.jpg)
ការប្រកាសដាក់ឲ្យដំណើរការកម្មវិធីអភិវឌ្ឍន៍ជំនាញដំណាក់កាលទី ២ ពីថ្ងៃ ២០ កក្កដា។ រូប ក្រសួងទេសចរណ៍
ភ្នំពេញ: ក្រសួងទេសចរណ៍ និងក្រសួងការងារ និងបណ្តុះបណ្តាលវិជ្ជាជីវៈកំពុងរៀបចំគម្រោងកម្មវិធីបណ្តុះបណ្តាលក្រុមយុវជនលើជំនាញទេសចរណ៍ និងបដិសណ្ឋារកិច្ចជំហានទី ២ ក្នុងខេត្តគោលដៅចំនួន ៥ រួមមាន ខេត្តក្រចេះ ស្ទឹងត្រែង រតនគិរី មណ្ឌលគិរី និងព្រះវិហារ ដើម្បីជួយអភិវឌ្ឍជំនាញ និងបង្កើតឱកាសការងារសមរម្យដល់ពួកគេ។
លោក តុប សុភ័ក អនុរដ្ឋលេខាធិការ និងជាអ្នកនាំពាក្យក្រសួងទេសចរណ៍បានថ្លែងពីថ្ងៃទី ២១ កក្កដា ថា ក្រុមការងារនៃក្រសួងទាំង ២ នេះកំពុងពិភាក្សាពីលទ្ធភាពដំណើរការកម្មវិធីអភិវឌ្ឍន៍ជំនាញ (Skills Development Programme) ជំហានទី ២ សម្រាប់ឆ្នាំ ២០២០-២០២៤ ដល់យុវជននៅក្នុងខេត្ត ក្រចេះ ស្ទឹងត្រែង រតនគិរី មណ្ឌលគិរី និងព្រះវិហារ ខណៈខេត្ត ៣ ក្នុងចំណោមនេះបានឆ្លងកាត់ជំហានទី ១ ម្ដងហើយ។
លោកបន្តថា កម្មវិធីលើកនេះគឺជាជំហានទី ២ បន្ទាប់ពីជំហានទី ១ ទើបបានបញ្ចប់ថ្មីៗនេះដែលមានយុវជន ៣ ខេត្តសរុបជាង ២ ពាន់នាក់បានចូលរួម។ ដោយឡែកជំហានទី ២ នេះនឹងផ្តល់ការសិក្សាជំនាញវិជ្ជាជីវៈដល់យុវជន និងអ្នកជំនាញកម្រិតទាបក្នុងខេត្តគោលដៅទាំង ៥ ខាងលើ ដើម្បីទទួលបានការងារសមរម្យ និងបង្កើនប្រាក់ចំណូលបន្ថែមសម្រាប់ជីវភាពគ្រួសារ។
លោក តុប សុភ័ក បញ្ជាក់ថា៖ «គម្រោងនេះកំពុងស្ថិតក្នុងដំណាក់ការសិក្សា និងពិភាក្សាជាមួយភាគីពាក់ព័ន្ធ។ ដូច្នេះយើងមិនទាន់ដឹងថា មានសិក្ខាកាមប៉ុន្មាននាក់ចូលរួមក្នុងវគ្គនេះទេ ប៉ុន្ដែយើងកំណត់យកយុវជនដែលមកពីខេត្តគោលដៅចំនួន ៥ ដូចរៀបរាប់ខាងលើនេះ។
គម្រោងនេះគឺក្នុងន័យជួយបន្ថែមលើជំនាញរបស់ពួកគាត់ដែលជាអ្នកធ្វើការផ្នែកសេវាកម្មតាមសណ្ឋាគារ ជំនាញចុងភៅ និងជំនាញបដិសណ្ឋារកិច្ច»។
លោកបន្ថែមថា គម្រោងនេះនឹងចូលរួមពង្រឹងសមត្ថភាពមន្ត្រីជំនាញទាំងថ្នាក់ជាតិ និងក្រោមជាតិដែលបង្កើតបាននូវធនមនុស្សមានសមត្ថភាពសម្រាប់វិស័យទេសចរណ៍ក្នុងបរិបទខេត្តដែលជាគោលដៅអេកូទេសចរណ៍ និងចូលរួមបង្កើតធនធានគ្រូបង្គោលក៏ដូចបង្កើតឲ្យមានអ្នកវាយតម្លៃបង្គោលប្រកបដោយជំនាញច្បាស់លាស់។
លោកស្រី ចិន្ដា ក្លេ ប្រធានសមាគមទេសចរណ៍កម្ពុជាបានថ្លែងពីថ្ងៃទី ២១ កក្កដាដែរថា លោកស្រីគាំទ្រលើកម្មវិធីបណ្តុះបណ្តាលនេះដោយសារការសិក្សាបន្ថែមលើមុខជំនាញដែលខ្លួនមាននឹងជួយឲ្យយុវជនមានជំនាញ និងបទពិសោធដើម្បីមានឱកាសរកការងារសមរម្យ។
លោកស្រីបន្តថា កន្លងមកវិស័យសេវាកម្មផ្នែកទេសចរណ៍នៅមានកម្រិត ដោយពួកគាត់មួយចំនួនចេះធ្វើការងារតាមរយៈសមាជិករួមក្រុមជួយបង្ហាត់បង្ហាញប៉ុណ្ណោះ។ ពួកគាត់ភាគច្រើនមិនមានជំនាញជាប់ខ្លួនមកធ្វើការក្នុងតួនាទីដែលខ្លួនកំពុងធ្វើនោះទេ។
លោកស្រី ចិន្ដាក្លេ បានបញ្ជាក់ថា៖ «ខ្ញុំមើលឃើញថាផ្នែកសេវាកម្មក្នុងវិស័យទេសចរណ៍នៅមានកម្រិតទាំងភាសាខ្មែរ ភាសាបរទេស និងជំនាញបច្ចេកទេសផ្សេង។ ខ្ញុំគិតថា ក្រសួង និងភាគីពាក់ព័ន្ធគួរតែមានវគ្គសិក្សា ឬបណ្ដុះបណ្ដាលខ្លីៗបន្ថែមទៀតដើម្បីជួយពួកគាត់ឲ្យមានសមត្ថភាពក្នុងការបំពេញការងារតាមជំនាញដែលគាត់កំពុងបំពេញតួនាទី»។
គួររំឭកថា ក្រសួងទាំង ២ នេះទើបបញ្ចប់ការបណ្ដុះបណ្ដាលយុវជនចំនួន ២ ១០០ នាក់ នៅខេត្តព្រះវិហារ ស្ទឹងត្រែង និងក្រចេះក្នុងដំណាក់កាលទី ១ រយៈពេល ៤ ឆ្នាំ (២០១៧-២០២០) នៅដើមឆ្នាំ ២០២០ នេះ។
ក្នុងនោះមានជំនាញបដិសណ្ឋារកិច្ច (HospitalityTraining) កម្មវិធីហ្វឹកហាត់ការងារ (Apprenticeship Program) និងការវាយតម្លៃការសិក្សាពីមុន (Recognition of Prior Learning) សំដៅបង្កើតឱកាសការងារ។ ទន្ទឹមនឹងនេះក៏បានពង្រឹងសមត្ថភាពគ្រូបង្គោល និងអ្នកវាយតម្លៃបង្គោលចំនួន ៥៨៣ នាក់ផងដែរ៕
