.jpg)
កិច្ចប្រជុំថ្នាក់ដឹកនាំក្រសួងព័ត៌មានពីថ្ងៃទី ២៧ មករា។ រូបថត សហការី
ភ្នំពេញៈ ក្រសួងព័ត៌មាននឹងជួបប្រជុំជាមួយក្រសួងប្រៃសណីយ៍ និងទូរគមនាគមន៍ និងក្រសួងសេដ្ឋកិច្ច និងហិរញ្ញវត្ថុនឹងជួបប្រជុំគ្នានៅថ្ងៃពុធនេះ ដើម្បីពិនិត្យទៅលើក្របខ័ណ្ឌគោលនយោបាយ និងសេចក្ដីព្រាងចំពោះការផ្លាស់ប្ដូរប្រព័ន្ធផ្សព្វផ្សាយទូរទស្សន៍របស់រដ្ឋចាស់ អាណាឡូកឲ្យទៅជាឌីជីថលវិញ ដើម្បីពង្រីកការផ្សព្វផ្សាយឱ្យបានលឿនទាំងនៅក្នុងប្រទេសកម្ពុជាក្នុងតំបន់ និងលើពិភពលោក។
នៅមុនកិច្ចប្រជុំអន្តរក្រសួងនេះគឺកាលពីព្រឹកថ្ងៃទី ២៧ ខែមករា លោក ខៀវ កាញារីទ្ធ រដ្ឋមន្ដ្រីក្រសួងព័ត៌មានថ្នាក់ដឹកនាំ និងមន្ត្រីជំនាញបច្ចេកទេសក្រសួងព័ត៌មានបានដឹកនាំកិច្ចប្រជុំនៅទីស្ដីការក្រសួងព័ត៌មាន ដើម្បីពិនិត្យលើសេចក្ដីព្រាងក្របខ័ណ្ឌគោលនយោបាយ ប្រព័ន្ធផ្សព្វផ្សាយទូរទស្សន៍របស់រដ្ឋឲ្យទៅជាប្រព័ន្ធផ្សព្វផ្សាយឌីជីថលនេះដើម្បីត្រៀមដាក់សេចក្ដីព្រាងទាំងនេះចូលក្នុងកិច្ចប្រជុំជាមួយក្រសួងប្រៃសណីយ៍ និងទូរគមនាគមន៍ និងក្រសួងសេដ្ឋកិច្ច និងហិរញ្ញវត្ថុនៅថ្ងៃទី ២៩ ខែមករានេះ។
លោក ខៀវ កាញារីទ្ធ ថ្លែងនៅក្នុងកិច្ចប្រជុំនេះថា ក្រសួងព័ត៌មានបានពន្លឿនការផ្លាស់ប្តូរប្រព័ន្ធផ្សព្វផ្សាយទូរទស្សន៍ពីអាណាឡូកទៅឌីជីថលឱ្យបានរួចរាល់យ៉ាងយូរត្រឹមឆ្នាំ ២០២៣ តាមអនុសាសន៍របស់លោក ហ៊ុន សែន នាយករដ្ឋមន្ត្រីដែលបានថ្លែងឱ្យប្រព័ន្ធផ្សព្វផ្សាយរបស់រដ្ឋមានការផ្លាស់ប្ដូរពីអាណាឡូកទៅជាឌីជីថលក្នុងជំនួបជាមួយអ្នកសារព័ត៌មានកាលពីដើមខែមករា។
លោករដ្ឋមន្ដ្រីថ្លែងថា៖ «ក្រសួងព័ត៌មានត្រៀមសហការជាមួយស្ថាប័នពាក់ព័ន្ធក្នុងការពន្លឿនផែនការផ្លាស់ប្តូរប្រព័ន្ធផ្សាយតាមទូរទស្សន៍ឱ្យទៅជាឌីជីថលឱ្យបានទាន់ពេលវេលា ដើម្បីធ្វើសមាហរណកម្មទូរទស្សន៍ឌីជីថលកម្ពុជា ទៅក្នុងតំបន់»។ លោករំឭកថា ប្រព័ន្ធផ្សព្វផ្សាយទូរទស្សន៍ឌីជីថលមានគុណសម្បត្តិជាច្រើនទាំងគុណភាពសំឡេងរូបភាព ល្បឿន ដែលធ្វើឱ្យអ្នកទស្សនាជក់ចិត្ត ពិសេសរលកសញ្ញាហ្វ្រេកង់មិនរំខានឬឆ្លងទៅប៉ុស្តិ៍ផ្សេងៗក្នុងប្រទេសកម្ពុជា និងក្នុងតំបន់។
លោក កឹម គុណវឌ្ឍន៍ រដ្ឋលេខាធិការក្រសួងព័ត៌មានបានលើកឡើងថា តាមទស្សនវិស័យ និងផែនការក្នុងការផ្លាស់ប្តូរប្រព័ន្ធទូរទស្សន៍ពីអាណាឡូកទៅជាឌីជីថល ក្រសួងព័ត៌មានបានធ្វើការយ៉ាងសកម្មជាមួយនឹងបណ្តាប្រទេសជាសមាជិកអាស៊ានតាំងពីឆ្នាំ ២០០៤ បន្តបន្ទាប់មកដល់បច្ចុប្បន្ន។ មន្ត្រីជំនាញគ្រប់ផ្នែកពាក់ព័ន្ធរបស់ក្រសួងព័ត៌មានបានធ្វើផែនការសម្មភាពដោយបានលើកជាគម្រោងពីជំហានមួយទៅជំហានមួយសម្រាប់អនាគតនៃការបញ្ចប់ការផ្សាយប្រព័ន្ធអាណាឡូកនៅឆ្នាំ ២០២៣ និងធ្វើការបោះជំហានទៅធ្វើការផ្សាយតាមប្រព័ន្ធឌីជីថលនៅក្នុងសហគមន៍តំបន់ក៏ដូចជានៅលើពិភពលោក។
លោកថ្លែងថា៖ «កិច្ចប្រជុំនាឱកាស (ថ្ងៃពុធ) នេះក៏បានសិក្សាពិភាក្សាគ្នាយ៉ាងល្អិតល្អន់អំពីផែនការសកម្មភាពនៅក្នុងជំហាននីមួយៗពីឆ្នាំ ២០២០ ទៅដល់ឆ្នាំ ២០២៣ តើត្រូវអនុវត្តតាមជំហានរបៀបណា ហើយតម្រូវការឥណទានពីរដ្ឋកម្រិតណាដែលជាការគិតគូរខ្ពស់របស់ក្រសួងព័ត៌មាននៅក្នុងផែនការសកម្មភាពលើការផ្លាស់ប្តូរប្រព័ន្ធទូរទស្សន៍ពីអាណាឡូកទៅឌីជីថលនេះ»។
លោក ផុស សុវណ្ណ ប្រតិភូរាជរដ្ឋាភិបាលទទួលបន្ទុកអគ្គនាយកព័ត៌មាន និងសោតទស្សន៍នៃក្រសួងព័ត៌មានបានបញ្ជាក់ថា ការផ្លាស់ប្តូរប្រព័ន្ធទូរទស្សន៍ពីអាណាឡូកទៅឌីជីថលនេះមានសារៈសំខាន់ណាស់នាពេលបច្ចុប្បន្នដោយអាចជូនដំណឹងព័ត៌មានទៅប្រជាពលរដ្ឋបានទាន់ពេលវេលា និងមានគុណភាពច្បាស់ល្អ។
លោកថ្លែងថា៖ «បើសិនជាយើងមិនប្ដូរទេ យើងមានបញ្ហាចោទត្រង់ថា អាចបណ្ដាលឲ្យប្រទេសជិតខាងយើងដែលគេផ្លាស់ប្ដូរទៅជាឌីជីថលហើយ យើងមិនទាន់ប្ដូរគឺយើងរំខានគេ។ ឧបករណ៍ផ្សព្វផ្សាយទាំងអស់នៅក្នុងប្រព័ន្ធផ្សព្វផ្សាយជាអាណាឡូកនេះនឹងលែងមានផលិតផលក្រុមហ៊ុនដែលជាអ្នកផលិតគឺគេនាំគ្នាផលិតបែបឌីជីថលសម្រាប់ទីផ្សារធំៗ។ អ៊ីចឹងយើងអត់មានសម្ភារ គ្រឿងបន្លាស់ ដើម្បីនឹងផ្លាស់ប្ដូរនូវសម្ភាររបស់យើង»។
លោកបន្ដថា៖ «បើយើងធ្វើនូវប្រព័ន្ធមួយដែលហៅថា network ឱ្យគ្រប់គ្រងបាន វាអាចជូនព័ត៌មានផ្សេងៗនៅក្នុងប្រព័ន្ធទូរទស្សន៍មានល្បឿនលឿន។ ប្រសិនបើមាន ១០ កម្មវិធីដែលត្រូវផ្សាយ យើងមានប្រព័ន្ធគ្រប់គ្រងជូនដំណឹងតែមួយទៅគឺវានឹងផ្សាយចូលទៅទាំងអស់តែម្ដងមានដូចជាបញ្ហាគ្រោះធម្មជាតិផ្សេងៗជាដើម»៕
