ភ្នំពេញៈ ក្រោយការប្រកាសបើកយុទ្ធនាការ ដោះស្រាយការកកស្ទះសំណុំរឿងនៅតាមសាលាដំបូង រាជធានី-ខេត្ត កាលពីថ្ងៃទី ១៨ ខែឧសភាក្រុមការងារទាំង ៤ ក្រុមនៃគណៈកម្មការអនុវត្ដយុទ្ធនាការនេះបានបញ្ចប់ការចុះផ្សព្វផ្សាយការដាក់ផែនការ និងការពិភាក្សាស្វែងរកដំណោះស្រាយលើបញ្ហាប្រឈមនានា ជាមួយសាលាដំបូងរាជធានី-ខេត្ដដើម្បីឈានទៅសម្រេចយុទ្ធនាការតាមផែនការកំណត់។
លោក ជិន ម៉ាលីន អ្នកនាំពាក្យក្រសួងយុត្ដិធម៌ និងជាប្រធានក្រុមការងារទី ៤ នៃគណៈកម្មការអនុវត្ដយុទ្ធនាការនេះបានប្រាប់ភ្នំពេញប៉ុស្ដិ៍កាលពីម្សិលមិញថាការចុះអនុវត្ដយុទ្ធនាការរយៈពេល ១ សប្ដាហ៍នេះ គឺដើម្បីធ្វើការផ្សព្វផ្សាយ ក៏ដូចជាបង្ហាញនូវវិធានការផ្សេងៗដែលសាលាដំបូង ត្រូវអនុវត្តយុទ្ធនាការនេះ។ «ក្នុងនោះ (យើង) ក៏បានពិភាក្សាគ្នាពីបញ្ហាប្រឈមមួយចំនួនដែលក្រសួងអាចធ្វើការសម្របសម្រួលដោះស្រាយបានក៏ដូចជាធ្វើការផ្ដល់ការគាំទ្រការឧបត្ថម្ភផ្សេងៗទៅដល់សាលាដំបូង ដើម្បីអាចឲ្យសាលាដំបូងអនុវត្ដនូវយុទ្ធនាការបានសម្រេចទៅតាមទិសដៅដែលយើងចង់បាន»។
លោកថ្លែងថា បេសកកម្ម ១ សប្ដាហ៍នេះក៏បានរៀបចំផែនការរួមគ្នាជាមួយសាលាដំបូងផងដែរក្នុងការអនុវត្ដនូវយុទ្ធនាការនេះ។ ចំណែកលទ្ធផលនៃការអនុវត្ដរយៈពេល ១ សប្ដាហ៍នេះនៅមិនទាន់អាចវាយតម្លៃបាននោះទេព្រោះស្ថិតនៅក្នុងដំណាក់កាលនៃការអនុវត្ដនៅឡើយ។
លោកថា៖ «យើងនឹងធ្វើការវាយតម្លៃលទ្ធផលការងារនេះជាដំណាក់កាលៗអាចថា ក្នុង ១ ខែម្ដង ១ ត្រីមាសម្ដង ឬក៏ ១ ឆមាសម្ដង»។
លោកបន្តថា៖ «ដូច្នេះការដែលចុះរយៈពេល ១ សប្ដាហ៍តាមសាលាដំបូងនីមួយៗគឺដើម្បីធ្វើការផ្សព្វផ្សាយ និងណែនាំពីវិធានការផ្សេងៗដែលសាលាដំបូងត្រូវអនុវត្ដ សិក្សាស្វែងយល់ ក៏ដូចជាពិភាក្សាពីបញ្ហាប្រឈមនានាដែលសាលាដំបូងជួបប្រទះ និងរៀបចំយន្តការក្នុងការដោះស្រាយបញ្ហាប្រឈមទាំងនោះក្នុងអំឡុងនៃការអនុវត្ដយុទ្ធនាការព្រមទាំងរៀបចំផែនការជាមួយសាលាដំបូងនីមួយៗដើម្បីអនុវត្ដឲ្យបានសម្រេចគោលដៅ»។
គណៈកម្មការដឹកនាំយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី ខេត្ត (គ.យ.ក.ស) នៃក្រសួងយុត្តិធម៌កាលពីថ្ងៃទី ២២ ខែឧសភាបានជូនដំណឹងដល់សាធារណជនពីលេខទំនាក់ទំនងចំនួន ២ ខ្សែមកកាន់លេខាធិការដ្ឋាន គ.យ.ក.ស ដើម្បីផ្ដល់ភាពងាយស្រួលក្នុងការទំនាក់ទំនង ឬផ្ដល់ព័ត៌មានពីសាធារណជនមកកាន់ គ.យ.ក.ស តាមរយៈលេខ ០១៧ ៦០៩ ៩៦០/០៧៨ ៥៦៧ ៨១០។
ក្រសួងយុត្តិធម៌បានប្រកាសបើកយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានីខេត្តកាលពីថ្ងៃទី ១៨ ខែឧសភា ខណៈនៅតាមតុលាការមានសំណុំរឿងព្រហ្មទណ្ឌដែលកំពុងចាត់ការសរុបជិត ៤ ម៉ឺនសំណុំរឿងក្នុងនោះមានសំណុំរឿងគ្រឿងញៀនចំនួន ៦ ២៦០ ករណីដែលនឹងត្រូវដោះស្រាយក្នុងយុទ្ធនាការនេះ។
ក្រសួងយុត្ដិធម៌រំពឹងថា យុទ្ធនាការនេះអាចនឹងកាត់បន្ថយការកកស្ទះសំណុំរឿងបានប្រមាណពី ៥០ ទៅ ៧០ ភាគរយដោយដាក់ផែនការអនុវត្តយុទ្ធនាការនេះរយៈពេល ៦ ខែ៕