ភ្នំពេញៈ កម្មករកាត់ដេរ និងមេដឹកនាំសហជីពកំពុងចង់ដឹងថាតើរោងចក្រណាខ្លះស្ថិតក្នុងចំណោមរោងចក្រចំនួន ៩ ដែលត្រូវបានជ្រើសរើសដោយក្រសួងការងារ ដើម្បីទទួលបានប្រាក់សំណង បន្ទាប់ពីថៅកែរោងចក្រពួកគេរត់ចោល។
ក្រសួងបានប្រកាសដ៏ភ្ញាក់ផ្អើលមួយកាលពីសប្តាហ៍មុនថាក្រសួងបានកំណត់ប្រាក់៤,៦លានដុល្លារដើម្បីផ្តល់ទៅកម្មករនៃរោងចក្រចំនួន៩ដែលម្ចាស់រោងចក្របានបិទទ្វារនិងរត់ចោល។ ទោះយ៉ាងណាក្តី កម្មករបានថ្លែងថា ពួកគេត្រូវបានទុកនៅក្នុងលក្ខណៈមិនច្បាស់ថាតើរោងចក្រណាខ្លះដែលស្ថិតនៅក្នុងបញ្ជី។
កម្មករនៃរោងចក្រយ៉ាងហោចណាស់ ២ គឺរោងចក្រ Co-Seek Garment Co.Ltd. និងរោងចក្រ Center World Garment Ltd. ត្រូវបានជម្រាបថា ក្រុមហ៊ុនរបស់ពួកគេមិនត្រូវបានរួមបញ្ចូលក្នុងបញ្ជីនោះទេ។
អ្នកនាង ឃុន ណារី ជាកម្មការិនីនៅរោងចក្រ Co-Seek បានថ្លែងថា អ្នកនាងនិងកម្មករដទៃៗទៀតត្រូវបានប្រាប់ដោយមន្រ្តីក្រសួង កាលពីសប្តាហ៍មុនថា ពួកគេមិនស្ថិតនៅក្នុងចំណោមក្រុមហ៊ុនចំនួន៩ដែលត្រូវបានជ្រើសរើសនោះទេ បន្ទាប់ពីមន្រ្តីនោះដំបូងអះអាងថា ការសងនោះគឺជា«ព័ត៌មានមិនពិត»។
អតីតកម្មករប្រមាណ ១០០ នាក់ នៃរោងចក្រ Co-Seek កំពុងស្វែងរកប្រាក់ខែនិងប្រាក់បំណាច់ដទៃៗទៀតនៅឡើយ បន្ទាប់ពីម្ចាស់រោងចក្រពួកគេបានរត់កាលពីខែសីហា ឆ្នាំ២០១៦។
អ្នកនាង ណារី បានថ្លែងថា៖ «នីតិវិធីតុលាការចំណាយពេលយូរ ហើយយើងមិនទាន់ទទួលបានដំណោះស្រាយទេ»។
ទន្ទឹមនេះ កម្មកររោងចក្រ Chung Fai Knitwear បានថ្លែងថា ពួកគេមានសុទិដ្ឋិនិយមបន្ទាប់ពីទៅខុទ្ទកាល័យលោកនាយករដ្ឋមន្រ្តីហ៊ុនសែន ហើយត្រូវបានគេសុំឲ្យបំពេញបែបបទ ។
អ្នកនាង ខន ជីវិន អតីតកម្មការិនីនៅរោងចក្រ Chung Fai បានថ្លែងថា៖ «ខ្ញុំមានសង្ឃឹមបន្តិច ដោយសារខ្ញុំនិងកម្មករដទៃៗទៀតនឹងទទួលបានប្រាក់ខែរបស់យើងនិងប្រាក់បំណាច់ដទៃៗទៀត»។
អ្នកនាងបានថ្លែងថា មន្រ្តីការងារបានប្រាប់ក្រុមកម្មករថា រោងចក្រចំនួន៥ក្នុងរាជធានីភ្នំពេញ ៣ក្នុងខេត្តកំពង់ស្ពឺ និងមួយក្នុងខេត្តកណ្តាល និងមួយក្នុងខេត្តកំពត ត្រូវបានជ្រើសរើស។
អ្នកនាំពាក្យក្រសួងការងារ លោក ហេង សួរ មិនអាចទាក់ទងសុំអត្ថាធិប្បាយបានកាលពីម្សិលមិញ ហើយអគ្គលេខាធិការសមាគមរោងចក្រកាត់ដេរនៅកម្ពុជា លោក ខេន លូ បានថ្លែងថា លោកមិនដឹងថាតើរោងចក្រណាខ្លះត្រូវបានជ្រើសរើសនោះទេ។
សកម្មជនសិទ្ធិការងារបានស្វាគមន៍សេចក្តីសម្រេចរបស់រដ្ឋាភិបាលក្នុងការចេញលុយហោប៉ៅសម្រាប់ដំណោះស្រាយរយៈពេលខ្លី ប៉ុន្តែបានសង្កត់ធ្ងន់ថា កម្មករជាច្រើនមិនត្រូវបានរួមបញ្ចូល។
លោក ឃុន ថារ៉ូ មន្រ្តីកម្មវិធីជាន់ខ្ពស់របស់មជ្ឈមណ្ឌលសាមគ្គី បានថ្លែងថា៖«មានរោងចក្រជាច្រើន មិនមែនតែ៩រោងចក្រទេ»។លោកថា៖ «តើអ្វីទៅជាយុទ្ធសាស្រ្តរយៈពេលវែង ហើយដំណើរការនៃការបិទរោងចក្រត្រូវការការដោះស្រាយ»។
លោក ថារ៉ូ បានថ្លែងថា ក្រុមកម្មកររោងចក្រ Center World Garment Ltd. ក៏បានទៅក្រសួងដែរកាលពីសប្តាហ៍មុន ហើយត្រូវបានជម្រាបថា ពួកគេមិនស្ថិតនៅក្នុងបញ្ជីដែលត្រូវបានជ្រើសរើសទេ។ កម្មករប្រមាណ ២០០ នាក់នៃរោងចក្រនេះមិនទទួលបានប្រាក់បំណាច់ចាប់តាំងពីរោងចក្រនេះត្រូវបានបិទក្នុងឆ្នាំ ២០១៥៕ PS