មណ្ឌលគិរីៈ មនុស្ស ២ នាក់បានស្លាប់ភ្លាមៗ រីឯម្នាក់ទៀតស្លាប់បន្ទាប់ពីដឹកដល់មន្ទីរពេទ្យ ខណៈ ១១ នាក់ទៀតរងរបួសធ្ងន់ស្រាល ដោយសារគ្រោះថ្នាក់ក្រឡាប់រថយន្តដឹកជន្លង់ម្រេច ១ គ្រឿងកាលពីរំលងអធ្រាត្រឈានចូលថ្ងៃទី ៥ ខែកញ្ញាម្សិលមិញនៅចំណុចអូរងើយ ក្នុងភូមិអណ្តូងក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី ចំណែកអ្នកបើកបរ និងព្រូឡាន ៣ នាក់បានរត់គេចខ្លួន ។
លោក ប៊ូ ប៊ុនឈាត អធិការស្រុកអូររាំងបានឱ្យដឹងថាបន្ទាប់ពីគ្រោះថ្នាក់ចរាចរណ៍នេះ សមត្ថកិច្ចបានអន្តរាគមន៍ដោយដឹកអ្នករបួសទៅសង្គ្រោះនៅមន្ទីរពេទ្យបង្អែកខេត្ត ប៉ុន្ដែលុះដល់ព្រឹកឡើង [ថ្ងៃពុធ] ជនរងគ្រោះម្នាក់ទៀតបានស្លាប់ ដោយសាររបួសគាត់ធ្ងន់ពេក។
លោកថា៖ «ឡាននេះដឹកជន្លង់ម្រេច តែមកដល់កន្លែងកើតហេតុក៏ធ្លាក់ជ្រោះ ខណៈអ្នកជិះនៅលើឡានមានមនុស្ស ១៧ នាក់គឺតៃកុងម្នាក់ ព្រូឡាន ២ នាក់ ម្ចាស់ចម្ការ ២ នាក់ និងកម្មករ ១២ នាក់។ ប៉ុន្ដែក្នុងពេលកើតហេតុ តៃកុងឡាន និងព្រូមិនប៉ះពាល់អ្វីទេ អ៊ីចឹងគាត់ក៏រត់គេចខ្លួនបាត់ទៅ»។
បើតាមលោក ប៊ុនឈាន រថយន្តដែលក្រឡាប់នេះ ម៉ាកហ៊ីយ៉ាន់ដាយពាក់ស្លាកលេខ ភ្នំពេញ ២ C-3075 ដឹកជន្លង់ម្រេចពីស្រុកមេមត់យកទៅស្រុកពេជ្រាដា តែពេលមកដល់ចំណុចកើតហេតុជាផ្លូវកោង និងមានចំណោត ហើយពេលអ្នកបើកបរសាងលេខមិនចូលក៏ធ្លាក់ចញ្ចើមផ្លូវទៅផ្នែកខាងស្ដាំក្រឡាប់ចូលជ្រោះតែម្ដង។
លោកអធិការស្រុកបញ្ជាក់ថា៖ «ដំបូងមានមនុស្សស្លាប់នៅនឹងកន្លែងតែ ២ នាក់ទេ ប៉ុន្ដែ ១២ នាក់រងរបួស មានធ្ងន់ និងស្រាលយើងក៏បានដឹកទៅសង្គ្រោះនៅមន្ទីរពេទ្យបង្អែកខេត្ត តែពេលទៅដល់ក៏បានស្លាប់ម្នាក់ទៀត។ ចំណែកសព ២ នាក់យើងតម្កល់ទុកនៅកន្លែងកើតហេតុសិន ព្រោះត្រូវកប់ក្រោមជន្លង់ម្រេចរហូតដល់ព្រឹក [ថ្ងៃពុធ] នេះទើបយើងរើជន្លង់ម្រេចចេញយកសពបាន»។
លោក ប៊ុនឈាន បានឲ្យដឹងថាសមត្ថកិច្ចស្រុកអូររាំងបានឲ្យកងកម្លាំងយករថយន្តដឹកសពទាំង ៣ នាក់ទៅស្រុកកំណើតហើយ ខណៈសពទាំងនោះសុទ្ធតែនៅក្នុងឃុំទ្រៀក ស្រុកមេមត់ ខេត្ដត្បូងឃ្មុំ ដូចគ្នា។
លោកបញ្ជាក់ថាសពទាំង ៣ នាក់នោះជាបុរសអាយុខ្ទង់ជាង ៤០ ឆ្នាំរួមមានទី១ ឈ្មោះ ឌៀន ប្រពន្ធមកទទួលយករួចហើយ, ឯសពម្នាក់ទៀត លុយ ដន និងម្នាក់ទៀតបានស្លាប់នៅមន្ទីរពេទ្យតែនៅមិនទាន់ស្គាល់អត្ដសញ្ញាណនៅឡើយ។ ដោយឡែកអ្នករបួស ១១ នាក់គឺស្គាល់អត្តសញ្ញាណតែ ៤ នាក់ទេ ដោយ ទី ១- ឈ្មោះ សេង បែន ប្រុសអាយុ ៣០ ឆ្នាំជនជាតិខ្មែររបួសជើងទាំង២,ទី ២- ឈ្មោះ ស៑យ ស៊ីជន់ ប្រុសអាយុ ៤០ ឆ្នាំ បាក់ដៃស្ដាំ, ទី៣- ឈ្មោះ អា៑ង ចាន់ថែ ប្រុសអាយុ ៣៦ ឆ្នាំបែកក្បាល និង ទី ៤- ឈ្មោះ ស៊ុន គឹមសឿន ប្រុសអាយុ ៥២ ឆ្នាំរបួសស្រាល ឯអ្នកផ្សេងទៀតសមត្ថកិច្ចកំពុងរកអត្តសញ្ញាណ។ ប៉ុន្តែបច្ចុប្បន្នអ្នករបួសទាំងនោះកំពុងសម្រាកព្យាបាលនៅមន្ទីរពេទ្យខេត្តមណ្ឌលគិរី៕