ភ្នំពេញៈ ក្រសួងចំនួន ២ ពីម្សិលមិញប្រកាសដាក់ឱ្យប្រើប្រាស់ «ប្រព័ន្ធគ្រប់គ្រងសារ និងទីតាំងសម្រាប់ទទួលព័ត៌មាន និងទិន្នន័យនៃពលរដ្ឋអំពីជំងឺកូវីដ១៩»។ ប្រព័ន្ធនេះមានមុខងារអាចទទួលការហៅចូល និងឆ្លើយតបសារជាសំឡេងដោយស្វ័យប្រវត្តិ (Interactive Voice Response,“IVR”) និងអាចកំណត់អត្តសញ្ញាណប្រជាជនដែលសង្ស័យថាមានផ្ទុកជំងឺកូវីដ១៩។
ពិធីនេះធ្វើឡើងក្រោមអធិបតីលោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងលោកស្រី ឱ វណ្ណឌីន រដ្ឋលេខាធិការក្រសួងសុខាភិបាលនៅទីស្ដីការក្រសួងប្រៃសណីយ៍។
សេចក្តីប្រកាសព័ត៌មានឱ្យដឹងថាប្រព័ន្ធគ្រប់គ្រងសារ និងទីតាំងសម្រាប់ទទួលព័ត៌មាន និងទិន្នន័យនៃប្រជាពលរដ្ឋអំពីជំងឺកូវីដ១៩ អាចទទួលការហៅចូល និងឆ្លើយតបសារជាសំឡេងដោយស្វ័យប្រវត្តិតាមរយៈការសហការជាមួយប្រតិបត្តិករទូរគមនាគមន៍។
តាមសេចក្ដីប្រកាសព័ត៌មានប្រព័ន្ធនេះមានមុខងារសំខាន់ៗ ដូចជា ១. ជួយបញ្ចៀសការកកស្ទះដល់ប្រព័ន្ធឆ្លើយតបសារ ១១៥ ដែលមានស្រាប់ និងកំពុងដំណើរការ។ ២. អាចទទួលការហៅចូល និងឆ្លើយតបដោយស្វ័យប្រវត្តិ និងអាចកំណត់អត្តសញ្ញាណប្រជាជនដែលសង្ស័យថាមានផ្ទុកជំងឺកូវីដ១៩។ ៣. អាច ផ្ញើសារជាសំឡេងដោយស្វ័យប្រវត្តិទៅប្រជាជនដែលស្ថិតក្នុងការសង្ស័យមានផ្ទុកជំងឺកូវីដ១៩ ដើម្បីតាមដានសុខភាព និង ៤. អាចផ្តល់ទិន្នន័យចាំបាច់មួយចំនួន ដើម្បីកំណត់អត្តសញ្ញាណនៃក្រុមជនដែលអាចមានហានិភ័យខ្ពស់ក្នុងការឆ្លងជំងឺកូវីដ ១៩។
លោក ជា វ៉ាន់ដេត ថ្លែងក្នុងពិធីនោះថា ប្រព័ន្ធនេះត្រូវបានចាប់ផ្តើមអភិវឌ្ឍឡើងនៅពេលវេលាមួយដែលពិភពលោកប្រឈមមុខនឹងជំងឺកូវីដ១៩។
លោកថ្លែងថា៖ «ខ្ញុំសង្ឃឹមថា ប្រព័ន្ធនេះនឹងអាចជួយលើកិច្ចខិតខំប្រឹងប្រែងរបស់មន្ត្រីក្រសួងសុខាភិបាលដែលជាសេនាធិការជួរមុខរបស់រាជរដ្ឋាភិបាលកម្ពុជាក្នុងការទប់ស្កាត់ការរីករាលដាលនៃជំងឺកូវីដ១៩ បានដោយមានប្រសិទ្ធភាព»។
លោកវាយតម្លៃខ្ពស់ចំពោះក្រុមការងារក្រសួងប្រៃសណីយ៍ និងទូរគមនាគមន៍ និងថ្លែងអំណរគុណចំពោះក្រុមហ៊ុន Cellcard, Smart Axiata, Metfone និង Telecom Cambodia ដែលបានយល់ព្រម និងអនុញ្ញាតឱ្យមានការប្រើប្រាស់សេវា ១១៥ របស់ក្រសួងសុខាភិបាលដោយមិនគិតថ្លៃ។ ក្នុងនោះប្រតិបត្តិករទូរគមនាគមន៍ផ្សេងទៀតក៏បានសហការសម្របសម្រួលដើម្បីរៀបចំប្រព័ន្ធនេះឡើង។ កិច្ចសហការនេះបានបង្កឱ្យមានភាពងាយស្រួលដល់ការកត់ត្រាទិន្នន័យចាំបាច់របស់ប្រជាពលរដ្ឋដែលស្ថិតក្នុងចង្កោមជនដែលមានហានិភ័យនៃការផ្ទុកជំងឺកូវីដ១៩។
លោក ជាង សុភ័ក្រ អគ្គនាយករងនៃអគ្គនាយកដ្ឋានទូរគមនាគមន៍ថ្លែងថា ប្រព័ន្ធគ្រប់គ្រងសារ និងទីតាំងសម្រាប់ទទួលព័ត៌មាន និងទិន្នន័យនៃប្រជាពលរដ្ឋអំពីជំងឺកូវីដ១៩ ត្រូវបានអភិវឌ្ឍឡើងក្នុងក្របខ័ណ្ឌមូលនិធិកាតព្វកិច្ចសេវាសកលទូរគមនាគមន៍ស្របតាមច្បាប់ទូរគមនាគមន៍ និងអនុក្រឹត្យស្តីពីការកំណត់យន្តការអនុវត្តកម្មវិធីកាតព្វកិច្ចសេវាសកលវិស័យទូរគមនាគមន៍។
លោកថា ក្រោមការដឹកនាំរបស់លោក កាន ច័ន្ទមេត្តា រដ្ឋលេខាធិការក្រសួងប្រៃសណីយ៍ និង ទូរគមនាគមន៍ សហការជាមួយក្រុមការងារក្រសួងសុខាភិបាល ក្រុមការងារក្រសួងទាំង ២ និងប្រតិបត្តិករទូរគមនាគមន៍បានប្រជុំពិភាក្សាជាបន្តបន្ទាប់។ ការពិភាក្សានេះក្នុងគោលដៅអភិវឌ្ឍប្រព័ន្ធគ្រប់គ្រងសារ និងទីតាំងសម្រាប់ទទួលព័ត៌មាន និង ទិន្នន័យនៃប្រជាពលរដ្ឋអំពីជំងឺកូវីដ ១៩ ឱ្យមានភាពងាយស្រួល និងប្រសិទ្ធភាពក្នុងការទប់ស្កាត់ការរីករាលដាលនៃជំងឺកូវីដ១៩ នៅក្នុងព្រះរាជាណាចក្រកម្ពុជា។
លោកថា៖ «ជាលទ្ធផលក្រុមការងារបានអភិវឌ្ឍប្រព័ន្ធនេះបានរួចរាល់ជាស្ថាពរ ព្រមទាំងបានធ្វើតេស្តសាកល្បងប្រើប្រាស់អស់ជាច្រើនខែ និងពិនិត្យឃើញថា ប្រព័ន្ធនេះមានភាពងាយស្រួលប្រើ និងមានប្រសិទ្ធភាពខ្ពស់ក្នុងការកំណត់អត្តសញ្ញាណក្រុមជនដែលអាចមានហានិភ័យខ្ពស់ក្នុងការឆ្លងជំងឺកូវីដ១៩»។
លោកស្រី ឱ វណ្ណឌីន ថា ប្រព័ន្ធនេះត្រូវបានអភិវឌ្ឍឡើងស្របតាមស្ថានភាពបច្ចុប្បន្ន និងតម្រូវការរបស់ក្រសួងសុខាភិបាលក្នុងការប្រយុទ្ធនឹងការរីករាលដាលនៃជំងឺកូវីដ ១៩ ដែលព្រះរាជាណាចក្រកម្ពុជាក៏ដូចជាពិភពលោកទាំងមូលកំពុងជួបប្រទះ។
លោកស្រីថ្លែងថា៖ «បច្ចុប្បន្ននេះស្ថានភាពនៃជំងឺកូវីដ១៩ គឺស្ថិតនៅក្នុងស្ថានភាពត្រូវតែមានការប្រុងប្រយ័ត្ន។ ប្រជាពលរដ្ឋយើងមួយចំនួនហាក់បីដូចជាភ្លេចក្នុងការការពារខ្លួនពីជំងឺកូវីដ១៩នេះ។ ប៉ុន្ដែក៏មានពលរដ្ឋមួយចំនួនបានការពារខ្លួនបានល្អដែរ។ ពលរដ្ឋដែលភ្លេចខ្លួនមិនបានការពារ ព្រោះពួកគាត់យល់ថា ករណីដែលកើតឡើងនៅកម្ពុជាសុទ្ធសឹងតែជាករណីដែលនាំចូល។ ប៉ុន្ដែបើយើងគិតបែបនេះវានឹងបង្កជាហានិភ័យខ្ពស់»។
លោកស្រីបន្តអំពាវនាវពលរដ្ឋឲ្យប្រុងប្រយ័ត្នការពារខ្លួនពីជំងឺកូវីដ១៩។ កុំមានការធ្វេសប្រហែស ដោយគិតថាកម្ពុជាមានតែករណីនាំចូល។ ការគិតបែបនេះ នាំឱ្យមានហានិភ័យខ្ពស់ចំពោះការឆ្លងជំងឺនេះ៕