កំពង់ចាម: រថយន្តដឹកឈើប្រភេទលេខ ១ ប្រមាណជាង ៣០ ម៉ែត្រគុប របស់ក្រុមហ៊ុនស៊ីងបាយអូថេក ១ គ្រឿង បានជួបគ្រោះថ្នាក់ចរាចរណ៍កាលពីថ្ងៃទី ៤ ខែមករា នៅភូមិគីឡូបី ឃុំព្រែកកក់ ស្រុកស្ទឹងត្រង់ ខេត្តកំពង់ចាម ខណៈធ្វើដំណើរពីខេត្តក្រចេះ ឆ្ពោះទៅខេត្តកណ្ដាល ប៉ុន្ដែមន្ត្រីបានបដិសេធការធ្វើអត្ថាធិប្បាយជុំវិញករណីនេះ។
លោក ស៊ិន ណេត អភិបាលស្រុកស្ទឹងត្រង់បានថ្លែងនៅថ្ងៃទី ៥ មករា នេះថា មានរថយន្តធុនធំ ១ គ្រឿង បានគ្រោះថ្នាក់ចរាចរណ៍ដោយក្រឡាប់នៅទីតាំងកើតហេតុខាងលើ។ ប៉ុន្តែពេលមន្ត្រីនគរបាលស្រុកចុះត្រួតពិនិត្យក៏បានឃើញមានឈើជាច្រើនដុំរួចប្រគល់សំណុំរឿងនេះជូនទៅមន្ត្រីជំនាញជាអ្នកចាត់ចែងតាមច្បាប់។
លោកបញ្ជាក់ថា៖ «ខ្ញុំមិនបានដឹងពីព័ត៌មានលម្អិតជុំករណីហ្នឹងថា តើរថយន្តនេះជារបស់ក្រុមហ៊ុនណាឬមានចំនួនឈើប៉ុន្មានម៉ែត្រគុបទេ? យើងបានប្រគល់សំណុំរឿងជូនទៅមន្ត្រីរដ្ឋបាលព្រៃឈើខេត្តកំពង់ចាមជាអ្នកចាត់ចែងតាមនីតិវិធីច្បាប់ហើយ។ ប្រសិនចង់ដឹងព័ត៌មានច្បាស់ អាចសួរទៅមន្ត្រីខាងរដ្ឋបាលព្រៃឈើ ទើបគេដឹងរឿងនេះ»។
លោកបន្ថែមថា រថយន្តនេះបានចេញដំណើរពីខេត្តក្រចេះឆ្លងកាត់ខេត្តកំពង់ចាមឆ្ពោះទៅខេត្តកណ្ដាល ប៉ុន្ដែនៅពេលដល់កន្លែងកើតហេតុ ស្រាប់តែរេចង្កូតក្រឡាប់ធ្វើឱ្យអ្នកបើកបរម្នាក់រងរបួសដៃតិចតួច ប៉ុន្តែលោកមិនបានបញ្ជាក់ឈ្មោះទេ។ បន្ទាប់មកមន្ត្រីនគរបាលមូលដ្ឋានបានរាយការណ៍ទៅមន្ត្រីជំនាញចុះទៅត្រួតពិនិត្យ និងវាស់វែងកន្លែងកើតហេតុ។
លោក ស៊ីម ថាវរៈ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ចាម បានបដិសេធការធ្វើអត្ថាធិប្បាយជុំវិញករណីនេះ ដោយលោកបានបង្វែរឱ្យសំណួរទៅលោក ប្រាក់ ណូម៉ា នាយខណ្ឌរដ្ឋបាលព្រៃឈើខេត្តវិញ តែភ្នំពេញប៉ុស្ដិ៍មិនទាន់អាចស្វែងរកប្រភពទាក់ទងសុំការបញ្ជាក់បាន។
ក៏ប៉ុន្ដែ លោក ប្រាក់ ណូម៉ា ត្រូវបានសារព័ត៌មានក្នុងស្រុកមួយបានដកស្រង់សម្ដីនៅថ្ងៃទី ៥ មករានេះថា រថយន្តដឹកឈើក្រឡាប់នេះមានច្បាប់អនុញ្ញាតត្រឹមប្រមាណជាង ១៧ ម៉ែត្រគុបប៉ុន្ដែរថយន្តដឹកនេះបានដឹកលើសចំនួនក្នុងលិខិតអនុញ្ញាតនោះ។
លោកបញ្ជាក់ថា៖ «រថយន្តដឹកឈើក្រឡាប់នេះមានច្បាប់អនុញ្ញាតត្រឹមត្រូវ ប៉ុន្តែបើថាដឹកលើសច្បាប់អនុញ្ញាតនិងខុសប្រភេទពីលេខ ៣ មកលេខ ១ នោះខាងលោកនឹងចាត់វិធានការតាមការវាស់វែងពិនិត្យជាក់ស្តែង»។
ប្រភពដដែលបន្ថែមថា ការដឹកជញ្ជូននេះមានលិខិតអនុញ្ញាត ត្រឹមតែជាង ១៧ ម៉ែត្រគុបប៉ុណ្ណោះ និងកំណត់ឱ្យដឹកតែឈើប្រភេទលេខ ៣ ចេញពីទឹកដីខេត្តក្រចេះឆ្ពោះទៅកាន់ខេត្តកណ្តាល ប៉ុន្តែជាក់ស្ដែងតាមកត់សម្គាល់របស់សមត្ថកិច្ច គឺឈើទាំងនេះជាប្រភេទឈើសុក្រំ និងស្រឡៅ ដែលបានកែច្នៃជារាងជ្រុងៗប្រវែងពី ៣ ទៅ ៤ ម៉ែត្រ ហើយទំនងជាប្រភេទឈើសម្រាប់នាំចេញទៅក្រៅប្រទេស៕