ១៤ តែមានការថយចុះបើប្រៀបធៀបនឹងត្រីមាសទី១ ឆ្នាំ ២០១៦ ជាឆ្នាំដែលកម្ពុជាក៏ធ្លាប់បានទទួលរងបាតុភាព អែលនីណូដែរ ហើយខេត្តចំនួន ២ ប៉ុណ្ណោះ ដែលរងការខ្វះខាតខ្លាំង។
លោកបញ្ជាក់ថា៖ «វាមានការកើនឡើងច្រើន បញ្ហាគ្រោះមហន្តរាយ បើប្រៀបនឹងក្នុងត្រីមាសទី១ ឆ្នាំ ២០១៨ ព្រោះវាកើតឡើងដោយសារខ្យល់ព្យុះ តែរន្ទះបាញ់មានការថយចុះវិញ ប៉ុន្តែបញ្ហាផលប៉ះពាល់ដល់ផ្ទះសម្បែងមានការកើនឡើងច្រើន ព្រោះបើតាមអ្នកជំនាញតែអាកាសធាតុក្តៅខ្លាំង ស្របពេលមានភ្លៀងកក់ខែផងនោះ បញ្ហាទាំងនេះកើតមានច្រើន ក្នុងរូបភាពផ្សេង»។
លោក ងួន រតនៈ អភិបាលខេត្តបាត់ដំបងបានប្រាប់ថា ប៉ុន្មានថ្ងៃចុងក្រោយនេះ ក្នុងខេត្តរបស់លោក មានភ្លៀងស្ទើររាល់ថ្ងៃដែលនាំឲ្យពលរដ្ឋមានទឹកប្រើប្រាស់វិញ ខណៈអាង ត្រពាំង បឹង ស្ទឹង ចាប់ផ្តើមមានទឹក និងសំណើមឡើងវិញ។ យ៉ាងណា លោកបានអះអាងថា ចំពោះបញ្ហាខ្វះខាតទឹកនេះ គឺមិនអាចធ្វេសប្រហែសបានទេ ដោយលោកនៅតែត្រៀមសម្រាប់បង្ការ និងត្រៀមលក្ខណៈរួចជាស្រេច ខណៈលោកក៏បានណែនាំឲ្យពលរដ្ឋប្រុងប្រយ័ត្ននិងរក្សាទឹកឲ្យបានត្រឹមត្រូវដែរ។
លោកបានបញ្ជាក់ថា៖ «ប្រាប់ពលរដ្ឋ កុំឲ្យប្រើប្រាស់ផ្តេសផ្តាស ត្រូវសន្សំសំចៃទឹក ហើយអាជ្ញាធរនៅស្រុកគាស់ក្រឡ និងស្រុកមោង និងកន្លែងលំបាកអីបានបូមបញ្ចូលស្រះនិងព្រែកអីមួយចំនួនធំហើយ។ បើមានភ្លៀងទៀត អាចកាត់បន្ថយភាពលំបាកបានច្រើន ក្នុងខេត្តរបស់ខ្ញុំ»។
យ៉ាងណា ក្រសួងធនធានទឹក ក៏បានណែនាំឲ្យពលរដ្ឋឲ្យមានការប្រុងប្រយ័ត្នខ្ពស់ ចំពោះបាតុភូត ផ្គររន្ទះ និងខ្យល់កន្ត្រាក់ផងដែរ និងត្រូវចូលរួមយកចិត្តទុកដាក់ក្នុងការថែរក្សាទឹកទុកហើយប្រើប្រាស់ដោយសន្សំសំចៃខ្ពស់ ស្របពេលដែលរដូវក្តៅដែលអាចនឹងបន្តអូសបន្លាយពេលដ៏វែង៕