The Phnom Penh Post Search

Search form

Logo of Phnom Penh Post newspaper Phnom Penh Post - ក្រុង​ព្រះសីហនុ​កំពុង​ប្រឈម​នឹង​កង្វះ​ទឹក​សាប

ក្រុង​ព្រះសីហនុ​កំពុង​ប្រឈម​នឹង​កង្វះ​ទឹក​សាប

ក្រុង​ព្រះសីហនុ​កំពុង​ប្រឈម​នឹង​កង្វះ​ទឹក​សាប

130401_06
ស្ថានភាពរស់នៅរបស់ពលរដ្ឋក្នុងតំបន់ក្រីក្រមួយក្នុងក្រុងព្រះសីហនុ ផា លីណា

ព្រះសីហនុៈ ប្រជា​ពលរដ្ឋ​នៅ​ទូទាំង​ក្រុង​ព្រះសីហនុ កំពុង​ប្រឈម​ទៅ​នឹង​កង្វះ​ខាត​ទឹក​ស្អាត​(ទឹក​សាប) ប្រើ​ប្រាស់ បន្ទាប់​ពី​ទំនប់​អាង​បឹង​ព្រែក​ទប់ បាន​រីង​ស្ងួត​ប្រេះ​ក្រហែង  ដោយ​សារ​តែ​ភាព​រាំង​ស្ងួត​គ្មាន​ភ្លៀង​អស់​ជា​ច្រើន​ខែ​កន្លង​មក​នេះ។

លោក ព្រាប ឌឿន ប្រជា​ពលរដ្ឋ​ក្នុង​សង្កាត់​មិត្ត​ភាព ក្រុង​ព្រះសីហនុ បាន​ប្រាប់​ភ្នំពេញ​ ប៉ុស្តិ៍ កាលពី​ម្សិល​មិញ​ថា អង្គភាព​រដ្ឋាករ​ទឹក​ខេត្ត​ព្រះសីហនុ​បាន​កាត់​ផ្ដាច់​បណ្ដាញ​ផ្គត់​ផ្គង់ ​ទឹក​ស្អាត​នៅ​តំបន់​លោក​រស់​នៅ រយៈ​ពេល​ពីរ​ថ្ងៃ​មក​ហើយ។

លោក​ថ្លែង ថា ៖ «​ចាប់​តាំង​ពី​មាន​ភាព​រអាក់​រអួល​លើ​ផ្នែក​បណ្ដាញ​ផ្គត់​ផ្គង់​ទឹក​ស្អាត ក្នុង​មួយ​សប្ដាហ៍​កន្លង​មក​នេះ ក្រុម​គ្រួសារ​ខ្ញុំ បាន​ចំណាយ​ថវិកា​មួយ​ថ្ងៃ​ចំនួន​មួយ​ម៉ឺន​រៀល​ដើម្បី​បន្ថែម​ទៅ​លើ​ការ​ទិញ​ ទឹក​សាប​យក​មក​ប្រើ​ប្រាស់»។

ពលរដ្ឋ​ម្នាក់​ទៀត​ដែល​រស់​នៅ​ទីក្រុង​ជាប់ ​មាត់​សមុទ្រ​មួយ​នេះ ដែរ​ លោក ខៀវ សារ៉េត អាយុ​ ៥៦​ឆ្នាំ​ បាន​និយាយ​ប្រាប់​ថា ​ចាប់​តាំង​ពី​មាន​ការ​ផ្គត់​ផ្គង់​ទឹក​មាន​ភាព​រអាក់​រអួល​មក បាន​ធ្វើ​ឲ្យ​អាជីវកម្ម ផ្ទះ​សំណាក់​របស់​គាត់​ជួប​ប្រទះ​នូវ​បញ្ហា។

លោក ​ថ្លែង​ថា​៖ ​«​ភ្ញៀវ​មួយ​ចំនួន​បាន​លុប​ចោល​ការ​កក់​បន្ទប់ ហើយ​ភ្ញៀវ​ដែល​មក​ស្នាក់​នៅ​បាន​រអ៊ូរ​ទាំជា​ខ្លាំង​ ថា​យើង​បាន​ត្បិត​ត្បៀត​ទឹក​មិន​ឲ្យ​ពួក​គេ​ប្រើប្រាស់​ឲ្យបាន​គ្រប់​ គ្រាន់»។

ជា​មួយ​គ្នា​នេះដែរ​ បុគ្គលិក​សណ្ឋាគារ​ហូលីដេ ផាលេស​ម្នាក់ ដែល​ស្នើ​សុំ​មិន​បញ្ចេញ​ឈ្មោះ​បាន​ប្រាប់​ភ្នំពេញ​ ប៉ុស្តិ៍​ថា កង្វះ​ទឹក​ស្អាត​ប្រើ​ប្រាស់​ក្នុង​មួយ​រយៈ​នេះ បាន​ធ្វើ​ឲ្យ​ប៉ះពាល់​ដល់​ប្រជា​ប្រិយភាព និង​សេវាកម្ម​សណ្ឋាគារ​របស់​ពួក​គេ​នៅ​តំបន់​ទេសចរណ៍​មាត់​សមុទ្រ​ នេះ។

បុគ្គលិក​រូប​នោះ បាន​បន្ត​ថា​៖​«​អតិថិជន​មួយ​ចំនួន ពិសេស​ភ្ញៀវ​ជា​ជន​បរទេស ពួក​គេ​បាន​កក់​បន្ទប់​ស្នាក់​នៅ​រយៈ​ពេល​៥​ថ្ងៃ ឬ​មួយ​សប្ដាហ៍ ប៉ុន្តែ​នៅ​ពេល​ជួប​នឹង​បញ្ហា​កង្វះ​ទឹក​ស្អាត​ប្រើប្រាស់ យ៉ាង​ដូច្នេះ ពួក​គេ​ក៏​ឈប់​ស្នាក់​នៅ​មុន​កាល​កំណត់»។

លោក​បញ្ជាក់​បន្ថែម​ថា ទឹក​សាប​ដែល​សណ្ឋាគារ​បាន​ទិញ​ពី​អ្នក​ផ្គត់​ផ្គង់​តាម​រថយន្ត​នោះ ​ក្រុម​ភ្ញៀវ​ជា​ជន​បរទេស​គេ​មិន​ងូត​ឬ​ប្រើ​ទេ ​ដោយ​ពួក​គេ​ថា ​ទឹក​នោះ​មិន​ស្អាត។

ប៉ុន្តែ​ទោះ​ជា​បែប​ណា​ក្ដី លោក​ ប្រាក់ ប្រាកដ ប្រធាន​អង្គភាព​រដ្ឋាករ​ទឹក​ខេត្ត​ព្រះសីហនុ បាន​ប្រាប់​ភ្នំពេញ ប៉ុស្តិ៍​កាលពី​ម្សិលមិញ​ថា លោក​កំពុង​តែ​ពិភាក្សា​ជាមួយ​នឹង​ក្រុមហ៊ុន​អានកូ (ANCO) ដើម្បី​ស្នើ​ឲ្យ​ក្រុម​ហ៊ុន​នេះ ជួយ​ផ្គត់ផ្គង់​ទឹក​ស្អាត​ដល់​អតិថិជន​និង​ប្រជាពលរដ្ឋ​ក្នុង​ទីក្រុង​នេះ បន្ទាប់​ពី​អាង​ បឹង ​ទំនប់​ទឹក​នានា បាន​រីង​ស្ងួត​អស់។

លោក​ បាន​បន្ថែម​ថា​៖​«​យើង​បាន​ស្នើ​សុំ​ឲ្យ​ក្រុមហ៊ុន​អានកូ ជួយ​ផ្គត់ផ្គង់​ទឹក​មក​ឲ្យ​អតិថិជន​របស់​យើង បន្ថែម​ក្នុង​មួយ​ម៉ោង ៣០០​ម៉ែត្រ​គុប»។

លោក​ប្រធាន​អង្គភាព​បន្ត​ឲ្យ​ដឹង​ថា តាម​ធម្មតា​អង្គភាព​រដ្ឋាករ​ទឹក​ខេត្ត​ព្រះសីហនុ​ចំណាយ​ទឹក ១២.០០០​ម៉ែត្រ​គុប សម្រាប់​ផ្គត់​ផ្គង់​ដល់​អតិថិជន​មាន​លំ​នៅ​ឋាន​ក្នុង​ក្រុង​ព្រះសីហនុ ដែល​ចំនួន​នេះ​មិន​ទាន់​បូក​សរុប​នឹង​អតិថិជន​សហគ្រាស រោង​ចក្រ និង​ផ្ទះ​សំណាក់​សណ្ឋាគារ​នានា បន្ថែម​ផង​ទេ​។

លោក ប្រាក់ ប្រាកដ បាន​បន្ត​ទៀត​ថា​៖​«​នេះ​ជា​បទ​ពិសោធ​មួយ ដែល​យើង​មិន​ធ្លាប់​ជួប​ប្រទះ​កាល​ពី​មុន។ យើង​រំពឹង​ថា នៅ​មួយ​ខែ​ក្រោយ​ទៀត​នេះ យើង​នឹង​ដំណើរ​ការ​ផ្គត់​ផ្គង់​បាន​ល្អ​ប្រសើរ​ឡើង​វិញ»៕

អត្ថបទគួរចាប់អារម្មណ៍