.jpg)
មាន់ពេលត្រូវបានគេដឹកយកមកលក់នៅផ្សារអូរឫស្ស៊ីរាជធានីភ្នំពេញ នាពេលកន្លងមក។ ហុង មិនា
ភ្នំពេញៈ ជារៀងរាល់ឆ្នាំនៅមុនពេលចូលឆ្នាំចិនក្រសួងសុខាភិបាល និងក្រសួងកសិកម្ម រុក្ខាប្រមាញ់ និងនេសាទតែងតែក្រើនរំឭកឱ្យត្រួតពិនិត្យអនាម័យនៃការដឹកជញ្ជូនចល័តសត្វបក្សី និងសត្វជ្រូក និងការអនុវត្តនូវវិធានការរក្សាសុខភាពសុវត្ថិភាព និងការការពារការឆ្លងជំងឺផ្តាសាយបក្សី។
លោក ម៉ម ប៊ុនហេង រដ្ឋមន្ត្រី ក្រសួងសុខាភិបាលបានធ្វើការក្រើនរំឭកទៅដល់ប្រជាពលរដ្ឋទាំងអស់ត្រូវប្រុងប្រយ័ត្នក្នុងការការពារសុខភាពពីការឆ្លងជំងឺផ្តាសាយបក្សី នារដូវបុណ្យ និងពិធីសែនដូនតាក្នុងពិធីបុណ្យចូលឆ្នាំប្រពៃណីចិន និងវៀតណាមក្នុងខែកុម្ភៈនេះ។
លោកថ្លែងកាលពីថ្ងៃទី ២៩ ខែមករា ថា៖ «ខ្ញុំសូមឱ្យមានការប្រុងប្រយ័ត្នខ្ពស់លើការបង្ការការចម្លងជំងឺផ្តាសាយបក្សីដែលអាចកើតមានជាយថាហេតុ។ ដូចនេះសូមបងប្អូនប្រជាពលរដ្ឋទាំងអស់ លាងដៃឱ្យបានញឹកញាប់ជាមួយសាប៊ូ និងទឹក មុនពេលបរិភោគ និងបន្ទាប់ពីប៉ះពាល់ជាមួយបសុបក្សី»។
លោកបន្តថា ត្រូវនៅឱ្យឆ្ងាយពីសត្វបក្សីឈឺ ឬងាប់ ឬកន្លែងដែលគេដឹងថាមានវីរុសកំពុងចរាចរ កុំបរិភោគសត្វបសុបក្សី ឈឺ ឬងាប់ និងរាល់សត្វបសុបក្សីដែលធ្វើសម្រាប់បរិភោគត្រូវចម្អិនឱ្យឆ្អិនល្អ និងត្រូវប្រាកដថា អ្នកទាំងអស់គ្នាត្រូវលាងដៃជាមួយសាប៊ូ និងទឹកស្អាត មុនពេលបរិភោគ និងបន្ទាប់ពីបានប៉ះពាល់ជាមួយសត្វបសុបក្សី។
បើតាមក្រសួងសុខាភិបាល វីរុសជំងឺផ្តាសាយបក្សី ជាធម្មតាចរាចរក្នុងចំណោមបសុបក្សី ដែលវីរុសនេះរួមមាន H4N1, H5N6, H7N3, H7N7, H7N9 និង H9N2 ហើយដែលអាចឆ្លងទៅមនុស្ស និងបណ្តាលឱ្យមានជំងឺផ្តាយបក្សី។ បច្ចុប្បន្ន ដោយសារតែវីរុសនៅតែបន្តចរាចរគ្មានព្រំដែនកំណត់ វាជាក្តីកង្វល់ចំពោះសុខភាពសាធារណៈ។
វីរុសផ្តាសាយបក្សីនេះនៅបន្តរកឃើញនៅលើសត្វ និងក្នុងបរិស្ថានហើយហានិភ័យក្នុងការចម្លងជំងឺផ្តាសាយបក្សីនេះពីសត្វមកមនុស្សងាយនឹងកើតមាន ហើយអាចត្រូវបានរំពឹងទុកថានឹងអាចកើតមានជំងឺផ្តាសាយបក្សីនេះក្នុងពេលណាមួយ ប្រសិនបើមិនមានការការពារបានត្រឹមត្រូវ។
ជាមួយគ្នានេះដែរ លោក ម៉ម ប៊ុនហេង ក៏បានស្នើឱ្យអាជ្ញាធរ ខេត្ត ស្រុក ក្រុង ខណ្ឌ រដ្ឋបាលឃុំ-សង្កាត់ត្រូវចាត់តាំងកម្លាំងគ្រប់គ្រង ឃ្លាំមើល និងធ្វើការណែនាំការអនុវត្តវិធានការការពារនៅតាមកសិដ្ឋាន ទីផ្សារ ជាពិសេសទីផ្សារលក់បសុបក្សីរស់ឱ្យបានហ្មត់ចត់ដើម្បីចៀសផុតពីការផ្ទុះជំងឺផ្តាសាយបក្សីក្នុងសហគមន៍។
លោកថា៖ «បើសង្ស័យថា ឆ្លងវីរុសផ្តាសាយបក្សីដោយរោគសញ្ញាទូទៅដូចជា គ្រុនក្តៅលើសពី ៣៨,៥ អង្សាសេ ក្អក និងពិបាកដកដង្ហើម និងមានប្រវត្តិប៉ះពាល់បសុបក្សីឈឺ ឬងាប់ក្នុងអំឡុង ១៤ ថ្ងៃ មុនចេញរោគសញ្ញា និងសូមទូរស័ព្ទទៅលេខ ១១៥»។
ទន្ទឹមនឹងនេះដែរ មន្ត្រីអគ្គនាយកដ្ឋានសុខភាពសត្វ និងផលិតកម្មសត្វនៃក្រសួងកសិកម្មក៏បានចេញនូវសារាចរណែនាំមួយផងដែរនៅថ្ងៃចន្ទ ទី ១ ខែកុម្ភៈ ឆ្នាំ ២០២១ នេះទាក់ទងនឹងការពង្រឹងអនាម័យក្នុងការដឹកជញ្ជូនសត្វបសុបក្សី និងសត្វជ្រូកក្នុងអំឡុងពេលចូលឆ្នាំប្រពៃណីចិន និងវៀតណាម។
លោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វប្រាប់ ភ្នំពេញ ប៉ុស្តិ៍ ម្សិលមិញថា ជាធម្មតានៅពេលចូលឆ្នាំចិន ការដឹកជញ្ជូនសត្វមានច្រើនពីកន្លែង ១ ទៅកន្លែង ១ ពីខេត្ត ១ ទៅខេត្ត ១ និងពីខេត្តមកភ្នំពេញក៏ដូចជាការនាំចូលជាដើម ដែលក្រសួងតែងតែធ្វើការពង្រឹងលើការត្រួតពិនិត្យនូវសកម្មភាពទាំងអស់នេះ។
លោកមានប្រសាសន៍ថា៖ «យើងធ្វើការត្រួតពិនិត្យសត្វ សុខភាពសត្វ និងការអនុវត្តជីវសុវត្ថិភាព ដែលយើងធ្វើការបាញ់ថ្នាំរម្ងាប់មេរោគនៅលើមធ្យោបាយដឹកជញ្ជូន។ ក្នុងនោះដែរ យើងក៏នឹងធ្វើការអនុវត្តឱ្យបានតឹងរ៉ឹងពាក់ព័ន្ធនឹងការបាញ់ថ្នាំរម្ងាប់មេរោគនៅតាមកសិដ្ឋាន និងការត្រួតពិនិត្យសុខភាពសត្វ មុននឹងដឹកចេញពីកសិដ្ឋាន»។
ជាងនេះទៅទៀតលោក ផាន់ណារ៉ា ក៏បានបង្កើតក្រុមទំនាក់ទំនងតាមប្រព័ន្ធតេឡេក្រាមទៅដល់គ្រប់អគ្គនាយកដ្ឋាន និងមន្ត្រីជំនាញនៅ ២៥ ខេត្ត-ក្រុង ក្នុងការជំរុញនូវការត្រួតពិនិត្យ និងការបាញ់ថ្នាំសម្លាប់មេរោគ។ បន្ថែមពីលើនេះលោកបានអំពាវនាវទៅដល់ប្រជាពលរដ្ឋនៅពេលដែលសម្លាប់សត្វត្រូវមានការប្រុងប្រយ័ត្ន ការពារពីមេរោគដោយការពាក់ស្រោមដៃជាដើម។
ទោះយ៉ាងណាលោក ផាន់ណារ៉ា សង្កត់ធ្ងន់ថា នៅពេលនេះដោយសារមិនមានករណីផ្ទុះជំងឺឆ្លង ដូចនេះមិនមានអ្វីដែលគួរឱ្យព្រួយបារម្ភនោះទេ។ ប៉ុន្តែការអនុវត្តវិធានការអនាម័យការពារខ្លួនត្រូវធ្វើជានិច្ច ទោះបីជាក្នុងកាលៈទេសៈបែបណាក៏ដោយ។
បើតាមក្រសួងសុខាភិបាលជំងឺផ្តាសាយបក្សី (H5N1) នៅតែមានចរាចរលើសត្វបសុបក្សីមួយចំនួនហើយចាប់ពីឆ្នាំ ២០០៥ រហូតមកដល់ឆ្នាំ ២០១៤ ប្រទេសកម្ពុជា ធ្លាប់មានករណីជំងឺផ្តាសាយបក្សីប្រភេទ H5N1 ចំនួន ៥៦ ករណីក្នុងនោះ ៣៧ ករណីបានស្លាប់៕
វីដេអូ៖
