The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​ ២ ​បង្កើត​ក្រុមការងារ​ពិនិត្យ​អនាម័យ​ និង​បរិស្ថាន​តាម​ភូមិ​ឃុំ​

ក្រសួង​ ២ ​បង្កើត​ក្រុមការងារ​ពិនិត្យ​អនាម័យ​ និង​បរិស្ថាន​តាម​ភូមិ​ឃុំ​

Content image - Phnom Penh Post
ក្រុមយុវជន​ពេល​ប្រមូល​សំរាម​នៅ​ភ្នំពេញ​កន្លងមក​។ រូប អង្គការ​យុវជន​សំរាម

ក្រសួង​ ២ ​បង្កើត​ក្រុមការងារ​ពិនិត្យ​អនាម័យ​ និង​បរិស្ថាន​តាម​ភូមិ​ឃុំ​

ភ្នំពេញៈ ​ក្រសួងបរិស្ថាន និង​ក្រសួងមហាផ្ទៃ​រួមគ្នា​បង្កើត​ក្រុម​ការងារ​ថ្មី​ដើម្បី​ពិនិត្យ និង​ដាក់បញ្ចូល​វិធានការ​អនាម័យ និង​បរិស្ថាន​ទៅក្នុង​លក្ខណសម្បត្តិ​នៃ​គោលនយោបាយ​ភូមិ​ឃុំ​មាន​សុវត្ថិភាព​ដើម្បី​បំផុសស្មារតី​ពលរដ្ឋ​ឱ្យ​យកចិត្តទុកដាក់​រក្សា​អនាម័យ គ្រប់គ្រង​សំណល់​រឹង​ឱ្យ​បានល្អ​។

ប្រកាស​អន្តរក្រសួង​ដែល​ភ្នំពេញ​ប៉ុស្តិ៍​ទទួល​បាន​ពី​ថ្ងៃ​ ១៣ ធ្នូ ឱ្យ​ដឹងថា ក្រុម​ការងារ​​ថ្មី​នេះ​មាន​តួនាទី​ពិនិត្យ​ឡើង​វិញ​​នូវ​លក្ខណសម្បត្តិ​នៃ​គោលនយោបាយ​ភូមិ ឃុំ មាន​សុវត្ថិភាព ដើម្បី​កែសម្រួល​ឱ្យបាន​សមស្រប​ជាមួយ​សភាពការណ៍​​វិវត្ត​ប្រែប្រួល​នៃ​បទល្មើស និង​ការចូលរួម​របស់​ពលរដ្ឋ​។ ​សិក្សា ពិនិត្យ និង​កែសម្រួល​គោលការណ៍ វិធានការ និង​យន្តការ​នានា​នៃ​ចលនា​ប្រឡងប្រណាំង​​ការអនុវត្ត​គោលនយោបាយ​ភូមិ​ឃុំ​មាន​សុវត្ថិភាព​។

រដ្ឋលេខាធិការ និង​ជា​អ្នក​នាំពាក្យ​ក្រសួងបរិស្ថាន លោក​ នេត្រ ភក្ត្រា បានឱ្យដឹង​ពីថ្ងៃ​ ១៣ ធ្នូ​ថា ការបង្កើត​ក្រុម​ការងារ អន្តរក្រសួង​នេះ​ដើម្បី​បញ្ជ្រាប​ការយល់ដឹង​ពី​ការថែរក្សា​អនាម័យ​បរិស្ថាន​ធ្វើយ៉ាងណា​ឱ្យមាន​បរិស្ថាន​ស្អាត ទន្ទឹមនឹង​ភូមិ​ឃុំ មាន​សុវត្ថិភាព​។

បើតាម​លោក ភក្ត្រា ការរក្សា​អនាម័យ​បរិស្ថាន គឺជា​ភាពចាំបាច់​មួយ ហេតុនេះ​គោលដៅ​សំខាន់​នៃ​ការរួម​គ្នា​បង្កើត​ក្រុម​ការងារ​អន្តរក្រសួង​នេះ គឺ​ដើម្បី​ឱ្យ​សហគមន៍​មាន​បរិស្ថាន​អនាម័យ​ល្អ ស្រប​នឹង​បរិបទ​នៃ​ជំងឺ​កូវីដ​១៩​។

លោក​បាន​បញ្ជាក់ថា​៖ «​អ៊ីចឹង​​ការបញ្ជ្រាប​នូវ​ចំណេះដឹង ការគោរព​ប្រតិបត្តិ​បរិស្ថាន​ទាំងអស់​គ្នា ទាំង​ការគ្រប់គ្រង​សំរាម ការរស់នៅ​ប្រកប​ដោយ​អនាម័យ​បរិស្ថាន ការចូលរួម​ទុកដាក់​សំរាម​ឱ្យបាន​ត្រឹមត្រូវ​ការចូលរួម​ក្នុង​ការសម្អាត​ភូមិ​ឃុំ​របស់ខ្លួន និង​ការទុកដាក់​សំរាម​សំណល់​ផ្សេងៗ​ឱ្យ​បាន​ត្រឹមត្រូវ​​គឺជា​កត្តា​សំខាន់​»​។

សំខាន់​ជាង​នេះ ការផ្តោត​សំខាន់​លើ​អនាម័យ​បរិស្ថាន​គឺ​ការគ្រប់គ្រង​សំណល់​រឹង​ទីប្រជុំជន​ក៏ដូចជា​សំណល់​ដែល​បង្កើតឡើង​តាម​ភូមិ​ឃុំ​របស់​ពលរដ្ឋ​​ដែរ​។ ​ក្រសួង​បរិស្ថាន​សង្កេតឃើញ​ថា ក្នុង​សំណល់​ ១០០ ​ភាគរយ​មានតែ​ជាង​ ៥០ ​ភាគរយ​ប៉ុណ្ណោះ​ត្រូវបាន​យកទៅ​ចាក់​នៅលើ​ទីលាន ក្រៅពីនោះ​តែង​មាន​ការដុត កាយកប់ និង​ការ​បោះចោល​ផ្តេសផ្តាស​។ ​នេះ​​បើ​តាម​លោក​ នេត្រ ភក្ត្រា​។

លោក សំ ប្រាក់ នាយ​នគរបាល​ប៉ុស្តិ៍​សង្កាត់​លេខ​ ៤ ខេត្ត​ព្រះសីហនុ​បាន​ប្រាប់ថា ក្នុង​រយៈពេល​ ៣ ​ខែ​ចុងក្រោយ​នេះ ការអនុវត្ត​គោលនយោបាយ​ភូមិ​​ឃុំ​មាន​សុវត្ថិភាព​មិន​បាន​លេចធ្លោ​ដូច​មុន​ឡើយ ដោយសារ​​បញ្ហា​វិបត្តិ​កូវីដ​១៩​។ ប៉ុន្តែ​នៅ​​មាន​សកម្មភាព​មួយចំនួន​ដែល​​អាច​ធ្វើ​ជាប្រចាំ​គឺ​ការងារ​រដ្ឋបាល ការបង្ក្រាប​បទល្មើស និង​ការល្បាត​ពួនស្ទាក់​តាម​វេន​។

លោក សំ ប្រាក់ ថ្លែង​ថា​៖ «​លទ្ធផល​កន្លងមក ពោល​គឺ​មុនពេល​កូវីដ​១៩​កើតឡើង​យើង​ទទួល​បាន​ល្អប្រសើរ​អាច​ទទួល​យក​បាន​...​ប៉ុន្តែ​នៅពេល​​កូវីដ​នេះ យើង​សង្កេតឃើញ​ថា ហាក់បី​ដូចជា មាន​ការកម្រើក​ច្រើន​ឡើងវិញ​នូវ​គ្រឿងញៀន និង​បញ្ហា​ចរាចរណ៍​»​។

លោក ប៉ា ច័ន្ទរឿន ប្រធាន​វិទ្យាស្ថាន​ប្រជាធិបតេយ្យ​កម្ពុជា​បាន​ថ្លែង​ពីថ្ងៃ​ទី​ ១៣ ធ្នូ ដែរ​ថា កន្លងមក​រាជរដ្ឋាភិបាល និង​អាជ្ញាធរ​បាន​អនុវត្ត​គោលនយោបាយ​ភូមិ​ឃុំ​មាន​សុវត្ថិភាព​បាន​​មួយកម្រិត​។ ប៉ុន្តែ​គុណភាព​នៃ​ការអនុវត្ត​គោលនយោបាយ​នេះ​មិនទាន់​បាន​ប្រសើរ​នៅឡើយ​។

លោក ចន្ទរឿន បាន​ថ្លែងថា​៖ «​តាម​ភូមិ​ឃុំ​នៅ​ប្រឈមមុខ​បញ្ហា​ជាច្រើន ឧទាហរណ៍​ដូចជា រឿង​ការប្រើប្រាស់ ជួញដូរ​គ្រឿងញៀន ការលួច ការឆក់​ប្លន់​តែង​កើតមាន​ជារឿយៗ ជាពិសេស​គ្រោះថ្នាក់​ចរាចរណ៍​នៅតែ​ជា​ឃាតករ​លាក់​មុខ ដែល​សម្លាប់​ប្រជាជន​ខ្មែរ​ក្នុង​ ១ ​ថ្ងៃ​ពី​ ៦ ទៅ​ ៧ ​នាក់​»​។

យ៉ាងណាក្ដី​លោក ច័ន្ទរឿន បាន​សម្តែង​ក្ដី​រីករាយ​នៅពេល​ដឹងថា ក្រសួងមហាផ្ទៃ និង​ក្រសួងបរិស្ថាន​បង្កើន​ប្រសិទ្ធភាព​ពី​លើ​គោលនយោបាយ​ភូមិ​ឃុំ​មាន​សុវត្ថិភាព ជាពិសេស​បញ្ហា​អនាម័យ និង​បរិស្ថាន​។

ជាមួយ​គ្នា​នេះ​លោក​បាន​ស្នើឱ្យ​​មាន​គោលនយោបាយ​ហិរញ្ញវត្ថុ​ដើម្បី​ឱ្យ​អាជ្ញាធរ​ថ្នាក់ក្រោម​​ និង​ភាគី​ពាក់ព័ន្ធ​មានលទ្ធភាព​ក្នុង​ការអនុវត្ត​គោលនយោបាយ​នេះ​ឱ្យបាន​ពេញលក្ខណៈ​​ផងដែរ​។ ​រីឯ​ការអនុវត្ត​ក៏​សុំ​កុំ​ឱ្យ​​រើសអើង ឬ​ប៉ះពាល់​សិទ្ធិ​សេរីភាព​ជា​មូលដ្ឋាន​របស់​ពលរដ្ឋ​។

លោក ម៉ាត់ អាល់ពី ប្រធាន​អង្គការ​អ្នក​អភិវឌ្ឍន៍​សហគមន៍​បាន​ថ្លែង​ដែរ​ថា ការដាក់​​បញ្ចូល​វិធានការ​អនាម័យ និង​បរិស្ថាន គឺជា​យន្តការ​ល្អ ប៉ុន្តែ​ការអនុវត្ត​អាច​នឹង​មិនបាន​ ១០០ ​ភាគរយ​នោះទេ​។

លោក​ថា​៖ «​ខ្ញុំ​គិតថា វា​អាច​ល្អ​សម្រាប់​គោលនយោបាយ ប៉ុន្តែ​ការអនុវត្ត​អាច​នឹង​ពិបាក អ៊ីចឹង​បើ​ក្នុង​សហគមន៍​មាន​អាជ្ញាធរ​មូលដ្ឋាន​សកម្ម​ក្នុង​​ការផ្សព្វផ្សាយ​បាន​ទូលំទូលាយ​ជាប្រចាំ​ទើប​គោលនយោបាយ​នោះបាន​ជ្រាប​ដល់​ពលរដ្ឋ​ក្នុង​សហគមន៍​»៕

អត្ថបទគួរចាប់អារម្មណ៍