.jpg)
ក្រុមការងារក្រសួងព័ត៌មានប្រជុំលើវិសោធនកម្មច្បាប់របបសារព័ត៌មាន។ រូបថត AKP
ភ្នំពេញៈ ក្រសួងព័ត៌មានកាលពីម្សិលមិញបានចាប់ផ្ដើមពិនិត្យធ្វើវិសោធនកម្មច្បាប់ «របបសារព័ត៌មាន» ដើម្បីឈានដល់ការកែលម្អ និងបញ្ចូលរបៀបរបបការងារថ្មីឲ្យសមស្របតាមបទដ្ឋានច្បាប់នាពេលបច្ចុប្បន្ន។
លោក ផុស សុវណ្ណ ប្រតិភូរាជរដ្ឋាភិបាលទទួលបន្ទុកអគ្គនាយកព័ត៌មាន និងសោតទស្សន៍ប្រាប់ភ្នំពេញប៉ុស្ដិ៍ ពីម្សិលមិញថាកាលព្រឹកថ្ងៃអង្គារទី ២៧ ក្រសួងព័ត៌មានបានចាប់ផ្ដើមប្រជុំក្រុមការងារគណៈកម្មការធ្វើវិសោធនកម្មច្បាប់ស្ដីពីរបបសារព័ត៌មានដំបូងដែលដឹកនាំដោយលោក អ៊ុក ប្រាថ្នា រដ្ឋមន្ដ្រីស្ដីទីក្រសួងព័ត៌មាន ដើម្បីពិនិត្យមើលលើទិដ្ឋភាពនៃច្បាប់នេះ។
លោក សុវណ្ណ បានថ្លែងថា៖ «យើងពិភាក្សាគ្នាក្នុងសមាជិកក្រុមការងារទាំងអស់ក្នុងដំណាក់កាលដំបូងដោយបានពិនិត្យមើលលើទិដ្ឋភាពច្បាប់ទាំងមូល ព្រោះច្បាប់របបសារព័ត៌មានយើងមានអាយុកាល ២៤ ឆ្នាំហើយ ដោយបង្កើតតាំងពីឆ្នាំ ១៩៩៥ មក។ ដូច្នេះអត្ថន័យនៃច្បាប់នេះ វាខុសពីការអនុវត្ដជាក់ស្ដែងនាពេលបច្ចុប្បន្នខ្លះ។ យើងកំពុងពិនិត្យមើលលើច្បាប់នេះ ដោយចាប់ផ្ដើមការងារចាប់ពីថ្ងៃអង្គារនេះតទៅតែម្ដង»។
លោក សុវណ្ណ បានលើកឡើងថាកន្លងមកក្រសួងបានសិក្សាខ្លះៗហើយលើអត្ថន័យនៃច្បាប់ខាងលើនេះជាផ្នែកៗ។ ប៉ុន្ដែចាប់ពីកិច្ចប្រជុំម្សិលមិញនេះទៅនឹងបន្ដសិក្សា និងប្រមូលគំនិតទាំងអស់បញ្ចូលគ្នា ដើម្បីធ្វើវិសោធនកម្មច្បាប់នេះឲ្យបានល្អប្រសើរឡើងវិញ។
លោកថ្លែងថា៖ «យើងមិនទាន់ឈានដល់ការកែសម្រួលលើន័យ ឬសេចក្ដីនៃច្បាប់នេះទេ។ យើងកំពុងប្រមូលមតិពីក្រុមការងារទាំងអស់ និងមានកិច្ចប្រជុំជាបន្តបន្ទាប់ទៀត ដើម្បីពិនិត្យមើលថា គួរយកមាត្រាណាខ្លះនៃច្បាប់នេះមកកែសម្រួលបន្តទៀត»។
លោក សុវណ្ណ បានឲ្យដឹងថា កន្លងមកដោយយោងលើច្បាប់របបសារព័ត៌មានចាស់នេះចំពោះការស្នើសុំបង្កើតស្ថាប័នសារព័ត៌មានគឺមិនទាន់បានកំណត់បានល្អដូចជាកម្រិតនៃការសិក្សា អាយុ ឬសមត្ថភាពរបស់ចាងហ្វាងស្ថាប័ននោះនៅឡើយទេ ព្រោះច្បាប់ចាស់នេះមានភាពបើកទូលាយខ្លាំងពេក។
លោក ឆាយ សុផល នាយកប្រតិបត្តិក្លិបអ្នកកាសែតកម្ពុជាបានលើកឡើងថា អ្នកសារព័ត៌មានក៏ចង់ឲ្យមានការធ្វើវិសោធនកម្មច្បាប់របបសារព័ត៌មាននេះដែរ ដើម្បីឲ្យសមស្របទៅនិន្នាការបច្ចុប្បន្ន។
លោកថ្លែងថា៖ «ច្បាប់ស្ដីពីរបបអ្នកសារព័ត៌មាននេះ យើងមើលឃើញមាត្រាមួយចំនួននៅមានភាពខ្វះចន្លោះនៅឡើយ។ ខ្ញុំគិតថា ក្រសួងក៏យល់ឃើញបែបនេះដែរទើបបង្កើតគណៈកម្មការធ្វើវិសោធនកម្មច្បាប់នេះឡើងវិញ ដើម្បីកែប្រែធ្វើយ៉ាងម៉េចសម្រួលដល់មាត្រាមួយចំនួននៃច្បាប់នេះ»។
លោក ឆាយ សុផល បានបញ្ជាក់ថាច្បាប់របបសារព័ត៌មានចាស់ដែលមានចំនួន ៥ ជំពូក និង ២២ មាត្រានេះ អត្ថន័យបានផ្ដោតតែទៅលើការបោះពុម្ពផ្សាយរបស់ស្ថាប័នសារព័ត៌មានដែលចំណុចនេះនៅមានភាពតូចចង្អៀត ខណៈបច្ចុប្បន្ននិន្នាការសារព័ត៌មានឌីជីថល អនឡាញ កំពុងកើតឡើងច្រើន។
លោកបន្ដថា៖ «នៅក្នុងច្បាប់នេះទាំងមូល ខ្ញុំពិនិត្យមើលទៅឃើញភាគច្រើនក៏បានដាក់កម្រិតដល់អ្នកសារព័ត៌មាន និងមិនបានកំណត់ទោសទណ្ឌដល់មន្ដ្រីរដ្ឋាភិបាលដែលផ្ដល់ព័ត៌មានទេ»៕
