តាកែវៈ កម្មករប្រមាណ ៩៣ នាក់បានរងរបួសធ្ងន់ និងស្រាល បន្ទាប់ពីរថយន្តដែលពួកគាត់ជិះទៅធ្វើការបានក្រឡាប់ទៅក្នុងដីស្រែនៅភូមិត្រពាំងក្រសាំង ឃុំកណ្តឹង ស្រុកបាទី ខេត្តតាកែវកាលពីម៉ោងជាង ៦ ព្រឹកម្សិលមិញ ខណៈពេលមេឃកំពុងភ្លៀង។ នេះបើតាមមន្ត្រីនគរបាលមូលដ្ឋាន។
លោក ហង្ស វ៉ន នាយនគរបាលប៉ុស្តិ៍ឃុំកណ្ដឹងបានប្រាប់ភ្នំពេញប៉ុស្តិ៍ថា កម្មករដែលធ្វើដំណើរតាមរថយន្តនោះបម្រើការនៅរោងចក្រដេរស្បែកជើងរបស់ក្រុមហ៊ុន Lin Wen Chih Sunbow Enterprises Co.,- Ltd ដែលមានទីតាំងក្នុងឃុំសៀមរាប ស្រុកកណ្ដាលស្ទឹង ខេត្តកណ្ដាល។ កម្មកររងគ្រោះនិងអ្នកបើកបរឈ្មោះ ទ្រី សេង អាយុ ៤២ ឆ្នាំ រងរបួសស្រាលត្រូវបានក្រុមសមត្ថកិច្ចចម្រុះជួយដឹកទៅមន្ទីរពេទ្យបង្អែកស្រុកបាទី និងគ្លីនិកមួយចំនួនដែលនៅក្បែរនោះដើម្បីព្យាបាលរបួស។
លោក វ៉ន បានបញ្ជាក់ថា៖ «ក្នុងចំណោមកម្មកររងគ្រោះទាំងនោះមាន ៧ នាក់រងរបួសធ្ងន់ហើយពួកគេត្រូវបានបុគ្គលិកសុខាភិបាលនៃមន្ទីរពេទ្យបង្អែកស្រុកបាទីបញ្ជូនបន្តទៅកាន់មន្ទីរពេទ្យខេត្តតាកែវ»។
បើតាមលោក វ៉ន គ្រោះថ្នាក់ចរាចរណ៍នេះគឺបណ្ដាលមកពីស្ថានភាពផ្លូវតូចចង្អៀតជាផ្លូវលំងាយរអិល នៅពេលមានភ្លៀងធ្លាក់។ នៅពេលនេះសមត្ថកិច្ចជំនាញបានស្ទូចអូសរថយន្តនោះយកទៅរក្សាទុកជាបណ្ដោះអាសន្ននៅអធិការដ្ឋាននគរបាលស្រុកបាទី ដើម្បីរង់ចាំរកដំណោះស្រាយរវាងភាគីកម្មករ និងម្ចាស់រថយន្ត។
ទោះជាយ៉ាងណាមកទល់ពេលនេះកម្មករភាគច្រើនដែលបានបញ្ជូនទៅព្យាបាលនៅមន្ទីរពេទ្យបង្អែកស្រុកបាទី និងគ្លីនិកឯកជនដែលជាដៃគូជាមួយនឹងរបបសន្តិសុខសង្គម (ប.ស.ស) មានអាការធូរស្រាលជាធម្មតាឡើងវិញហើយ។ នេះបើតាមការអះអាងរបស់លោក ម៉ឹង វីរីយ៉ា ប្រធានមន្ទីរការងារខេត្តតាកែវ។
លោកថ្លែងថា ក្រោយទទួលបានព័ត៌មាននេះលោកបានដឹកនាំក្រុមការងារចុះជួយអន្តរាគមន៍ដឹកជញ្ជូនកម្មកររងគ្រោះទៅកាន់មន្ទីរពេទ្យ និងគ្លីនិកឯកជនដែលជាដៃគូ។ ក្នុងនោះកម្មករ ៨០ នាក់បានបញ្ជូនទៅកាន់មន្ទីរពេទ្យបង្អែកស្រុកបាទី, ៦ នាក់ទៅកាន់គ្លីនិកឯកជនដែលជាដៃគូ ប.ស.ស និង ៧ នាក់ទៀតដែលរងរបួសធ្ងន់ទៅកាន់មន្ទីរពេទ្យខេត្តតាកែវ។
លោក វីរីយ៉ា បានបញ្ជាក់ថា៖ «ពេលនេះកម្មករ ៨៦ នាក់ដែលរងរបួសស្រាលសើស្បែកមានអាការធូរស្រាលជាធម្មតាឡើងវិញហើយក្រោយទទួលបានការពិនិត្យលាងរបួស និងព្យាបាលដោយចាក់ថ្នាំ និងព្យួរសេរ៉ូមពីក្រុមគ្រូពេទ្យជំនាញ។
នៅព្រឹកថ្ងៃស្អែក (ពុធនេះ) ពួកគេអាចត្រឡប់ទៅធ្វើការងារវិញបាន»។
បើតាមលោក វីរីយ៉ា កម្មករ ៧ នាក់ដែលបានបញ្ជូនបន្តទៅកាន់មន្ទីរពេទ្យខេត្តតាកែវនោះនៅពុំទាន់ដឹងអំពីស្ថានភាពនៃមុខរបួសពិតប្រាកដនៅឡើយទេ ហើយក្រុមគ្រូពេទ្យកំពុងបន្តពិនិត្យតាមដាន និងឆ្លុះមើលដោយម៉ាស៊ីនកាំរស្មីអ៊ិច។
យ៉ាងណាក៏ដោយនៅរសៀលថ្ងៃម្សិលមិញ លោក នុត ស៊ីណាត ប្រធានមន្ទីរសុខាភិបាលខេត្តតាកែវដែលបានចុះពិនិត្យស្ថានភាព និងសួរសុខទុក្ខកម្មកររងគ្រោះទាំងនោះដល់មន្ទីរពេទ្យខេត្ត បានប្រាប់ភ្នំពេញប៉ុស្តិ៍ថាពួកគេមានអាការធូរស្បើយឡើងវិញហើយ លើកលែងតែអ្នករងគ្រោះ ២ នាក់ប៉ុណ្ណោះដែលកំពុងត្រូវបានធ្វើការវះកាត់ដោយក្រុមគ្រូពេទ្យជំនាញ។
លោក ស៊ីណាត បញ្ជាក់ថា៖ «អ្នកជំងឺ ៥ នាក់ដែលរងការប៉ះទង្គិចលើរាងកាយតិចតួចបានធូរស្បើយហើយ ប៉ុន្តែអ្នកជំងឺ ២ នាក់ទៀតដែលពិនិត្យឃើញមានបាក់ឆ្អឹងច្រមុះ និងប្រេះស្រាំឆ្អឹងកដៃនោះគឺកំពុងស្ថិតក្រោមការវះកាត់ពីគ្រូពេទ្យ និងត្រូវប្រើពេលយូរក្នុងការព្យាបាល»។
ជុំវិញករណីនេះ បុគ្គលិករដ្ឋបាលរោងចក្រកាត់ដេរស្បែកជើងនៃក្រុមហ៊ុន Lin Wen Chih Sunbow Enterprises Co., Ltd គឺអ្នកស្រី គង់ ចាន់មុន្នីផល បានប្រាប់ភ្នំពេញប៉ុស្តិ៍ថា នេះជាករណីគ្រោះថ្នាក់ការងារ ព្រោះកម្មករបានធ្វើដំណើរពីផ្ទះមកបំពេញការងារដូច្នេះថ្លៃព្យាបាលរបួសគឺជាបន្ទុក របស់ ប.ស.ស ព្រោះរោងចក្របានចុះកិច្ចព្រមព្រៀងជាមួយ ប.ស.ស រួចហើយ។
អ្នកស្រី មុន្នីផល បានបន្តថា៖ «នៅពេលនេះ បុគ្គលិករោងចក្ររបស់យើងកំពុងចុះធ្វើការរួមគ្នាជាមួយក្រុមមន្ត្រី ប.ស.ស ដើម្បីស្រង់ឈ្មោះកម្មករដែលរបួស។ ចំពោះអ្នករងរបួសធ្ងន់ រោងចក្រនឹងអនុញ្ញាតឱ្យឈប់សម្រាកបន្តព្យាបាលជំងឺទៅតាមស្ថានភាពជាក់ស្ដែង។ ចំណែកអ្នករងរបួសស្រាលគឺសូមឱ្យពួកគាត់មកធ្វើការវិញនៅថ្ងៃពុធនេះ»។
សូមបញ្ជាក់ផងដែរថា អភិបាលខេត្តតាកែវលោក អ៊ូច ភា ក៏បានចុះសួរសុខទុក្ខ និង ផ្ដល់អំណោយមួយចំនួនដល់កម្មកររងគ្រោះដល់មន្ទីរពេទ្យផងដែរកាលពីម្សិលមិញ។ ជាមួយនោះលោកបានណែនាំឱ្យក្រុមហ៊ុនរោងចក្រអនុញ្ញាតច្បាប់ឈប់សម្រាកដល់ពួកគេ ១ ថ្ងៃសម្រាប់អ្នករងរបួសស្រាល និងទៅតាមភាពជាក់ស្ដែងចំពោះអ្នករបួសធ្ងន់ដោយមិនកាត់ប្រាក់ឈ្នួល និងប្រាក់អត្ថប្រយោជន៍ផ្សេង៕