.jpg)
លោក ស៊ុន ចាន់ថុល ពេលពិនិត្យទឹកជំនន់នៅខណ្ឌដង្កោពីថ្ងៃ ១៤ តុលា។ ហេង ជីវ័ន
ភ្នំពេញៈ ក្រសួងចំនួន ២ បានណែនាំទៅអង្គភាពក្រោមឱវាទឱ្យចូលរួមសហការគ្រប់គ្រងគ្រោះមហន្តរាយជាមួយស្ថាប័នពាក់ព័ន្ធ និងជួយអន្តរាគមន៍ឱ្យបានទាន់ពេលនៅតាមតំបន់ដែលកំពុងរងគ្រោះដោយគ្រោះទឹកជំនន់ ព្រមទាំងត្រៀមខ្លួនស្តារការខូចខាតឡើងវិញក្រោយពីគ្រោះទឹកជំនន់។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានណែនាំទៅមន្ត្រីក្នុងអង្គភាពក្រោមឱវាទ និងមន្ទីរកសិកម្ម រាជធានី-ខេត្ត ឱ្យចូលរួមសម្របសម្រួល និងធ្វើប្រតិបត្តិការឆ្លើយតបគ្រោះអាសន្ន និងស្តារឡើងវិញជាមួយស្ថាប័នពាក់ព័ន្ធ និងអាជ្ញាធរមានសមត្ថកិច្ច ជាពិសេសគណៈកម្មាធិការជាតិគ្រប់គ្រងគ្រោះមហន្តរាយ ដើម្បីបញ្ចៀសបង្ការ និងទប់ស្កាត់ ការខូចខាត ដែលកើតពីទឹកជំនន់តាមលទ្ធភាពជាក់ស្តែង។
ក្នុងសេចក្តីជូនដំណឹងកាលពីថ្ងៃទី ១៣ ខែតុលា លោក វេង សាខុន បានណែនាំឱ្យអគ្គនាយកដ្ឋានកសិកម្ម ពិនិត្យ តាមដាន និងវាយតម្លៃផលប៉ះពាល់នៃការខូចខាតដំណាំ និងត្រៀមលក្ខណៈបញ្ចេញស្រូវពូជ និងពូជដំណាំផ្សេងៗពីសន្និធិនៃប្រព័ន្ធស្បៀងបម្រុងកម្ពុជាសម្រាប់កិច្ចអន្តរាគមន៍ស្តារការខូចខាតឡើងវិញតាមភាពជាក់ស្តែង។
ជាមួយគ្នានោះលោករដ្ឋមន្ត្រីបានរំឭកទៅអគ្គនាយកដ្ឋានសុខភាពសត្វ និងផលិតកម្មសត្វឱ្យត្រៀមថ្នាំការពារ ព្យាបាល សម្ភារបសុព្យាបាល ចំណីសត្វ ឱ្យបានគ្រប់គ្រាន់ និងត្រៀមទីទួលខ្ពស់ដើម្បីជម្លៀសសត្វដែលរងគ្រោះពីទឹកជំនន់ និងសង្គ្រោះសត្វ។ រីឯខាងមន្ទីរកសិកម្មរាជធានី ខេត្ត ត្រូវតាមដានជាប្រចាំនូវស្ថានភាពទឹកជំនន់ដោយត្រៀមសង្គ្រោះបន្ទាន់ វាយតម្លៃផលប៉ះពាល់ និងខូចខាតជាបណ្តើរៗដើម្បីប្រាកដដែលត្រូវស្តារឡើងវិញ។
លោក ឡាយ ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តពោធិ៍សាត់ បានថ្លែងពីថ្ងៃទី ១៤ តុលា ថា ពលរដ្ឋរងគ្រោះដោយទឹកជំនន់ក្នុងខេត្តនេះបានទទួលស្បៀងជាបន្តបន្ទាប់ ចំណែកសត្វត្រូវបានជម្លៀសទៅទីទួលសុវត្ថិភាពដោយក្នុងភូមិនីមួយៗមានយ៉ាងហោចណាស់ក៏ ២ កន្លែងដែរ ប៉ុន្តែមានការលំបាកលើបញ្ហាចំណី ព្រោះខ្វះស្មៅ និងចំបើងជាដើម។
លោក ពិសិដ្ឋ បានថ្លែងថា៖ «យើងរង់ចាំនៅពេលដែលទឹកស្រកនឹងចុះវាយតម្លៃឱ្យបានច្បាស់ថា មានការខូចខាតប៉ុនណាអីប៉ុនណា ហើយយើងគិតពីលទ្ធភាពស្តារ បើអាចស្តារបានគឺយើងធ្វើសំណើទៅគណៈកម្មាធិការជាតិគ្រប់គ្រងគ្រោះមហន្តរាយដែលអាចស្នើសុំជាពូជស្រូវ និងដំណាំផ្សេងៗ ដើម្បីជួយស្រោចស្រង់ ឬក៏ស្តារ»។
ទាក់ទងនឹងបញ្ហានេះ លោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វបានឱ្យដឹងថា តំបន់ដែលមានទឹកជំនន់សុទ្ធតែបានចាក់ថ្នាំការពារជំងឺសត្វរួចហើយ ប៉ុន្តែអ្វីដែលមន្ត្រីកសិកម្មកំពុងធ្វើនោះ គឺចុះទៅតាមដាន និងអំពាវនាវឱ្យពលរដ្ឋយកសត្វដែលមិនទាន់បានចាក់វ៉ាក់សាំងពេលមន្ត្រីជំនាញចុះយុទ្ធនាការនោះមកឱ្យមន្ត្រីពេទ្យសត្វចាក់ជូនដើម្បីការពារ។
លោក ផាន់ណារ៉ា ថ្លែងថា៖ «ចំពោះថ្នាំការពារ និងថ្នាំព្យាបាលយើងមិនខ្វះទេយើងមានបម្រុងគ្រប់គ្រាន់ ហើយយើងទើបតែចែកជូនពួកគាត់កាលពីថ្ងៃទី ១២ ខែតុលា។ ប្រសិនបើពួកគាត់មានការខ្វះខាតក៏យើងមានបម្រុងដែរ នៅអគ្គនាយកដ្ឋានសម្រាប់ផ្តល់ទៅគ្រប់ខេត្តក្រុង បើមានខេត្ត-ក្រុងណាមួយត្រូវការ»។
ដោយឡែករដ្ឋមន្ត្រី ក្រសួងសាធារណការ និងដឹកជញ្ជូនលោក ស៊ុន ចាន់ថុល ក៏បានណែនាំដល់អគ្គនាយកដ្ឋានសាធារណការ អគ្គនាយកដ្ឋានបច្ចេកទេស ព្រមទាំងប្រធានមន្ទីរសាធារណការ រាជធានី ខេត្ត ផងដែរ ដើម្បីរួមគ្នាផ្សព្វផ្សាយសភាពការណ៍គ្រោះអាសន្ននានា និងប្រមូលព័ត៌មានឱ្យបានគ្រប់ជ្រុងជ្រោយដោយសហការជាមួយគណៈកម្មាធិការជាតិគ្រប់គ្រងគ្រោះមហន្តរាយ។
ក្នុងសេចក្តីណែនាំចុះថ្ងៃទី ១៣ ខែតុលា លោក ស៊ុន ចាន់ថុល បានជំរុញឱ្យចាត់កម្លាំងជាបន្ទាន់ ដើម្បីជួសជុល និងតភ្ជាប់ឱ្យបានទាន់ពេលករណីមានការកាត់ផ្តាច់ផ្លូវ ស្ពាន (កាត់ផ្តាច់ចរាចរណ៍)។ ជាមួយគ្នានោះក៏ត្រូវដំឡើងស្លាកសញ្ញាចរាចរណ៍នៅតាមទីតាំងដែលកំពុងងាយរងគ្រោះដោយសារទឹកជំនន់ ដើម្បីចៀសវាងគ្រោះថ្នាក់។
លោក ហេង រត្នពិសិដ្ឋ អគ្គនាយកនៃអគ្គនាយកដ្ឋានសាធារណការបានឱ្យដឹងថា ការងារនេះលោកបានណែនាំទៅគ្រប់អង្គភាពពាក់ព័ន្ធឱ្យចាត់វិធានការជាចំណុចៗ ដើម្បីឱ្យអង្គភាពត្រៀមទប់ទល់ធ្វើយ៉ាងណាការពារកុំឱ្យមានការកាត់ផ្តាច់ចរាចរណ៍ ក៏ដូចជាការត្រៀមកម្លាំង ដើម្បីភ្ជាប់ចរាចរណ៍ឡើងវិញជាដើម។
លោកបានបញ្ជាក់ថា៖ «វិធានការសំខាន់ៗ យើងបានណែនាំទៅបណ្តាមន្ទីរសាធារណការទាំងអស់តាមដានការព្យាករអាកាសធាតុ ហើយធ្វើរបាយការណ៍មកអគ្គនាយកដ្ឋានឱ្យបានទាន់ពេលវេលា។ ប្រសិនបើមានការកាត់ផ្តាច់ផ្លូវ ត្រូវចាត់កម្លាំងជាបន្ទាន់ សម្រាប់ទៅជួសជុលឡើងវិញ ធ្វើការសហការយ៉ាងណាធានាការធ្វើដំណើរឱ្យបាន ហើយក្នុងករណីមានទឹកលិចផ្លូវ យើងអាចពិនិត្យមើល តើយើងត្រូវអនុញ្ញាតឱ្យឡានតូច ឬធំអាចឆ្លងកាត់បានឬយ៉ាងណា?»៕
វីដេអូ៖f
