.jpg)
ពិធីសម្ពោធជាផ្លូវការ គម្រោង Grab for Good គាំទ្រដល់មនុស្សថ្លង់ និងប្រយុទ្ធប្រឆាំងអំពើជួញដូរមនុស្ស។ រូបថត សហការី
ភ្នំពេញៈ ក្រសួងសាធារណការ និងដឹកជញ្ចូន និងក្រសួងមហាផ្ទៃរួមគ្នាគាំទ្រដំណើរការផ្តួចផ្តើម ក្រោមកម្មវិធីការទទួលខុសត្រូវសង្គមឈ្មោះថា «Grab for Good” ក្នុងការលើកកម្ពស់សេដ្ឋកិច្ចជនពិការ និងការប្រយុទ្ធប្រឆាំងការជួញដូរមនុស្សដែលក្រសួងទាំង ២ ចាត់ទុកថាជាការចូលរួមដ៏សំខាន់ពីសំណាក់វិស័យឯកជន។
ក្រុមហ៊ុន Grab ដែលជាក្រុមហ៊ុនគ្រប់គ្រងកម្មវិធីហៅយានជំនិះលើទូរស័ព្ទដែលឈានមុខគេនៅក្នុងតំបន់អាស៊ីអាគ្នេយ៍កាលពីម្សិលមិញ បានប្រកាសដាក់ឲ្យដំណើរការនូវគំនិតផ្តួចផ្តើមចំនួន ២ នេះដោយមានអ្នកចូលរួមប្រមាណ ១០០ នាក់ មកពីក្រសួង សង្គមស៊ីវិល និងជនពិការដែលជាអ្នកបើកបរម៉ូតូកង់បី។
តាមសេចក្តីប្រកាសរបស់ក្រុមហ៊ុន Grab បញ្ជាក់ថា កម្មវិធីទី ១ ដែលមានឈ្មោះថា បញ្ចប់ភាពស្ងៀមស្ងាត់របស់ Grab គឺជាគំនិតផ្តួចផ្តើមមួយដែលនឹងធ្វើឱ្យកម្មវិធី Grab កាន់តែងាយស្រួលស្វែងរក និងពង្រីកឱកាស ដើម្បីផ្តល់ឱកាសរកប្រាក់ចំណូលឲ្យបានកាន់តែច្រើនសម្រាប់ក្រុមមនុស្សថ្លង់។
ចំពោះកម្មវិធីនេះ រួមបញ្ចូលទាំងការផ្ញើសារភ្លាមៗដើម្បីប្រាប់អ្នកដំណើរថាដៃគូបើកបររបស់គាត់គឺជាមនុស្សថ្លង់ហើយណែនាំពួកគេឱ្យប្រើប្រាស់កម្មវិធី GrabChat និងសន្លឹកកាតទំនាក់ទំនងដែលមានស្រាប់ក្នុងយានយន្ត។ Grab ក៏នឹងចាប់ផ្តើមយុទ្ធនាការអប់រំសាធារណៈ និងកម្មវិធីការបណ្តុះបណ្តាលបន្ថែម និងផ្តល់សម្ភារសម្រាប់ដៃគូបើកបរដែលជាមនុស្សថ្លង់ផងដែរ។
Grab បន្តថាចំពោះកម្មវិធីទី ២ គឺមានឈ្មោះថា ប្រឆាំងការជួញដូរមនុស្ស ដែលវាគឺជាកម្មវិធីបណ្តុះបណ្តាលសម្រាប់ដៃគូបើកបរដើម្បីលើកកម្ពស់ការយល់ដឹងអំពីការជួញដូរមនុស្សក្នុងភាពជាដៃគូជាមួយអង្គការប្រឆាំងការជួញដូរមនុស្សដូចជា អង្គការ Liberty Shared Cambodia និងអង្គការបណ្តាញទូរស័ព្ទជំនួយកុមារនៅកម្ពុជា។
Grab បញ្ជាក់ថាខ្លួននឹងធ្វើការបណ្តុះបណ្តាលតាមអ៊ីនធឺណិតតាមរយៈកម្មវិធីក្នុងទូរស័ព្ទចល័ត និងការបណ្តុះបណ្តាលផ្ទាល់ក្នុងថ្នាក់រៀនដល់ដៃគូបើកបរចំនួន ១០ ០០០ នាក់ ក្នុងខែមិថុនា ឆ្នាំ ២០២០។
លោក ស៊ុន ចាន់ថុល ទេសរដ្ឋមន្ត្រី និងជារដ្ឋមន្ត្រីក្រសួងសាធារណការ និងដឹកជញ្ជូន បានស្វាគមន៍ចំពោះគំនិតផ្តួចផ្តើមនានាពីក្រុមហ៊ុន Grab និងបានអំពាវនាវឲ្យក្រុមហ៊ុនឯកជនជាច្រើនផ្សេងទៀតចូលរួមគាំទ្រ និងបង្កើតកម្មវិធីដែលមានសារប្រយោជន៍ដល់សង្គមជាតិដូចក្រុមហ៊ុន Grab។
លោកបញ្ជាក់ថា៖ «នៅកម្ពុជាមានជនពិការជាង ១ លាននាក់ ក្នុងនោះអ្នកមានបញ្ហាគថ្លងមានជាង ៤ ម៉ឺននាក់។ ដូច្នេះនេះគឺជាគម្រោងមួយដ៏ល្អនៅផ្នែកឯកជនសហការជាមួយស្ថាប័នរដ្ឋយើងក្នុងការជួយគាំទ្រផ្តល់លទ្ធភាពទៅជនពិការឲ្យមានឱកាសរកទទួលទានតាមរយៈបើកបរ Grab មកចិញ្ចឹមគ្រួសារ»។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្រៃ្តយ៍នៃគណៈកម្មាធិការជាតិប្រយុទ្ធប្រឆាំងការជួញដូរមនុស្សកម្ពុជា បានថ្លែងក្នុងឱកាសនោះដែរថា ការដឹកជញ្ជូនគឺជាមធ្យោបាយដែលជនរងគ្រោះ និងជនល្មើសបានប្រើប្រាស់ដើម្បីប្រព្រឹត្តសកម្មភាពនៃការជួញដូរមនុស្ស។
លោកស្រីបន្តថា បើសិនជាមានកិច្ចសហការល្អជាមួយអ្នកបើកបរគ្រប់យានជំនិះនៅលើដងផ្លូវ និងអ្នកធ្វើដំណើរនៅលើផ្លូវនោះនឹងនាំឲ្យសកម្មភាពនៃការបង្ក្រាបបទល្មើសជួញដូរមនុស្សទទួលបានជោគជ័យ។
លោកស្រីបញ្ជាក់ថា៖ «ការងារប្រយុទ្ធប្រឆាំងអំពើជួញដូរមនុស្សនេះ គឺមិនមែនមានសមត្ថកិច្ចត្រឹមតែនគរបាលទេ។ ជាការពិតមធ្យោបាយធ្វើដំណើរមានសារៈសំខាន់ជាទីបំផុតដែលខ្ញុំសូមគាំទ្រចំពោះការសហការជាមួយគ្នា»។ បើតាមលោកស្រី ជូ ប៊ុនអេង ជារៀងរាល់ឆ្នាំសមត្ថកិច្ចបានបង្ក្រាបបទល្មើសពាក់ព័ន្ធនឹងការជួញដូរមនុស្សយ៉ាងតិចបំផុត ១០០ ករណី ក្នុង ១ ឆ្នាំៗដោយក្នុងនោះមានជនរងគ្រោះយ៉ាងហោចណាស់ ៥០០ នាក់ បានទទួលរងគ្រោះពីអំពើជួញដូរតាមគ្រប់រូបភាព។
លោក Hashim Alkaff នាយកក្រុមហ៊ុន Grab ប្រចាំកម្ពុជាបានលើកឡើងថា សុវត្ថិភាព និងសន្តិសុខគ្រប់ទម្រង់ទាំងអស់ត្រូវបាន «ផ្សារភ្ជាប់ទៅក្នុង DNA (ឌីអិនអេ) របស់ក្រុម Grab»។
លោកបន្ថែមទៀតថា៖ «ដោយសារតែយើងពង្រីកបណ្តាញរបស់យើងពាសពេញក្នុងតំបន់ រួមទាំងក្នុងប្រទេសកម្ពុជាផងដែរ យើងដឹងច្បាស់ថាដៃគូបើកបររបស់យើងអាចមិនដឹងអំពីការទាក់ទង រវាងអ្នកជួញដូរ និងជនរងគ្រោះនៅតាមព្រលានយន្តហោះ ស្ថានីយរថភ្លើង ឬស្ថានីយឡានក្រុងនោះទេ។
នេះជាមូលហេតុដែលយើងមានការប្ដេជ្ញាយ៉ាងរឹងមាំក្នុងភាពជាដៃគូដ៏សកម្មជាមួយអង្គការ Liberty Shared និងអង្គការបណ្តាញទូរស័ព្ទជំនួយកុមារ ដើម្បីស្វែងរកដោះស្រាយ និងបង្វឹកដៃគូបើកបរឱ្យចេះវាយតម្លៃពីសកម្មភាពសង្ស័យ និងឆ្លើយតបឱ្យបានត្រឹមត្រូវ»៕
