ភ្នំពេញៈ លោក ជិន ម៉ាលីន អ្នកនាំពាក្យក្រសួងយុត្ដិធម៌បានឲ្យដឹងកាលពីម្សិលមិញថា ក្រុមការងារទាំង ៤ ក្រុមនៃ «គណៈកម្មការដឹកនាំយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី ខេត្ត» របស់ក្រសួងយុត្ដិធម៌កំពុងវាយតម្លៃលទ្ធផលនៃយុទ្ធនាការរយៈពេល ១ ខែ ហើយនឹងបង្ហាញលទ្ធផលនៅសប្ដាហ៍ក្រោយមុនពេលអនុវត្តយុទ្ធនាការជុំទី ២ បន្តទៀត។
លោកបានថ្លែងថា ក្រុមការងារទាំង ៤ ក្រុមកំពុងប្រជុំផ្ទៃក្នុងដើម្បីត្រួតពិនិត្យ និងវាយតម្លៃលទ្ធផលនៃការអនុវត្តយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងខេត្តគោលដៅសម្រាប់រយៈពេល ១ ខែដំបូង និងរៀបចំផែនការចុះអនុវត្តយុទ្ធនាការជុំទី ២ នៅសប្តាហ៍ក្រោយនេះ។
លោកថ្លែងថា៖ «ក្រុមការងារនឹងចុះធ្វើការវាយតម្លៃលទ្ធផលនៃការអនុវត្តយុទ្ធនាការសម្រាប់ ១ ខែដំបូង។ លទ្ធផលនឹងប្រកាសនៅពេលក្រោយ។ ក្រុមការងារអនុវត្ដយុទ្ធនាការនឹងប្រកាសលទ្ធផលនៃការអនុវត្ដយុទ្ធនាការនេះក្នុងពេល ១ ខែម្ដង»។
ដើម្បីដោះស្រាយបញ្ហាការកកស្ទះសំណុំរឿងនៅតាមសាលាដំបូងរាជធានី ខេត្ដ លោក កើត រិទ្ធ រដ្ឋមន្ដ្រីក្រសួងយុត្តិធម៌បានប្រកាសបើកយុទ្ធនាការនេះកាលពីថ្ងៃទី ១៨ ខែឧសភា កន្លងទៅ ក្រោយពីរកឃើញមានសំណុំរឿងព្រហ្មទណ្ឌដែលនៅសេសសល់មិនទាន់បានចាត់ការសរុបជិត ៤ ម៉ឺន។
លោករដ្ឋមន្ដ្រីក្រសួងយុត្តិធម៌ដែលទើបកាន់តំណែងថ្មីរូបនេះរំពឹងថា តាមរយៈយុទ្ធនាការនេះនឹងកាត់បន្ថយការកកស្ទះសំណុំរឿងបានប្រមាណពី ៥០ ទៅ ៧០ ភាគរយក្នុងរយៈពេល ៦ ខែខាងមុខ។
ក្រសួងយុត្ដិធម៌បានបញ្ជាក់ថា ដើម្បីធានាដល់ការអនុវត្ដយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានីខេត្ដ ជាពិសេសដើម្បីជួយដល់សាលាដំបូងឲ្យអនុវត្ដយុទ្ធនាការបានជោគជ័យ និងត្រឹមត្រូវក្រសួងបានសម្រេចបង្កើតគណៈកម្មការដឹកនាំយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានីខេត្តហៅកាត់ថា «គ.យ.ក.ស.»។
បើតាមក្រសួងយុត្តិធម៌ គណៈកម្មការនេះមានក្រុមការងារចំនួន ៤ ក្រុមជាសេនាធិការដឹកនាំអនុវត្ដយុទ្ធនាការនៅតាមសាលាដំបូងរាជធានីខេត្ដក្នុងតំបន់ដែលខ្លួនទទួលខុសត្រូវនីមួយៗ។ ក្រុមការងារទាំងនេះត្រូវអនុវត្ដតួនាទី និងភារកិច្ចរបស់ខ្លួនស្របតាមគោលការណ៍ណែនាំ និងវិធានការចាំបាច់នានារបស់ គ.យ.ក.ស.។
ចំណែកសាលាដំបូង និងអយ្យការអមសាលាដំបូងរាជធានីខេត្ដគឺជាតួអង្គប្រតិបត្ដិយុទ្ធនាការដែលត្រូវប្រកាន់ខ្ជាប់នូវគោលការណ៍ច្បាប់ព្រមទាំងមានភាពម្ចាស់ការ និងមានឆន្ទៈខ្ពស់ក្នុងការដោះស្រាយការកកស្ទះសំណុំរឿងជាពិសេសចូលរួមអនុវត្ដយុទ្ធនាការដោយគោរពឲ្យបានត្រឹមត្រូវនូវអភិក្រមការងារក្នុងការអនុវត្ដយុទ្ធនាការនេះ៕