.jpg)
រថយន្ត និងឈើដែលត្រូវបានរឹបអូសពីបទល្មើសនៅខេត្តមណ្ឌលគិរីកន្លងមក។ រូបថត សហការី
ភ្នំពេញៈ ក្រសួងសេដ្ឋកិច្ច និងហិរញ្ញវត្ថុ និងក្រសួងយុត្តិធម៌បានបង្កើត «គណៈកម្មាធិការគ្រប់គ្រងទ្រព្យសម្បត្តិរឹបអូស» ដើម្បីធ្វើការងារលើការលក់ទ្រព្យសម្បត្តិដែលផ្ទេរពីតុលាការបន្ទាប់ពីមានសាលដីកាស្ថាពរពីតុលាការ។
គណៈកម្មាធិការនេះដឹកនាំដោយលោក គឹម សន្តិភាព រដ្ឋលេខាធិការក្រសួងយុត្តិធម៌ ប៉ុន្តែសមាជិកនៃគណៈកម្មាធិការនេះមានសមាសភាពមន្ត្រីដែលជាសមាជិកមកពីក្រសួងទាំង ២។
នៅពេលទាក់ទងកាលពីម្សិលមិញលោក គឹម សន្តិភាព បានថ្លែងថា គណៈកម្មាធិការធ្វើការងារតែលើទ្រព្យសម្បត្តិដែលផ្ទេរពីតុលាការដែលមានសាលដីកាស្ថាពរតែប៉ុណ្ណោះ។
គណៈកម្មាធិការនេះក៏ធ្វើការងារលើការប្រមូល ការគ្រប់គ្រង និងការដោះស្រាយជាមួយទ្រព្យសម្បត្តិដែលត្រូវបានរឹបអូស ការរក្សាទ្រព្យសម្បត្តិដើម្បីបន្តជាមួយនីតិវិធី រៀបចំឯកសារដាក់ទ្រព្យសម្បត្តិលក់ឡាយឡុង និងការងារដទៃៗទៀត។
តាមឯកសារបាននិយាយថា គណៈកម្មាធិការអាចដោះស្រាយទ្រព្យសម្បត្តិរឹបអូសក្នុងលក្ខណៈមធ្យោបាយ ៣ រួមមាន លក់ ផ្តល់ទ្រព្យសម្បត្តិទាំងនោះទៅស្ថាប័នរដ្ឋដែលពាក់ព័ន្ធ ឬបញ្ជូនត្រឡប់ទៅតុលាការវិញ ឬទៅគណៈកម្មាធិការចំពោះកិច្ចណាមួយ ។
ឯកសារនេះបន្តថាការលក់ទ្រព្យសម្បត្តិរឹបអូសដូចជា ឧបករណ៍កសិកម្មបរិកា្ខរ យានយន្ត គ្រឿងយន្ត គ្រឿងសង្ហារិម និងអ្វីផ្សេងៗទៀតត្រូវតែឆ្លងកាត់គណៈកម្មាធិការវាយតម្លៃទៅតាមទីផ្សារហើយចំពោះអចលនទ្រព្យក៏អ៊ីចឹងដែរ។ ឯកសារនេះបានរៀបរាប់នីតិវិធីដេញថ្លៃដែលគណៈកម្មាធិការគួរគោរពតាម។
ផ្នែក ៩ នៃឯកសារនេះបាននិយាយថា៖ «គណៈកម្មាធិការត្រូវតែរៀបចំការដេញថ្លៃសម្រាប់ទ្រព្យសម្បត្តិរឹបអូសទៅតាមនីតិវិធី ដោយចាប់ផ្តើមពីតម្លៃមូលដ្ឋានមួយ ។ តម្លៃដេញថ្លៃត្រូវតែដាក់តាមរយៈស្រោមសំបុត្រ ឬផ្ទាល់មាត់អាស្រ័យទៅលើទ្រព្យសម្បត្តិ និងការសម្រេចដែលគណៈកម្មាធិការបានជ្រើសរើស»។
ផ្នែក ១៦ នៃឯកសារនេះក៏បានលើកឡើងថា ៨៩ ភាគរយនៃប្រាក់ដែលបានមកពីការលក់ទ្រព្យសម្បត្តិត្រូវផ្ទេរទៅគណៈកម្មាធិការ ។ ១០ ភាគរយត្រូវផ្ទេរចូលថវិកាជាតិ និង ១ ភាគរយត្រូវផ្ទេរទៅក្រសួងសេដ្ឋកិច្ច និងហិរញ្ញវត្ថុ ។
គណៈកម្មាធិការនឹងប្រើប្រាស់ថវិកា ៨៩ ភាគរយសម្រាប់ការចំណាយនៅក្នុងការអនុវត្តការងាររបស់ខ្លួន។
លោក ជិន ម៉ាលីន អ្នកនាំពាក្យក្រសួងយុត្តិធម៌បានថ្លែងថា គណៈកម្មាធិការនេះត្រូវបានបង្កើតយូរមកហើយ ប៉ុន្តែវាឆ្លងកាត់ការកែលម្អ និងការផ្លាស់ប្តូរមួយចំនួនក្នុងចំណោមសមាជិក ។
លោក ជិន ម៉ាលីន បានបញ្ជាក់ថា៖ «គណៈកម្មាធិការហ្នឹងធ្វើការងារយូរហើយ តែឥឡូវគ្រាន់តែគេផ្លាស់ប្តូរ សមាសភាពមួយចំនួន។ ពីមុនមកវត្ថុតាងដែលសាលក្រមស្ថាពរហើយត្រូវលក់ឡាយឡុងចូលជាសម្បត្តិរបស់រដ្ឋដែលគ្រប់គ្រងដោយក្រសួងសេដ្ឋកិច្ចហិរញ្ញវត្ថុ និងក្រសួងយុត្តិធម៌»។
លោកបន្ថែមថា៖ «យើងផ្លាស់ប្តូរដើម្បីបង្កើនប្រសិទ្ធភាព ដូច្នេះហើយបានជាគេធ្វើការផ្លាស់ប្តូរ»៕Ps
រាយការណ៍បន្ថែមដោយ ម៉ិច ដារ៉ា
