.jpg)
ទិដ្ឋភាពនៅកន្លែងរថយន្តក្រឡាប់កាលពីថ្ងៃ ៣០ មីនា។ រូបថត ហ្វេសប៊ុក
បាត់ដំបងៈ យ៉ាងហោចណាស់មានមនុស្ស ៤ នាក់បានស្លាប់ ដោយសារក្រឡាប់រថយន្តធុនធំដឹកអង្ករ ១ គ្រឿង បណ្ដាលមកពីរអិលពេលចុះចំណោត កាលពីថ្ងៃទី ៣០ មីនា នៅក្នុងភូមិថ្នល់បត់ ឃុំអូររំដួល ស្រុកភ្នំព្រឹក ខេត្តបាត់ដំបង។
លោក សុង សុភ័ក្ត្រ អភិបាលស្រុកភ្នំព្រឹកបានប្រាប់ ភ្នំពេញ ប៉ុស្តិ៍ពី ម្សិលមិញថា តាមរបាយការណ៍ពីលោក ហេង បារាំង អធិការនគរបាលស្រុកភ្នំព្រឹកបានបញ្ជាក់ថា ជនរងគ្រោះទាំង ៤ នាក់ សុទ្ធប្រុសទាំងអស់ ដែលទី១- ឈ្មោះ សួន សុជា អាយុ ១៧ ឆ្នាំ រស់នៅភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ, ទី២- ឈ្មោះ ឧត្តម អាយុ ២៥ ឆ្នាំរស់នៅខេត្តព្រៃវែង ទី៣- ឈ្មោះ ម៉ៅ អាយុ ៣៣ ឆ្នាំ រស់នៅខេត្តកំពង់ស្ពឺ និងទី៤ ឈ្មោះ សីហា អាយុ ២៤ ឆ្នាំ រស់នៅស្រុកសំឡូត ខេត្តបាត់ដំបង។
លោកប្រាប់ថា៖ «តាមមន្ត្រីជំនាញចរាចរណ៍ខេត្តដែលបានពិនិត្យរថយន្តនោះមិនឃើញមានបញ្ហាបច្ចេកទេសអ្វីទេ តែគ្រោះថ្នាក់នេះបណ្តាលមកពីរថយន្តនោះដឹកធ្ងន់ ហើយចុះចំណោតពីលើភ្នំព្រឹក។ ដូច្នេះពេលរថយន្តដឹកធ្ងន់ ហើយចុះចំណោតផងនោះ ប្រហែលមកពីអ្នកបើកបរជាន់ហ្វ្រាំងអត់ស៊ី»។
បើតាមលោក សុភ័ក្ត្រ ដែលបានចុះដល់កន្លែងកើតហេតុឱ្យដឹងតាមរយៈសាក្សីថា កាលពីវេលាម៉ោងជាង ២ រសៀលថ្ងៃទី ៣០ មីនា គេបានឃើញរថយន្ត ១ គ្រឿង ម៉ាកហ៊ីយ៉ាន់ដាយ ពណ៌ទឹកប្រាក់ពាក់ស្លាកលេខត្បូងឃ្មុំ 3A-0409 ដែលមានដឹកអង្ករពេញទ្រុងពីខេត្តតាកែវសំដៅទៅស្រុកភ្នំព្រឹកខេត្តបាត់ដំបង។
លុះមកដល់ចំណុចកើតហេតុស្រាប់តែរថយន្តបានចុះចំណោតពីលើភ្នំព្រឹកហើយរេចង្កូតរួចក៏ក្រឡាប់ផ្ងារជើងតែម្តង។ ចំពោះមនុស្ស ៤ នាក់ដែលនៅក្នុងកាប៊ីនរថយន្តអាចតក់ក្រហល់ពេកក៏លោតចេញមិនទាន់ ហើយក្បាលរថយន្តបុកដីទើបបានកៀបស្លាប់។
លោកបានបន្តថា ក្រោយកើតហេតុ រូបលោក និងលោកអធិការនគរបាលស្រុកភ្នំព្រឹកបានចុះដល់កន្លែងកើតហេតុ និងបាននាំគ្នាជួយគាស់ដែកកាប៊ីនរថយន្តទាញយកសពចេញដើម្បីកំណត់អត្តសញ្ញាណជនរងគ្រោះស្វែងរកគ្រួសារ។
ដោយឡែកលោក ផាន់ ស្រល់ នាយនគរបាលប៉ុស្តិ៍អូររំដួលបានឱ្យដឹងពីម្សិលមិញដែរថា បើតាមលោកសួរក្រុមគ្រួសារជនរងគ្រោះម្នាក់ក្នុងចំណោមនោះបានប្រាប់ថា រថយន្តនេះបានដឹកអង្ករចេញពីខេត្តតាកែវដើម្បីយកមកដាក់ស្តង់នៅផ្សារកាប៊ីននៅទីរួមស្រុកភ្នំព្រឹក។
ប៉ុន្តែដោយសារអ្នកបើកបរមិនស្គាល់ផ្លូវ គាត់ក៏បើកតាមផ្លូវវាង។ ដូច្នេះដើម្បីទៅដល់ស្រុកភ្នំព្រឹកបានត្រូវតែបើកឆ្លងកាត់ផ្លូវចំណោតហើយដោយសារក្រុមជនរងគ្រោះមិនស្គាល់ភូមិសាស្ត្រផងទើបជួបគ្រោះថ្នាក់បែបនេះ។
លោកប្រាប់ថា៖ «ឥឡូវនេះផ្លូវទើបធ្វើចាក់កៅស៊ូ រួចរាងគ្រាន់បន្តិច តែបើកាលពីនៅផ្លូវដីវិញគឺចោតមែនទែន សូម្បីតែឡានថៃក៏បើកធ្លាក់ផ្លូវនោះដែររាល់តែឆ្នាំហ្នឹង។ បើគេធ្លាប់ឆ្លងកាត់ផ្លូវនោះគេដឹងមុនគឺ គេសាងលេខពីលើចំណោតទុកឱ្យហើយ»។
លោកបន្តថា នៅពេលយប់ក្រោយកើតហេតុគឺមានក្រុមគ្រួសារជនរងគ្រោះទាំង ៤ នាក់នោះមកពីខេត្តកំពង់ស្ពឺ ព្រៃវែង ភ្នំពេញ និងស្រុកសំឡូត ខេត្តបាត់ដំបងបានទៅយកសពអស់ហើយ។ ប៉ុន្តែលោកមិនទាន់ឃើញម្ចាស់រថយន្ត និងម្ចាស់អង្ករមកដោះស្រាយនៅឡើយទេរហូតដល់ថ្ងៃទី ៣១ មីនា រីឯរថយន្តក៏មិនទាន់បានស្ទួចយកទៅណាដែរ៕
