ភ្នំពេញៈ ក្រសួងព័ត៌មាន និង ក្រសួងសុខាភិបាលសហការជាមួយក្លិបអ្នកកាសែតកម្ពុជាបានរៀបចំធ្វើកិច្ចពិភាក្សាស្តីពី «សារព័ត៌មាន៖ ចំពោះមុខកូវីដ ១៩ និងព័ត៌មានក្លែងក្លាយ» ដើម្បីឱ្យអ្នកសារព័ត៌មាន ចែករំលែកព័ត៌មានឱ្យបានច្បាស់លាស់ និងបន្សាបព័ត៌មានក្លែងក្លាយ ខណៈដែលក្រសួងព័ត៌មានរកឃើញគណនីហ្វេសប៊ុកជាង ១០ ដែលបង្ហោះព័ត៌មានបំពុលសង្គម ហើយបានដាក់ទៅឱ្យក្រុមហ៊ុនហ្វេសប៊ុកចាត់វិធានការ។
កិច្ចពិភាក្សាដែលធ្វើឡើងកាលពីម្សិលមិញនៅភោជនីយដ្ឋានទន្លេបាសាក់ ២ ដោយមានការអញ្ជើញចូលរួមពីសំណាក់ លោក ផុស សុវណ្ណ ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មាន លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលលោក ពុយ គា អគ្គលេខាធិការក្លិបអ្នកកាសែតកម្ពុជា លោក ប៉ែន បូណា ប្រធានក្លិបអ្នកកាសែតកម្ពុជា ព្រមទាំងបណ្តាអ្នកសារព័ត៌មានជាតិមកពីស្ថាប័ននានាយ៉ាងច្រើនផងដែរ។
ក្លិបអ្នកកាសែតកម្ពុជាបញ្ជាក់ថា ការរៀបចំឱ្យមានកិច្ចពិភាក្សាស្តីពី «សារព័ត៌មានចំពោះមុខកូវីដ ១៩ និងព័ត៌មានក្លែងក្លាយ» នេះឡើងស្របពេលដែលបច្ចុប្បន្ននេះមានបណ្តាញព័ត៌មានមួយចំនួនបានបំផុសនូវព័ត៌មានក្លែងក្លាយជាច្រើនអំពីករណីវីរុសកូវីដ ១៩ នៅក្នុងប្រទេសកម្ពុជាធ្វើឱ្យសាធារណជនទូទៅមានការភាន់ច្រឡំចំពោះបញ្ហានេះ។
លោក ផុស សុវណ្ណ ថ្លែងក្នុងកិច្ចពិភាក្សានេះថាចំពោះការប្រយុទ្ធប្រឆាំងនឹងព័ត៌មានក្លែងក្លាយ ពិសេសកំពុងកើតមានឡើងដោយផ្សព្វផ្សាយបំភ័ន្តការពិតអំពីករណីវីរុសកូវីដ ១៩ នេះជំហានដំបូងក្រសួងព័ត៌មានបានប្រើប្រាស់វិធានការអប់រំ ប៉ុន្តែក្នុងពេលបច្ចុប្បន្ននេះក្រសួងបានរកឃើញគណនីហ្វេសប៊ុកប្រមាណជាង ១០ ដែលបានផ្សព្វផ្សាយព័ត៌មានបំភ័ន្តការពិតពាក់ព័ន្ធនឹងវីរុសកូវីដ ១៩ នៅកម្ពុជាផ្ញើទៅឱ្យក្រុមហ៊ុនហ្វេសប៊ុកចាត់វិធានការ។
លោកបញ្ជាក់ថា៖ «សម្រាប់ដំណឹងក្លែងក្លាយគឺយើងឱ្យឈ្មោះ ឬអត្តសញ្ញាណរបស់ផេច ឬអាខោនមួយចំនួនទៅក្រសួងមហាផ្ទៃដើម្បីចាត់ការករណីនេះ។ ព័ត៌មានក្លែងក្លាយផ្សាយតាមរយៈបណ្តាញសង្គម ហើយបានចុះបញ្ជីនៅក្រសួងព័ត៌មាននោះ ក្រសួងព័ត៌មានអាចចាត់វិធានការដោយខ្លួនឯងបាន។ ដោយឡែកមានគេហទំព័រហ្វេសប៊ុកមួយចំនួនក៏ផ្សាយព័ត៌មានក្លែងក្លាយដែរ ប៉ុន្តែមិនបានចុះបញ្ជីនៅក្រសួងព័ត៌មានទេ យើងក៏ប្រគល់ទៅឱ្យក្រសួងប្រៃសណីយ៍ចាត់វិធានការ»។
លោកបញ្ជាក់ថា៖ «កន្លងមកនេះមានផេច និងអាខោនជាង ១០ បានផ្សាយយ៉ាងសកម្មអំពីជំងឺកូវីដ ១៩ ដោយបំភ្លៃព័ត៌មានផ្សាយព័ត៌មានមិនពិត ដែលធ្វើឱ្យមានការយល់ច្រឡំដោយចេតនាតែម្តង។ យើងបានផ្ញើអាខោន ឬផេចទាំងនោះទៅក្រុមហ៊ុនហ្វេសប៊ុក ដើម្បីចាត់វិធានការហើយ»។
លោកស្រី ឱ វណ្ណឌីន បានថ្លែងថា បច្ចុប្បន្ននេះព័ត៌មានមិនពិត ឬព័ត៌មានក្លែងក្លាយបាននិងកំពុងតែធ្វើឱ្យប្រជាពលរដ្ឋមានការភ័យខ្លាច និងកាន់តែចាប់អារម្មណ៍ច្រើនជាងព័ត៌មានពិតទៅទៀត ខណៈដែលព័ត៌មានមិនពិត ជុំវិញបញ្ហាវីរុសកូវីដ ១៩ នេះកំពុងមានឥទ្ធិពលទៅលើសុខភាពផ្លូវចិត្ដរបស់សាធារណជន។
លោកស្រីបញ្ជាក់ថា បច្ចុប្បន្ននេះតាមការលើកឡើងរបស់អង្គការសុខភាពពិភពលោក ហើយក៏មានអត្ថបទមួយលើកឡើងពីមជ្ឈមណ្ឌលប្រយុទ្ធជំងឺឆ្លងនៃសហរដ្ឋអាមេរិកដែរបានបញ្ជាក់ថា ព័ត៌មានក្លែងក្លាយមានចំនួន ១៤២ ដងច្រើនជាងព័ត៌មានដែលពិត។ មានន័យថាបើព័ត៌មានពិត ១ ចំពោះមានព័ត៌មានមិនពិតមានចំនួន ១៤២ ដែលជាចំនួនច្រើន ហើយព័ត៌មានមិនពិតនេះមានការរីករាលដាលលឿនជាងជំងឺកូវីដ ១៩ ទៅទៀត។
លោកស្រីបញ្ជាក់ថា៖ «ព័ត៌មានមិនពិតនេះឯង ដែលធ្វើឱ្យមានការជ្រួលច្របល់ និងបំពុលនៅក្នុងសង្គមនីមួយៗផងដែរ។ ការសាយភាយនូវព័ត៌មានមិនពិតនេះគឺមានល្បឿនលឿនណាស់លឿនជាងព័ត៌មានពិត។ ដូចការលើកឡើងហើយថា ជាការអកុសលព័ត៌មានពិតមិនសូវមានអ្នកមើលទេ ដោយសារតែព័ត៌មានពិតនេះមានតិចជាងព័ត៌មានមិនពិត»៕