.jpg)
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល។ ហុង មិនា
ភ្នំពេញៈ រដ្ឋមន្ត្រីក្រសួងសុខាភិបាល និងរដ្ឋមន្ត្រីក្រសួងមហាផ្ទៃបានណែនាំឱ្យអភិបាលខេត្តទាំងអស់ដែលមានព្រំប្រទល់ជាប់ជាមួយប្រទេសវៀតណាម ត្រូវពង្រឹងវិធានការត្រួតពិនិត្យនៅតាមច្រកព្រំដែនចេញ-ចូល ដើម្បីទប់ស្កាត់ការឆ្លងរាលដាលជំងឺកូវីដ ១៩។ ការណែនាំនេះស្របពេលដែលប្រទេសវៀតណាមកំពុងឆ្លងរាលដាលជំងឺកូវីដ ១៩ នៅក្នុងសហគមន៍ដោយរាលដាលពីក្រុងមួយទៅក្រុងមួយ។
លិខិតចុះថ្ងៃទី ៣១ ខែកក្កដា របស់លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានបញ្ជាក់ថា អភិបាលខេត្តទាំងអស់ ជាពិសេសអភិបាលខេត្តទាំង ៩ ដូចជាខេត្តកំពត តាកែវ កណ្ដាល ព្រៃវែង ស្វាយរៀង ត្បូងឃ្មុំ ក្រចេះ មណ្ឌលគិរី និងរតនគិរីដែលមានព្រំប្រទល់ជាប់ជាមួយប្រទេសវៀតណាមត្រូវបង្កើនការប្រុងប្រយ័ត្ន និងចាត់វិធានការឱ្យមានប្រសិទ្ធភាព ដើម្បីបង្ការការនាំចូលជំងឺតាមព្រំដែន និងដើម្បីការពារការឆ្លងជំងឺចូលទៅក្នុងសហគមន៍។
វិធានការទាំងនោះរួមមាន ត្រូវបង្កើនការត្រួតពិនិត្យអ្នកធ្វើដំណើរឆ្លងកាត់ព្រំដែន យកសំណាករាល់អ្នកកើតមានរោគសញ្ញាសង្ស័យ ចាត់កម្លាំងឱ្យឃ្លាំមើលពលរដ្ឋអនុវត្តវិធីការពារខ្លួនពីជំងឺឆ្លង ហាមឃាត់ពលរដ្ឋប្រមូលផ្ដុំកុះករ ណែនាំពលរដ្ឋឱ្យពាក់ម៉ាស់ពេលធ្វើដំណើរ ម្ចាស់សណ្ឋាគារ និងផ្ទះសំណាក់ត្រូវអនុវត្តវិធានការបង្ការជំងឺឆ្លង និងត្រូវបន្តអប់រំពលរដ្ឋជាប្រចាំជាដើម។
លិខិតសរសេរ៖ «ជាមួយគ្នានេះក្រសួងសុខាភិបាលសូមធ្វើការណែនាំដល់បងប្អូនប្រជាពលរដ្ឋទាំងអស់ឱ្យផ្អាក ឬពន្យារពេល ការធ្វើដំណើរទៅប្រទេសវៀតណាម ជាពិសេសទៅតំបន់ដែលមានការរាតត្បាតជំងឺកូវីដ១៩ បើមិនចាំបាច់»។
ចំណែកលោក ស ខេង រដ្ឋមន្ត្រីក្រសួងមហាផ្ទៃក៏បានចេញលិខិតណែនាំទៅកាន់អភិបាលខេត្តនៅតាមព្រំដែនជាប់ជាមួយប្រទេសវៀតណាមដែរកាលពីថ្ងៃទី ៣១ ខែកក្កដា។ លោកបានស្នើឱ្យអភិបាលខេត្តទាំងនោះត្រូវពង្រឹងការគ្រប់គ្រងចំពោះមធ្យោបាយ និងអ្នកដឹកទំនិញ ចេញ-ចូលឆ្លងកាត់ព្រំដែនដែលត្រូវអនុវត្តតាមវិធានការចត្តាឡីស័កឱ្យបានហ្មត់ចត់ និងត្រូវទប់ស្កាត់ការឆ្លងដែនខុសច្បាប់រួមទាំងបន្តចុះអប់រំពលរដ្ឋនៅតាមព្រំដែនឱ្យបង្កើនការប្រុងប្រយ័ត្ន។
ការចេញសេចក្ដីណែនាំទាំងនេះធ្វើឡើងក្រោយពីប្រទេសវៀតណាមបានរាយការណ៍ពីករណីឆ្លងជំងឺកូវីដ ១៩ នៅក្នុងសហគមន៍នៅក្នុងទីក្រុងដាណាង កាលពីថ្ងៃទី ២៥ ខែកក្កដា ហើយការឆ្លងក្នុងសហគមន៍នេះបានរាលដាលទៅដល់ខេត្តក្រុងចំនួន ៦ ផ្សេងទៀតក្នុងនោះរួមមាននៅទីក្រុងហាណូយ និងទីក្រុងហូជីមិញ។
សារព័ត៌មានវៀតណាមបានផ្សាយពីថ្ងៃម្សិលមិញថា ចាប់តាំងពីថ្ងៃទី ២៥ ខែកក្កដា មកទីក្រុងដាណាងមានករណីកូវីដ ១៩ កើនដល់ ១០៤ ករណី ខណៈខេត្តក្រុងចំនួន ៦ ទៀតបានរាយការណ៍ចំនួន ៤០ ករណីដែលករណីទាំងនេះ សុទ្ធតែជាប់ពាក់ព័ន្ធនឹងករណីផ្ទុះឡើងនៅទីក្រុងដាណាង។
លោក រស់ ផារិទ្ធ អភិបាលរងខេត្តស្វាយរៀងបានប្រាប់ភ្នំពេញប៉ុស្ដិ៍ពីម្សិលមិញថា ខេត្តរបស់លោកមានច្រកព្រំដែនទាំងអស់ចំនួន ៨ កន្លែងដែលរដ្ឋាភិបាលបានអនុញ្ញាតឱ្យពលរដ្ឋប្រទេសទាំង ២ អាចធ្វើដំណើរចេញ-ចូលបាន និងគ្មានច្រករបៀងទេ។
លោកបញ្ជាក់ថា ច្រកទ្វារព្រំដែនទាំង ៨ នោះរួមមានច្រកទ្វារអន្តរជាតិ ២ កន្លែង ច្រកទ្វារព្រំដែនទ្វេភាគី ២ កន្លែង និងច្រកទ្វារតំបន់ព្រំដែន ៤ កន្លែងដែលច្រកទាំងនេះ សុទ្ធតែមានការអនុវត្តតាមការណែនាំរបស់ក្រសួងសុខាភិបាល និងរដ្ឋាភិបាល។
លោកបញ្ជាក់ថា៖ «គ្មានអ្នកចេញ-ចូលទេលើកលែងតែអ្នកចេញ-ចូលផ្លូវការដូចជាអ្នកការទូត និងនិស្សិតទៅសិក្សា (នៅប្រទេសវៀតណាម) ប៉ុន្តែបើថា ភ្ញៀវទេសចរ និងប្រជាពលរដ្ឋស្ទើរតែនឹងអស់ទៅហើយចាប់តាំងពីផ្អាកច្រកទ្វារព្រំដែនតាំងពីថ្ងៃទី ២០ ខែមីនាមក ហើយឥឡូវនៅសល់តែទំនិញទេដែលយើងនៅបន្តដោះដូរគ្នា»។
កាលពីថ្ងៃម្សិលមិញកម្ពុជាបានរាយការណ៍ពីករណីឆ្លងថ្មីតែម្នាក់ប៉ុណ្ណោះ ដែលធ្វើឱ្យចំនួនអ្នកឆ្លងសរុបកើនដល់ ២៤០ នាក់ និងអ្នកជាសះស្បើយថ្មី មានចំនួន ៣២ នាក់ ដែលធ្វើឱ្យចំនួនអ្នកជាសះស្បើយសរុបកើនដល់ ១៩៦ នាក់។ កម្ពុជាបន្តរាយការណ៍គ្មានករណីឆ្លងជំងឺកូវីដ ១៩ ក្នុងសហគមន៍ ហើយករណីភាគច្រើននាំចូលពីក្រៅប្រទេស។
ក្រសួងសុខាភិបាលបានចេញសេចក្ដីប្រកាសនៅថ្ងៃម្សិលមិញដោយបានកែសម្រួលវិធានការចំពោះអ្នកដំណើរជាពលរដ្ឋខ្មែរកាន់លិខិតឆ្លងដែនបរទេស និងកែសម្រួលការធ្វើចត្តាឡីស័កមន្ត្រីការទូត និងមន្ត្រីអង្គការអន្តរជាតិដែលមានទិដ្ឋាការប្រភេទ A និង B។
សេចក្ដីសម្រេចនោះបញ្ជាក់ថា ពលរដ្ឋខ្មែរដែលកាន់លិខិតឆ្លងដែនបរទេសដែលមានទិដ្ឋាការ Visa K ត្រូវលើកលែងចំពោះការតម្កល់ប្រាក់ ៣ ពាន់ដុល្លារ ប៉ុន្តែត្រូវមានវិញ្ញាបនបត្របញ្ជាក់សុខភាពបញ្ជាក់ថាគ្មានជំងឺកូវីដរយៈពេល ៧២ ម៉ោងចាប់ពីពេលចេញដំណើរ។
ចំណែកស្ថានបេសកកម្មបរទេស និងអង្គការអន្តរជាតិដែលអ្នកការទូត និងមន្ត្រីអង្គការអន្តរជាតិចូលមកកម្ពុជាត្រូវធានាអះអាងពីភាពអវិជ្ជមានជំងឺកូវីដ ១៩ របស់មន្ត្រីរបស់ខ្លួន និងត្រូវធានាពីការធ្វើចត្តាឡីស័ក ១៤ ថ្ងៃ ឱ្យបានត្រឹមត្រូវដោយខ្លួនឯង៕
វីដេអូ៖
