.jpg)
ស្ត្រីម្នាក់កំពុងរកឯកសារនៅបណ្ណាល័យជាតិ។ ហ៊ាន រង្សី
ភ្នំពេញៈ ក្រសួងអប់រំ យុវជន និងកីឡា និងក្រសួងសេដ្ឋកិច្ច និងហិរញ្ញវត្ថុ បានផ្តួចផ្ដើមគំនិតឧបត្ថម្ភថវិកាគាំទ្រអ្នកនិពន្ធ អ្នកសិក្សាស្រាវជ្រាវ ចំពោះការរៀបរៀង និពន្ធ និងកែលម្អសៀវភៅនៅកម្រិតឧត្តមសិក្សាតាមរយៈមូលនិធិ «ការស្រាវជ្រាវ គំនិតច្នៃប្រឌិត និងនវានុវត្តន៍»។
លោក រស់ សុវាចា អ្នកនាំពាក្យ ក្រសួងអប់រំថ្លែងថា ការផ្ដល់មូលនិធិនេះ គឺជាជំហានថ្មីមួយទៀតដែលជាការឆ្លើយតបចំពោះបំណងប្រាថ្នារបស់និស្សិតកម្ពុជាក្នុងការទទួលបានធនធានសិក្សាជាខេមរភាសាឱ្យបានគ្រប់គ្រាន់ មានគុណភាព និងប្រកបដោយសមធម៌។
លោកថ្លែងថា៖ «ការផ្ដល់មូលនិធិនេះ គឺដើម្បីរួមចំណែកលើកកម្ពស់វប្បធម៌នៃការស្រាវជ្រាវ បំផុសគំនិតច្នៃប្រឌិត និងជំរុញការធ្វើនវានុវត្តន៍ ដើម្បីជាប្រយោជន៍ដល់វិស័យអប់រំដែលឆ្លើយតបទៅនឹងទីផ្សារពលកម្ម និងសកលភាវូបនីយកម្ម»។ លោកបន្តថា គោលបំណងនៃការរៀបរៀងនិពន្ធ និងកែលម្អ សៀវភៅសិក្សានៅកម្រិតឧត្តមសិក្សាគឺដើម្បីបង្កើនបរិមាណលើកកម្ពស់គុណភាព និងពង្រីកសមធម៌នៃធនធានសិក្សាជាខេមរភាសាជូនដល់និស្សិតដែលកំពុងបន្តការសិក្សា និងត្រៀមខ្លួនធ្វើការស្រាវជ្រាវនៅកម្រិតឧត្តមសិក្សា។
បើតាមលោក សុវាចា ការរៀបរៀងនិពន្ធ និងកែលម្អសៀវភៅសិក្សានៅកម្រិតឧត្តមសិក្សាមានគោលដៅឆ្លើយតបជាបន្ទាន់ចំពោះការខ្វះខាតធនធានសិក្សា ដែលជាតម្រូវការសិក្សារបស់និស្សិតនៅកម្រិតឧត្តមសិក្សា។ លោកបន្ថែមថា គំនិតផ្គួចផ្ដើមនេះក៏មានបំណងលើកកម្ពស់ទំនើបភាវូបនីយកម្ម និងឧត្តមានុវត្តន៍នៃការរៀន និងបង្រៀន និងការស្រាវជ្រាវទៅលើមុខវិជ្ជាកម្មវិធីសិក្សា ឬមុខជំនាញជាក់លាក់។ បង្កើនភាពស៊ីជម្រៅក្នុងការកសាងវិជ្ជាជីវៈ និងបទពិសោធសម្រាប់ឋានៈសាស្ត្រាចារ្យ និងអ្នកស្រាវជ្រាវ។ តាមរយៈមូលនិធិនេះក៏បានរួមចំណែកដល់ការកសាងភាពជាសហគមន៍វិជ្ជាជីវៈការចែករំលែកបទពិសោធ និងវប្បធម៌នៃការរៀបរៀងនិពន្ធ និងកែលម្អសៀវភៅសិក្សានៅកម្រិតឧត្តមសិក្សាផងដែរ។
បើតាមលោក សុវាចា ប្រភេទសៀវភៅសិក្សានៅកម្រិតឧត្តមសិក្សាដែលមូលនិធិនឹងផ្តល់ការគាំទ្រលើការរៀបរៀង និពន្ធ ឬកែលម្អមានទម្រង់ ៤ ប្រភេទដូចជាទី ១ សៀវភៅអំណានទូទៅ ទី ២ សៀវភៅសិក្សាស្រាវជ្រាវសម្រាប់កម្មវិធីសិក្សានៃគ្រឹះស្ថានឧត្តមសិក្សា ទី ៣ សៀវភៅសិក្សាស្រាវជ្រាវសម្រាប់កម្មវិធីសិក្សារួមគ្នានៃកិច្ចសហប្រតិបត្តិការនៃគ្រឹះស្ថានឧត្តមសិក្សា និងទី ៤ ការស្រាវជ្រាវធនធានសិក្សាសម្រាប់ការបង្កើតសាកលវិទ្យាល័យនិម្មិត (Virtual University)។
លោក ប៉ិច បូឡែន ប្រធានក្រុមប្រឹក្សាភិបាលសហព័ន្ធសេវាអប់រំនៅកម្ពុជាថ្លែងថា គំនិតផ្គួចផ្ដើមនេះគឺជាគំនិតល្អដែលបើកឱកាសដល់សិស្ស និស្សិតក្នុងការសិក្សាស្រាវជ្រាវ និងការតែងនិពន្ធនៅកម្រិតឧត្ដមសិក្សា។ លោកថ្លែងថា៖ «គំនិតផ្គួចផ្ដើមរបស់ក្រសួងនេះក៏បានជួយលើកតម្កើងគំនិតនវានុវត្ដន៍ ច្នៃប្រឌិត សហគ្រិនភាព និងការចូលរួមរបស់សិស្សនិស្សិត។ ការធ្វើបែបនេះក្រសួងអប់រំក៏បានប្រភពគំនិតពីខាងក្រៅបន្ថែមសម្រាប់វិស័យអប់រំកម្ពុជាផងដែរ»៕
